မန္တလေးတိုင်း၊ မတ္တရာမြို့နယ်မှာ စစ်ကြောင်းထိုးလာတဲ့ စစ်ကောင်စီတပ်တွေရဲ့ ဖမ်းဆီးခံရတဲ့ ဒေသကာကွယ်ရေးတပ်ဖွဲ့ဝင်တယောက်ကို သတ်ဖြတ်ပြီး အလောင်းနဲ့ အတူ သွေးသောက်တံဆိပ်ကတ် ချထားတာ တွေ့ရှိခဲ့ရတယ်လို့ ဒေသခံတွေထံက သိရပါတယ်။
ဒေသခံတစ်ဦးက" PDF ထဲက အမည်ကတော့ ဖိုးထောင်၊ Local ထဲက ဖမ်းခေါ်သွားပြီးမှ မိုင်းဆွဲတာနဲ့ စိတ်တိုသွားပြီးတော့ သတ်ထားခဲ့တာ"လို့ ပြောပါတယ်။
မနေ့မနက်ပိုင်းမှာ စစ်ကြောင်းထိုးလာတဲ့ စစ်ကောင်စီစစ်ကြောင်းကို ရွာသာယာကျေးရွာအနီးမှာ ဒေသကာကွယ်ရေးတပ်တွေက မိုင်းဆွဲတိုက်ခိုက်ခဲ့ပြီးတဲ့နောက် အသက် ၁၀ ကျော်အရွယ် ကိုဖိုးထောင်ကို ဖမ်းမိသွားတာဖြစ်ပြီး အဲဒီနောက် အခုလိုသတ်ဖြတ်သွားတာလို့ သိရပါတယ်။
စစ်ကောင်စီတပ်က မတ္တရာအရှေ့ခြမ်းနယ်ကို ဧပြီလ ၂၂ ရက်နေ့ကတည်းက ရွာစဉ်ပတ် စစ်ကြောင်းထိုးနေပြီး ဒေသခံအမြောက်အမြား ဘေးလွတ်ရာကို ထွက်ပြေးတိမ်းရှောင်နေကြရပါတယ်။
စစ်ကောင်စီတပ်ဖွဲ့ဝင်တွေက မြောင်းသစ်ရွာကို စစ်ကြောင်းထိုးရာမှာ ပြည်သူ့နေအိမ်တွေကို မွှေနှောက်ပြီး အဖိုးတန် ပစ္စည်းတွေယူငင်သွားတယ်လို့ ဒေသခံတစ်ဦးက ပြောပါတယ်။
ဧပြီ ၂၂ ရက်နဲ့ ၂၃ ရက်အတွင်းမှာ စစ်ကောင်စီစစ်ကြောင်းကို ဒေသကာကွယ်ရေးတပ်တွေဘက်က မိုင်းဆွဲတိုက်ခိုက်မှု ငါးကြိမ်ရှိခဲ့တယ်လို့ သိပါတယ်။
ဒေသကာကွယ်ရေးတပ်တွေဟာ မြကန်သာရွာနဲ့ ကျောက်တံတားကျေးရွာတွေမှာ ဒရုန်းနဲ့ ဗုံးသီးချ တိုက်ခိုက်ခဲ့သလို၊ မတ္တရာမြို့က ရဲစခန်းနဲ့ ထွေအုပ်ရုံးကို ဒရုန်းနဲ့ ဗုံးသီးချ တိုက်ခိုက်ခဲ့တာတွေကြောင့် အခုလို စစ်ကြောင်းထိုးတာလို့လည်း ဒေသခံတွေက ဆိုပါတယ်။
စစ်အုပ်စုဟာ စစ်ကြောင်းထိုးရင်း ရွာသာယာနဲ့ မြောင်းသစ်ကျေးရွာက ဒေသခံနေအိမ် နှစ်လုံးကို မီးရှို့သွားတယ်လို့ သိရပါတယ်။ ဒါ့အပြင် ကင်းရွာနဲ့ ထုံးဘိုရွာက ဒေသခံလူငယ်တချို့ကိုလည်း လူသားဒိုင်းအဖြစ် ဖမ်းဆီးခေါ်ဆောင်သွားပါတယ်။
မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသအခြေစိုက် ရွှေလယ်ကျွန်း LPDF အဖွဲ့အတွက် မောင်းပြန်သေနတ် လိုအပ်နေတာကြောင့် နိုဝင်ဘာ ၁၆ ရက်ကနေ ဒီဇင်ဘာ ၁၆ ရက်နေ့အထိ ကျပ်သိန်း ၂၀၀ ကမ်ပိန်း ပြုလုပ်နေတယ်လို့ သိရပါတယ်။
၂၀၂၁ ခု၊ အောက်တိုဘာ ၁၀ ရက်က စတင်ဖွဲ့စည်းခဲ့တဲ့ ရွှေလယ်ကျွန်း LPDF အဖွဲ့မှာ ဒီနေ့အထိ မောင်းပြန်သေနတ် နှစ်လက်သာ ရှိသေးတယ်လို့ အဖွဲ့တာဝန်ရှိသူတဦးက ပြောပါတယ်။
“မောင်းပြန်တလက် ၅၀ လောက်ကတည်းက မောင်းပြန်တချို့ကို မှာခဲ့ပါတယ်။ ဒါပေမဲ့ အဖမ်းခံရတာရော လိမ်သွားတာတွေရော၊ တော်လှန်ရေး အမြတ်ထုတ်သူတွေရောကြောင့် တလက်မှ ရောက်မလာခဲ့ဘူး။ အခုဆို မောင်းပြန်တလက်ကို သိန်း ၂၀၀ မကတော့ဘူး။”
လက်နက်ဝယ်ဖို့ ငွေစုဆောင်းခဲ့ပေမဲ့ တခြားကဏ္ဍတွေမှာ သုံးစွဲရတဲ့အပြင် လက်နက်စျေးတွေ တက်လာခဲ့တာကြောင့် မောင်းပြန်သေနတ်ရရှိဖို့ ခက်ခဲလာတယ်လို့ ဆိုပါတယ်။
ရွှေလယ်ကျွန်း LPDF တပ်ဖွဲ့မှာ မောင်းပြန်သေနတ် မလုံလောက်တာကြောင့် စစ်ကောင်စီတပ်က စစ်ကြောင်းထိုးလာတဲ့အခါမှာ အခက်အခဲတွေ ရင်ဆိုင်ရတယ်လို့ ပြောပါတယ်။
“အဓိကကတော့ ရဲဘော်တွေ စိတ်ဓာတ်ကျတာပါ။ ဒီဘက်နယ် ပြောက်ကျားစစ်ဆင်ရေးတွေမှာဆိုရင် တထောင့်ထိုး လက်လုပ်တွေ၊ ခါးချိုးကိုးလုံးတွေက အသုံးမဝင်တော့ဘူး။ မောင်းပြန်သီးသန့်ပဲ တိုက်ပွဲဖော်ဆောင်ရမယ်ဆိုတော့ နှစ်လက်ပဲ ရှိတော့ နှစ်ယောက်စီပဲ မဟာမိတ်တွေနဲ့ ရှေ့တန်းလှည့်ထွက်ရတာပေါ့။ နောက်တန်းကျန်တဲ့ ရဲဘော်တွေက မလိုက်ရတော့ အတော်စိတ်ဓာတ်ကျကြတာပေါ့။”
ဒေသခံပြည်သူတွေက စားဝတ်နေရေးအတွက် အစစအရာရာ ကူညီပေးတာကြောင့် စားဝတ်နေရေး မခက်ခဲပေမဲ့ လက်နက်ခဲယမ်းရရှိဖို့ အခက်အခဲတွေ အများကြီးရှိတယ်လို့ ပြောပါတယ်။
စစ်ကောင်စီတပ်က နိုဝင်ဘာလအတွင်းမှာ ရေလယ်ကျွန်းဒေသကို လေယာဥ်နဲ့ပစ်ခတ်ပြီး စစ်ကြောင်းထိုး ရွာမီးရှို့တာကြောင့် ကျေးရွာ ၄ ရွာ မီးရှို့ခံထားရတဲ့အတွက် မောင်းပြန်ရရှိဖို့ ကမ်ပိန်းမှာ ပြည်သူတွေအနေနဲ့ ငွေကျပ် ၅၀၀၊ ၁,၀၀၀ ကစတင်ပြီး ပါဝင်နိုင်တယ်လို့ ပြောပါတယ်။
