ကရင်ပြည်နယ်၊ ကြာအင်းဆိပ်ကြီးမြို့နယ်မှာ စစ်ကောင်စီတပ်စခန်းတခုဖြစ်တဲ့ ကွီလုံတိုင်တပ်စခန်းကို KNLA တပ်မဟာ ၆ တပ်ရင်း  ၁၇ ပူးပေါင်းအဖွဲ့က အောက်တိုဘာ ၂၅ ရက်ညမှာ သိမ်းပိုက်နိုင်ခဲ့တယ်လို့ ကရင်တပ်မှူးတယောက်က ဒီဗွီဘီကို ပြောပါတယ်။

စစ်ဆင်ရေးကွပ်ကဲရေးမှုဌာနချုပ် စကခ ၁၃ လက်အောက်ခံ ခမရ ၃၃၉  ရဲ့အခြေစိုက်စခန်းဖြစ်တဲ့ ကျိုက်ဒုံမြို့နယ်ခွဲ အဇင်းကျေးရွာအုပ်စုရှိ  ကွီလုံတိုင်စခန်းသိမ်းတိုက်ပွဲမှာ  စစ်ကောင်စီတပ်ဖွဲ့ဝင် ၁၇ ဦးဖမ်းဆီးရမိပြီးလက်နက်ချအလင်းဝင်းတဲ့သူတွေနဲ့ဆိုရင် စုစုပေါင်း အယောက် ၃၀ ကျော်ရှိတယ်လို့လည်း ပြောပါတယ်။

ဒါ့အပြင် စက်သေနတ်မျိုးစုံ  ၄၃ လက်၊  လက်ပစ်ဗုံး ၂ လုံးနဲ့ လက်နက်ခဲယမ်း ကျည်ဆန်တချို့အပါအဝင်  စစ်သုံးပစ္စည်းတွေလည်း သိမ်းဆည်းနိုင်ခဲ့ပါတယ်။

ဖမ်းမိတဲ့ စစ်ကောင်စီတပ်သားတွေကို စစ်ကောင်စီတပ်ထံ ပြန်လည်လွဲပြောင်းပေးမှာမဟုတ်ဘဲ KNLA သက်ဆိုင်ရာ ဌာနအဆင့်ဆင့်က အရေးယူသွားမယ်လို့ တပ်မှူးကပြောပါတယ်။

အဆိုပါတိုက်ပွဲမှာ KNLA တပ်ရင်း ၁၇၊ KNLA တပ်ရင်း ၁၈ ၊ KNLA တပ်ရင်း ၂၇ ၊ အထူးစစ်ဆင်ရေးတပ်ဖွဲ့ (SOF) နဲ့ Federal Win Drone တပ်ဖွဲ့တွေ  ပါဝင်တိုက်ခိုက်ခဲ့ကြတာဖြစ်ပြီး စစ်ကောင်စီတပ်ကလည်း လေကြောင်းကနေ ပစ်ကူပေးတိုက်ခိုက်ခဲ့ပါတယ်။

အဆိုပါတိုက်ပွဲအပြီးမှာ မြဝတီ-ကော့ကရိတ်အာရှလမ်း မြဝတီမြို့နယ် ကွမ်းခြံကွေ့အနီးရှိ စားသောက်ဆိုင်တဆိုင်မှာ စားစရာဝယ်နေတဲ့ စစ်ကောင်စီတပ်ဖွဲ့ဝင်  ၄ ယောက်ကို  KNLA အဖွဲ့ဝင် ၄ ယောက်က ဆိုင်ကယ်နှစ်စီးနဲ့ ဆိုင်အတွင်းဝင်ရောက်ပစ်ခတ်ရာမှာ စစ်ကောင်စီတပ်သား ၃ယောက် နေရာမှာတင် သေဆုံးပြီးတယောက်ကတော့ စိုးရိမ်ဒဏ်ရာနဲ့ ထွက်ပြေးသွားလို့ လက်နက်ငယ် ၄ လက် သိမ်းဆည်းရမိခဲ့ပါတယ်။

ကရင်ပြည်နယ်အတွင်း အာရှလမ်းမှာ ခရီးသွားလာသူတွေအနေနဲ့  လမ်းခရီးမှာ စစ်ကောင်စီတပ်တွေလိုက်ပါခြင်း ပူးတွဲသွားလာခြင်းတွေကို ရှောင်ကြဖို့နဲ့ စစ်ရေးသတင်းတွေကို နားဆွင့်ထားဖို့ KNLA ပူးပေါင်းတပ်တွေက အသိပေးထားပါတယ်။

ကရင်ပြည်နယ်၊ မြဝတီမြို့နယ်၊ ဒေါနတောင်အရှေ့ခြမ်း သေ့ဘောဘိုးရွာအနီးရှိ စစ်ကောင်စီတပ်စခန်းကို ကရင်အမျိုးသားလွတ်မြောက်ရေးတပ်မတော် KNLA၊ KNDO နဲ့ PDF  ပူးပေါင်းတပ်တွေက ဒီကနေ့ မေ ၁၈ ရက် မွန်းလွဲပိုင်းလောက်က တိုက်ခိုက်သိမ်းပိုက်နိုင်ခဲ့တယ်လို့ တိုက်ပွဲမှာပါဝင်တဲ့ စစ်မြေပြင်သတင်းရင်းမြစ်က ပြောပါတယ်။

စခန်းသိမ်းတိုက်ပွဲမှာ စစ်ကောင်စီတပ်ဘက်က ၁၀ ဦးသေဆုံး၊ ၄ ဦးအရှင်ဖမ်းဆီးရမိ၊ ၂ ဦး မြေမြှုပ်မိုင်းနင်းမိခဲ့ကာ လက်နက် ကျည်ဆန်အကြီးအငယ် အများအပြား သိမ်းဆည်းရမိခဲ့တယ်လို့ KNLA ဘက်က ပြောပါတယ်။

တိုက်ပွဲမှာ စစ်ကောင်စီလေတပ်က တိုက်လေယာဉ်နဲ့ လာရောက်ပစ်ကူပေး ဗုံးကြဲတိုက်ခိုက်ခဲ့လို့  KNLA ဘက်က လည်း တပ်သား ၂ ယောက် ကျဆုံးပြီး  ၄ ဦးထိခိုက်ဒဏ်ရာရရှိသွားခဲ့ပါတယ်။

သေ့ဘောဘိုးစခန်းကို သိမ်းဆည်းပြီးနောက် စခန်းတွင်း နေထိုင်တဲ့ တဲလေးတွေကို မီးရှို့ဖျက်ဆီးခဲ့ပြီး  အဆိုပါ စခန်းမှ KNLA ပူးပေါင်းတပ်ဖွဲ့တွေပြန်လာထွက်ခွာခဲ့တယ်လို့သိရပါတယ်။

အဆိုပါ တပ်စခန်းသိမ်းပိုက်ရရှိခဲ့တယ်လို့  KNDO ဗိုလ်မှူးစလုံးကလည်း ထပ်မံအတည်ပြုပြောဆိုခဲ့ပါတယ်။ 

KNLA ပူးပေါင်းတပ်တွေက တပ်စခန်းကို ဝင်ရောက်တိုက်ခိုက်သိမ်းပိုက်နေစဉ် စစ်ကောင်စီက လေကြောင်းကနေ တိုက်ခိုက်ရေး လေယာဉ် ၃ စီးနဲ့ ရဟတ်ယာဉ် ၁ စီးက လာရောက် ဗုံးကြဲပစ်ခတ်တိုက်ခိုက်ခဲ့တယ်လို့ တောင်ပိုင်တိုင်းစစ်ရေးနယ်မြေ၊ ထောက်ပို့တာဝန်ခံ ကိုရဲမင်းက ဆိုပါတယ်။

”အခုနောက်ဆုံးသတင်းအရ စခန်းကိုတော့ရသွားပြီးလို့ သိရတယ်။ အခု လုံခြုံရေးအရဖြစ်မယ် သတင်းမထုတ်ပြန်သေးတာက။ အခုတောင် လေယာဉ်နဲ့ တောက်လျှောက်လာပစ်နေတယ်”

စခန်းသိမ်းတိုက်ပွဲကြောင့် သေ့ဘောဘိုးရွာသားတွေနဲ့ ဆုံဆည်းမြိုင်ရွာသားတွေ ၃၀၀ လောက်  ထိုင်းနိုင်ငံ တာခ်ရိုင် ဖုတ်ဖမြို့ မောကိုးထိုင်းနဲ့သစ်ဘောဘိုးထိုင်းရွာဘက်ကို စစ်ဘေးရှောင်  ထွက်ပြေးတိမ်းရှောင်သွား ကြပါတယ်။

ကရင်အမျိုးသားအစည်းအရုံး(ကေအန်ယူ)၊ တပ်မဟာ ၆ နယ်မြေကို ကျူးကျော်ဝင်ရောက်လာတဲ့အတွက် စစ်ကောင်စီတပ်တွေနဲ့ KNLA ၊ KNDO၊ PDF ပူးပေါင်းတပ်တွေနဲ့ နေ့စဉ်လိုလိုတိုက်ပွဲတွေဖြစ်ပွားနေသလို  စစ်ကောင်စီတပ်စခန်းတွေကို ပူးပေါင်းတပ်ဖွဲ့ဝင်တွေက တိုက်ခိုက်သိမ်းယူနိုင်ခဲ့ပါတယ်။

ဒါအပြင် KNLA ပူးပေါင်းတပ်ဖွဲတွေက စစ်ကောင်စီတပ်ဖွဲ့ဝင်အရာရှိအပါအဝင် အရှင်ဖမ်းဆီးမိတာ၊ လက်နက်ခဲယမ်းမျိုးစုံ သိမ်းပိုက်ရယူနိုင်ခဲ့သလို တိုက်ပွဲတွေအတွင်း တပ်ရင်းမှူး အပါအဝင် သေဆုံးသူ၊ ဒဏ်ရာရရှိသူအများအပြားရှိခဲ့ပါတယ်။

နှစ်ဖက်တိုက်ပွဲတွေအတွင်း  စစ်ကောင်စီနဲ့ ပူးပေါင်းတပ်တွေက ရွာတွေကို လက်နက်ကြီးတွေနဲ့ ပစ်ခတ်တာ၊ လေယာဉ်တွေနဲ့ ဗုံးကြဲတာအပြင် အရပ်သားတွေကို လူသားဒိုင်းအဖြစ် ခေါ်ဆောင်တာတွေကြောင့် စိုးရိမ်ကြောက်လန့်ပြီး ထွက်ပြေးတိမ်းရှောင်နေရပါတယ်။

ကေအန်ယူထိန်းချုပ်ရာနယ်မြေအတွင်း အရပ်သားပြည်သူ ၇၀,၀၀၀ ကျော်ဟာ နေအိမ်စွန်ခွာပြီး တော၊ တောင်၊ လျှိုမြောင်တွေနဲ့ နယ်စပ်သောင်းရင်းမြစ်တလျှောက် ထွက်ပြေးတိမ်းရှောင်နေရပါတယ်။