မန္တလေးတိုင်း၊ ကျောက်ဆည်မြို့နယ်၊ သံရွာရဲစခန်းကို ကျောက်ဆည်ခရိုင် ကာကွယ်ရေးတပ်ဖွဲ့ (KDDF) နဲ့အတူ မဟာမိတ်ပူးပေါင်းအဖွဲ့တွေက ဧပြီ ၁၉ ရက် မနက် ၄ နာရီမှာ ပစ်ခတ်တိုက်ခိုက်ခဲ့တယ်လို့ KDDF က ထုတ်ပြန်ပါတယ်။
အဆိုပါတိုက်ခိုက်မှုကို ကျောက်ဆည်ခရိုင်ကာကွယ်ရေးတပ်ဖွဲ့ (KDDF)၊ စဉ့်ကိုင် LPDF၊ မြစ်ငယ် LPDF နဲ့ တပ်ကုန်း LPDF တို့ ပူးပေါင်းတိုက်ခိုက်ခဲ့တာပါ။
တိုက်ခိုက်မှုအတွင်း သံရွာရဲစခန်းအတွင်းရှိ လိုင်းခန်းတွေ မီးလောင်ပျက်စီးသွားပြီး လူထိခိုက်သေဆုံးမှု အသေးစိတ်ကိုတော့ မသိရသေးပါဘူး။
စဉ့်ကိုင် LPDF တာဝန်ရှိသူတဦးက “မောင်းပြန်သေနတ် ပစ်ဖူးပေမဲ့၊ သေနတ်မှာ M9 တပ်ပြီး မပစ်ဖူးတဲ့ အဖွဲ့သားတွေက အလုအယက် ပစ်ခတ်ကြလို့ စစ်(--) ရဲ(--) တွေ ပစ်မှတ်ရှေ့မှာ ကိုးရိုးကားယား ငရဲကျတဲ့အလား ပြေးလွှားနေကြပါတယ်” လို့ ပြောပါတယ်။
ကျောက်ဆည်ခရိုင် ကာကွယ်ရေးတပ်ဖွဲ့မှ တာဝန်ရှိသူတဦးက ဒေသတွင်း PDF တွေ တဖွဲ့နဲ့တဖွဲ့ ချိတ်ဆက်ပြီး မြို့ပြတော်လှန်ရေး အရှိန်မြှင့်ဖို့ ရှိတာကြောင့် ပြည်သူတွေအနေနဲ့ မိမိပတ်ဝန်းကျင်ရှိ စစ်ကောင်စီနဲ့သက်ဆိုင်တဲ့ သတင်းအချက်အလက်တွေကို Local PDF တွေရဲ့ တရားဝင် စာမျက်နှာတွေမှာ သတင်းပေးခြင်းနဲ့ ထုတ်ပြန်ကြေညာချက်တွေကိုလည်း လိုက်နာကြဖို့ မေတ္တာရပ်ခံထားပါတယ်။
မန္တလေးတိုင်း၊ ကျောက်ဆည်ခရိုင်၊ ကျောက်ဆည်မြို့မှာ စစ်ကောင်စီတပ်စွဲထားတဲ့ ခရိုင် အထွေထွေအုပ်ချုပ်ရေးမှူးရုံးကို လက်ပစ်ဗုံးနဲ့ တိုက်ခိုက်ခဲ့တယ်လို့ ကျောက်ဆည်ခရိုင် ကာကွယ်ရေးတပ်ဖွဲ့ (KDDF) က ထုတ်ပြန်ထားပါတယ်။
မတ်လ ၃ ရက် မနက် ၁၀ နာရီခွဲအချိန်က စစ်ကောင်စီတပ်သားတွေ အခိုင်အမာတပ်စွဲထားတဲ့ ကျောက်ဆည်ခရိုင်ထွေအုပ်ရုံးကို လက်ပစ်ဗုံး ၂ လုံး ပစ်ထည့်တိုက်ခိုက်ခဲ့တာလို့ KDDF တာဝန်ရှိသူက ဒီဗွီဘီကို ပြောပါတယ်။
ထွေအုပ်ရုံးရှေ့မှာ အစောင့် စစ်သား ၂ ယောက်ရှိနေပြီး လက်ပစ်ဗုံးနဲ့ တိုက်ခိုက်ခံရပြီးနောက် ရမ်းသန်းပစ်ခတ်တာတွေ၊ လမ်းပိတ်စစ်ဆေးတာတွေ ပြုလုပ်ခဲ့တာကြောင့် ထိခိုက်ပျက်စီးမှု အခြေအနေကို မသိရသေးကြောင်း၊ ပြည်သူ့ကာကွယ်ရေးတပ်ဖွဲ့တွေအနေနဲ့ ဘေးကင်းစွာ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။
ဒါ့အပြင် မတ် ၂ ရက် မနက် ၆ နာရီအချိန်ကလည်း စဥ့်ကိုင်မြို့နယ်၊ မြောက်ကျောက်မိုင်းကျေးရွာ အနောက်ဘက်မှာရှိတဲ့ စစ်တပ်ပိုင် မိုင်တဲလ် တာဝါတိုင်အတွင်းရှိ စက်တွေကို မိုင်းအကြီး ၃ လုံး နဲ့ ဖောက်ခွဲတိုက်ခိုက်ခဲ့တယ်လို့ KDDF က ထုတ်ပြန်ထားပါတယ်။
