စစ်ကိုင်းတိုင်း၊ မြောင်မြို့နယ်ထဲက စစ်ကောင်စီတပ်တွေ မီးရှို့ဖျက်ဆီးခဲ့တဲ့ ရွာတချို့ကို မတ် ၂၂ ရက် မနက်က မြောင်အမျိုးသမီးစစ်သည်တော်တပ် M2W၊ မြောင်မြို့နယ် ပြည်သူ့ကာကွယ်ရေးနဲ့ အုပ်ချုပ်ရေးအဖွဲ့ CDSOM၊ မြောင်လူငယ်ကွန်ရက် YFC နဲ့ MEN မြောင်ပညာရေးကွန်ရက်တို့က သွားရောက်လှူဒါန်းခဲ့ပါတယ်။
မီးဘေးသင့် အိမ်ထောင်စုပေါင်း ၁၀၂ စု၊ လူဦးရေ ကျား ၁၅၉၊ မ ၁၉၆ ဦး ပေါင်း ၃၅၅ ဦးတို့ကို အခြေခံစားနပ်ရိက္ခာ ဆန်၊ ဆီ၊ ဆား၊ ပဲ၊ အဝတ်အထည်နဲ့ မီးဘေးသင့် ဆရာ ဆရာမတွေရဲ့ မိသားစု ၁၄ ဦးကို YFC မြောင်လူငယ်ကွန်ရက်နဲ့ MEN မြောင်ပညာရေးကွန်ရက်တို့က တဦးကို ၅၀,၀၀၀ ကျပ်ဆီ ပြည်သူတွေပံ့ပိုးမှုနဲ့ သွားရောက်လှူဒါန်းနိုင်ခဲ့တယ်လို့ M2W မှ မအမရာမှူးက ဒီဗွီဘီကို ပြောပါတယ်။
“ဒီကနေ့ (မတ် ၂၂ ရက်) မနက် ၁၀ နာရီမှာ စကစတပ်ကြောင့် မီးဘေးသင့်နေတဲ့ ရွာတချို့ကို သွားရောက်ပူးပေါင်း ကူညီဖြစ်ခဲ့တာပါ။ ပြည်သူ့အခြေပြု တော်လှန်ရေးတရပ်မှာ ပြည်သူတွေရဲ့ အခက်အခဲတွေကိုလည်း ကျမတို့ နွေဦးတော်လှန်ရေးအင်အားစုအနေနဲ့ ဥပေက္ခာမပြုထားဘဲ လူသားဆန်တဲ့ ဖေးမခြင်းတွေနဲ့ ကျမတို့ရဲ့ နှလုံးသားတွေကို ဆန့်တန်းထားပြီးတော့ မီးဘေးသင့်သူတွေရဲ့ စိတ်ဒဏ်ရာကို အနည်းငယ်ကုစားပေးချင်လို့ သွားရောက်ကူညီဖြစ်ခဲ့တာပါ” လို့ ပြောပါတယ်။
စစ်ရေးလှုပ်ရှားမှုတွေ ပြင်းထန်နေပေမဲ့ မိဘပြည်သူတွေရဲ့ အခက်အခဲတွေကိုလည်း ဥပေက္ခာပြုထားလို့ မရပါဘူးလို့ ဆိုပါတယ်။
လက်ရှိမှာတော့ စစ်ကိုင်းတိုင်းထဲက မြောင်၊ ကနီ၊ ယင်းမာပင် စတဲ့နယ်တွေမှာ စစ်ကောင်စီက အင်အားသုံး စစ်ကြောင်းထိုး မီးရှို့ဖျက်ဆီးနေတဲ့အတွက် မီးဘေးသင့် လူနေအိမ်ခြေ ထောင်ဂဏန်းနဲ့ စစ်ဘေးရှောင်ဦးရေ သောင်းဂဏန်းအထိ ရှိလာပြီး ဘေးလွတ်ရာ တောတောင်တွေမှာ တိမ်းရှောင်နေရတဲ့အတွက် ထောက်ပံ့ကူညီမှုတွေ လိုအပ်နေတယ်လို့ သိရပါတယ်။
ဓာတ်ပုံ-M2Wတာဝန်ရှိသူ
စစ်ကိုင်းတိုင်း၊ မြောင်မြို့နယ်ကို စစ်ကြောင်းထိုးနေတဲ့ စစ်ကောင်စီတပ်ဟာ ဇူလိုင် ၆ ရက် ဒီနေ့မနက်ပိုင်းက ဒေသခံပြည်သူ့ကာကွယ်ရေးတပ်တွေနဲ့ တိုက်ပွဲဖြစ်ပွားခဲ့တယ်လို့ CDSOM တပ်ဖွဲ့က ပြောပါတယ်။
မြောင်မြို့နယ် ပြည်သူ့ကာကွယ်ရေးနဲ့ လုံခြုံရေးတပ်ဖွဲ့ (CDSOM) တပ်ဖွဲ့ဝင်တဦးက “မနက်ကတော့ အပြန်အလှန်ပစ်ခတ်တယ်။ တိုက်ပွဲအခြေအနေက အတည်ပြုလို့ မရသေးဘူးဗျ။ တပ်ရင်းမှူးတကောင်နဲ့ ၃ ပွင့် ၂ ကောင်ကျတယ် ကြားထားတယ်ဗျ။ ကျနော်တို့ဘက်က ကျည်ရှပ်မှန်တာ ဘာညာပဲ ရှိတယ်ဗျ။ နည်းနည်းပါးပါးပေါ့၊ ပါးကို ကျည်ရှပ်မှန်တာပေါ့။ မနက်ပိုင်းက တိုက်ပွဲကြာချိန် တနာရီလောက်ကြာတယ်” လို့ ပြောပါတယ်။
အဆိုပါစစ်ကောင်စီတပ်ဟာ မြောင်မြို့နယ်နဲ့ ရေစကြိုမြို့နယ်ကို စစ်ကြောင်းထိုးနေတာဖြစ်ပြီး မနက်ပိုင်းစစ်ပွဲအပြီး နေ့လယ်ပိုင်းမှာ မြောင်မြို့နယ်နဲ့ ရေစကြိုမြို့နယ် အစပ်ကြားက မြစ်သာကျေးရွာနဲ့ အနီးတဝိုက် ကျေးရွာတွေကို လေယာဉ်နဲ့ ပစ်ခတ်ခဲ့တယ်လို့ ဒေသခံတွေက ပြောပါတယ်။
မြောင်မြို့နယ် ဒေသခံတဦးက “လေယာဉ်နဲ့ပစ်နေတယ်၊ အခုဆုတ်သွားပြီဗျ။ မြစ်သာရွာထဲမှာ မီးရှို့နေတယ်ဗျ။ လတ်တလောတော့ မြစ်သာရွာထဲမှာ တပ်စွဲထားတုန်းဗျ။ ရွာထဲ သက်ကြီးရွယ်အိုလောက်ပဲ ကျန်တာဗျ။ ကျန်တဲ့သူတွေက အကုန်စစ်ဘေးရှောင်ရတာပေါ့ဗျာ။ သက်ကြီးရွယ်အိုတွေကျ ဘုန်းကြီးကျောင်းမှာပဲ နေတယ်ဗျ။ ရွာအထိခိုက်ကို မသိရသေးဘူး။ မြစ်သာရွာဘေး ပတ်ပတ်လည်တွေကိုရော ပစ်သွားတယ်ဗျ” လို့ ပြောပါတယ်။
လေယာဉ်ပေါ်တင်ပစ်ရတဲ့ MI-35 စက်လက်နက်အကြီးစားမျိုးနဲ့ ပစ်ခတ်ခဲ့တာလို့ ဒေသခံ ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။
ရေစကြို-မြောင် နယ်စပ်အနီးက ကျေးရွာဒေသခံတဦးက “ရေစကြိုနဲ့ မြောင်နယ်စပ် မြစ်သာရွာနဲ့၊ မြစ်ဆုံရွာကြားမှာ ကြဲနေတာပါ၊ အထက်ရော အောက်ရော အသံတွေ ဆူညံသွားတာပဲ။ မနက်က ကာကွယ်ရေးတပ်ဖွဲ့တွေနဲ့ တိုက်ပွဲဖြစ်တာ စစ်(--) တွေ သေကြတယ်ကြားတယ်” လို့ ပြောပါတယ်။
လေယာဉ်နဲ့ ပစ်ခတ်တိုက်ခိုက်တာဟာ မြောင်နယ်မှာ ဒုတိယအကြိမ်မြောက် ပစ်ခတ်ခံရတာဖြစ်ပြီး လွန်ခဲ့တဲ့ တလနီးပါးလောက်ကလည်း တကြိမ်ပစ်ခတ်ခံခဲ့ရတယ်လို့ သိရပါတယ်။
