ကမ္ဘောဇဘဏ်အကောင့်တွေထဲက ငွေတွေကို လိမ်လည်ထုတ်ယူသွားတဲ့ နိုင်ဂျီးရီးယား နိုင်ငံသား ၅ ယောက်နဲ့ မြန်မာ ၆ ယောက်ကို ဖမ်းဆီးလိုက်တယ်လို့ စစ်ကောင်စီပြန်ကြားရေးလက်အောက်ခံ ဒီနေ့ထုတ် သတင်းစာတွေမှာ ဖော်ပြပါတယ်။
ဖေဖော်ဝါရီ ၆ ရက်က ရန်ကုန်၊ သင်္ဃန်းကျွန်းမြို့နယ်နေ အမျိုးသမီး တယောက်က သူ့ရဲ့ ကမ္ဘောဇဘဏ်အကောင့်ထဲက ငွေကျပ် သိန်း ၁၀၂၀၊ ဖေဖော်ဝါရီ ၉ ရက်နေ့မှာ ကမာရွတ်မြို့နယ်နေ အမျိုးသမီး တယောက်က သူ့ရဲ့ ကမ္ဘောဇ ဘဏ်အကောင့်ထဲက ငွေကျပ် သိန်း ၃၇၀ ကို လိမ်လည်ထုတ်ယူခံရတယ်လို့ ရဲစခန်းတွေမှာ အမှုဖွင့်တိုင်ကြားလာခဲ့တယ်လို့ ဆိုပါတယ်။
ဒါကြောင့် အထူးအမှုစစ်အဖွဲ့ ဖွဲ့ပြီး သက်ဆိုင်ရာဘဏ်နဲ့ပူးပေါင်းစုံစမ်းတဲ့အခါ ငွေတွေလွှဲပြောင်းသွားခဲ့တဲ့ ဘဏ်အကောင့်ပိုင်ရှင် အမျိုးသား ၄ ယောက်နဲ့ အမျိုးသမီး ၂ ယောက်ကို ဖေဖော်ဝါရီ ၁၂ ရက်နေ့မှာ ဖမ်းမိခဲ့တယ်လို့ ဆိုပါတယ်။
ဖမ်းမိသူတွေက သူတို့ဟာ ဘဏ်အကောင့်တွေဖွင့်ပြီး တခုစီကို ငွေတသောင်းနဲ့ ရောင်းခဲ့တာလို့ ထွက်ဆိုကြပြီး ဖေဖော်ဝါရီ ၁၆ ရက်နေ့မှာတော့ ငွေကြေးလိမ်လည် ထုတ်သူတွေဖြစ်တဲ့ နိုင်ဂျီးရီးယားနိုင်ငံသား လင်မယားကို သန်လျင်မြို့နယ်၊ Star City အိမ်ရာမှာ သက်သေခံတွေနဲ့အတူ ဖမ်းမိတယ်လို့ ထုတ်ပြန်ထားပါတယ်။
သူတို့ကတဆင့် ငွေကြေးလိမ်လည်ရာမှာ ပူးပေါင်းပါဝင်သူတွေဖြစ်တဲ့ နိုင်ဂျီးရီးယား နိုင်ငံသား ၃ ယောက်ကိုလည်း Star City အိမ်ရာမှာ ထပ်ဖမ်းမိတယ်လို့လည်း ဆိုပါတယ်။
သူတို့ကို စစ်ဆေးချက်တွေအရ ဖေ့စ်ဘွတ်ခ်အကောင့်နဲ့ ပေ့ဂျ်တွေကနေ KBZ Pay Level အဆင့်မြှင့်ပေးမယ်ဆိုတဲ့ ပို့စ်တွေတင်တာ၊ ဖုန်းနံပါတ်တွေကို KBZ Pay Application မှာ စစ်ဆေးကြည့်ပြီး အကောင့်ဖွင့်ထားတယ်ဆိုရင် ဘဏ်ဝန်ထမ်းယောင်ဆောင်ပြီး ဆက်သယ်တာ၊ KBZ Bank Email Account အတုတွေနဲ့ဆက်သွယ်တာစတဲ့ နည်းလမ်းတွေနဲ့ လိမ်လည်ခံရမယ့်သူတွေကို ရှာဖွေကြတယ်လို့ ဆိုပါတယ်။
အဲဒီနောက် လိမ်လည်ခံရမယ့်သူရဲ့ ဖုန်းနံပါတ်နဲ့ KBZ Pay Application မှာ Login ဝင်ထားချိန်မှာ လိမ်လည်ခံရမယ့်သူကို ဆက်သွယ်ပြီး သူ့ဖုန်းထဲကို ရောက်လာတဲ့ တခါသုံးကုဒ်နံပါတ်ကို တောင်းတယ်လို့ ဆိုပါတယ်။ အဲဒီနံပါတ်ကို ထည့်သွင်း လိုက်ရင်တော့ လိမ်လည်ခံရမယ့်သူရဲ့ ဘဏ်အကောင့်ကို လိမ်လည်မယ့်သူတွေက ထိန်းချုပ်နိုင်သွားပြီ ဖြစ်ပါတယ်။
ပြီးတော့ အဲဒီ ဘဏ်အကောင့်တွေထဲကနေ လိမ်လည်သူတွေဝယ်ထားတဲ့ အကောင့်တွေထဲကို ငွေလွှဲပြောင်းယူတယ်လို့ ဆိုပါတယ်။
ဖမ်းဆီးရထားတဲ့တရားခံတွေကို ထိထိရောက်ရောက် အရေးယူသွားမှာဖြစ်ပြီး မြန်မာနိုင်ငံပြင်ပကိုရောက်နေတဲ့ ပူးပေါင်းပါဝင်ကျူးလွန်သူ တရားခံတွေကိုလည်း နိုင်ငံတကာရဲအဖွဲ့အစည်းတွေနဲ့ ချိတ်ဆက်ဖော်ထုတ်အရေးယူဖို့ ဆောင်ရွက်နေတယ် လို့လည်း ဆိုပါတယ်။
ငွေဝင်ငွေထွက်များတဲ့ wave pay/ kpay အကောင့်တွေအား ရဲစခန်းခေါ်ယူစစ်ဆေးဖို့ စစ်တပ်က အဖွဲ့အစည်းအသီးသီးကို ညွှန်ကြားထားတယ်လို့ နီးစပ်သူတွေက ပြောပါတယ်။
NUG၊ CRPH၊ CDM နဲ့ PDF တွေကို လှူဒါန်းတာ မပြုလုပ်နိုင်ဖို့ စစ်တပ်က ဗဟိုဘဏ်ကို ညွှန်ကြားထားပြီး ဗဟိုဘဏ်တဆင့် ဌာနဆိုင်ရာရုံးတွေကို စာပေးပို့ စစ်ဆေးခိုင်းတာလို့ စစ်တပ်နဲ့ နီးစပ်သူတဦးက ပြောပါတယ်။
“အခုက အကောင့်ပိတ်တဲ့ အဆင့်မဟုတ်တော့ဘူး။ တယောက်ယောက်က မလိုလို့တိုင်ရင် အဲ့ဒီ KPay အကောင့်တို့၊ Wave အကောင့်တို့ကို ရဲစခန်းက ခေါ်စစ်တာ။”
ဒဂုံဆိပ်ကမ်းမြို့နယ်မှာလည်း Online Shop ရောင်းချသူတဦးအား ပြီးခဲ့တဲ့ရက်ပိုင်းအတွင်းက ရဲစခန်းက ခေါ်ယူစစ်ဆေးခဲ့ပြီးနောက် Kpay အကောင့် အပိတ်မခံရပေမဲ့ ရဲစခန်းကို ၁၅ သိန်းပေးပြီးမှ ပြန်လွတ်လာတယ်လို့ ခေါ်ယူစစ်ဆေးခံရသူက ပြောပါတယ်။
“ကျနော်ကို ရဲစခန်းက စာနဲ့ခေါ်တယ်။ ဟိုရောက်တော့ ရဲစခန်းမှာ မစစ်ဘူး၊ စစစ ရုံးမှာစစ်တာ၊ ဘဏ်မန်နေဂျာလည်း ပါတယ်။ သူတို့စွပ်စွဲချက်တွေ တခုမှမတွေ့တော့ ပြီးခဲ့တဲ့နှစ်က Share ထားတဲ့ သတင်းတခုကို ဖုန်းမှာတွေ့ပြီး ရစ်နေလို့ ဆယ့်ငါးသိန်းလောက် ကုန်သွားတယ်၊ အဲဒါမှ ပြန်လွှတ်ပေးတယ်။”
ငွေဝင်ငွေထွက်များတဲ့ wave pay/ kpay acc များကို ရဲစခန်းက ခေါ်ယူစစ်ဆေးရာမှာ နိုင်ငံရေးနဲ့ဆက်နွှယ်မှုမရှိတဲ့ အကောင့်တွေကို ပြန်မလွှတ်ဘဲ ငွေရမှာသာ ပြန်လွှတ်ပေးတယ်လို့ တောင်ဥက္ကလာမြို့ခံတဦးက ဒီဗွီဘီကို ပြောပါတယ်။
“ကျမ အစ်မ Wave Pay အကောင့်ဆိုရင် ဆန်ဆိုင်ဆိုတော့ ငွေဝင်တာများတာပေါ့၊ အဲဒါကို ရဲက စောက်ကျင့်ယုတ်ပြီး စခန်းခေါ်စစ်တယ်။ ဘဏ်ကို ပိတ်ခိုင်းတယ်။ Wave အကောင့် အပိတ်မခံရအောင်ရယ်၊ အဖမ်းမခံရအောင် လိုက်လုပ်တာ သိန်းငါးဆယ်လောက်ကုန်တယ်" လို့ ပြောပါတယ်။
ငွေဝင်ငွေထွက်များတဲ့ wave pay / kpay acc တွေကို ရဲစခန်းခေါ်ယူစစ်ဆေးဖို့ ဗဟိုဘဏ်မှ ညွှန်ကြားထားတာမရှိသလို ထုတ်ပြန်ထားတာလည်း မရှိဘူးလို့ ဗဟိုဘဏ်နဲ့နီးစပ်သူတဦးက ပြောပါတယ်။
ရဲစခန်းတွေက ခေါ်ယူစစ်ဆေးရာမှာ စစ်ကောင်စီရဲ့ မိသားစုဝင်တွေပါ စစ်ဆေးခံနေရတဲ့အတွက် ထုချေလွှာပေးနေရတဲ့ မြို့မရဲစခန်းတွေလည်း ရှိနေတယ်လို့ စစ်ကောင်စီနဲ့နီးစပ်သူတွေဆီက သိရပါတယ်။
စစ်ကောင်စီက ပြီးခဲ့တဲ့လတွေက NUG၊ CRPH၊ CDM နဲ့ PDF စတဲ့ အဖွဲ့အစည်းအသီးသီးကို လှူဒါန်းလို့မရအောင် wave pay / kpay acc တွေကို ပိတ်သိမ်းခဲ့တဲ့အပြင် ဖမ်းဆီးခဲ့တဲ့ ဖြစ်စဥ်တွေလည်းရှိပါတယ်။
