မကွေးတိုင်း၊ ချောက်မြို့မှာ ဖေဖော်ဝါရီ ၂၈ ရက် ညက စစ်ကောင်စီရဲ့ စစ်ကြောရေးစခန်းတခု တိုက်ခိုက်ခံရပြီး နှစ်ယောက်သေဆုံးခဲ့တယ်လို့ ချောက်မြို့နယ်ပြောက်ကျားတပ်ဖွဲ့-CGF ကနေ သိရပါတယ်။

ချောက်မြို့မှာ အရင်က ရေနံမြေအရာရှိတွေ နေထိုင်ခဲ့တဲ့ နက/၆၀ မှာရှိတဲ့ စစ်ကောင်စီရဲ့ စစ်ကြောရေးစခန်းကို မနေ့ ည ၆ နာရီ ၄၅ မိနစ်မှာ ဒေသကာကွယ်ရေး ပူးပေါင်းတပ်ဖွဲ့တွေက ပစ်ခတ်တိုက်ခိုက်ခဲ့တာလို့ CGF ရဲ့ ဒုတာဝန်ခံ ဗိုလ်ပေတက ဒီဗွီဘီကို ပြောပါတယ်။

“အဲဒီစစ်ကြောရေးစခန်းအတွင်းက အလင်းရောင်အောက်မှာ ကင်းစောင့်နေတဲ့ စစ်ကောင်စီတပ်သား ၃ ယောက်ကို ရှေ့တည့်တည့်ကနေ မျက်နှာချင်းဆိုင် ပစ်လိုက်တာဗျ။ အဲဒီမှာ သူတို့လူတယောက် လဲကျသွားပြီး ကျန်တဲ့ ၂ ယောက် ဝပ်လိုက်တဲ့အချိန်မှာ ၈ ချက်ပစ်လိုက်ပြီး သေနတ်က ဂျန်းဖြစ်သွားလို့ နောက်ပြန်ဆုတ်ခဲ့ရတယ်။ အဲဒီထဲက စစ်ကောင်စီတပ်သားတွေ ကျနော်တို့နောက်ကိုလိုက်လာလို့ သေနတ်အတိုတွေနဲ့ ပြန်ပစ်ခဲ့ရပြီး ထိခိုက်မှုရှိမရှိဆိုတာကိုတော့ ညဘက်ကြီးဖြစ်နေတဲ့အတွက် မသိရသေးဘူး။”

အဲဒီစစ်ကြောရေးစခန်းမှာ စစ်ကောင်စီရဲ့ ဒုဗိုလ်မှူးကြီးတယောက် ဦးစီးပြီး စစ်ကောင်စီတပ်သား အယောက် ၂၀ ကျော်လောက် တပ်စွဲထားကာ အပြစ်မဲ့ပြည်သူတွေကို မတရား ဖမ်းဆီးနှိပ်စက်နေပြီး အခုနှစ် ဇန်နဝါရီလနဲ့ ဖေဖော်ဝါရီလအတွင်းမှာပဲ အသက် ၄၀ ကျော်လောက်ရှိတဲ့ ဦးကျော်မိုးနဲ့ အသက် ၂၀ ကျော်အရွယ် လူငယ်တယောက် သေဆုံးခဲ့တယ်လို့ ဆိုပါတယ်။

အဲဒီတိုက်ခိုက်မှုကို ချောက်မြို့နယ် ပြောက်ကျားတပ်ဖွဲ့-CGF၊ ချောက် ပ.က.ဖ၊ Hunter Dragon Group၊ King Fighter အဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး ဒေသကာကွယ်ရေး ပူးပေါင်းတပ်ဖွဲ့ဘက်က ရဲဘော်တွေ ထိခိုက်မှုမရှိဘဲ ဘေးကင်းလုံခြုံတဲ့နေရာကို ရောက်ရှိပြီလို့ ပြောပါတယ်။

အလားတူ မကွေးတိုင်း၊ မြိုင်မြို့မှာလည်း ဖေဖော်ဝါရီ ၂၈ ရက် ညနေပိုင်းက စစ်ကောင်စီရဲ့ စစ်ဆေးရေးဂိတ်တခု တိုက်ခိုက်ခံရပြီး ၃ ယောက်သေဆုံးကာ ၂ ယောက် အပြင်းအထန် ဒဏ်ရာရရှိခဲ့တယ်လို့ မြိုင် ပကဖ ကနေ သိရပါတယ်။

မြိုင်မြို့ မြောက်ဘက်မှာ တပ်စွဲထားတဲ့ စစ်ကောင်စီရဲ့ ပူးပေါင်းစစ်ဆေးရေးဂိတ်ကို မနေ့က ဖေဖော်ဝါရီ ၂၈ ရက် ညနေ ၄ နာရီ ၄၉ မိနစ်မှာ ဒေသကာကွယ်ရေး ပူးပေါင်းတပ်ဖွဲ့တွေက ဝင်ရောက်စီးနင်း တိုက်ခိုက်ခဲ့တာလို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

နှစ်ဖက်အပြန်အလှန် မိနစ်အနည်းငယ်ကြာ တိုက်ပွဲဖြစ်ပွားခဲ့ပြီး အဲဒီတိုက်ခိုက်မှုအတွင်းမှာ စစ်ကောင်စီတပ်ဘက်က ၃ ယောက်သေဆုံးပြီး ၂ ယောက် အပြင်းအထန် ဒဏ်ရာရရှိခဲ့တယ်လို့ ဆိုပါတယ်။

“အဲဒီတိုက်ခိုက်မှုကို မြိုင် ပ.က.ဖ တပ်ရင်း-၁၊ တပ်ခွဲ-၃ နဲ့ နံသာမြေအဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က တပ်ကူတွေလိုက်လာလို့ ကျနော်တို့ဘက်က ရဲဘော်တွေ အလျင်အမြန်ပစ်ခတ်ပြီး ထိခိုက်မှုမရှိဘဲ ပြန်လည်ဆုတ်ခွာခဲ့ကြတယ်”လို့ ဗိုလ်လက်ယာက ပြောပါတယ်။

မြိုင်မြို့အနီးမှာ ဖေဖော်ဝါရီ ၂၅ ရက် မနက်ပိုင်းကလည်း ကင်းပတ်ထွက်လာတဲ့ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၁ ယောက်သေဆုံးကာ ၂ ယောက် အပြင်းအထန် ဒဏ်ရာရရှိခဲ့တယ်လို့ မြိုင်ပ.က.ဖ ကနေ သိရပါတယ်။

ပေါက်မြို့နယ်မှာတော့ ထန်းပေါက်ကုန်းကျေးရွာကနေ မြိုင်မြို့နယ် ကိုင်းတောမကျေးရွာကို ဦးတည်ပြီး အင်အား ၆၀ နဲ့ စစ်ကြောင်းထိုးလာတဲ့ စစ်ကောင်စီ စစ်ကြောင်းကို ဒေသခံပြည်သူ့ကာကွယ်ရေးတပ်တွေက အီနာဂါဗုံးသီး ၅ လုံးချ တိုက်ခိုက်ခဲ့တယ်လို့ သိရပါတယ်။

Black Cheetah People Defence Force တာဝန်ခံက “လက်ခုပ်ပင်ကျေးရွာက တောစပ်နားအရောက်မှာ ဒရုန်းနဲ့ကြဲချတာဗျ။ လက်နက်ကြီးတွေနဲ့တော့ ရမ်းထုသေးတယ်။ ကျနော်တို့ဘက်က အထိအခိုက် မရှိပါဘူး” လို့ ပြောပါတယ်။

အဲဒီတိုက်ခိုက်မှုကို Black Cheetah People Defence Force အပါအဝင် Hero New G.Z၊ ဝံပုလွေပြောက်ကျားတပ်ဖွဲ့-မြိုင်၊ ဒေသခံကာကွယ်ရေးတပ်ဖွဲ့တွေ စုပေါင်းတိုက်ခိုက်ခဲ့တာ ဖြစ်ပြီး စစ်ကောင်စီတပ်ဘက်က လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ကာ အထိအခိုက် အကျအဆုံးကိုတော့ စုံစမ်းနေဆဲဖြစ်တယ်လို့ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

B2 45

မကွေးတိုင်း၊ ချောက်မြို့က မြန်မာ့စီးပွားရေးဘဏ်ရှေ့မှာ ဇန်နဝါရီ ၁၈ ရက် နေ့လယ်ပိုင်းက မိုင်းပေါက်ကွဲခဲ့တယ်လို့ ချောက်မြို့နယ် ပြောက်ကျားတပ်ဖွဲ့-CGF ကနေ သိရပါတယ်။

ချောက်မြို့ စီးပွားရေးဘဏ်နားမှာ မနေ့ ဇန်နဝါရီ ၁၈ ရက် နေ့လယ် ၁၂ နာရီလောက်မှာ စစ်ကောင်စီတပ်နဲ့ ရဲတပ်ဖွဲ့ဝင်တွေ လာတဲ့လမ်းကို ဒေသကာကွယ်ရေး ပူးပေါင်းတပ်ဖွဲ့တွေက ကြိုတင်စောင့်ဆိုင်းပြီး ပဒေသာမိုင်း ၅ လုံးတွဲနဲ့ ဖောက်ခွဲဖို့ စီစဥ်ခဲ့ပေမဲ့ မိုင်းက Error ဖြစ်သွားလို့ ပြည်သူတွေ ထိခိုက်မှုမရှိအောင် ကြိုပြီးဖောက်ခွဲလိုက်ရတယ်လို့ CGF တာဝန်ခံ ဗိုလ်ဘကွန်းက ပြောပါတယ်။

“ကျနော်တို့တပ်ဖွဲ့တွေက စစ်ဆင်ရေးပြုလုပ်မယ်ဆိုရင် လမ်းပိုင်းဆိုင်ရာ သတိပေးချက်တွေ ထုတ်ပြန်ပြီးမှ လုပ်တာဗျ။ မိဘပြည်သူတွေအနေနဲ့လည်း ကျနော်တို့ရဲ့ ထုတ်ပြန်ချက်တွေကို လိုက်နာပြီး ပူးပေါင်းကူညီဖို့ လိုအပ်တယ်။ နောက်နောင်မှာ လိုက်နာမှုမရှိခဲ့လို့ ထိခိုက်မှုရှိလာခဲ့ရင် ကျနော်တို့ မဟာမိတ်တပ်ဖွဲ့တွေအနေနဲ့ လုံးဝတာဝန်ယူမှာမဟုတ်ဘူး။”

ချောက်မြို့ မြန်မာ့စီးပွားရေးဘဏ်ရှေ့ လမ်းမတလျှောက်ကို ဖြတ်သန်းသွားလာတာတွေ မပြုလုပ်ကြဖို့ ဇန်နဝါရီ ၁၆ ရက်နေ့မှာ ထုတ်ပြန်ခဲ့ပြီး ဇန်နဝါရီ ၁၈ ရက် ညနေပိုင်းမှာ ပြန်လည်သွားလာနိုင်ပြီလို့ ကြေညာချက် ထုတ်ပြန်ထားတယ်လို့ ဗိုလ်ဘကွန်းက ပြောပါတယ်။

ချောက်မြို့ ဒေသခံတယောက်က “ချောက်မြို့ မြန်မာ့စီးပွားရေးဘဏ်နားမှာ မနေ့က မိုင်းပေါက်ကွဲခဲ့တာ ဟုတ်ပါတယ်ဗျ။ ပေါက်ကွဲသံကတော့ အကျယ်ကြီး ကြားလိုက်ရတယ်။ လူတွေကိုတော့ ထိခိုက်မှုမရှိဘူးလို့ သိရတယ်။ အဲဒီပေါက်ကွဲမှုဖြစ်ပြီးတော့ စစ်သားတွေ၊ ရဲတွေ ခြေရှုပ်နေပြီး လမ်းသွားလမ်းလာတွေကို ပိတ်ဆို့စစ်ဆေးတာတွေ ပြုလုပ်ခဲ့ကြတယ်” လို့ ပြောပါတယ်။

ချောက်မြို့ မြို့မစျေးအရှေ့ဘက် တိုက်တန်းမှာလည်း မြတ်ရွှေအိုးအမည်နဲ့ စျေးဆိုင်ဖွင့်ထားတဲ့ ဘိုဘိုကို ဇန်နဝါရီ ၁၇ ရက် မနက် ၁၁ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက သေနတ်နဲ့ ၇ ချက်ပစ်ခတ်ပြီး သုတ်သင်ရှင်းလင်းခဲ့ကြတယ်လို့ သိရပါတယ်။

အဲဒီဖောက်ခွဲစစ်ဆင်ရေးကို ချောက် ပ.က.ဖ၊ King Fighter၊ Hunter Dragon Group၊ ရေနံချောင်း ဖေကံကောင်း အဖွဲ့တို့နဲ့အတူ ပူးပေါင်းလုပ်ဆောင်ခဲ့တာဖြစ်ပြီး ပူးပေါင်းတပ်ဖွဲ့က ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ သိရပါတယ်။

မကွေးတိုင်း၊ ပေါက်မြို့နယ်မှာလည်း ဇန်နဝါရီ ၁၈ ရက် မွန်းလွဲပိုင်းက ရဲစခန်းတခုနဲ့ ပျူစောထီးရွာတရွာ တိုက်ခိုက်ခံရပြီး ရဲတယောက်သေဆုံးကာ ထိခိုက်ဒဏ်ရာရသူ ရှိနိုင်တယ်လို့ မြိုင်ပ.က.ဖနဲ့ ဒေဝယက္ခတပ်ဖွဲ့ကနေ သိရပါတယ်။

ပေါက်မြို့နယ် ဇီးပြားရဲစခန်းကို ဇန်နဝါရီ ၁၈ ရက် မွန်းလွဲ ၁ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက သွားရောက်တိုက်ခိုက်ရာ ရဲတယောက် သေနတ်ထိမှန် သေဆုံးသွားတာကို မြင်တွေခဲ့ရတယ်လို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

ရဲစခန်းကို ဝင်ရောက်စီးနင်းဖို့ ချဉ်းကပ်ခဲ့ပေမဲ့ စစ်ကောင်စီတပ်ဖွဲ့ဝင်တွေနဲ့ ရဲတွေဘက်က လက်ဦးမှုရရှိသွားလို့ ရဲဘော်တွေ ထိခိုက်မှုမရှိအောင် ပြန်လည်ဆုတ်ခွာခဲ့ကြတယ်လို့ ဆိုပါတယ်။

ပေါက်မြို့နယ်၊ တပ်ကုန်းရွာသစ် ပျူစောထီးရွာကို ဇန်နဝါရီ ၁၈ ရက် မွန်းလွဲ ၁ နာရီခွဲလောက်မှာ ဒေသကာကွယ်ရေး တပ်ဖွဲ့တွေက ၆၀ မမနဲ့ ၁၈ လုံး ပစ်ခတ်တိုက်ခိုက်ခဲ့လို့ စစ်ကောင်စီတပ်နဲ့ ပျူစောထီးတွေဘက်က ထိခိုက်မှုရှိနိုင်တယ်လို့ ဒေဝယက္ခတပ်ဖွဲ့ရဲ့ လက်နက်ထုတ်လုပ်ရေး တာဝန်ခံ ဗိုလ်လပြည့်က ပြောပါတယ်။

ဒါ့အပြင် ရွာအစပ်မှာရှိတဲ့ စစ်ကောင်စီတပ်နဲ့ ပျူစောထီးတွေရဲ့ ကင်းတဲတလုံးကိုလည်း မီးရှို့ဖျက်ဆီးခဲ့ပြီး ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ဆိုပါတယ်။

အဲဒီတိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။