မြန်မာပြည်တွင်း အကူအညီလိုအပ်နေတဲ့ပြည်သူတွေအတွက် အလှူခံပေးသူတွေရဲ့KPay အကောင့်နဲ့ KBZ ဘဏ်အကောင့်တချို့ကိုKBZ ဘဏ်က  ထိန်းချုပ်ပိတ်ထားလိုက်ပြီးတဲ့ နောက်မှာ Google PlayStore နဲ့ iOS Appstore တွေမှာ KBZ Pay ရဲ့ rating တွေဟာ ရက်ပိုင်းအတွင်းမှာ သိသိသာသာ ကျဆင်းသွားပါတယ်။ 

အရင်က Rating 4 အထက်မှာရှိခဲ့တဲ့ KPay ဟာ Google Playstore မှာ Rating 1.1 ပဲ ရှိတော့သလို iOS Appstore မှာတော့ Rating 3 ရှိနေပါသေးတယ်။ 

အခုလို Rating လျော့ကျတာဟာ အထွေအထူး သိသိသာသာဘဏ်ကို မထိခိုက်ပေမဲ့ အဲဒီလို လျော့ကျတဲ့ Negative Review တွေဟာ အသုံးပြုသူတွေရဲ့ အသံတွေကို ကိုယ်စားပြုတဲ့သဘော ဖြစ်ပါတယ်။

ပြီးခဲ့တဲ့ ရက်ပိုင်းအတွင်းမှာ စစ်ဘေးရှောင်တွေ၊ CDM တွေနဲ့  ပရဟိတလုပ်ငန်းတွေကို လှူဒါန်းနေတဲ့ KPay၊ Wave Money ၊ KBZ ဘဏ်အသုံးပြုသူတချို့ရဲ့ အကောင့်တွေ ပိတ်ခံလိုက်ရတာ ဖြစ်ပါတယ်။ ကျပ်သိန်းထောင်ချီရှိနေတဲ့ ဘဏ်အကောင့်တချို့လည်း အပိတ်ခံခဲ့ရတယ်လို့ ဆိုပါတယ်။ 

ဒီလို အကောင့်တွေ အပိတ်ခံရပြီးတဲ့နောက်မှာ ဒီမိုကရေစီအရေးလှုပ်ရှားသူတွေ၊ ဘဏ်အသုံးပြုသူတွေဟာ KBZ Pay ကို Rating ကျစေဖို့ Appstore တွေမှာ ကြယ်ပွင့်တစ်ပွင့်ပဲ ပေးတာ၊ KBZ ဘဏ်ကို စစ်ကောင်စီက ထိန်းချုပ်ထားကြောင်း၊ မယုံကြည်ရကြောင်း မှတ်ချက်ရေးတာတွေ လုပ်လာကြတာကို တွေ့ရပါတယ်။ 

အခုလက်ရှိ Google Playstore က KBZ Pay ရဲ့ အောက်မှာ မှတ်ချက်ရေးသားသူပေါင်း လေးသောင်းကျော်ရှိနေပါတယ်။  KBZ ဘဏ်ဟာ ပြည်တွင်း ဘဏ်လုပ်ငန်းဈေးကွက်မှာ ဈေးကွက် ဝေစု ၄၀ ရာခိုင်နှုန်းကျော်ရရှိထားတဲ့ ပုဂ္ဂလိကဘဏ်တစ်ခုလည်းဖြစ်ပါတယ်။

မန္တလေးတိုင်း၊ မိုးကုတ်မြို့မှာ ဧပြီ ၂၆ ရက်နေ့ကစပြီး ကမ္ဘောဇ (KBZ)ဘဏ်ခွဲတချို့  မနက် ၉ နာရီခွဲကနေ ၁၂ နာရီအထိ  ပြန်လည်ဖွင့်သွားမှာ ဖြစ်တယ်လို့သိရပါတယ်။

ဒီနေ့ မနက် ၇ နာရီဝန်းကျင်ကစပြီး ဘဏ်မဖွင့်ခင်ကတည်းက  ငွေထုတ်မယ့်ပြည်သူတွေ ဘဏ်ရှေ့ တွေ့မှာ စည်ကားနေတယ်လို့ ဒေသခံတစ်ဦးက ပြောပါတယ်။

ဘဏ်တံခါးတွေကိုတော့ ပိတ်ထားပြီး  လူတစ်ဦးကို တပတ်မှာ ငွေကျပ် ၅ သိန်းသာ  ထုတ်ခွင့်ရှိကာ တပတ်စာအတွက် တိုကင် ၁၅၀ သာ ထုတ်ပေးမှာဖြစ်တယ်လို့သိရပါတယ်။

လက်ရှိ မိုးကုတ်မြို့အရှေ့ပိုင်း ဘဏ်ခွဲ ၁ နဲ့ အနောက်ပိုင်းဘဏ်ခွဲ ၂ သာလျှင် ဘဏ်ဖွင့်နေတာ ဖြစ်တယ်လို့သိရပါတယ်။

Photo Credit