foodpanda ရဲ့ ရန်ကုန်နဲ့ မန္တလေးမြို့က ပို့ဆောင်သူ (rider) တွေဟာ လုပ်ငန်းခွင်အဆင်မပြေမှုတွေနဲ့ ပတ်သက်ပြီး Black Cross ကမ်ပိန်းကို မေ ၁ ရက်နေ့မှာ ပြုလုပ်ခဲ့ကြပါတယ်။
လုပ်ငန်းခွင်အဆင်မပြေမှုတွေနဲ့ပတ်သက်ပြီး ကမ္ဘာ့အလုပ်သမားနေ့မှာ ဆန္ဒထုတ်ဖော်ရတာလို့ ပို့ဆောင်သူတွေက ပြောပါတယ်။
ပို့ဆောင်သူတဦးက “ဒီနေ့က အလုပ်သမားနေ့ မေဒေးနေ့ကို အထိမ်းအမှတ်အနေနဲ့ ကျနော်တို့က ဒါကိုလုပ်တာ၊သူတို့ပေးထားတဲ့ကြေးကို လုံးဝ လက်မခံဘူးဆိုတာ ဆန့်ကျင်တဲ့အကြောင်းပေါ့နော်” လို့ ပြောပါတယ်။
ပြီးခဲ့တဲ့ မတ် ၁၆ ရက်က ပို့ဆောင်ခတွေ မှားယွင်းတွက်ချက်ခဲ့တဲ့နောက်မှာ အစားအသောက်ပို့ဆောင်သူတွေက ဆက်လက်မပို့ဘဲ ရပ်နားထားကြဖို့ တိုင်ပင်ခဲ့ပြီး ရန်ကုန်အပါအဝင် မြို့တချို့မှာ ရပ်နားခဲ့ကြပါတယ်။
ကုမ္ပဏီဘက်က လျှော့ချလိုက်တဲ့ အနိမ့်ဆုံး အော်ဒါကြေး ၅၈၀ ကို Rider တွေက လက်မခံနိုင်ဘဲ လုပ်အားခငွေကို အနည်းဆုံး ၆၇၀ ကျပ်ကနေ စတင်ပြီး ပို့ဆောင်ရမယ့် ခရီးအကွာအဝေးပေါ်မူတည်တိုးမြှင့်ပေးဖို့၊ ပို့ဆောင်နေတဲ့အလုပ်သမားတွေကို ကွန်ပျူတာစနစ်နဲ့ ထိန်းချုပ်နေတဲ့ တင်းကျပ်လွန်းတဲ့ စည်းကမ်းချက်တွေကို လျှော့ချပေးဖို့၊ ပို့ဆောင်သူတွေ အလုပ်ချိန်အတွင်း ထိခိုက်မှု တခုခုဖြစ်ခဲ့ရင် ကုမ္ပဏီဘက်က တာဝန်ယူ တာဝန်ခံပေးဖို့၊ ပို့ဆောင်သူတွေက အလုပ်နားလိုရင် တပတ်မှာ တရက် နားခွင့်ပေးဖို့၊ စည်းကမ်းသတ်မှတ်ချက်တွေ ပြောင်းလဲချင်ရင် ကြိုတင် အသိပေးဖို့၊ ပို့ဆောင်သူတွေ တခုခုဖြစ်ရင် ကုမ္ပဏီကို တိုက်ရိုက်ဆက်သွယ်နိုင်ဖို့အတွက် ဖုန်းနံပါတ် တခုထားပေးဖို့နဲ့ သွားရောက်ပို့ဆောင်ရမယ့် ခရီးကို သတ်မှတ်ရာမှာ Google မြေပုံနဲ့ တိုင်းတာပြီး တွက်ချက်ပေးဖို့တို့ကို ပို့ဆောင်သူတွေဘက်က တောင်းဆိုထားပါတယ်။
foodpanda Myanmar ရဲ့ တာဝန်ရှိသူတယောက်ကတော့ ပို့ဆောင်သူတွေ တောင်းဆိုချက်ကို foodpanda Myanmar ရဲ့ ဆုံးဖြတ်ချက်တခုတည်း နဲ့ လုပ်လို့မရတဲ့အတွက် နည်းပညာအပိုင်း တာဝန်ယူထားတဲ့ regional team ကိုတင်ပြထားပြီး ဆက်သွယ်ဆောင်ရွက်နေပြီး regioanl team ဘက်ကနေ ပြန်လည်သုံးသပ်မှုတွေလုပ်ပြီး အဘက်ဘက်ကနေ အဆင်ပြေနိုင်တဲ့ ပြောင်းလဲမှုတွေ လုပ်ပေးသွားမှာဖြစ်ကြောင်း၊ ဒီလိုနည်းပညာပိုင်းဆိုင်ရာ အပြောင်းအလဲမျိုးလုပ်ဖို့ အချိန်ယူပြင်ဆင်လုပ်ကိုင်ရတာကြောင့် rider တွေအနေနဲ့ အနည်းငယ်စောင့်ဆိုင်းပေးဖို့ ပြီးခဲ့တဲ့ ဧပြီ ၂၀ ရက်နေ့က တွေ့ဆုံမှုမှာ မေတ္တာရပ်ခံထားတယ်လို့ ပြီးခဲ့တဲ့အပတ်က ပြောဆိုထားပါတယ်။
ပို့ဆောင်သူတွေကတော့ တောင်းဆိုမှုတွေ မရမချင်း ဆက်လက်တောင်းဆိုမှုတွေ ပြုလုပ်နေမှာဖြစ်ပြီး customers တွေနဲ့ အလုပ်သမားအသင်းအဖွဲ့တွေ့ကလည်း ပူးပေါင်းပါဝင်ပေးကြဖို့ တိုက်တွန်းထားပါတယ်။
အစားအသောက်ပို့တဲ့ဝန်ဆောင်မှု Foodpanda ကုမ္ပဏီကို အစားသောက်ပို့ဆောင်ပေးတဲ့ rider တွေက အလုပ်မဆင်းဘဲ ဆန္ဒပြခဲ့ကြပြီးနောက် ကုမ္ပဏီဘက်က အော်ဒါကြေးတိုးမြှင့်ပေးမယ်လို့ ကြေညာပါတယ်။
ပြီးခဲ့တဲ့ ရက်ပိုင်းက ပို့ဆောင်ခရမယ့် အော်ဒါကြေးကို တွက်ချက်တဲ့စနစ်က ချို့ယွင်းခဲ့ပြီးနောက် အခုလိုဖြစ်လာခဲ့တာလို့ ကုမ္ပဏီဘက်က အကြောင်းပြပါတယ်။
ဒါနဲ့ပတ်သက်ပြီး ရန်ကုန်မြို့က စက်ဘီးနဲ့ ပို့ဆောင်သူတယောက်က “အဲဒီနေ့ (မတ် ၁၆ ရက်) ကျနော်က မနက် ၇ နာရီအလုပ်ဆင်းရမယ်။ လိုင်းပေါ်မှာ ၆ နာရီခွဲကတည်းက ရှိနေလိုက်တယ်။ ၆ နာရီ ၄၅ မိနစ်မှာ အော်ဒါတခုဝင်လာတယ်။ တာမွေ မေတ္တာညွန့် ဧရာဝတီ ဒေါ်စောဆိုင်ကနေ ရန်ကင်းကို ၃၇၅ ကျပ်နဲ့။ ကျနော်ငြင်းလိုက်တယ်။ နောက်တော်တော်ကြာတော့ အော်ဒါတခုထပ်ဝင်တယ်။ အဲဒါကတော့ ၈၀၀ နဲ့။ အဲဒီနေ့က အဲဒီတခုပဲ ရလိုက်တယ်” လို့ ပြောပါတယ်။
Foodpanda တာဝန်ရှိသူတယောက်ကတော့ “မတ်လ ၁၆ ရက်နေ့ မနက် ၇ နာရီကနေ ၇ နာရီခွဲ အချိန်အတွင်း တချို့မြို့က rider တွေအတွက် system ကနေ အော်ဒါကြေးတွေ မှားယွင်းစွာ တွက်ချက်မှုများဖြစ်ပေါ်ခဲ့ကြောင်း ကျနော်တို့သိခဲ့ရပါတယ်။ သိသိချင်းအမြန်ဆုံး ပြန်လည်ပြင်ဆင်ခဲ့ပြီး rider တွေအတွက် လျော့နည်းသွားတဲ့ အော်ဒါကြေးတွေကို ပြန်လည်တွက်ချက်ပေးပြီး ပုံမှန် လစာဝင်မယ့်အချိန်မှာ တခါတည်း ထည့်သွင်းပေးသွားမှာဖြစ်ပါတယ်။ ပြီးခဲ့တဲ့ ဖေဖော်ဝါရီ ၂၂ ရက်နေ့မှာလည်း အလားတူ system ချို့ယွင်းမှုမျိုးဖြစ်ခဲ့ပြီး သက်ဆိုင်ရာ ဌာနတွေကနေ အမြန်ဆုံးပြန်လည်ဖြေရှင်းပေးခဲ့ပါတယ်။ system က လိုအပ်ချက်တွေကို ပိုမိုကောင်းမွန်လာအောင် အစဉ်တစိုက် ကြိုးစားလုပ်ဆောင်နေပါတယ်။ အခုလို ချို့ယွင်းချက်ကြောင့် အဆင်မပြေဖြစ်သွားတဲ့ rider တွေကိုလည်း မေတ္တာရပ်ခံလိုပါတယ်” လို့ ထုတ်ပြန်ပြောဆိုထားပါတယ်။
Foodpanda က ပို့ဆောင်သူတယောက်ကတော့ အရင်တခါမှားယွင်းခဲ့တုန်းက နီးသည်ဖြစ်စေ ဝေးသည်ဖြစ်စေ အော်ဒါတခုကို ကျပ် ၅၀၀ နှုန်းနဲ့ပဲ ပေးခဲ့တာဖြစ်ပြီး လစာဝင်ချိန်မှာ ပြင်ဆင် ဖြည့်ပေးခဲ့တယ်လို့ ပြောပါတယ်။
ပြီးခဲ့တဲ့ မတ် ၁၆ ရက်က မှားယွင်းတွက်ချက်ခဲ့တဲ့နောက်မှာ အစားအသောက်ပို့ဆောင်သူတွေက ဆက်လက်မပို့ဘဲ ရပ်နားထားကြဖို့ တိုင်ပင်ခဲ့ပြီး ရန်ကုန်အပါအဝင် မြို့တချို့မှာ ရပ်နားခဲ့ကြပါတယ်။ ဒီလိုဖြစ်နေတာကို ကုမ္ပဏီက မဖြေရှင်းခဲ့ဘဲ ပို့ဆောင်သူအသစ်တွေခေါ်ယူဖို့ ကြိုးစားခဲ့တာကိုလည်း တွေ့ရပါတယ်။
“ကျနော်တို့ပို့ရတဲ့ မင်္ဂလာတောင်ညွန့်၊ တာမွေ၊ ဗဟန်း၊ ရန်ကင်းမြို့နယ်တို့ထဲမှာ rider ၈၀၀ လောက်ရှိတယ်။ အခု ကျနော်တို့ မပို့ဘဲနားထားကြတယ်။ လက်ရှိမှာ ပို့နေတာ ၁၀ ယောက်တောင်မရှိတော့ဘူး။ ဒီလိုကာလမှာ ရုံးရှေ့မှာ သွားပြောရင်လည်း ဘာမှရမှာမဟုတ်ဘူးလေ။ ဒီတိုင်းဆို နှစ်ဦးနှစ်ဖက် ပျက်စီးသွားလိမ့်မယ်။ ဇုန်ခေါင်းဆောင်တွေရှိတယ်။ သူတို့က တဆင့် ညှိနှိုင်းမှ ပြေလည်မှာပေါ့။ ခုထိတော့ အဲလိုဆွေးနွေးတာ မတွေ့ရသေးဘူး” လို့ ပို့ဆောင်သူ တယောက်က ပြောပါတယ်။
foodpanda ဟာ မြန်မာနိုင်ငံက မြို့ပေါင်း ၁၉ မြို့မှာ စားသောက်ဆိုင်ပေါင်း ၃၀,၀၀၀ ကျော်နဲ့ လက်တွဲလုပ်ကိုင်နေပြီး အလွတ်တမ်းသဘော သီးခြားလွတ်လပ်တဲ့ rider ပေါင်း ၈,၀၀၀ ကျော်နဲ့ ပို့ဆောင်နေတာဖြစ်ပါတယ်။
အခုလို ပြဿနာတွေဖြစ်ပြီးနောက် အော်ဒါကြေးတိုးမြှင့်ပေးဖို့နဲ့ ဆိုင်ကယ်နဲ့ ပို့ရတဲ့မြို့တွေမှာ ဓာတ်ဆီအပိုသုံးရတာအတွက် အော်ဒါကြေးတိုးပေးဖို့ သက်ဆိုင်ရာမြို့အသီးသီးက မန်နေဂျာတွေက အသိပေးလိမ့်မယ်လို့ ထုတ်ပြန်ထားပါတယ်။