စစ်ကိုင်းတိုင်း၊ ဟုမ္မလင်းမြို့နယ် အောင်ချမ်းသာကျွေးရွာမှာရှိတဲ့ မိုင်တဲလ်တာဝါတိုင် စက်တင်ဘာ ၁၇ ရက်က မိုင်းခွဲဖျက်ဆီးခဲ့တယ်လို့ အထက်ချင်းတွင်းဒေသ ပြောက်ကျားအဖွဲ့က ပြောပါတယ်။
ဟုမ္မလင်းမြို့နယ်မှာ စက်တင်ဘာ ၁၆ ရက်နေ့ကလည်း ငိုးပင်းကျေးရွာ မိုင်တဲလ်တာဝါတိုင်ကို အထက်ချင်းပြောက်ကျားဖွဲ့က ဖျက်ဆီးခဲ့ပြီး အခုဒုတိယအကြိမ် ထပ်မံပျက်စီးခဲ့ပါတယ်။
စစ်ကိုင်းတိုင်း မုံရွာမြို့နယ် ဇီးကျွန်းကျေးရွာအုပ်စု၊ ကိုင်းတောရွာက စစ်ကောင်စီ သတင်းပေးတစ်ဦးကို Monywa Heroes Group နှင့် Monywa Satan အဖွဲ့က သုတ်သင်ရှင်းလင်းခဲ့တယ်လို့ အဲဒီအဖွဲ့က စက်တင်ဘာ ၁၇ ရက်မှာ ထုတ်ပြန်ပါတယ်။
ကိုင်းတောရွာနေ စစ်ကောင်စီသတင်းပေး ကိုဇင်ကို စက်တင်ဘာ ၁၆ ရက်က သုတ်သင်ရှင်းလင်းခဲ့တာလို့ ဆိုပါတယ်။
Monywa Heroes Group အနေနဲ့ စက်တင်ဘာ ၉ ရက်က အာဏာသိမ်းစစ်ကောင်စီ သတင်းပေးပို့နေသူတွေအနေနဲ့ သူတို့ရဲ့လုပ်ရပ်ကို ရပ်တန်းက ရပ်ဖို့ သတိပေးထားတာ ဖြစ်ပါတယ်။
စစ်ကောင်စီရဲ့ထုတ်ကုန်တွေ မရောင်းချဖို့ မုံရွာမြို့က ဆင်နှစ်ကောင် စတိုးဆိုင်အား Monywa Heroes Group က သတိပေးစာထုတ်ပြန်လိုက်ပါတယ်။
စစ်ကိုင်းတိုင်းဒေသကြီး၊ မုံရွာမြို့နယ် ဆင်နှစ်ကောင်စတိုးဆိုင်က Myanmar Beer နဲ Andaman Gold အစရှိတဲ့ စစ်ကောင်စီရဲ့ ထုတ်ကုန်တွေ ဖြန့်ဖြူးရောင်းချနေတာကြောင့် အအခုလို သတိပေးစာထုတ်ပြန်ခဲ့တယ်လို့ ဆိုပါတယ်။
Monywa Heroes Group အနေနဲ့ အကြမ်းဖက်စစ်ကောင်စီရဲ့ထုတ်ကုန်တွေ ဖြန့်ဖြူးရောင်းချခြင်းများမပြုလုပ်ဖို့ စာစောင်များဖြန့်ဝေတာ၊ Facebook စာမျက်နှာတို့ကနေ တဆင့်သတိပေးတာတွေ ပြုလုပ်ခဲ့ပြီးဖြစ်တယ်လို့လည်း ဆိုပါတယ်။
အဲလိုအသိပေးချက် အကြိမ်ကြိမ်ထုတ်ပြန်ထားပေမဲ့ ဆင်နှစ်ကောင်စတိုးဆိုင်ဟာ ထုတ်ပြန်ထားတဲ့ သတိပေးချက်တွေကို မလိုက်နာဘဲ ဆက်လက်ဖြန့်ဖြူးရောင်းချနေပါက ပစ္စည်းတွေနဲ့ လုံခြုံရေးအား တာဝန်မယူနိုင်ဘူးလို့ Monywa Heroes Group ရဲ့ ထုတ်ပြန်ချက်မှာ ဖော်ပြထားပါတယ်။
အကြမ်းဖက်စစ်ကောင်စီက ထုတ်ပြန်ထားတဲ့ မတရားတဲ့အမိန့်မှန်သမျှ ဖီဆန်ကြကာ စစ်ကောင်စီရဲ့ ထောက်တိုင်တွေကို ဖြိုဖျက်ကြဖို့လည်း တိုက်တွန်းထားပါတယ်။
Monywa Heroes Group ဟာ အပြောသက်သက်သာမဟုတ်ဘဲ အလုပ်နဲ့သက်သေပြတဲ့အဖွဲ့ဖြစ်ကြောင်းလည်း ထုတ်ပြန်ထားပါတယ်။
