ကရင်နီဒေသ တော်လှန်ရေးရန်ပုံငွေအတွက် သရုပ်ဆောင်မင်းသမီး ပိုင်ဖြိုးသု ကိုယ်တိုင် ချည်ထိုးထားတဲ့ ရောင်စုံ Crochet Cardigan တထည်ကို ကံစမ်းဝယ်ယူရင်း ပါဝင်ထောက်ပံ့ကြဖို့ တိုက်တွန်းထားပါတယ်။
ကံစမ်းမဲရောင်းချမယ့် ကာလကတော့ မတ် ၁ ရက်ကနေ ၇ ရက်အထိဖြစ်ကာ ရရှိလာတဲ့ ရန်ပုံငွေတွေအားလုံးကိုတော့ အကြမ်းဖက်စစ်ကောင်စီရဲ့ အပြင်းအထန်ဖိနှိပ်မှုကို ခံနေရတဲ့ ကရင်နီ ရဲဘော်တွေကို ထောက်ပံ့ပေးသွားမယ်လို့ ဆိုပါတယ်။
ပါဝင်လိုသူတွေအနေနဲ့ ကံစမ်းမဲလက်မှတ်တစ်စောင်ကို မြန်မာငွေကျပ် တစ်သောင်းနဲ့ CDM Medical Network ဖေ့စ်ဘွတ်ခ်စာမျက်နှာ မက်ဆင်ဂျာကတဆင့် ဝယ်ယူနိုင်မယ်လို့ ဆိုပါတယ်။
မြန်မာနိုင်ငံမှာ အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၁ နှစ် ကျော်လာခဲ့ပြီဖြစ်ကာ ဒီကာလအတွင်း အကြမ်းဖက်အာဏာသိမ်းစစ်ကောင်စီတပ်တွေနဲ့ တိုင်းရင်းသားလက်နက်ကိုင် တပ်ဖွဲ့တွေ၊ ပြည်သူ့ကာကွယ်ရေးတပ်ဖွဲ့တွေကြားက တိုက်ပွဲ တွေ ပြင်းထန်နေပြီး အခြေအနေတွေ ပိုမိုပြီးတော့ ဆိုးဝါးလာနေတာ ဖြစ်ပါတယ်။
စစ်ကောင်စီတပ်တွေဟာ ကရင်နီဒေသမှာ လေကြောင်း တိုက်ခိုက်မှုအပြင် စစ်ကြောင်းတွေနဲ့ မြေပြင်ကနေ အကြီးအကျယ် ထိုးစစ်ဆင်နေပြီး အဆိုပါ ထိုးစစ်ဆင်မှုတွေအတွင်း အရပ်သားပြည်သူတွေရဲ့ အသက်အိုးအိမ်စည်းစိမ်တွေ ပျက်စီးဆုံးရှုံးခဲ့ရကာ တော်လှန်ရေး အင်အားစုတွေဟာလည်း လက်နက်အင်အားမမျှတာကြောင့် နယ်မြေတချို့ ဆုတ်ခွာပေး ရတာလည်း ဖြစ်ပါတယ်။
ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) ရဲ့ ထုတ်ပြန်ချက်အရ စစ်အာဏာသိမ်းကာလ တနှစ်ကျော်အတွင်း တိုက်ပွဲတွေနဲ့ လုံခြုံရေးအခြေအနေတွေ ကြောင့် မြန်မာနိုင်ငံတောင်ပိုင်းက အိုးအိမ်စွန့်ခွာ ထွက်ပြေးခဲ့ကြရသူတွေ ၂ သိန်း ၂ သောင်းကျော် ရှိလာခဲ့ပြီလို့ ဆိုပါတယ်။
အဆိုပါ အိုးအိမ်စွန့်ခွာထွက်ပြေးခဲ့ကြရသူတွေထဲမှာ ကယားပြည်နယ်မှာ လူဦးရေ ၉၂,၄၀၀နဲ့ အများဆုံးဖြစ်ပြီး ကရင်ပြည်နယ်မှာ ၆၈,၄၀၀၊ ရှမ်းပြည်နယ်တောင်ပိုင်းမှာ ၆၀,၅၀၀၊ မွန်ပြည်နယ်မှာ ၇,၅၀၀၊ တနင်္သာရီတိုင်းဒေသကြီးမှာ ၂,၆၀၀ နဲ့ ပဲခူးတိုင်းဒေသကြီးမှာ ၈၀၀ လောက် ပါဝင်တယ်လို့ ဆိုပါတယ်။
မြန်မာ့နွေဦးတော်လှန်ရေးမှာ ရှေ့တန်းတနေရာက ပါဝင်နေကြတဲ့ သူရဲကောင်းအမျိုးသမီးတွေ အတွက် အကယ်ဒမီမင်းသမီး ပိုင်ဖြိုးသုကိုယ်တိုင်ထိုးထားတဲ့ Crochet cardigan လေးနဲ့ ခေါင်းစီးကြိုးလေးကို ပေးခဲ့ပါတယ်။
မင်းသမီး ပိုင်ဖြိုးသုက “ဘဝမှာ သူများကိုပေးဖူးသမျှလက်ဆောင်တွေထဲမှာ အကြည်နူးရဆုံးလက်ဆောင်လေး Crochet cardigan လေးနဲ့ ခေါင်းစီးကြိုးလေး ထိုးပြီးတော့ ရာသီဥတု စအေးလာတဲ့ အချိန်မှာ မြေပြင်က သူရဲကောင်းညီမလေးတွေကို လက်ဆောင်ပေးချင်လို့ ဆရာဖြိုးသီဟ Phio Thiha ကို အကူညီတောင်းပြီး November လကုန်လောက်ကတည်းက အဆင့်ဆင့် ကြိုးစားပြီးပို့ခဲ့ရတာ အခု ရောက်သွားပါပြီ ”လို့ သူ့ရဲ့ လူမှုကွန်ရက်ကနေ မျှဝေထားပါတယ်။
ရုပ်သံဗွီဒီယိုဖိုင်ထဲမှာတော့ နွေဦးတော်လှန်ရေးရဲ့ သူရဲကောင်းမလေးတွေကို Cardigan မဲဖောက်ပေးတဲ့ ပုံရိပ်တွေကို မြင်တွေ့ရပြီး ပိုင်ဖြိုးသုကတော့ အားလုံးကို ထိုးပေးချင်ပေမယ့် တစ်ထည်ထိုးဖို့ ၃ ပတ်လောက် အချိန်ယူရကြောင်းနဲ့ ရောက်အောင်ပို့ပေးရတဲ့ လမ်းခရီး အခက်ခဲတွေကြောင့် တစ်ယောက်ပဲ ပေးခွင့်ရလိုက်တာကို နားလည်ပေးဖို့နဲ့ ဘေးကင်းကျန်းမာအောင် နေပေးကြဖို့ ဆုတောင်းစကား ပါးထားခဲ့တာပါ။
“မဲနှိုက်ရင်း သူတို့တွေ ပျော်နေကြတာမြင်တော့ ကိုယ်တွေအတွက် အများကြီးစွန့်လွှတ် အနစ်နာ ခံပေးနေသူလေးတွေကို ခဏတာပျော်သွားစေတဲ့အတွက် အရမ်းကိုကြည်နူးမိပါတယ်”လို့ ပိုင်ဖြိုးသုက ရေးထားပါတယ်။
သုသုလို့ ပရိသတ်တွေ ချစ်စနိုးခေါ်ကြတဲ့ ပိုင်ဖြိုးသုဟာ ဆရာဝန်တဦးလည်းဖြစ်ကာ မြန်မာ့ရုပ်ရှင်အကယ်ဒမီထူးချွန်ဆုကိုလည်း ရရှိထားခဲ့သူတဦး ဖြစ်ပါတယ်။
လတ်တလောမှာတော့ မြန်မာ့နွေဦးတော်လှန်ရေးမှာ ပြည်သူတွေနဲ့ တသားတည်းရပ်တည်ပြီး စစ်အာဏာရှင်ဆန့်ကျင်တော်လှန်ရေးမှာ အမှန်တရားဘက်က မားမားမတ်မတ် ပါဝင်ခဲ့တာကြောင့် ရာဇသတ်ကြီးပုဒ်မ ၅၀၅(က) နိုင်ငံတော်အကြည်ညိုပျက်စေမှုနဲ့ အမှုဖွင့်ခံထားရပြီး တိမ်းရှောင်နေရတာ ဖြစ်ပါတယ်။
