အမျိုးသားညီညွတ်ရေးအစိုးရ (NUG) က ကျန်းမာရေးဝန်ကြီးဌာနနဲ့ တိုင်းရင်းသားကျန်းမာရေးဌာနတွေရဲ့ ဆေးရုံ/ဆေးခန်းတွေမှာ တာဝန်ထမ်းဆောင်နိုင်ဖို့ CDM ဆရာဝန်၊ သူနာပြုဦးရေစုစုပေါင်း ၁၅၀ ကို ခေါ်ယူနေပါတယ်။
ဇူလိုင် ၁၄ ရက် ဒီကနေ့ရက်စွဲနဲ့ ထုတ်ပြန်ချက်မှာတော့ အရိုးအထူးကုဆရာဝန်၊ အရိုးအထူးကု ဘွဲ့လွန်သင်တန်းသား၊ ခွဲစိတ်အထူးကုဆရာဝန်၊ ခွဲစိတ်အထူးကု ဘွဲ့လွန်သင်တန်းသား၊ မေ့ဆေးအထူးကုဆရာဝန်၊ မေ့ဆေးအထူးကု ဘွဲ့လွန်သင်တန်းသား၊ အရေးပေါ်အထူးကုဆရာဝန်၊ အရေးပေါ်အထူးကု ဘွဲ့လွန်သင်တန်းသား၊ အကြောအဆစ်နှင့်ပြန်လည်သန်စွမ်းရေး အထူးကုဆရာဝန်၊ အကြောအဆစ်နှင့်ပြန်လည်သန်စွမ်းရေးဘွဲ့လွန်သင်တန်းသား စတဲ့နေရာတွေအတွက် ၁၀ နေရာစီနဲ့ လက်ထောက်ဆရာဝန် နေရာ ၂၀ နဲ့ သူနာပြု နေရာ ၃၀ စီ အသီးသီးလျှောက်ထားနိုင်တယ်လို့ ဖော်ပြထားပါတယ်။
လျှောက်ထားသူတွေအနေနဲ့ ပြည်ထောင်စုမြန်မာနိုင်ငံဖွား၊ ကျန်းမာရေးကောင်းမွန်သူ၊ တာဝန်ချထားမယ့် နေရာဒေသတွေမှာ သွားရောက် တာဝန်ထမ်းဆောင်နိုင်သူဖြစ်ရမှာ ဖြစ်ပြီး နိုင်ငံ့ဝန်ထမ်းများရော၊ နိုင်ငံ့ဝန်ထမ်းမဟုတ်သူတွေပါ လျှောက်ထားနိုင်မှာဖြစ်ကာ အကြမ်းဖက်စစ်ကောင်စီနဲ့ ပတ်သက်မှုမရှိသူ ဖြစ်ရမယ်လို့ ဆိုပါတယ်။
စိတ်ပါဝင်စားသူတွေအနေနဲ့ အမျိုးသားညီညွတ်ရေးအစိုးရ၊ ကျန်းမာရေးဝန်ကြီးဌာန၊ လူ့စွမ်းအားအရင်းအမြစ်ဌာနရဲ့ Telegram Account - https://t.me/HR_MOHNUG ဒါမှမဟုတ် Telegram Username - @HR_MOHNUG မှာ လျှောက်လွှာပုံစံတွေကို ထုတ်ယူနိုင်ပြီး လာမယ့် ဇူလိုင် ၂၈ ရက်နောက်ဆုံးထားကာ ပေးပို့လျှောက်ထားနိုင်မှာ ဖြစ်ပါတယ်။
ခုလို လျှောက်လွှာခေါ်ယူတာဟာ တော်လှန်ရေးကာလ လိုအပ်ချက်အရ ပထမအသုတ်အဖြစ် ခေါ်ယူတာဖြစ်ပြီး တခြားသော ကျန်းမာရေးဝန်ထမ်းတွေကိုလည်း ထပ်မံခေါ်ယူသွားမယ်လို့ ဖော်ပြထားပါတယ်။
လျှောက်လွှာမှာ ဖြည့်သွင်းရမယ့် ပုံစံနဲ့ အချက်လက်တွေ၊ ပူးတွဲပါရှိရမယ့် Soft Copy တွေနဲ့ အသေးစိတ်အချက်လက်တွေကိုတော့ ဖော်ပြပါ Telegram Account မှာ နေ့စဉ် ပိတ်ရက်မရှိ၊ နံနက် (၁၀) နာရီမှ ည (၈) နာရီအတွင်း အသေးစိတ် စုံစမ်းနိုင်မှာ ဖြစ်ပါတယ်။
NUG အစိုးရက တော်လှန်ရေးကာလနဲ့ ကြားကာလ ကျန်းမာရေးစောင့်ရှောက်မှုလုပ်ငန်းတွေမှာ ပါဝင်ဆောင်ရွက်နေတဲ့ ကျန်းမာရေးသူရဲကောင်းတွေအတွက် လက်ရှိကာလတွေအတွင်း လူမှုဘဝလုံခြုံမှုနဲ့ လုပ်ငန်းခွင်လုံခြုံမှုတွေကို ကာကွယ်စောင့်ရှောက်မှုပေးနိုင်ဖို့ အစီအစဉ်တွေ အတတ်နိုင်ဆုံး ချမှတ်ထားရှိပြီး တော်လှန်ရေးအလွန် ကာလတွေမှာလည်း ဘဝအာမခံချက်တွေကို ဖက်ဒရယ်ဒီမိုကရေစီ မူဝါဒတွေနဲ့အညီ ပေးနိုင်ဖို့ စီစဉ်ဆောင်ရွက်ပေးသွားမယ်လို့ ဆိုပါတယ်။
ကယားပြည်နယ်(ကရင်နီပြည်) တနေရာမှာ ဒေသခံပြည်သူတွေ အခြေခံကျန်းမာရေးစောင့်ရှောက်မှုပေးနိုင်ဖို့ ရည်ရွယ်ပြီး ဆေးတက္ကသိုလ် (၁) ကျောင်းသားသမဂ္ဂက ဆေးကုခန်းတစ်ခု ထပ်မံ ဖွင့်လှစ်ပေးနိုင်ခဲ့ပါတယ်။
ဆေးခန်းအတွက် လိုအပ်မယ့် ဆေးဝါးနဲ့ ရောဂါကုသရေးဆိုင်ရာ ပစ္စည်းကိရိယာတွေပါ ထောက်ပံ့ခဲ့ပြီး ဒေသခံပြည်သူ ရပ်မိရပ်ဖတွေဆီ လွှဲပြောင်းပေးအပ်ခဲ့တယ်လို့ ဆိုပါတယ်။
ဒါ့အပြင် ဆေးခန်းမှာ ဆေးကုသရေးပိုင်းအတွက် ကူညီဆောင်ရွက်ပေးသွားမယ့် CDM ဆရာဝန်နဲ့ သူနာပြုတွေကိုလည်း လစဉ် ထောက်ပံ့ကြေးတွေ ပေးပို့ပေးသွားမှာဖြစ်တယ်လို့ ဆိုပါတယ်။
မြန်မာနိုင်ငံမှာ စစ်ကောင်စီက မတရားအာဏာသိမ်းယူထားခဲ့တာ ၁၁ လခွဲကျော် ကြာမြင့်ခဲ့ပြီ ဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေပါတယ်။
မြို့တော်လွိုင်ကော်မှာ စစ်ကောင်စီတပ်တွေနဲ့ ဒေသခံကာကွယ်ရေးတပ်တွေအကြား တိုက်ပွဲဖြစ်ပွားပြီး လေတပ်က လေယာဉ်တွေနဲ့ ဗုံးကြဲတိုက်ခိုက်မှုကြောင့် ဒေသခံပြည်သူတွေ သောင်းချီ စစ်ဘေးရှောင်နေကြရတာဖြစ်ပြီး အရေးပေါ်အကူညီတွေ လိုအပ်နေတာ ဖြစ်ပါတယ်။
လက်ရှိပြည်တွင်းက ဆေးရုံတွေမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက်ရောက်နိုင်တာ၊ အွန်လိုင်းကသာ ကုသမှုခံယူနေကြရတာ၊ စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာစတဲ့ အချက်တွေဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှုလုပ်ငန်းတွေမှာ မှားယွင်းညံ့ဖျင်းစွာ စီမံနေတယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်တဲ့ ကိုဗစ်-၁၉ ရောဂါဖြစ်ပွားမှုဆိုင်ရာ စစ်တမ်းမှာသုံးသပ်ဖော်ပြထားပါတယ်။
ဒါ့အပြင် ကိုဗစ်-၁၉ တတိယလှိုင်းကာလမှာ သေဆုံးသူတွေရဲ့ ၇၃ ရာခိုင်နှုန်းက လိုအပ်တဲ့ ဆေးရုံတွေမှာ တက်ရောက်ကုသခွင့်မရဘဲ နေအိမ်တွေမှာ သေဆုံးခဲ့ကြတယ်လို့ ဖော်ပြပါတယ်။
ဒါ့အပြင် စစ်ကောင်စီဟာ အာဏာဖီဆန်ရေးလှုပ်ရှားမှု (CDM) မှာ ဦးဆောင်ပါဝင်ခဲ့ကြတဲ့ ဆရာဝန်၊ သူနာပြု စတဲ့ ကျန်းမာရေးဝန်ထမ်းတွေအပါအဝင် စစ်အာဏာသိမ်းမှုကို ဆန့်ကျင်တဲ့ ပြည်သူတွေကို လက်နက်အားကိုးဖြိုခွင်းမှုတွေ ဆက်တိုက်လုပ်ဆောင်နေတာ ဖြစ်ပါတယ်။
