မြန်မာ့ဆက်သွယ်ရေးလုပ်ငန်း (MPT) က ဆင်းမ်ကတ်တွေ မှတ်ပုံတင်ဖို့ သတိပေးနေရာ မြစ်ကြီးနား MPT ရုံးမှာလည်း မှတ်ပုံတင် ဆောင်ရွက်ပေးနေပေမဲ့ ကချင်မျိုးနွယ်စု နာမည်တွေကို သေချာစိစစ်ဖို့လိုကြောင်း ဖုန်းမှတ်ပုံတင်သွားလုပ်သူတဦးက ပြောပါတယ်။
“MPT4U မှာ ကိုယ်တိုင်လုပ်လို့လည်းမရလို့ ရုံးသွားလုပ်တော့ နာမည်မှားနေတယ်လို့ ပြောတာကို လူများနေလို့လားတော့ မသိဘူး၊ ရှေ့ကိုသွားဖို့ပြောတယ်။ ရှေ့ကောင်တာကျတော့လည်း လုပ်တော့လုပ်ပေးတယ်။ နာမည်စာလုံးပေါင်း ပြောတာကို အတော်ဇယားရှုပ်တဲ့ နာမည်တွေဆိုပြီး ပြောခံရတယ်။”
ဖုန်းမှတ်ပုံတင်တွေစစ်ဆေးဖို့ MPT က စာတိုနဲ့ အကြောင်းကြားသလို ဖုန်းပိတ်သိမ်းခံရမှုတွေ ရှိနေတာကြောင့် သွားလုပ်တဲ့သူတွေ များကြောင်းလည်း ပြောပါတယ်။
အထူးသဖြင့် ကချင်မျိုးနွယ်စု နာမည်တွေက စာလုံးပေါင်းလည်း ခက်သလို သေချာမကြည့်ရင် စာလုံးပေါင်း ထပ်ထပ်မှားတာမို့ ဘဏ်နဲ့ချိတ်ဆက်တဲ့ နေရာမှာလည်း ဖုန်းမှတ်ပုံတင်ထဲက နာမည်နဲ့ စာလုံးပေါင်း မတူတာတွေကြောင့် အခက်အခဲ တွေ့ရတယ်လို့လည်း ဆိုပါတယ်။
နာမည်စာလုံးပေါင်းအပြင် မှတ်ပုံတင်အမှတ်တွေကို မှားရိုက်ထည့်ပေးလိုက်တာတွေလည်း ရှိတာမို့ ကိုယ်တိုင် ချက်ချင်း သေချာစစ်ဆေးဖို့ လိုအပ်တယ်လို့လည်း သိရပါတယ်။
ရန်ကုန်မြို့၊ မရမ်းကုန်းမြို့နယ်၊ ကမ္ဘာအေးဘုရားလမ်းမှာရှိတဲ့ MPT Exchange ရုံး ဒီကနေ့ ဖေဖော်ဝါရီ ၇ ရက် မနက် ၁၀ နာရီခွဲလောက်က မီးလောင်မှုဖြစ်ပွားခဲ့တာကြောင့် MPT ဖုန်းလိုင်းတွေ တနိုင်ငံလုံးနီးပါး ယာယီပြတ်တောက်မှုတွေ ဖြစ်ပွားခဲ့တယ်လို့ သိရပါတယ်။
မီးလောင်မှုကြောင့် ဒီကနေ့ မနက် ၁၀ နာရီမခွဲခင်လောက် MPT ဖုန်းလိုင်းတွေ ပြတ်တောက်သွားခဲ့တာဖြစ်ပြီး တနိုင်ငံလုံးနီးပါး ဖုန်းလိုင်းတွေ ပြတ်တောက်တာဖြစ်နိုင်ပြီး နေ့လယ် ၁၂ ခွဲလောက်အထိ ဖုန်းခေါ်ဆိုလို့ မရရှိသေးလို့ ရန်ကုန်က MPT အသုံးပြုတွေဆီကနေ သိရပါတယ်။
“MPT ရုံး မီးလောင်တယ်လို့ ကြားတယ်။ မနက်ကတော့ ၁၀ နာရီခွဲလောက်ကတည်းက ဖုန်းတွေ ခေါ်လို့ မရဘဲဖြစ်နေတာ အခုထိလည်း မရသေးဘူး၊ ရန်ကုန်တင်မဟုတ်ဘဲ တနိုင်ငံလုံး ပြတ်ကုန်တာ ထင်တယ်။ နယ်ကို ဖုန်းခေါ်တာလည်း ခေါ်မရတော့ဘူး”လို့ ရန်ကုန်နေ ပြည်သူတယောက်က နေ့လယ် ၁၂ နာရီဝန်းကျင်လောက်မှာ ပြောပါတယ်။
အဆိုပါမီးလောင်မှုကြောင့် စစ်ကိုင်းထဲက ကန့်ဘလူမြို့နယ်မှာပါ MPT လိုင်းတွေ ယာယီပြတ်တောက်တာတွေ ဖြစ်ခဲ့ပြီး အခုတော့ ပြန်လည်အသုံးပြုလို့ရနေပြီလို့ ကန့်ဘလူခရိုင် ကျွန်းလှတက်ကြွလှုပ်ရှားသူများဆီကနေ သိရပါတယ်။
DVB က ဆက်သွယ်မေးမြန်းချက်အရ နေ့လယ် ၁၂ နာရီခွဲဝန်းကျင်မှာတော့ ရန်ကုန်မှာ MPT ဖုန်းလိုင်းတွေ ပြန်လည်အသုံးပြုလို့ရနေပြီဖြစ်တယ်လို့ ထပ်မံစုံစမ်း သိရှိရပါတယ်။
ရန်ကုန်တိုင်း၊ မရမ်းကုန်းမြို့နယ်၊ အမှတ်(၅)ရပ်ကွက်၊ ကမ္ဘာအေးဘုရားလမ်းပေါ်ရှိ MPT Exchange ရုံးမှာ ဖေဖော်ဝါရီ ၇ ရက် ဒီမနက် ၁၀ နာရီ ၂၃ မိနစ်က မီးလောင်မှုဖြစ်ပွားခဲ့တာဖြစ်ပါတယ်။
မီးလောင်မှုကို မြန်မာနိုင်ငံမီးသတ်တပ်ဖွဲ့ဌာနချုပ်က မီးသတ်ယာဉ်တွေနဲ့ မရမ်းကုန်းမြို့နယ်မီးသတ်စခန်းက မီးသတ်ယာဉ်တွေ ထွက်ခွာငြှိမ်းသတ်ခဲ့ရာမှာ မနက် ၁၀ ၃၇ အချိန် မီးထိန်းနိုင်ခဲ့ပြီး မနက် ၁၀ နာရီ ၄၅ အချိန် မီးငြိမ်းသွားတယ်လို့ မီးသတ်တပ်ဖွဲ့က ထုတ်ပြန်ထားပါတယ်။
MPT Exchange ရုံးမီးလောင်မှုဖြစ်ပွားပြီးနောက် MPT အင်တာနက်နဲ့ မိုဘိုင်းလ် တယ်လီဖုန်းလိုင်းတွေ ဆက်သွယ်မှုပြတ်တောက်နေတာနဲ့ ပတ်သက်ပြီး တောင်းပန်တဲ့ အကြောင်း သုံးစွဲသူတွေထံ MPT ကုမ္ပဏီက အသိပေးထုတ်ပြန်ထားပါတယ်။
မီးလောင်မှုဖြစ်ပြီးနောက် MPT Call Center, ဖိုင်ဘာအင်တာနက်၊ မိုဘိုင်းလ် အင်တာနက်၊ မိုဘိုင်းလ်နဲ့ တယ်လီဖုန်းဆက်သွယ်ရေးလုပ်ငန်းတွေ လတ်တလောအခက်အခဲတွေ ဖြစ်ပေါ်နေပြီး မြန်မာ့ဆက်သွယ်ရေးလုပ်ငန်းတာ၀န်ရှိသူတွေက မူလအတိုင်း ဆက်သွယ်မှု ပြန်လည်ရရှိနိုင်စေရေး အမြန်ဆုံး ပြုပြင်ဆောင်ရွက်သွားမှာဖြစ်ပြီး အဆင်မပြေမှုတွေအတွက် အနူးအညွတ်တောင်းပန်ကြောင်း ထုတ်ပြန်ထားပါတယ်။
ဆက်သွယ်ရေးကွန်ရက်အခြေအနေနဲ့ ပတ်သက်ပြီးအပြောင်းအလဲရှိပါကအကြောင်းကြားပေးသွားမယ်လို့လည်း အသိပေးကြေညာထားပါတယ်။
မီးလောင်ရတဲ့ အကြောင်းရင်းနဲ့ မီးလောင်ဆုံးရှုံးမှု ပမာဏကိုတော့ လတ်တလော မသိရသေးပါဘူး။
