ချင်းပြည်နယ်၊ ဖလမ်းမြို့နယ်မှာ စစ်ကောင်စီတပ်စခန်းတခုကို ဧပြီ ၁၀ ရက်က သိမ်းပိုက်နိုင်ခဲ့ပြီး စစ်ကောင်စီတပ်သား ၁၄ ယောက်သေဆုံး၊ ၁၁ ယောက်ကို ဖမ်းဆီးနိုင်ခဲ့တယ်လို့ ချင်းအမျိုးသားအဖွဲ့ချုပ်၊ သတင်းပြန်ကြားရေးနဲ့ ပြည်သူ့ဆက်ဆံရေးဌာနက ထုတ်ပြန်ပါတယ်။

ဖလမ်းမြို့နဲ့ ၁၂ မိုင်လောက်ဝေးတဲ့ ဗားရ်ကျေးရွာမှာရှိတဲ့ စစ်ကောင်စီ တပ်စခန်းကို ချင်းအမျိုးသားကာကွယ်ရေးတပ်ဖွဲ့ (CNDF) က ဧပြီ ၁၀ ရက်မနက်ပိုင်းမှာ သွားရောက်တိုက်ခိုက်ခဲ့တာဖြစ်ပြီး ၁ နာရီခွဲဝန်းကျင်လောက်အကြာမှာ တပ်စခန်းကို သိမ်းပိုက်နိုင်ခဲ့တာလို့ ဆိုပါတယ်။

ဗားရ်စခန်းမှာ တာဝန်ကျတဲ့  စစ်ကောင်စီ တပ်သား ၂၅ ယောက်ထဲက ၁၁ ယောက်ဟာ တိုက်ပွဲမှာ သေဆုံးခဲ့ပြီး ၁၄ ယောက်ကို အရှင်ဖမ်းမိခဲ့ပေမယ့် ရထားတဲ့ဒဏ်ရာတွေပြင်းထန်လို့ လမ်းခုလတ်မှာပဲ ဗိုလ်ကြီးတယောက်အပါအဝင် ၃ ယောက် ထပ်သေသွားတယ်လို့ ထုတ်ပြန်ဖော်ပြထားပါတယ်။

အဲဒီ စခန်းသိမ်းတိုက်ပွဲကနေ MA1 – သေနတ် သုံးလက်၊ MA2 –တလက်၊ MA3 – နှစ်လက်၊ MA4 – တလက်၊ G3 – ၁၂ လက်၊ MA ကျည်ဘောက် -  ၂ဝ  ၆၀ မမ စိန်ပြောင်း - နှစ်ခု၊ ၆၀ မမ ကျည် - ၅၈ ခု၊ အီနာဂါ - ၈ ခု၊ G3 ကျည်ဘောက် - ၃၇ ခု၊ တိုက်မိုင်း - ၁၁ ခု၊ ၄ဝ မမ ကျည် - ၃၃ ခု၊ လက်ပစ်ဗုံး - ၁၂ လုံး၊ ရှေ့ထွက်မိုင်း - ၅၀၊ နင်းမိုင်း - ၅၀၀၊ MA ကျည် - ၁,၀၀၀ ကျော်နဲ့  G3 ကျည် - ၂,၅၀၀ ကျော် သိမ်းဆည်းခဲ့ပြီး စခန်းကို မီးရှို့ဖျက်ဆီးခဲ့တယ်လို့ ဆိုပါတယ်။

တိုက်ပွဲအတွင်းမှာ အရပ်သား ပြည်သူတယောက်နဲ့ ချင်းအမျိုးသားကာကွယ်ရေးတပ်ဖွဲ့ (CNDF) ရဲဘော်တယောက်တို့ ကျဆုံးခဲ့ရတယ်လို့လည်း ထုတ်ပြန်ထားပါတယ်။

စစ်ကောင်စီရဲ့ ရွေးကောက်ပွဲ အထမြောက်အောင်ကူညီမယ့် ဘယ်လိုပုဂ္ဂိုလ်မျိုးကိုမဆို ပြင်းပြင်းထန်ထန် အရေးယူမယ်လို့ ချင်းအမျိုးသားကာကွယ်ရေးတပ်ဖွဲ့ (CNDF) ရဲ့ ဒုတိယအကြိမ် ညီလာခံကနေ ထုတ်ပြန်လိုက်ပါတယ်။

ညီလာခံကို စစ်ဌာနချုပ်ရုံးမှာ ဇန်နဝါရီ ၆ ရက်မှ ၉ ရက်အထိ ကျင်းပခဲ့တာဖြစ်ပြီး CNO Defense Council, War Office နဲ့ တပ်မဟာ ၄ ခုက ညီလာခံကိုယ်စားလှယ် အယောက် ၆၀၊ စောင့်ကြည့်လေ့လာသူ အယောက် ၃၀ လောက် တက်ရောက်ခဲ့ကြတယ်လို့ ချင်းအမျိုးသားကာကွယ်ရေးတပ်ဖွဲ့က ပြောပါတယ်။

အကြမ်းဖက်စစ်ကောင်စီရဲ့ ရွေးကောက်ပွဲကို ချင်းပြည်နယ်၊ ဖလမ်းမြို့နယ်နဲ့ အထက်ချင်းတွင်းဒေသအတွင်း မလုပ်ဖို့အတွက် CNO/CNDF က လုံးဝတားမြစ်တဲ့ အကြောင်းနဲ့ တားမြစ်နေတဲ့ကြားက အဲဒီရွေးကောက်ပွဲကို အထမြောက်အောင် ကူညီမယ့် ဘယ်လိုပုဂ္ဂိုလ်မျိုးမဆို CNO/CNDF က ပြင်းပြင်းထန်ထန် အရေးယူသွားမယ်လို့လည်း ညီလာခံထုတ်ပြန်ချက်မှာ ရေးသားဖော်ပြထားပါတယ်။

ပြီးတော့ ချင်းအမျိုးသားကာကွယ်ရေးတပ်ဖွဲ့ရဲ့ ဌာနအသီးသီးနဲ့ တပ်မဟာ၊ တပ်ရင်းအလိုက် ၁ နှစ်တာ လုပ်ငန်းဆောင်ရွက်ချက်တွေရဲ့ လှုပ်ရှားမှုတွေကို အစီရင်ခံတာ၊ ဘဏ္ဍာရေး အစီရင်ခံစာ တင်သွင်းတာ၊ ၁ နှစ်တာ လုပ်ငန်းဆောင်ရွက်တာတွေအပေါ် ပြန်လည်သုံးသပ်တာနဲ့ ရှေ့ဆက်ရမယ့် လုပ်ငန်းစဉ်တွေကို ဆွေးနွေးခဲ့ကြတယ်လို့ သိရပါတယ်။

တပ်မဟာ ၄ ခုနဲ့ စစ်ဌာနချုပ်ရုံးရဲ့ တာဝန်ခွဲဝေယူတာတွေ၊ နယ်မြေသတ်မှတ်တာ၊ ငွေကြေးစီမံမှုဆိုင်ရာ ပေါ်လစီတွေ၊ နေ့ထူးနေ့မြတ်သတ်မှတ်တာ၊ စည်းမျဉ်းစည်းကမ်း စစ်ကျင့်ဝတ်တွေနဲ့ ပတ်သက်ပြီး အရေးယူဆောင်ရွက်နိုင်ရေးအတွက် စစ်ဘက်ဆိုင်ရာ တရားရုံးကို တပ်မဟာအဆင့်၊ စစ်ဌာနချုပ်ရုံးအဆင့်နဲ့ Defense Council အဆင့်လို့ သတ်မှတ်ပြဋ္ဌာန်းပြီး အများပြည်သူ အားကိုးအားထားပြုထိုက်တဲ့ တပ်ဖွဲ့ဖြစ်နိုင်ရေးကို မူဝါဒတွေ ချမှတ်ခဲ့တယ်လို့လည်း ဆိုပါတယ်။

CNO/CNDF အနေနဲ့ အာဏာရှင်စနစ် အမြစ်ပြတ်ချေမှုန်းရေး၊ ချင်းအမျိုးသားတည်ဆောက်ရေးနဲ့ ဖက်ဒရယ်ဒီမိုကရေစီပြည်ထောင်စု ပေါ်ပေါက်ရေးအတွက် တော်လှန်ရေး အင်အားစုတွေနဲ့အတူ ဆုံးခန်းတိုင်အောင် ဆက်လက် တိုက်ပွဲဝင်သွားမယ်လို့လည်း ထုတ်ပြန်ထားပါတယ်။