ကချင်ပြည်နယ်၊ မြစ်ကြီးနားမြို့၊ ထီ၀န်းရပ်ကွက်မှာ ခင်ပွန်းဖြစ်သူရဲ့ သတင်းပေးမှုကြောင့် CDM ကျောင်းဆရာမတယောက်ကို စစ်ကောင်စီက စက်တင်ဘာ ၁၆ ရက် မနက်မှာ ဖမ်းဆီးခံရတယ်လို့ မိသားစုနဲ့နီးစပ်သူက ပြောပါတယ်။
ဖမ်းဆီးခံရတဲ့ ဆရာမနဲ့ နီးစပ်သူတဦးက “၁၆ ရက်မနက်ပိုင်းမှာ ဆရာမရဲ့ပုံကိုပြပြီး ရဲနဲ့စစ်သားတွေက လာမေးတယ်။ ဆရာမက ဖမ်းဆီးခံရတဲ့ညမှာ တခြားနေရာအိပ်လိုက်တာ။ အဲဒီနေရာထိ သူ့အမျိုးသားဖြစ်သူက သတင်းပေးလိုက်လို့ ဖမ်းဆီးခံရတာပါ။ သူ့အမျိုးသား လမ်းညွှန်လိုက်တာ အဒေါ်ကိုယ်တိုင် မြင်တယ်” လို့ ပြောပါတယ်။
ဖမ်းဆီးခံရတဲ့ CDM ဆရာမဟာ ဒေါ်ချင်လိုင်ချန်ဆားရ် ဖြစ်ပြီး PDF တွေကို ရန်ပုံငွေရှာပေးတယ်ဆိုတဲ့ စွပ်စွဲချက်နဲ့ စစ်ကောင်စီက ဖမ်းဆီးခဲ့တာဖြစ်တယ်လို့ ဆရာမရဲ့မိတ်ဆွေက ပြောပါတယ်။
“သူ့အမျိုးသားက မြစ်ကြီးနား UG နှစ်ယောက် အဖမ်းခံရတုန်းကလည်း သူ သတင်းပေးလို့ ဖမ်းခံရတာပါ။ အခုလည်း အမျိုးသမီးဖြစ်သူကို ကိုယ်တိုင်ပုံရိုက်ပြီး ဖမ်းခိုင်းလိုက်တာ။ ဆရာမက CDM လုပ်ထားတာကလွဲပြီး အေးဆေးနေတဲ့သူတစ်ယောက်ပါ။”
မတရားဖမ်းဆီးခံရသူ CDM ဆရာမဒေါ်ချင်လိုင်ချန်ဆားရ်ဟာ လက်ရှိ ဘယ်မှာ ထိန်းသိမ်းခံနေရတယ် ဆိုတာ မသိရသေးသလို မိသားစုနဲ့ ခုချိန်ထိ အဆက်သွယ်မရသေးပါဘူး။
စစ်ကိုင်းတိုင်း၊ ကလေးမြို့၊ အောင်မင်္ဂလာရပ်ကွက် (ယခင်ဘဲအင်းရပ်ကွက်)မှာ နေထိုင်တဲ့ ဒေသခံ လေးယောက်ကို PDF နဲ့ ဆက်နွှယ်တယ်လို့ စွပ်စွဲပြီး စစ်ကောင်စီတပ်သားတွေက ဇူလိုင် ၂၇ ရက်နဲ့ ၂၈ ရက်မှာ ဖမ်းဆီးသွားတယ်လို့ ဒေသခံတွေကပြောပါတယ်။
ဖမ်းဆီးခံရသူ လေးယောက်ထဲမှာ အမျိုးသား နှစ်ယောက်နဲ့ အမျိုးသမီး နှစ်ယောက်ပါဝင်ပြီး အမျိးသမီး တယောက်ကတော့ CDM ကျောင်းဆရာမ ဖြစ်ပါတယ်။
အောင်မင်္ဂလာရပ်ကွက်နေ ပြည်သူတဦးက "စစ်သားတွေက ဒေသခံ အိမ်နှစ်အိမ်ကို နှစ်ရက်ဆက်ဝင်ရှာတာ၊ ပထမရက်မှာ သုံးယောက်ဖမ်းသွားတာ။ ဒုတိယရက်မှာ တယောက်ဖမ်းသွားတာ။ ဖမ်းဆီးခံရတဲ့နေအိမ်က စက်ဘီး၊ ဆန်၊ ဆီ စတဲ့ အိမ်တွင်းပစ္စည်းတွေကိုပါ သယ်ဆောင်သွားကြတာ။ ဖမ်းခံရတဲ့ထဲက လူငယ်တွေကို နေအိမ်မှာတင် ရိုက်နှက်တဲ့ အသံကြားရတယ်။ ဖမ်းဆီးခံရတဲ့အထဲမှာ CDM ကျောင်းဆရာမ တယောက်ပါဝင်တယ်။"လို့ ပြောပါတယ်။
အဆိုပါရပ်ကွက်မှာ စစ်ကောင်စီကို သတင်းပေးတဲ့သူတွေရှိနေတာကြောင့် ဒေသခံတွေအ ခုလိုမကြာခဏ ဖမ်းဆီးခံနေရတာဖြစ်ပြီး ဖမ်းဆီးခံရသူတွေကို ကလေးမြို့(ဒကစ)တပ်ထဲကို ဖမ်းဆီးခေါ်ဆောင်သွားကြတယ်လို့ ဆိုပါတယ်။
ဇူလိုင် ၂၅ ရက်ကလည်း ကလေးမြို့ဒေသကွပ်ကဲမှုစစ်ဌာနချုပ် (ဒစက) အနီး စွမ်းအားဖုန်းပြင်ဆိုင်က ဖုန်းပြင် သင်တန်းတက်နေတဲ့ လူငယ် ငါးယောက်ကို စစ်ကောင်စီတပ်သားတွေက ဖမ်းဆီးသွားခဲ့ပါသေးတယ်။
စစ်တပ်အာဏာသိမ်းပြီးနောက် ကလေးမြို့မှာ ဖမ်းဆီးထိန်းသိမ်းခံရသူ အယောက် ၅၀၀ ကျော်ရှိပြီး ပစ်ခတ်သတ်ဖြတ်ခံရသူ အယောက် ၁၀၀ ကျော် ရှိပြီလို့ ဒေသခံ သပိတ်အဖွဲ့တွေရဲ့ စာရင်းအရ သိရပါတယ်။
