စစ်ဘေးရှောင်တွေကို တိုက်ရိုက်အကူအညီတွေ ရောက်ရှိစေဖို့ နယ်စပ်ဒေသတွေမှာရှိတဲ့  အရပ်ဘက်လူထုအဖွဲ့အစည်းတွေကတဆင့် ကူညီထောက်ပံ့ပေးဖို့ နိုင်ငံတကာနဲ့ အလှူရှင်တွေကို ကရင်ငြိမ်းချမ်းရေး အထောက်အကူပြုကွန်ရက် (KPSN) က တိုက်တွန်းလိုက်ပါတယ်။

အောက်တိုဘာ ၂၇ ရက် ဒီကနေ့ပြုလုပ်တဲ့ ကရင်လူသားချင်းစာနာထောက်ထားမှု အကူအညီ အကျပ်အတည်းနဲ့ ပတ်သက်တဲ့ အွန်လိုင်းသတင်းစာရှင်းလင်းပွဲမှာ ကရင်ငြိမ်းချမ်းရေး အထောက်အကူပြုကွန်ရက် (KPSN) မှ စောအဲလက်စ်ထူးက ပြောပါတယ်။

“နံပါတ် ၁ အနေနဲ့ နယ်စပ်အခြေစိုက် လူမှုအဖွဲ့အစည်းဟာ ကျနော်တို့ နှစ်ပေါင်းများစွာ ဒီအလုပ်ကို လုပ်ခဲ့တယ်။ ကျနော်တို့ ထောက်ပံ့ကူညီမှုတွေကို အချိန်မီရောက်အောင် ကူညီပေးနေတယ်။ နံပါတ် ၂ အချက်က ကျနော်တို့ အကူအညီတွေက စစ်ကောင်စီနဲ့ စစ်တပ်တွေ မရောက်ဘူး။ တိုက်ရိုက် အိုင်ဒီပီ လိုအပ်တဲ့ဆီကို ရောက်တယ်ပေါ့နော်။ နောက်တခုက နယ်စပ်ကနေ ပေးခြင်းအားဖြင့် မလိုလားအပ်တဲ့ တားဆီးမှုတွေ၊ မလိုလားအပ်တဲ့ ဆုံးရှုံးမှုတွေကို အများကြီးကာကွယ်ပေးလို့ ရတယ်ပေါ့နော်။”

ဒါ့အပြင် လက်ရှိအခြေအနေအရ နိုင်ငံကာအကူအညီတွေဟာ ပြည်တွင်းကနေတဆင့် ဝင်ရောက်ဖို့ရှိနေပြီး အဲဒီအကူအညီတွေဟာ စစ်ကောင်စီရဲ့ ကန့်သတ်ချက်ကြောင့် အမှန်တကယ် လိုအပ်တဲ့သူဆီရောက်ဖို့ စိုးရိမ်စရာဖြစ်တယ်လို့ KPSN ဒုတာဝန်ခံ စောလေးကပေါ်က ပြောပါတယ်။

“အဓိက ကျနော်တို့ ပြန်ကြည့်မယ်ဆိုရင် အကူအညီတွေကို ထောက်ပံ့ပေးနေတာက ဘယ်နေရာမဆို ဒုက္ခသည်တွေရှိနေတဲ့ နေရာအားလုံးကို ပေးနေတာက လူထုအခြေပြု အဖွဲ့အစည်းတွေပဲ ဖြစ်ပါတယ်။ နိုင်ငံတကာ အဖွဲ့အစည်း အထူးသဖြင့် ရန်ကုန်မှာ အခြေစိုက်တဲ့ နိုင်ငံတကာ အဖွဲ့အစည်း တော်တော်များများက လိုအပ်နေတဲ့သူတွေဆီကို တိုက်ရိုက်ရောက်တာကို ကျနော်တို့ သိပ်မရှိသလောက်ပါပဲ။ ဆိုတော့ အဓိက ဒုက္ခသည်တွေကို ကူညီပေးနေတာက ကျနော်တို့ CSO တွေပဲဖြစ်ပါတယ်။ ဆိုတော့ နိုင်ငံတကာ အထူးသဖြင့် ယူအန်တို့လို အန်ဂျီအိုတို့လိုပဲပြောပြော သူတို့ကို ကူညီပေးချင်တယ်ဆိုလို့ရှိရင် ကျနော်တို့ CB, CSO ကနေတဆင့် သွားနေရတယ်။ အဲတော့ first hand ကူညီပေးနေတဲ့သူတွေကို တိုက်ရိုက်ထောက်ပံ့မယ်ဆိုရင်တော့ ပိုပြီးတော့ ဒုက္ခသည်တွေဆီကို လျင်မြန်ပြီး ပိုပြီးအကျိုးရှိမယ်။ နောက်တခုက ပြည်တွင်းကနေတဆင့် ကျနော်တို့ သွားမယ်ဆိုရင် အဆင့်ဆင့်သွားရမှာဖြစ်တဲ့အပြင် နေရာတော်တော်များများက စစ်တပ်ရဲ့ အနှောင့်အယှက်ပေးမှုတွေ အများကြီးရှိနေတဲ့အခါမှာ အကူအညီတွေ ထိရောက်မှုက အင်မတန်မှ စိုးရိမ်ဖို့ကောင်းတယ်ပေါ့နော်။”

နယ်စပ်အခြေစိုက် အဖွဲ့အစည်းတွေဟာ အစာမလုံလောက်မှုတွေ ကြုံတွေ့နေရတဲ့ မြန်မာနိုင်ငံ အရှေ့တောင်ပိုင်းရှိ ကျေးရွာသားတွေကို  လူသားချင်းစာနာထောက်ထားတဲ့ အကူအညီတွေ ဆယ်စုနှစ် ၃ ခုကျော်ကြာအောင်  ပေးခဲ့သလို ၁၉၉၂ ခုနှစ်ကနေ ၂၀၂၀ အတွင်း နယ်စပ်အခြေစိုက် အဖွဲ့အစည်းတွေဟာ မြန်မာနိုင်ငံအတွင်း နေထိုင်တဲ့ လူဦးရေ ၁ ဒသမ ၇ သန်းကို အဓိအားဖြင့် ဆန်အကူအညီ အမေရိကန် ဒေါ်လာ ၃၂ သန်းကျော်ဖိုး ပံ့ပိုးကူညီနိုင်ခဲ့ကြောင်း ရှင်းလင်းပွဲမှာ KPSN က ထုတ်ပြန်တဲ့ အစီရင်ခံစာအရ ဖော်ပြပါတယ်။

ဒါ့အပြင် ၂၀၂၁ ခု စစ်အာဏာသိမ်းပြီးနောက်ပိုင်း ပိုမိုပြင်းထန်လာတဲ့ ပဋိပက္ခနဲ့ မြန်မာစစ်တပ်ရဲ့ ဖိနှိပ်မှုတွေက မြန်မာနိုင်ငံ အရှေ့တောင်ပိုင်းက ရွာသား ၃၄၀,၀၀၀ ကျော် ရွှေ့ပြောင်းမှုနဲ့ လူသားချင်းစာနာမှု အကျပ်အတည်းတွေကို ဖြစ်ပေါ်စေခဲ့ကြောင်း ဖော်ပြပါတယ်။

၂၀၂၁ ဖေဖော်ဝါရီလကနေ ၂၀၂၂ ဇူလိုင်လအထိ နယ်စပ်အခြေစိုက် လူထုအခြေပြု အဖွဲ့အစည်းကနေတဆင့် လူပေါင်း ၃၈၈,၀၀၀ ကျော်ကို စားနပ်ရိက္ခာထောက်ပံ့မှု အမေရိကန်ဒေါ်လာ ၈ ဒသမ ၇ သန်းဖိုး ပေးနိုင်ခဲ့သလို ယန္တရားတွေကိုလည်း လျင်မြန်ထိရောက်အောင် ကူညီဖြန့်ဝေနိုင်ခဲ့ကြောင်းလည်း ဆိုပါတယ်။

အဲဒီထောက်ပံ့မှုတွေဟာ အဓိအားဖြင့် ပုဂ္ဂလိက အလှူရှင်ကနေသာ ရရှိနေတဲ့ အနေအထား ဖြစ်ကြောင်းလည်း ထောက်ပြပြောဆိုထားပါတယ်။

ဒါ့အပြင် လက်ရှိပဋိပက္ခတွေကြောင့် လယ်သမားတွေ ဆန်စပါးစိုက်ပျိုးနိုင်စွမ်း မရှိတော့တဲ့အတွက် ဖြစ်လာတဲ့ အစားအစာလိုအပ်ချက်ကို ဖြည့်ဆည်းနိုင်ဖို့ ရေရှည်ထောက်ပံ့ ကူညီဖို့အတွက် လာမယ့် ၁၂ လ ကာလတခုအတွက် အစားအစောထောက်ပံ့မှု ရန်ပုံငွေ အမေရိကန်ဒေါ်လာ ၁၇ သန်းအထိ လိုအပ်နေကြောင်းလည်း ထောက်ပြထားပါတယ်။

ဒီလိုအပ်မှုဟာ ကရင်ပြည်နယ်အတွင်း ထွက်ပြေးတိမ်းရှောင်နေကြရတဲ့ စစ်ဘေးဒုက္ခသည်တွေရဲ့ လိုအပ်မှုဖြစ်ကြောင်းလည်း ပြောပါတယ်။

ကရင်ပြည်နယ် မူတြော်၊ ဖာပွန်မှာ ဒုက္ခသည် ၉၆,၁၇၉၊ ဒူပလာခရိုင်မှာ ၈၅,၄၈၂၊ ဒူသထူ (သထုံ) ခရိုင်မှာ ၇၄,၇၀၅ နဲ့ အများဆုံးဖြစ်နေပြီး ကျန်တဲ့ ခလယ်လွီထူ (ညောင်လေးပင်) ခရိုင်မှာ‌တော့ စစ်ရှောင် ၆၁,၉၈၆၊ တနင်္သာရီမှာတော့ ၂၁,၆၁၄ နဲ့ တောင်ငူခရိုင်မှာ ၇,၅၃၇ ဦး စုစုပေါင်း ၃၄၇,၅၀၃ ရှိကြောင်းလည်း ထုတ်ပြန်ထားပါတယ်။

ပြီးခဲ့တဲ့ နှစ်ကုန်ပိုင်းကနေ ဒီလဆန်းပိုင်းအထိ ကေအန်ယူ ဒူးပလာယာခရိုင်ကို စစ်ကောင်စီက လေကြောင်းကနေ အကြိမ် ၁၆၀ ကျော် တိုက်ခိုက်ခဲ့ပြီး ပြည်သူတွေရဲ့ အိမ်တွေ၊ ကျောင်းတွေ၊ ဘာသာရေးအဆောက်အအုံ အများအပြား ပျက်စီးခဲ့တယ်လို့ ကရင်ငြိမ်းချမ်းရေး အထောက်အကူပြုကွန်ရက် (KPSN) က ထုတ်ပြန်ပါတယ်။

စစ်ကောင်စီရဲ့ လေကြောင်းတိုက်ခိုက်တာနဲ့ လက်နက်ကြီး ပစ်ခတ်တာတွေကြောင့် အရပ်သားပြည်သူ ၈ ယောက်သေဆုံး၊ ၆၃ ယောက် ဒဏ်ရာရခဲ့ပြီး လူပေါင်း ၈၇,၀၀၀ လောက် နေရပ်စွန့်ခွာ ထွက်ပြေးနေရတယ်လို့ KPSN က ပြုစုထုတ်ပြန်တဲ့ စာတမ်းမှာ ဖော်ပြထားပါတယ်။

ဒါကြောင့် နိုင်ငံတကာအနေနဲ့ စစ်အုပ်စုအပေါ် ပိုအားကောင်းတဲ့ စီးပွားရေး သံတမန်ရေး ဖိအားတွေပေးကြဖို့နဲ့ ဂျပန်နိုင်ငံအနေနဲ့ လက်ရှိလုပ်နေတဲ့ စီမံကိန်းတွေရပ်ဆိုင်းဖို့ကိုလည်း KPSN က တောင်းဆိုထားပါတယ်။

၂၀၁၂ ခုနှစ်မှာ ကရင်အမျိုးသားအစည်းအရုံး (ကေအန်ယူ) နဲ့ စစ်တပ်တို့ အပြန်အလှန်အပစ်ရပ်ခဲ့ကြပေမယ့် ၂၀၂၁ ခုနှစ် စစ်တပ်က အာဏာသိမ်းပြီးနောက် စစ်အုပ်စုဆန့်ကျင်ရေး တက်ကြွလှုပ်ရှားသူတွေ ခိုလှုံလာကြတဲ့ ကေအန်ယူတပ်မဟာ ၆ ဒူးပလာယာခရိုင်ထဲမှာ တင်းမာမှုတွေ စလာခဲ့တယ်လို့ ဆိုပါတယ်။

ပြီးခဲ့တဲ့ နှစ်ကုန်ပိုင်းမှာတော့ စစ်တပ်ဘက်က အင်အားတိုးချဲ့လာခဲ့သလို လေးကော့ကော်မြို့သစ်ကို ဝင်ရောက်ရှာဖွေပြီး နိုင်ငံရေးလှုပ်ရှားသူတွေကို ဖမ်းဆီးခဲ့တာကြောင့် တိုက်ခိုက်တာတွေ စတင်ခဲ့ပြီး စစ်တပ်ဘက်က လေကြောင်းကနေတိုက်ခိုက်လာခဲ့ပါတယ်။

ရန်ကုန်၊ မှော်ဘီလေတပ်က တိုက်လေယာဉ်တွေ၊ မော်လမြိုင်နဲ့ ဖားအံလေတပ်က တိုက်ခိုက်ရေးရဟတ်ယာဉ်တွေနဲ့ စစ်ကောင်စီဟာ ဒေါနတောင်တန်းနှစ်ဖက်ခြမ်းလုံးကို အကြိမ်ကြိမ်တိုက်ခိုက်ခဲ့ကြတယ်လို့ KPSN က ဆိုပါတယ်။

သူတို့ ပြုစုထားတဲ့ စာရင်းအရ ၂၀၂၂ ခုနှစ် ဇွန်လ ၂၉ ရက်နေ့မှာ ဥကရစ်ထကို ဂျက်တိုက်လေယာဉ် ၈ စီးနဲ့ ၄၉ ကြိမ်အထိ အများဆုံး တိုက်ခိုက်ခဲ့ပြီး မေလ ၁၈ ရက်နေ့က သေဘော့ဘိုးကို ဂျက်တိုက်လေယာဉ် ၄ စီး၊ တိုက်ခိုက်ရေး ရဟတ်ယာဉ် ၂ စီးနဲ့ ၃၈ ကြိမ် တိုက်ခိုက်ခဲ့တယ်လို့ သိရပါတယ်။

ပြီးတော့ ဇူလိုင် ၁ ရက်နေ့က သေဘော့ဘိုးနဲ့ ဥကရစ်ထကို ဂျက်တိုက်လေယာဉ် ၃ စီးနဲ့ ၃၁ ကြိမ်၊ ဇွန် ၃၀ ရက်နေ့က သေဘော့ဘိုးကို ဂျက်တိုက်လေယာဉ် ၈ စီးနဲ့ ၂၂ ကြိမ်တိုက်ခိုက်ခဲ့တယ်လို့ ဆိုပါတယ်။

ပြီးခဲ့တဲ့နှစ် ဒီဇင်ဘာ ၂၃ ရက်ကနေ အခု ဇူလိုင် ၃ ရက်နေ့အထိ အတွင်းမှာ ၂၈ ရက် လေကြောင်းကနေ တိုက်ခိုက်ခဲ့ပြီး စုစုပေါင်း ၁၆၅ ကြိမ်ရှိပါတယ်။

ဒီတိုက်ခိုက်မှုတွေမှာ ခြေလျင်တပ်ရင်း၊ အမြောက်တပ်ရင်းနဲ့ စစ်ကောင်စီ တပ်မတွေ၊ နယ်ခြားစောင့်တပ်တွေလည်း ပါဝင်ပြီး လက်နက်ကြီးတွေနဲ့ လူနေကျေးရွာတွေကို ပစ်ခတ်တာကြောင့် အခု ဇွန်လကုန်ပိုင်းအထိ ကော့ကရိတ်၊ ကြာအင်းဆိပ်ကြီး၊ ဝင်းရေးနဲ့ ကျုံဒိုးမြို့နယ်တို့က ကျေးရွာပေါင်း ၁၀၀ ကျော်မှာ လူပေါင်း ၈၇၀၀၀ လောက်ဟာ ဘေးလွတ်ရာ တိမ်းရှောင်ထွက်ပြေးနေကြရတယ်လို့လည်း ဆိုပါတယ်။

စစ်ရှောင်တွေဟာ မြန်မာနိုင်ငံနဲ့ ထိုင်းနိုင်ငံထဲမှာ ဒုက္ခရောက်နေကြရပြီး ဒီလိုအခြေအနေတွေမှာ တိုင်းရင်းသား လူမှုဝန်ဆောင်မှုဌာနတွေနဲ့ လူထုအခြေပြုအဖွဲ့တွေကတဆင့် စစ်ရှောင်တွေကို နယ်စပ်ဖြတ်ကျော်ကူညီတာတွေတိုးမြှင့်ပေးဖို့ KPSN က နိုင်ငံတကာကို တောင်းဆိုပါတယ်။

ပြီးတော့ စစ်အုပ်စုကို ဖွံ့ဖြိုးရေးအကူအညီသစ်တွေရပ်ဆိုင်းထားဖို့၊ အာရှအဝေးပြေးလမ်းမကြီးတလျှောက် တံတားဆောက်လုပ်ရေးလုပ်ငန်းတွေအတွက် လက်ရှိထောက်ပံ့နေတာတွေအပါဝင်ရပ်ဆိုင်းထားဖို့ JICA ကို တောင်းဆိုပါတယ်။

စစ်အုပ်စုကိုလည်း လက်နက်နဲ့ လေယာဉ်ဆီ၊ စီးပွားရေးပိတ်ဆို့ကြဖို့၊ နိုင်ငံတကာရာဇဝတ်ခုံရုံးဆီကို လွှဲပြောင်းပေးဖို့လည်း KPSN က ထုတ်ပြန်တောင်းဆိုလိုက်ပါတယ်။