ထောင်ဒဏ် ၃ နှစ်ချမှတ်ခံထားရတဲ့ ပြည်မြို့အခြေစိုက် DVB သတင်းထောက်ကိုမင်းညို အောက်တိုဘာ ၁၈ ရက် ဒီနေ့ အကျဉ်းထောင်ကနေ ပြန်လည်လွတ်မြောက်လာပါတယ်။
ကိုမင်းညိုဟာ ပြည်မြို့ အကျဉ်းထောင်မှာ ရက်ပေါင်း ၂၂၉ ရက် အကျဉ်းကျခံခဲ့ရပြီးနောက် ဒီကနေ့ ပြန်လွတ်လာတာဖြစ်ပြီး နေအိမ်ကို ပြန်ရောက်နေပြီလို့လည်း ကိုမင်းညိုက ပြောပါတယ်။
ဆန္ဒပြသတင်းရယူနေတဲ့ ကိုမင်းညိုကို ပြီးခဲ့တဲ့ မတ် ၃ ရက်မှာ အကြမ်းဖက်စစ်ကောင်စီက ရိုက်နှက်ဖမ်းဆီးခဲ့သလို ပြည်အကျဉ်းထောင်ကို မပို့ခင် စစ်ကြောရေးမှာလည်း ရိုက်နှက်စစ်ဆေး ခဲ့ပြီး ပုဒ်မ ၅၀၅(က)နဲ့တရားစွဲဆိုခဲ့တာလည်း ဖြစ်ပါတယ်။
မေ ၁၂ ရက်နေ့မှာ စစ်ကောင်စီရဲ့ ထောင်တွင်းတရားရုံးက သတင်းထောက် ကိုမင်းညိုကို ထောင်ဒဏ်ချမှတ်ခဲ့တာလည်း ဖြစ်ပါတယ်။
အကျဉ်းကျနေတဲ့ နိုင်ငံရေးအကျဉ်းသား ၁၃၁၆ ယောက်ကို အကျဉ်းထောင် အသီးသီးကနေ ခံဝန်ကတိနဲ့ လွတ်ငြိမ်းသက်သာခွင့်ပြုလိုက်တယ်လို့အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ဒီကနေ့ အောက်တိုဘာ ၁၈ ရက်မှာ ကြေညာခဲ့ပြီးနောက် အခုလို လွတ်မြောက်လာတာလည်း ဖြစ်ပါတယ်။
ဖေဖော်ဝါရီလ စစ်အာဏာသိမ်းပြီးနောက် ဖမ်းဆီးခံထားရတဲ့ နိုင်ငံရေးအကျဉ်းသား ၁၃၀၀ ကျော်ကို စစ်ကောင်စီက ကန့်သတ်ချက်နဲ့လွှတ်ပေးနေတာဖြစ်ပြီး အနုပညာရှင်တွေ အပါအဝင် ဖမ်းဆီး တရားစွဲဆိုခံထားရသူ ၄၀၀၀ ကျော်ကိုလည်း အမှုရုပ်သိမ်း ပြန်လွှတ်ဖို့ အမိန့် ထုတ်ပြန်ထားပါတယ်။
