ကရင်နီ(ကယား)ပြည်နယ်၊ ဒီးမော့ဆိုမြို့နယ်၊ ဆောင်ဒူလာကျေးရွာကို စစ်ကောင်စီတပ်က မတ်လ ၈ ရက် ဒီမနက်အစာပိုင်း ၂ နာရီလောက်မှာ လေယာဉ်နဲ့ ဗုံးကြဲ လက်နက်ကြီးနဲ့ ပစ်ခတ်ခဲ့လို့ ပြည်သူ ၂ ဦး ဒဏ်ရာရပြီး ဆောင်ဒူလာ ကက်သလစ်ဘုရားကျောင်းနဲ့ စာသင်ကျောင်း ပျက်စီးသွားပါတယ်။
ပစ်ခတ်တိုက်ခိုက်မှုတွေနဲ့ပတ်သက်ပြီး မနက် ၈ နာရီလောက်မှာ Free Burma Ranger အဖွဲ့က ဓာတ်ပုံ ဗီဒီယိုမှတ်တမ်းသွားရောက်ယူနေစဉ် စစ်ကောင်စီဘက်က လက်နက်ကြီးတွေနဲ့ ပစ်ခတ်လို့ မှတ်တမ်းယူနေတဲ့ FBR အဖွဲ့ဝင် ၂ ဦး ဒဏ်ရာရခဲ့ပါတယ်။
ဒဏ်ရသွားသူ အဖွဲ့ဝင်နှစ်ဦးထဲက တဦးမှာ အမျိုးသမီးဖြစ်ပြီး ဦးခေါင်းမှာ ဒဏ်ရာရရှိတဲ့အတွက် စိုးရိမ်ရတဲ့အနေအထား ဖြစ်တယ်လို့ FBR အဖွဲ့တဦးက ပြောပါတယ်။
“ဆေးကုသမှုခံယူနေပါတယ်။ FBR အဖွဲ့ဝင်ပါ။ သတင်းထောက်မဟုတ်ပါဘူး။ နှစ်ယောက်ထိခိုက်တာ” လို့ ပြောပါတယ်။
ဆောင်ဒူလာကျေးရွာမှာ တိုက်ပွဲမဖြစ်ဘဲ စစ်ကောင်စီတပ်က မနက်အစောပိုင်း ၂ နာရီက လေယာဉ်နဲ့ ဗုံးကြဲခဲ့သလို မနက် ၉ နာရီလောက်မှာ အခုလို လက်နက်ကြီးနဲ့ ပစ်ခတ်တာလို့လည်း ဆိုပါတယ်။
မနေ့ မတ်လ ၇ ရက် ၁၂ နာရီလောက်ကလည်း ဒီးမော့ဆိုမြို့နယ် ဒေါငံခါးကျေးရွာနဲ့ ကုန်းသာရွာကို စစ်ကောင်စီလေတပ်က တိုက်လေယာဉ် ၂ စီးနဲ့ ဗုံးကြဲခဲ့လို့ ဒေါငံခါး စာသင်ကျောင်းနဲ့ အဆောက်အအုံတချို့ ပျက်စီးသွားခဲ့တယ်လို့ ဒေသခံတွေ ပြောပါတယ်။
