ချင်းပြည်နယ်၊ မင်းတပ်မြို့နယ်မှာ ဧပြီ ၁၈ ရက်ညပိုင်း တိုက်ပွဲမဖြစ်ဘဲ ပြည်သူနေအိမ်တွေကို စစ်ကောင်စီတပ်က ဂျက်တိုက်လေယာဉ်၊ ဗုံးကြဲလေယာဥ်နဲ့ ၃ ကြိမ်ခန့် ဗုံးကြဲတိုက်ခိုက်ခဲ့တယ်လို့ CDF - Mindat ကနေ သိရပါတယ်။
မနေ့ည ၉ နာရီ ၁၅ မိနစ်လောက်မှာ စစ်ကောင်စီရုံးစိုက်ရာ နေပြည်တော်လေတပ်ကနေ ဂျက်ဖိုက်တာတစီးက ပျံသန်းလာခဲ့ပြီး မင်းတပ်မြို့နယ် တိုက်နယ် ၂ ဘက်က ကျေးရွာတွေကို ဗုံး ကြဲတိုက်ခိုက်ခဲ့တာဖြစ်ပါတယ်။
CDF-Mindat သတင်းပြန်ကြားရေးနှင့် မှတ်တမ်းဌာန တာဝန်ရှိသူတဦးက “ မင်းတပ်မြို့ တိုက်နယ် ၂ ဘက်ကို ကြဲတာပါ။ အဲဒီနားမှာက ကာကွယ်ရေးတပ်ဖွဲ့တွေ မရှိဘူး၊ တိုက်ပွဲလည်း မဖြစ်ပွားဘူး။ ပြည်သူတွေပဲ နေတာ။ အဲဒါကို ဗုံးကြဲတိုက်ခိုက်ခဲ့တာပါ။”
စစ်ကောင်စီရဲ့ လေယာဥ်သုံး ဗုံးကြဲတိုက်ခိုက်မှုကြောင့် ကျေးရွာနေလူထု ပျက်စီးဆုံးရှုံးမှု များနိုင်ပေမဲ့ ပျက်စီးရှုံးဆုံးမှုတွေတော့ အတည်ပြုလို့မရသေးဘူးလို့ဆိုပါတယ်။
CDF-Mindat က တာဝန်ရှိသူတဦးက “၂၀၂၂ ဇူလိုင် ၇ ရက်နေ့ ကနေစပြီး မင်းတပ်မြို့ထဲကို ဆက်တိုက်ဆိုသလို ကြဲနေတာ ဒီနေ့အထိပါပဲ။ နောက်ပြီး သူတို့တွေက ကာကွယ်ရေးတပ်စခန်း တည်နေရာတွေ မဟုတ်တဲ့ ပြည်သူတွေနေတဲ့ နေရာကိုပဲ ရွေးပြီး ကြဲနေတာပါ။ ပြည်သူတွေလည်း အထိတ်တလန့်နဲ့ ဘေးလွတ်ရာကို ထွက်ပြေးနေရပြီး ဒီတခေါက် ပျက်စီးဆုံးရှုံးမှုက များနိုင်တယ်ဗျ” လို့ ပြောပါတယ်။
လက်ရှိမှာတော့ စစ်ကောင်စီက မြန်မာနိုင်ငံအနှံ့အပြားကို လေကြောင်းကနေ အကြမ်းဖက် ထိုးစစ်ဆင်နေပြီး ကန့်ဘလူ၊ ပဇီကြီးကျေးရွာကို လေကြောင်းကနေ ဗုံးကြဲတိုက်ခိုက်မှုကြောင့် အသက် ၆ လအရွယ် ကလေးငယ်ကနေ အသက် ၆၇ နှစ်အရွယ် သက်ကြီးရွယ်အို၊ ကိုယ်ဝန်သည်တွေ အပါအဝင် လူဦးရေ ၁၇၀ လောက် သေဆုံးခဲ့ပါတယ်။
ဧပြီ ၁၈ နေ့မှာပဲ မြိုင်နယ် မန်ကျည်းကန်ရွာကို စစ်သုံး Mi35၊ Mi17 အမျိုးအစားလေယာဥ်နဲ့ ပစ်ခတ်တိုက်ခိုက်ခဲ့ပြီး ကျေးရွာတွင်းကို စစ်ကြောင်းထိုးဝင်ရောက်ကာ သက်ကြီးရွယ်အိုတွေနဲ့ ဒေသခံတချို့ကို ဓားစာခံအဖြစ် ဖမ်းဆီးသွားခဲ့ပါသေးတယ်။
ချင်းပြည်နယ်အတွင်းမှာ ဇူလိုင် ၁၉ ရက်ကစလို့ မင်းတပ်-မတူ ပီကားလမ်းကို မိဘပြည်သူတွေ အနေနဲ့ ဖြတ်သန်းသွားလာတာတွေ မလုပ်ကြဖို့ CDF-မင်းတပ်က တားမြစ်လိုက်ပါတယ်။
ပခုက္ကူအခြေစိုက် တပ်မ-၁၀၁က ထွက်လာတဲ့ ကားစီးရေ ၁၀၀ ကျော်ပါတဲ့ စစ်ကောင်စီ ယာဥ်တန်းဟာ ကျောက်ထုမြို့ကို ရောက်နေပြီလို့ သိရပြီး မင်း-တပ်မတူပီးကားလမ်းဘက်ကို တက်လာနိုင်တာကြောင့် ပိတ်လိုက်တာလို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့ရဲ့ ပြန်ကြားရေးတာဝန်ခံ ကိုယောမာန်က ပြောပါတယ်။
မင်းတပ်-မတူပီကားလမ်းမှာ တိုက်ပွဲတွေ ပြန်ဖြစ်လာနိုင်ပြီး နှစ်ဘက် မိုင်းထောင် မိုင်းခွဲတာတွေ ရှိလာနိုင်လို့ ပြည်သူလူထုကိုထိခိုက်မှာစိုးလို့ အန္တရာယ်ကို ကြိုတင်ကာကွယ်တဲ့အနေနဲ့ အခုလို တားမြစ်ပိတ်ပင်လိုက်တာလို့ ကိုယောမာန်က ပြောပါတယ်။
ပခုက္ကူအခြေစိုက် တပ်မ ၁၀၁ ကနေ စစ်ကား ၁၀၅ စီးလောက်ပါတဲ့ စစ်ကြောင်းဟာ ဇူလိုင် ၁၇ ရက်မနက်ပိုင်းမှာ ပေါက်မြို့ကို ဖြတ်ပြီး ယောဒေသဘက်ကို ဦးတည်ထွက်ခွာသွားတယ်လို့ ပေါက်တောင်ပိုင်း ပြောက်ကျားတပ်ဖွဲ့ SPGF ရဲ့ ပြန်ကြားရေးတာဝန်ခံ ဗိုလ်နဂါးလေးက ပြောပါတယ်။
“ကားပေါ်မှာတော့ လက်နက်ကြီးတွေပါပုံရတယ်။ မိုးကာကြီးတွေ အုပ်ထားတယ်။ အင်အားက တော့ ယာဥ်မောင်း ၁၀၀ ကျော်လောက်နဲ့ အနောက်ခန်းထဲမှာတော့ စစ်သား ၅၀ လောက်ပါတယ်။”
စစ်ကောင်စီတပ်အင်အား ၂၀၀ လောက်ဟာ ကျောက်ထုကနေ တပြင်းအထိ လမ်းဘေးဝဲယာ ကျေးရွာတွေမှာ လုံခြုံရေးယူထားတယ်လို့ ယောဒေသကာကွယ်ရေးတပ်ပေါင်းစု YRPA ရဲ့ အတွင်းရေးမှူး ဗိုလ်မင်းကျော်က ပြောပါတယ်။
စစ်ကောင်စီတပ်တွေဟာ ချင်းပြည်နယ်ကို ထိန်းချုပ်ဖို့ ခက်ခဲလာတဲ့အတွက် စစ်အင်အား အလုံးအရင်းနဲ့ ထိုးစစ်ဆင်နေပြီး အခုအကြိမ်နဲ့ဆိုရင် စစ်ကားအများအပြားနဲ့ စစ်ကြောင်ထိုးတာ ၄ ကြိမ်ရှိပြီလို့ ချင်းကာကွယ်ရေးတပ်ဖွဲ့တွေဆီက သိရပါတယ်။
