တနင်္သာရီတိုင်း၊ မြိတ်မြို့က မြိတ်တက္ကသိုလ်မှာ တက္ကသိုလ်အုပ်ချုပ်ရေးအဖွဲ့က ဘွဲ့နှင်းသဘင် အခမ်းအနား ကျင်းပတဲ့အပေါ် မြိတ်တက္ကသိုလ် CDM ကျောင်းသားတွေက ဝေဖန်ပြောဆိုနေကြပါတယ်။

ဘွဲ့နှင်းသဘင်အခမ်းအနားကို ဖေဖော်ဝါရီ ၂၃ ရက်ကနေ ၂၇ ရက်အထိ ၅ ရက်ဆက်တိုက် ပြုလုပ်ပြီး နေ့သင်တန်းကျောင်းသား ၁၂၀ နဲ့ အဝေးသင်ကျောင်းသား ၅၀၀ လောက် တက်ရောက်ခဲ့တယ်လို့လည်း သိရပါတယ်။

မြိတ်တက္ကသိုလ်ကျောင်းသားများသမဂ္ဂ တာဝန်ရှိသူတယောက်က “ကျနော်တို့အနေနဲ့ စစ်အာဏာရှင်ကို အားပေးထောက်ခံနေတဲ့ တက္ကသိုလ်အာဏာပိုင်တွေလုပ်တဲ့ ဘွဲ့နှင်းသဘင် အခမ်းအနားကိုတော့ အပြင်းအထန် ကန့်ကွက်ရှုတ်ချပါတယ်” လို့ ပြောပါတယ်။

စစ်ကောင်စီကို လက်နက်ကိုင်တော်လှန်နေတဲ့ CDM ကျောင်းသားတယောက်ကလည်း “ဘွဲ့ယူတဲ့ ကျောင်းသားတွေက တောထဲရောက်နေတဲ့သူတွေကို မျက်နှာမထောက်ရင်တောင် အသက်ပေးသွားတဲ့သူတွေ၊ စစ်အာဏာရှင်ကြောင့် ဒုက္ခရောက်နေကြတဲ့ တနိုင်ငံလုံးက လူတွေကိုတော့ အားနာသင့်တယ်။ စစ်ကောင်စီကို အားပေးတဲ့ လုပ်ရပ်တွေဟာ တနိုင်ငံလုံး အနေအထားနဲ့ ဒီတော်လှန်ရေးလုပ်ငန်းစဉ်တွေမှာ အနှောင့်အယှက်ဖြစ်စေတယ်” လို့ ပြောပါတယ်။

စစ်အာဏာမသိမ်းခင်ကာလက ကျင်းပတဲ့ မြိတ်တက္ကသိုလ်ဘွဲ့နှင်းသဘင်အခမ်းအနားမှာ  တက်ရောက်ခဲ့တဲ့ နေ့သင်တန်းကျောင်းသား ၁,၀၀၀ ကျော်ရှိပြီး အခုအချိန်မှာတော့ ၆၀၀ ကျော်လောက်သာရှိတယ်လို့ သိရပါတယ်။

ဘွဲ့နှင်းသဘင်အခမ်းအနား ကျင်းပတဲ့အပေါ် CDM ကျောင်းသားတွေရဲ့ ဝေဖန်မှုတွေကိုတော့ မြိတ်တက္ကသိုလ်အုပ်ချုပ်ရေးအဖွဲ့က တစုံတရာ ပြန်လည်တုံ့ပြန်တာ မရှိပါဘူး။

မြိတ်တက္ကသိုလ်အုပ်ချုပ်ရေးအဖွဲ့တွေနဲ့ Non CDM ကျောင်းသားတွေကို စစ်အာဏာရှင် ဆန့်ကျင်ရေးမှာ ပူးပေါင်းပါဝင်ပေးဖို့အတွက် အခုအချိန်မှာ နောက်မကျသေးဘူးလို့ မြိတ်တက္ကသိုလ် CDM ကျောင်းသားတဦးက ဆိုပါတယ်။

စစ်ကောင်စီ အာဏာမသိမ်းခင်က မြိတ်တက္ကသိုလ်မှာ နေ့သင်တန်းကျောင်းသား ၄,၀၀၀ ကျော်ရှိပြီး စစ်ကောင်စီ အာဏာသိမ်းပြီးတဲ့နောက်မှာတော့ မြိတ်တက္ကသိုလ်ကျောင်းသား အများစုဟာ အာဏာရှင်ကို ဆန့်ကျင်ဖို့အတွက် CDM လုပ်ထားကြပြီး ကျောင်းသား ၈၀၀ ကျော်သာ ကျောင်းတက်နေကြပါတယ်။

အမျိုးသားညီညွတ်ရေးအစိုးရ (NUG) ပညာရေးဝန်ကြီးဌာနနဲ့ အမေရိကန်အပါအဝင် ကမ္ဘာ့ ထိပ်တန်းတက္ကသိုလ်ကြီးတွေဖြစ်တဲ့ Massachusetts Institute of Technology နဲ့ Harvard University တို့က တည်ထောင်ထားတဲ့ edX Online Learning platform မှာ မြန်မာနိုင်ငံက CDM ကျောင်းသားတွေ လေ့လာသင်ယူလို့ရအောင် သဘောတူညီမှုတွေ ရရှိခဲ့တယ်လို့ NUG က ဖေဖော်ဝါရီ ၁၆ ရက်မှာ ထုတ်ပြန်ထားပါတယ်။

စစ်ကျွန်ပညာရေးကို သပိတ်မှောက်ထားတဲ့ CDM ကျောင်းသားတွေအနေနဲ့ ပညာဆက်လက်သင်ယူနိုင်ဖို့အတွက် သင်တန်းအမျိုးအစားပေါင်း ၁၃၂ မျိုးကို edX MOOC မှာ လေ့လာနိုင်ဖို့ သဘောတူညီမှုတွေ ရရှိခဲ့ပြီးဖြစ်တယ်လို့ ထုတ်ပြန်ထားပါတယ်။

edX ဟာ အမေရိကန်နဲ့ ကမ္ဘာ့ထိပ်တန်းတက္ကသိုလ်ကြီးတွေဖြစ်တဲ့ Massachusetts Institute of Technology နဲ့ Harvard University တို့က ၂၀၁၂ ခုနှစ်မှာ စတင်တည်ထောင်ခဲ့တဲ့ Online Learning platform တခုဖြစ်ပြီး edX ပညာရေးအဖွဲ့အစည်းကနေ Certificate Program, Bachelor Program, Master Program တွေကို လေ့လာသင်ယူနိုင်တယ်လို့ ဆိုပါတယ်။

edX MOOC မှာ လေ့လာသင်ယူနိုင်ဖို့ သဘောတူညီမှု ရရှိထားတဲ့ သင်တန်း ၁၃၂ မျိုးထဲက edX နဲ့ မိတ်ဘက်ဖြစ်တဲ့ နိုင်ငံတကာတက္ကသိုလ်တွေက အင်္ဂလိပ်ဘာသာနဲ့ သင်ကြားပို့ချတဲ့ သင်တန်းအမျိုးအစား ၈၈ မျိုးမှာ ကျောင်းသားဦးရေ ၅,၀၀၀ အထိ တက်ရောက် သင်ယူနိုင်မှာ ဖြစ်တယ်လို့ ထုတ်ပြန်ချက်မှာ ပါရှိပါတယ်။

အဲဒီသင်တန်းတွေကို တက်ရောက်ခွင့်ရရှိသူ‌ ကျောင်းသားတွေအနေနဲ့ အမေရိကန်ဒေါ်လာနဲ့ ပေးသွင်းရတဲ့ သင်တန်းတွေကို အခကြေးငွေ လုံးဝပေးသွင်းစရာမလိုဘဲ တက်ရောက်နိုင်မှာ ဖြစ်တဲ့အပြင် နိုင်ငံတကာ အသိအမှတ်ပြု သင်တန်းပြီးဆုံးကြောင်း လက်မှတ်တွေကိုလည်း အခမဲ့ ထုတ်ယူနိုင်မှာဖြစ်တယ်လို့ ဖော်ပြထားပါတယ်။

အမျိုးသားညီညွတ်ရေးအစိုးရ၊ ပညာရေးဝန်ကြီးဌာနက အခုသင်တန်းတွေရဲ့ ဝင်ခွင့်လျှောက်ထားတာနဲ့ ပတ်သက်ပြီး ဆက်လက်ထုတ်ပြန် ကြေညာသွားမယ်လို့လည်း အသိပေးထားပါတယ်။