မကွေးတိုင်း၊ ဂန့်ဂေါမြို့နယ်မှာ Local PDF စခန်းတခုကို ပကဖက ဝင်ရောက်စီးနင်းခဲ့လို့ အမှန်တရားပေါ်ပေါက်ဖို့နဲ့ တရားမျှတမှုရှိဖို့ Phoenix Defence Battalion-PDB ရဲ့ တပ်ရင်းမှူးက တောင်းဆိုလိုက်ပါတယ်။
ဧပြီ ၂၀ ရက်မှာ PDBနဲ့ ထောက်ပို့ပြည်သူတွေနဲ့ အစည်းဝေးလုပ်နေတဲ့အချိန်မှာ ဂန့်ဂေါခရိုင် တပ်ရင်း(၁၄)နဲ့ ပကဖ အဖွဲ့တွေက ပစ်ခတ်ဝင်ရောက်စီးနင်းခဲ့ကြတာလို့ ပြောပါတယ်။
ဒီဖြစ်စဥ်မှာ PDB ရဲဘော်တွေနဲ့ ထောက်ပို့အဖွဲ့ဝင် ၃၀ ကျော်လောက်ဖမ်းဆီးခံခဲ့ရပြီး တပ်ရင်းမှူး ကိုဗစ်အပါအဝင် ၃ ယောက်ကတော့ ထွက်ပြေးလွတ်မြောက်ခဲ့ပေမဲ့ လက်နက်ခဲယမ်းတွေနဲ့ ပြည်သူတွေထောက်ပံ့လှူဒါန်းထားတဲ့ ငွေကျပ် သိန်း ၂၀၀ သိမ်းဆည်းခံခဲ့ရတယ်လို့ ဆိုပါတယ်။
PDB တပ်ရင်းမှူး ကိုဗစ်က “ကျနော်တို့ဆီကိုတော့ ပြဿနာရှိတဲ့အကြောင်းကို ဖုန်းဆက်အကြောင်းကြားထားတာလည်းမရှိဘူး။ စာထုတ်ထားတာလည်းမရှိဘူးဗျ။ ရုတ်တရက်ဝင်ရောက်စီးနင်းပြီး ပစ်ခတ်ခံလိုက်ရမှ ကျနော်တို့ ပြေးလိုက်ရတာ။ ကျနော်တို့ တော်လှန်ရေးတပ်ဖွဲ့တွေမှာ မှားယွင်းတာမျိုးရှိတယ်ဆိုရင်၊ တိုင်ကြားထားတာမျိုးရှိတယ်ဆိုရင် ပထမအဆင့် ဖုန်းဆက်ပြီးဖြစ်ဖြစ် စာပို့ပြီးဖြစ်ဖြစ်ခေါ်စေချင်တယ်။ အဲလိုခေါ်လို့မှမလာဘူးဆိုမှသာ ဒီလိုဝင်စီးတာမျိုးလုပ်သင့်တယ်လို့ ဆိုပါတယ်။ သက်ဆိုင်ရာပအဖ ခေါင်းဆောင်တွေကို ဆက်သွယ်မေးမြန်းရာမှာ အရေးပေါ်ဝင်ရောက်ဖမ်းဆီးလိုက်ရတာလို့ အကြောင်းပြန်တယ်။ ကျနော်တို့ ပြဿနာတွေရှိရင် ဒေသတွင်းက အဖွဲ့စည်းပေါင်းစုံရဲ့ရှေ့မှာ စစ်ဆေးခံပြီး ပေးတဲ့အပြစ်ကို ခံယူဖို့ပြောပေမဲ့သူတို့ ဘက်ကလက်မခံဘဲ ကျန်တဲ့အဖွဲ့စည်းတွေကို အသိမပေးဘဲ ရှင်းချင်တယ်”လို့ ပြောပါတယ်။
ဒေသခံ Local အဖွဲ့ဆိုပေမယ့် NUG ရဲ့လက်အောက်ခံအဖွဲ့အဖြစ်နဲ့ ရပ်တည်ဖို့အတွက် တိုင်းအဆင့်ထိသွားရောက်ပြီး စာတင်ထားကြောင်းနဲ့ ကစတွေ၊ ပျူတွေ၊ ရဲတွေ၊ ဒလန်တွေနဲ့ ပူးပေါင်းလုပ်ဆောင်တာ လုံးဝမလုပ်ပဲ တော်လှန်ရေးပြီးတဲ့အထိ ဖြူစင်ရိုးသားစွာနဲ့ ကြိုးစားသွားမယ်လို့ဆိုပါတယ်။
ဘာကြောင့်ဝင်ရောက်စီနင်း ဖမ်းဆီးတယ်ဆိုတာကို မသိရှိရသေးဘဲ ဖမ်းဆီးခံရတဲ့အထဲ PDFရဲဘော်တွေ၊ ထောက်ပို့အဖွဲ့တွေ၊ ကလေးသူငယ်တွေပါဝင်နေပြီး မှားတာ ရှိရင် အပြစ်ဒဏ်ကိုခံယူဖို့ အသင့်ဖြစ်သလို မှန်ရင်လည်း ဖမ်းဆီးသွားတဲ့သူတွေကို ပြန်လွှတ်ပေးကာ သိမ်းဆည်းခံခဲ့ရတဲ့ လက်နက်ခဲယမ်းတွေနဲ့ ပျက်စီးဆုံးရှုံးမှုတွေ ပြန်ပေးဖို့ ကိုဗစ်က ပြောပါတယ်။
ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့ (ပအဖ) တာဝန်ရှိသူတယောက်ကတော့ ဒီကိစ္စတွေအားလုံးကို ဝန်ကြီးဌာနကို တင်ပြထားပြီး ပြောရေးဆိုခွင့်မရှိတာကြောင့် ဝန်ကြီးဌာနကို တိုက်ရိုက်ဆက်သွယ်မေးမြန်းဖို့ ပြောပါတယ်။
NUG ကာကွယ်ရေးဝန်ကြီးဌာနရဲ့ အမြဲတမ်း အတွင်းဝန် ဦးနိုင်ထူးအောင်က “ကျနော်တို့ဆီကိုတော့ ဒီဟာနဲ့ပတ်သက်ပြီးတော့ သတင်းရောက်ရှိခြင်းမရှိသေးပါဘူး။ ကျနော်တို့ စုံစမ်းမှု ဆက်လုပ်သွားပါမယ်လို့"ပြောပါတယ်။
PDB ဒေသကာကွယ်ရေးတပ်ဖွဲ့ဟာ ပကဖတွေ ပအဖအဖွဲ့တွေ မဖွဲ့ခင်ကတည်းက စစ်ကောင်စီရဲ့ ယာဥ်တန်းတွေကို မိုင်းဆွဲတိုက်ခိုက်ကာ တော်လှန်ခဲ့တဲ့ အဖွဲ့စည်းတခုဖြစ်ပြီး နောက်ပိုင်းမှာ ယောကာကွယ်ရေးတပ်-YDF ရဲ့တပ်ရင်းတခုအဖြစ်ရပ်တည်ခဲ့ကာ YDF တပ်ရင်းကနေ နုတ်ထွက်ခဲ့ပြီး သီးခြားရပ်တည်နေတဲ့ တော်လှန်ရေးတပ်ဖွဲ့ဖြစ်ပါတယ်။
ပြည်တွင်းမှာ ဒေါ်လာဈေးတက်ပြီး မြန်မာကျပ်ငွေတန်ဖိုး အဆမတန်ကျဆင်းလာတာကြောင့် ပြည်တွင်းအလှူရှင်ရဲ့ အကူအညီနဲ့ ရပ်တည်နေရတဲ့ ဒေသတွင်းပြည်သူ့ကာကွယ်ရေးတပ်(Local PDF)တွေအတွက် ထောက်ပို့မှု လုပ်ငန်းတချို့ ထိခိုက်မှုရှိနေတယ်လို့ PDF ထောက်ပို့တွေထံက သိရပါတယ်။
“ပြည်တွင်းအလှူက ကျပ်ငွေပဲရတယ်။ လက်နက်ခဲယမ်း ရောင်းတဲ့အဖွဲ့တွေက အခုနောက်ပိုင်း ကျပ်ငွေမယူတော့ဘူး။ နိုင်ငံခြားငွေပဲ ယူတော့တယ်။ အဲဒီမှာ ထိခိုက်မှုတချို့ရှိလာတယ်”လို့ စစ်ကိုင်းတိုင်းက Local PDF တွေကို ထောက်ပို့လုပ်နေသူ တယောက်က ပြောပါတယ်။
မြန်မာငွေတန်ဖိုး ကျဆင်းလာနဲ့အမျှ နိုင်ငံခြားငွေနဲ့ ဝယ်ယူရတဲ့ လက်နက်နဲ့ ခဲယမ်းစျေးနှုန်းတွေဟာ နိုင်ငံခြားငွေဈေးနဲ့အတူ လိုက်လံမြင့်နေတာကြောင့်လည်း Loca PDF ထောက်ပို့လုပ်ငန်းတချို့ အပေါ်မှာ ထိခိုက်မှုရှိနေတာ ဖြစ်ပါတယ်။
ဒီးမော့ဆို Local PDF ကို ထောက်ပို့လုပ်ပေးနေသူတစ်ဦးက “သေနတ်ဈေးလည်း လိုက်တက်တယ်။ ကျည်ဈေးလည်း လိုက်တက်တယ်။ ဈေးကွက်မှာ ဝယ်ယူတဲ့သူများတဲ့ ကျည်အမျိုးအစားအလိုက် တတောင့်ကို တစ်ထောင် နှစ်ထောင် တက်တယ်။ သေနတ်တွေဆို သိန်းနဲ့ချီပြီး ဈေးမြောက်သွားတယ်။ ဈေးနှုန်းကြောင့် အရင်ကလောက် မထောက်ပို့နိုင်တော့ဘူးပေါ့"လို့ ပြောပါတယ်။
လက်နက်၊ ခဲယမ်းတွေအပြင် တခြားစစ်အသုံးအဆောင်ပစ္စည်းနဲ့ ရိက္ခာဖိုးတွေမှာလည်း မြင့်တက်လာတာကြောင့်လည်း Local PDF တွေကို လိုအပ်သလောက် ထောက်ပံ့ပေးဖို့ အားနည်းလာတာတွေရှိနေတယ်လို့လည်း ဆိုပါတယ်။
Local PDF မြောက်ပိုင်းထောက်ပို့အဖွဲ့ဝင်တစ်ဦးက “အရင်က ကြိုးပုခက်တစ်ခုကို ကိုးထောင်ပဲ ပေးရတယ်။ အခု တစ်သောင်းခြောက်ထောင် ပေးဝယ်ထားရတယ်။ တနေ့တခြား ဈေးက တက်တက်လာတယ်။ ရိက္ခာဆို ရှူးရှဲပဲ စျေးမတက်တာ။ ဒါပေမဲ့ အထဲမှာ တဝက်ပဲပါတော့တယ်” လို့ ပြောပါတယ်။
ဒါ့အပြင် လစဥ်ထောက်ပံ့နေကြတဲ့ သူတွေမှာလည်း ငွေစျေးကျဆင်းမှုနဲ့ ကုန်ဈေးနှုန်း မြင့်တက်နေမှုတွေကြောင့် အရင်တုန်းကလောက် မထောက်ပံ့နိုင်တော့ဘူးလို့ ဆိုပါတယ်။
“ဝင်ငွေနဲ့ ထွက်ငွေမမျှဖြစ်လာတော့ အရင်လစဥ် တစ်သိန်းလှူတဲ့သူက အခုဆို ထက်ဝက်လောက်ပဲ လှူတော့တယ်”လို့ PDF ထောက်ပို့တစ်ဦးက ပြောပါတယ်။
စစ်အာဏာသိမ်းပြီးနောက် မြန်မာ့စီးပွားရေး ယိုယွင်းပျက်စီး ကျဆင်းလာနေပြီး ငွေကြေးဖောင်းပွ မြန်မာကျပ်ငွေတန်ဖိုး အဆမတန်ကျဆင်းလာနေသလို နိုင်ငံတဝန်းမှာ လောင်စာဆီ ရှားပါးပြတ်လပ် ဈေးနှုန်းကြီးမြင့်မှုတွေနဲ့ ပြည်သူတွေ ကြုံတွေ့နေရပါတယ်။
စစ်တပ်အာဏာသိမ်းမှုရဲ့ နောက်ဆက်တွဲ ဆိုးကျိုးတွေဖြစ်တဲ့ တရားဥပဒေစိုးမိုးမှုမရှိတာ လောင်းကစားနဲ့ ဒုစရိုက်မှုတွေ ပေါများလာတာ၊ ကုန်ဈေးနှုန်းကြီးမြင့်လာတာ၊ အလုပ်အကိုင် ရှားပါးမှုနဲ့ ငတ်မွတ်ခေါင်းပါးမှုဒဏ်ကို ပြည်သူလူတွေ ခံစားနေတယ်လို့ ပြည်သူ့ကာကွယ်ရေးတပ် (PDF) တွေက ပြောပါတယ်။
