သတင်းကြေညာသူတွေအနေနဲ့ ကိုဗစ်-၁၉ ကပ်ရောဂါသတင်းနဲ့ ပတ်သက်ပြီး ဖတ်ကြား ကြေညာရာမှာ အင်္ဂလိပ်လို “ကိုဗစ်နိုင်တင်း”အသံထွက်အစား မြန်မာလို “ကိုဗစ်ဆယ့်ကိုး”လို့သာ ကြေညာဖို့ အကြမ်းဖက်စစ်ကောင်စီက ခိုင်းစေထားပါတယ်။
ပြီးခဲ့တဲ့ သီတင်းပတ်ကစပြီး စစ်ကောင်စီ ရုပ်သံမီဒီယာတွေမှာ သတင်းကြေညာသူတွေက “ကိုဗစ်ဆယ့်ကိုး”လို့ ထည့်သွင်းကြေညာခဲ့ကြတာကို တွေ့ရပါတယ်။
မြန်မာမှာ ကိုဗစ်-၁၉ စတင်ကူးစက်ချိန်ကတည်းက ပြီးခဲ့တဲ့ ၁၈ လတာလုံးလုံးမှာ တော့ ဒီသတင်းတွေနဲ့ပတ်သက်ပြီး အင်္ဂလိပ်လို “ကိုဗစ်နိုင်တင်း”လို့သာ အသံထွက် ကြေညာခဲ့ကြတာ ဖြစ်ပါတယ်။
ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ မြန်မာနိုင်ငံမှာ ပြီးခဲ့တဲ့ ဇွန်လအစောပိုင်းက စတင်ကာ ရောဂါကူးစက်မှုတွေ၊ သေဆုံးမှုတွေ မြင့်တက်နေပြီး ဆေးရုံတွေမှာ ဆရာဝန်တွေ မလုံလောက်တဲ့ ပြသနာတွေ၊ အောက်ဆီဂျင်အခက်အခဲတွေနဲ့ ကြုံတွေ့နေရတာ ဖြစ်ပါတယ်။
အင်္ဂလိပ်လို “နိုင်တင်း”လို့ အသံထွက်ဖတ်ရတဲ့ စကားလုံး ၂ လုံးဟာ နားထောင်ရခက်တာ၊ မြန်မာလို အသံထွက်အဓိပ္ပါယ်နဲ့ဆိုရင် ရောဂါက နိုင်တာ၊ လူတွေကို ရိုက်နှက် ထိုးနှက်တာ စတဲ့ အဓိပ္ပါယ်ဆောင်သလို ဖြစ်နေတာမို့ ပြောင်းလဲကြေညာခိုင်းတာ ဖြစ်မယ်လို့ အသီးသီး ဝေဖန်ပြောဆိုနေကြတာတွေလည်း ရှိနေပါတယ်။
အကြမ်းဖက်စစ်အုပ်စုအနေနဲ့ မကောင်းတဲ့ အသံအတိတ်နိမိတ်ကြောင့် ဒီစကားလုံးကို ပြောင်းလဲဖယ်ရှားပစ်ခဲ့တာလားဆိုတဲ့ အမေးကို စစ်ကောင်စီလက်အောက်ခံ ပြန်ကြားရေးဝန် ကြီးဌာန အကြီးတန်းတာဝန်ရှိသူတယောက်က ငြင်းဆိုထားပါတယ်။
“ကျနော်တို့ အရင်ကလည်း ဒီစကားလုံးကို မြန်မာလိုရော၊ အင်္ဂလိပ်လိုပါ အသံ ထွက်အသုံးပြုခဲ့ပြီးပါပြီ။ ဒါပေမဲ့ မြန်မာပရိသတ်အတွက် ကျနော်တို့အနေနဲ့ မြန်မာလို အသံထွက်ပြောင်းသင့်တယ်လို့ ထင်ပါတယ်။ တခြားအကြောင်းရင်း မရှိပါဘူး”
စစ်ကောင်စီ သတင်းမီဒီယာတွေပေါ်မှာတော့ အာဏာပိုင်တွေအနေနဲ့ ရောဂါကူး စက်ပျံ့ပွားမှု ထိန်းချုပ်ရေးအတွက် လုပ်ဆောင်နေကြောင်းနဲ့ ပြည်သူတွေအနေနဲ့ ရောဂါ ကပ်ဘေးကနေ ကာကွယ်စောင့်ရှောက်မှုပေးနိုင်ဖို့အတွက် ဗုဒ္ဓအဆုံးအမအောက် လိုက် နာကျင့်သုံးသွားကြဖို့ နှိုးဆော်တာတွေကိုလည်း တွေ့ရပါတယ်။
မြန်မာပြည်သူအများစုဟာ ဗုဒ္ဓဘာသာဝင်တွေ ဖြစ်ကြပေမယ့် နတ်၊ နက္ခတ်ဗေဒင်၊ အဆောင်စတာတွေကို ယုံကြည်ကြသူတွေ အများစု ပါဝင်ပါတယ်။
ထင်ရှားတဲ့ ဗေဒင်ဆရာတယောက်ဖြစ်တဲ့ တင်ထွဋ်ကတော့ “အာဏာပိုင်တွေ ခု လိုဘာကြောင့်ပြောင်းရသလဲတော့ မသိဘူး။ ဒါပေမဲ့ ကျနော်ကတော့ သဘောကျ တယ်။ မြန်မာလိုကာရန်နဲ့က “ကိုဗစ်ဆယ့်ကိုးရှေ့မတိုး”ပေါ့ဗျာ”လို့ ပြောပါတယ်။
REF- AFP
အကြမ်းဖက်မှုနဲ့ အားပေးလှုံ့ဆော်မှု မူဝါဒစံနှုန်းတွေကို ဖောက်ဖျက်ပြီး အာဏာသိမ်းစစ်ကောင်စီရဲ့ သတင်းအာဘော်တွေကို ဖော်ပြနေတဲ့ မြန်မာ့အသံနဲ့ ရုပ်မြင်သံကြား MRTV နဲ့ MRTV Live စာမျက်နှာတို့ကို ဒီနေ့ ဖေ့စ်ဘွတ်ခ် ဆိုရှယ်မီဒီယာပလက်ဖောင်းကနေ ဖယ်ရှားလိုက်ပါတယ်။
ဒါနဲ့ပတ်သက်လို့ “ကမ္ဘာတဝန်းလုံးဆိုင်ရာ မူဝါဒတွေနဲ့အညီ Facebook မှာ တားမြစ်ထားတဲ့ အကြမ်းဖက်မှုနဲ့ အားပေးလှုံ့ဆော်မှု မူဝါဒအပါအဝင် လူမူစံနှုန်းတွေကို ထပ်ကာထပ်ကာ ဖောက်ဖျက်မှုတို့ကြောင့် MRTV နဲ့ MRTV Live စာမျက်နှာတွေကို Facebook ကနေ ဖယ်ရှားလိုက်ပါတယ်” လို့ ဖေ့စ်ဘွတ်ခ် ကုမ္ပဏီရဲ့ အာရှပစိဖိတ်ဒေသ ဖွံ့ဖြိုးဆဲနိုင်ငံများ၏ ပြည်သူ့ရေးရာ မူဝါဒဆိုင်ရာ ဒါရိုက်တာ Rafael Frankel (ရာဖယ်လ် ဖရန်ကယ်လ်)က ထုတ်ပြန်ပြောကြားပါတယ်။
ဖေဖော်ဝါရီ ၂၁ ရက်နေ့တုန်းကလည်း တပ်မတော်ရဲ့ သတင်းတွေကို အစဉ်တစိုက် ထုတ်ပြန်နေတဲ့ တပ်မတော် သတင်းမှန်ပြန်ကြားရေး ဖေ့စ်ဘွတ်ခ်စာမျက်နှာကို “အကြမ်းဖက်မှု လှုံ့ဆော်ခြင်းနဲ့ ထိခိုက်မှုဖြစ်အောင် စုစည်းကြံစည်ခြင်း မူဝါဒတွေကို ထပ်ကာထပ်ကာ ဖောက်ဖျက်မှုတို့ကြောင့်” ဖေ့စ်ဘွတ်ခ်ကနေ ဖယ်ရှားခဲ့ပါသေးတယ်။
စစ်အာဏာသိမ်းပြီးနောက်ပိုင်း မြန်မာနိုင်ငံမှာ ဖေ့စ်ဘွတ်ခ်ကို ပို့ဆောင်ရေးနဲ့ ဆက်သွယ်ရေးဝန်ကြီးဌာန ညွှန်ကြားချက်နဲ့ ဖေဖော်ဝါရီ ၄ ရက်နေ့ကတည်းက ပိတ်ပင်ထားခဲ့ပေမယ့် တပ်မတော်သတင်းမှန်နဲ့ MRTV စာမျက်နှာတွေကို ဆက်လက်သုံးစွဲခဲ့တဲ့အပြင် တိုက်ရိုက်ထုတ်လွှင့်မှုတွေလည်း ပြုလုပ်ခဲ့ပါတယ်။
စစ်တပ်က အာဏာသိမ်းပြီးနောက်ပိုင်း သတင်းတွေ ပုံမှန်မတင်နိုင်တော့ဘဲ သတင်းမှားဖြစ်တယ်ဆိုတဲ့ ပို့စ်တွေကိုပဲ တင်နေခဲ့တာပါ။
