အန်အယ်လ်ဒီပါတီရုံးတွေကို နည်းမျိုးစုံနဲ့ ဖွင့်လှစ်ဖို့ ကြိုးစားနေတာကို လုံးဝခွင့်မပြုဘဲ ကျူးလွန်ဝင်ရောက်ရင်လည်း တရားဥပဒေကြောင်းအရ အရေးယူမယ်လို့ အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) ဗဟိုအလုပ်ကော်မတီက ဇူလိုင် ၅ ရက် ဒီနေ့ ထုတ်ပြန်ပါတယ်။

၂၀၂၁ ခုနှစ် ဖေဖော်ဝါရီကနေ  ၂၀၂၂ ခုနှစ် ဇူလိုင် ၁ ရက်အထိ ကောက်ယူထားတဲ့ စာရင်းတွေအရ ဗဟိုရုံးချုပ် အပါအဝင် အန်အယ်လ်ဒီရုံးတွေကို စစ်ကောင်စီက ၁၀၆ ကြိမ် ကျူးကျော်ဖျက်ဆီးခဲ့တယ်လို့ ဆိုပါတယ်။

လွှတ်တော်ကိုယ်စားလှယ် ၁၁၉ ယောက် အပါအဝင် ပါတီဝင် ၂၂၄ ယောက်တို့ရဲ့ အိမ်နဲ့ပိုင်ဆိုင်မှုတွေကိုလည်း အကြောင်းအမျိုးမျိုးပြပြီး ဝရမ်းကပ် ချိပ်ပိတ် သိမ်းဆည်းခံခဲ့ရတယ်လို့လည်း အန်အယ်လ်ဒီ ထုတ်ပြန်ချက်မှာ ဖော်ပြထားပါတယ်။

ရွှေဂုံတိုင်ရှိ အန်အယ်လ်ဒီဗဟိုရုံးချုပ်ကိုလည်း ၂၀၂၂ ခုနှစ် ဖေဖော်ဝါရီ ၉ ရက်နေ့ညက စစ်သားနဲ့ရဲတွေ ပူးပေါင်းစီးနင်းဝင်ရောက်ခဲ့ပြီး ပါတီရဲ့ စာရွက်စာတမ်းတွေ ယူသွားခဲ့သလို မတ်လကုန်ပိုင်းမှာ မီးကွင်းပစ် မီးရှို့တာ၊ ဇွန်လလယ်မှာ ဗုံးနဲ့ပစ်တာတို့ကိုလည်း လုပ်ခဲ့ကြတယ်လို့ ဆိုပါတယ်။

ဒါတွေနဲ့ပတ်သက်လို့ ဥပဒေနဲ့အညီ အရေးယူပေးဖို့ ဗဟန်းရဲစခန်းမှာ တိုင်ကြားခဲ့ပေမယ့် အရေးယူဆောင်ရွက်တာမရှိတဲ့အပြင် တိုင်ကြားခဲ့ကြတဲ့ ဗဟိုကော်မတီဝင် ဦးဘမျိုးသိန်းနဲ့ ဦးစိုးလေးတို့ကို မတရားအမှုဆင်ဖမ်းဆီးထောင်ချခဲ့ကြတယ်လို့လည်း ဆိုပါတယ်။

အဲဒီလို အခြေအနေတွေကို အခွင့်ကောင်းယူပြီ အဖွဲ့ချုပ်က တာဝန်ပေးမထားသူတွေကို အဖွဲ့ချုပ်ရုံးထဲကို အကြောင်းအမျိုးမျိုးပြုဝင်ရောက်ဖို့ ကြိုးစားကြံစည်တာတွေ ရှိနေတာကို သိရတယ်လို့ဆိုပါတယ်။

ပါတီရုံးတွေနဲ့ အဖွဲ့ဝင်တွေကို ရည်ရွယ်ချက်ရှိရှိနဲ့ ပစ်မှတ်ထားတိုက်ခိုက်ခံနေရချိန်မှာ ပြည်သူ့ဆန္ဒနဲ့ သွေဖယ်ပြီး ရုံးခန်းတွေ့ပြန်ဖွင့်ဖို့ ကြိုးစားနေကြသူတွေကို လုံးဝ ခွင့်မပြုသလို ကျူးလွန်ဝင်ရောက်မယ် ဆိုရင်လည်း တရားဥပဒေကြောင်းအရရော၊ ပါတီစည်းကမ်းထိန်းသိမ်းရေး အရပါ ထိထိရောက်ရောက် အရေးယူမယ်လို့ ပါတီရဲ့ ဗဟိုအလုပ်ကော်မတီ၊ ဗဟိုကော်မတီဝင်တွေ၊ ဗဟိုရေးရာကော်မတီဝင်တွေ၊ တိုင်းနဲ့ ပြည်နယ် တာဝန်ခံတွေရဲ့ အစည်းအဝေးဆုံးဖြတ်ချက်အရ ပါတီက ထုတ်ပြန်လိုက်ပါတယ်။

စစ်ကောင်စီဟာ ဖေဖော်ဖော်ဝါရီ ၁ ရက် အာဏာသိမ်းပြီးကတည်းက  အန်အယ်လ်ဒီပါတီ ဥက္ကဋ္ဌ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် ပါတီထိပ်ပိုင်းခေါင်းဆောင်တွေကို ဖမ်းဆီးထောင်ချခဲ့သလို နိုင်ငံတဝန်းရှိ  အန်အယ်လ်ဒီပါတီဝင်တွေ၊ လွှတ်တော်အမတ်တွေ၊ ပါတီထောက်ခံဝန်းရံသူတွေကိုလည်း ဖမ်းဆီး၊ သတ်ဖြတ်နှိပ်ကွပ်နေသလို နေအိမ်တွေ ပါတီရုံးတွေကိုလည်း ချိပ်ပိတ်၊ မီးရှို့ဖျက်ဆီးတာတွေ ပြုလုပ်ခဲ့ပါတယ်။ 

ပြီးခဲ့တဲ့ အောက်တိုဘာ တလတာအတွင်း အကြမ်းဖက် အာဏာသိမ်းစစ်အုပ်စုက အမျိုး သားဒီမိုကရေစီအဖွဲ့ချုပ်(NLD)ပါတီရုံး ၁၀ ရုံးထက်မနည်း ဖျက်ဆီးခဲ့တယ်လို့ နိုင်ငံရေး အကျဉ်းသားများကူညီစောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။

အကြမ်းဖက်စစ်ကောင်စီဟာ ပြီးခဲ့တဲ့ ၂၀၂၀ ပြည့်နှစ် ရွေးကောက်ပွဲမှာ ပြည်သူ့ထောက် ခံမဲအများဆုံးရရှိခဲ့တဲ့ NLD ပါတီရဲ့ ပါတီရုံးတွေ၊ အဖွဲ့ဝင်တွေ၊ ထောက်ခံသူတွေကို ပစ်မှတ် ထားတိုက်ခိုက်နေတာဖြစ်ပြီး ပါတီရုံးခြံစည်းရိုး၊ တံခါး၊ ဆိုင်းဘုတ်၊ ဗီနိုင်းနဲ့ အလံတွေကို ရိုက်ချိုးဖျက်ဆီးပစ်တာတွေအပြင် ရုံးခန်းအတွင်း ဝင်ရောက်ကာ ပစ္စည်းတွေ ဖျက်ဆီး ယူငင်တာ၊ မီးကွင်းပစ်တာ၊ ဗုံးပစ်ထည့်တာ၊ ဖောက်ခွဲဖျက်ဆီးတာ စတဲ့ပုံစံတွေနဲ့ တိုက်ခိုက်ခဲ့တာ ဖြစ်ပါတယ်။

ဒါ့အပြင် လွှတ်တော်ကိုယ်စားလှယ်တွေ၊ NLD ပါတီအဖွဲ့ဝင်တွေနဲ့ အရပ်သားတွေ ပိုင်ဆိုင်တဲ့ ဟိုတယ်၊ ဆေးရုံ၊ နေအိမ်ဆိုင်ခန်းတွေကိုလည်း အကြမ်းဖက်စစ်အုပ်စုက မတရား သိမ်းဆည်းချိတ်ပိတ်မှုတွေ လုပ်ဆောင်နေပြီး အောက်တိုဘာလအတွင်း အနည်းဆုံး ၂၅ ခု ထက်မနည်း ကျူးလွန်ခဲ့ကြတယ်လို့ အေအေပီပီက ဆိုပါတယ်။

အာဏာသိမ်းစစ်အုပ်စုရဲ့ လူမဆန်စွာ ရက်စက်မှုတွေဟာ မတရားအာဏာလုယူမှုလ ပေါင်း ၉ လ ကြာလာတဲ့အချိန်ထိ ဆထက်တိုးပြီး ပိုမိုဆိုးရွားလာနေခဲ့ကာ မြို့ရွာတွေအတွင်း အကြမ်းဖက်ဝင်ရောက်စီးနင်းတာတွေ၊ လက်နက်နဲ့ပစ်ခတ်တာတွေကြောင့် ကလေးသူငယ်တွေအပါအဝင် အရပ်သားထိခိုက်နစ်နာခံစားရမှုတွေလည်း တိုင်းနဲ့ ပြည်နယ်အနှံ့ ရင်ဆိုင်နေရတယ်လို့ ဆိုပါတယ်။

ဒါ့အပြင် အောက်တိုဘာလအတွင်း ချင်းပြည်နယ် ထန်တလန်မြို့၊ ဖလမ်းမြို့နယ်နဲ့ မင်း တပ်မြို့နယ်အတွင်းရှိ ကျေးရွာတွေက ဘုရားကျောင်း ၁ လုံးနဲ့ အိမ်ခြေအလုံး ၄၀၀ ထက် မနည်း မီးရှို့ဖျက်ဆီးခဲ့ကြတာ ဖြစ်ပါတယ်။

ဒီဖြစ်စဉ်နဲ့ ပတ်သက်ပြီး စစ်အုပ်စုဘက်က ငြင်းဆန်ထားပေမယ့် စစ်အုပ်စုအမာခံ ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ ပြောရေးဆိုခွင့်ရှိသူကတော့ လူမှုကွန်ရက်စာမျက် နှာပေါ်ကတဆင့် ထန်တလန်ဖြစ်စဉ်ကို နမူနာယူကြဖို့ ပြည်သူလူထုကို ခြိမ်းခြောက်ခဲ့တာတွေ ပြုလုပ်ခဲ့တယ်လို့ အေအေပီပီက ပြောပါတယ်။

ဒါ့အပြင် တလအတွင်း ဖမ်းဆီးမှုအနေနဲ့လည်း အောက်တိုဘာ ၁ ရက်ကနေ ၃၁ ရက်နေ့အထိ စစ်အုပ်စုရဲ့ တရားလက်လွတ်ဖမ်းဆီးမှုကြောင့် ထိန်းသိမ်းခံခဲ့ရသူပေါင်း ၃၁၉ ယောက် ရှိခဲ့ပြီး အဲဒီထဲမှာ အမျိုးသမီးအယောက် ၈၀ နဲ့ အသက် ၁၈ နှစ်အောက် ကလေးသူငယ် ၉ ယောက်၊ ဓားစာခံအဖြစ် ဖမ်းဆီးခံရသူ ၂၇ ယောက် ပါဝင်နေတယ်လို့ ဆိုပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်မှ နိုဝင်ဘာ ၃ ရက်အထိ  အာဏာသိမ်းကာလ ၉ လကျော်အကြာ အကြမ်းဖက်စစ်တပ် ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူပေါင်း ၁,၂၃၆ ယောက်ထိ ရှိလာခဲ့ပြီ ဖြစ်ပါတယ်။

နွေဦးတော်လှန်ရေးကာလအတွင်း ပြည်သူ ၉၆၆၇ ယောက် ဖမ်းဆီးခံခဲ့ရကာ ၇၀၃၃ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲကအယောက် ၃၀၀ ကတော့ ထောင်ဒဏ် ချမှတ်ခံထားရတယ်လို့ အေအေပီပီက ပြောပါတယ်။