စစ်ကိုင်းဒေသခံ PDF တွေက တိုက်ပွဲခေါ်ရေး ကိုအားသန်နေပေမယ့် လက်နက်လိုအပ်ချက် မြင့်မားနေတာကြောင့် အလှူငွေရရှိရေးကို တိုးမြှင့်လုပ်ဆောင်နေရပါတယ်။

ပုလဲမြို့နယ်၊ မင်းတိုင်ပင်ကျေးရွာကို ဖေဖော်ဝါရီ ၁၇ ရက်နေ့မှာ စစ်ကောင်စီတပ်သားတွေက ဝင်ရောက်မီးရှို့ခဲ့ပြီး လက်ရှိအချိန်အထိ အနီးနားရွာတွေမှာ အကြမ်းဖက်မှုတွေ ဆက်လက်လုပ်ဆောင်နေတယ်လို့ ပုလဲဗိုလ်ဂဠန်ပြောက်ကျားတပ်ဖွဲ့ခေါင်းဆောင်ကပြောပါတယ်။ 

စစ်ကောင်စီရဲ့လုပ်ရပ်တွေကို လက်တုံ့ပြန်သွားမှာဖြစ်ပြီး စခန်းသိမ်းတိုက်ပွဲတွေဆင်နွှဲသွားမယ်လို့ ဆိုပါတယ်။

ဗိုလ်ဂဠုန်က "တိုက်ပွဲတွေကတော့ ပြင်းထန်တယ်။ ကျနော်တို့ စခန်းသိမ်းတိုက်ပွဲတွေပါလုပ်ဖို့ စီစဉ်ထားတယ်။ လက်တုံ့ပြန်မယ်၊ ကျနော်တို့လည်း စစ်ကြောင်းပြန်ထိုးမယ်၊ ဗျူဟာကို ကောင်းကောင်းလေးနဲ့ ပြန်ခုခံမယ်ပေါ့။"

ဖေဖော်ဝါရီ ၂ရက်နေ့က စစ်ကိုင်းတိုင်း ၁၁ မြို့နယ်ကို စစ်အုပ်ချုပ်ရေးကြေညာပြီးနောက် PDF တွေဘက်က လက်ဦးမှုရယူပြီး စခန်းသိမ်းတိုက်ပွဲတချို့ဆင်နွှဲခဲ့ပါတယ်။ တတိုင်းလုံးက PDF အစုအဖွဲ့တွေဟာ တိုက်ပွဲခေါ်ဖို့ စိတ်အားထက်သန်နေပေမယ့် လက်နက်လိုအပ်ချက် မြင့်မားတာကြောင့် စိတ်ထင်တိုင်းမပေါက်ဘူးဖြစ်နေတယ်လို့ PDF ခေါင်းဆောင်တွေကပြောပါတယ်။ 

ဇီးရိုးပြောက်ကျားတပ်ဖွဲ့က ရက် ၉၀ သိန်းတထောင် တိုက်ပွဲခေါ်သံချဲလန့်နဲ့ အလှူငွေရရှိဖို့ ကြိုးစားနေသလို မြောင် Eagle ပြည်သူ့ကာကွယ်ရေးတပ်ဖွဲ့ကလည်း ဒရုန်းဝယ်ယူရေးအတွက် "ဝေဟင်ထက်မှသူရဲကောင်း(ကံစမ်းရင်းလှူ) အစီအစဉ်နဲ့ အလှူငွေရဖို့ကြိုးစားနေပါတယ်။ ရရှိလာတဲ့အလှူငွေတွေနဲ့ ထိုက်တန်တဲ့ တိုက်ပွဲနဲ့ရလဒ်တွေကို ပြသနိုင်ဖို့ တာဝန်ယူတယ်လို့ PDF ခေါင်းဆောင်တွေက ပြောပါတယ်။

Zero ပြောက်ကျားတပ်ဖွဲ့ခေါင်းဆောင် ဗိုလ်ဇီးရိုးက "ကျနော်တို့ Zero ပြောက်ကျားတပ်ဖွဲ့-မြင်းခြံဟာ မြေပြင်မှာ တိုက်ပွဲတွေများစွာဆင်နွှဲနေပါတယ်။ ဆက်လက်တိုက်ပွဲဝင်နိုင်ဖို့ လက်နက်ခဲယမ်း ဖြည့်တင်းဖို့လိုအပ်နေတဲ့အတွက် တိုက်ပွဲခေါ်သံချဲလန့်ဆိုပြီးတော့ ရက် ၉၀ သိန်း ၁၀၀၀ ချဲလန့်နဲ့ ကျနော်တို့အလှူခံမှာဖြစ်ပါတယ်။ ပြည်တွင်းပြည်ပမှာရှိတဲ့ မိဘပြည်သူများအနေနဲ့ ကျနော်တို့ချဲလန့်ကို ပါဝင်အားဖြည့်လှူဒါန်းဖို့ရန် မေတ္တာရပ်ခံအပ်ပါတယ်။"

မြောင် Eagle ပြည်သူ့ကာကွယ်ရေးတပ်ဖွဲ့ခေါင်းဆောင် ကိုတိုးက "ပြည်သူတွေက တချို့အရာတွေမှာ လုပ်နိုင်စွမ်းနည်းနေတာကို သံသယလေးတွေရှိနေတဲ့အပေါ် ကျနော်တို့အ‌ပေါ်သံသယလေးတွေဖျောက်ပေးပြီး ယုံကြည်မှုလေးတွေထားပေးပါပေါ့နော်။ ဒါလေးပဲ ပြောချင်ပါတယ်။ တဦးတည်းအလှူရှင်မပေါ်ပေါက်ဘူးဆိုရင် ကျနော်တို့က ဒီငွေလေးတွေသုံးစွဲပြီးတော့ ဒရုန်းဝယ်ယူသွားပါမယ်။ တဦးတည်း အလှူရှင်ပေါ်တယ်ဆိုရင်တော့ ဒီငွေတွေအားလုံးကို ကျနော်တို့အဖွဲ့လုံးဝမသုံးစွဲဘဲနဲ့ ပြည်သူတွေကို ပြန်လည်ပေးအပ်သွားမှာပါ။” လို့ ပြောပါတယ်။

ဇန်နဝါရီ ၃၁ ရက်နေ့ကပြုလုပ်ခဲ့တဲ့  အမျိုးသားကာကွယ်ရေးနဲ့လုံခြုံရေးကောင်စီအစည်းအဝေးမှာ စစ်ကောင်စီက ၂၀၀၈ ဖွဲ့စည်းပုံ အခြေခံဥပဒေပုဒ်မ ၄၂၅ အရ နိုင်ငံတဝန်း အရေးပေါ်အခြေအနေကာလကို သက်တမ်း ၆လ တိုးတယ်လို့ ကြေညာခဲ့ပါတယ်။ 

ဒီသက်တမ်းတိုးမှုမတိုင်ခင် အာဏာစသိမ်းတဲ့ ၂၀၂၁ ဖေဖော်ဝါရီလဆန်းမှာ နိုင်ငံတော်အာဏာကို ၁ နှစ်ထိန်းသိမ်းပြီး ရွေးကောက်ပွဲကျင်းပပေးမယ်လို့ စစ်ခေါင်းဆောင်ကပြောဆိုခဲ့ပေမယ့် လက်ရှိအချိန်အထိ ရွေးကောက်ပွဲမကျင်းပနိုင်ခဲ့ဘဲ နောက်ထပ်သက်တမ်း ၆လထပ်တိုးခဲ့တာပါ။ 

စစ်ခေါင်းဆောင်က ၂၀၀၈ ဖွဲ့စည်းပုံအရ သက်တမ်းတိုးတာလို့ ကြေညာချက်မှာဖော်ပြခဲ့ပေမယ့် တကယ်တမ်းမှာတော့ ၂၀၀၈ ဖွဲ့စည်းပုံနဲ့ညီညွတ်မှုမရှိတဲ့ လုပ်ရပ်သာဖြစ်တယ်လို့ ဥပဒေပညာရှင်တွေက သုံးသပ်ထားပါတယ်။ 

ဒီအခြေအနေတွေမှာ စစ်ကောင်စီရဲ့ အကြမ်းဖက်လုပ်ရပ်တွေနဲ့ပတ်သက်ပြီး လက်နက်ကိုင်တော်လှန်ရေးအင်အားစုတွေဘက်က ရွေးချယ်စရာလမ်းမရှိတဲ့အတွက် တိုက်ပွဲဝင်ဖို့ နည်းလမ်းကိုသာ ရွေးချယ်ကြတာလို့ စစ်ကိုင်းနယ်ခံနိုင်ငံရေးသမား ကိုစိုးဝင်းဆွေက သုံးသပ်ပါတယ်။ 

"နိုင်ငံရေးအရ ဘာမှအမြတ်မထွက်လို့ လုပ်မိလုပ်ရာလုပ်ပြီးတော့ ပိုမိုရက်စက်ကြမ်းကြုတ်တဲ့ နည်းနာတွေကို ပိုမိုအသုံးပြုလာတယ်လို့ပဲမြင်ပါတယ်။  ၆ လ ၂ ကြိမ်နဲ့ ၁ နှစ် ၁ကြိမ် အရေးပေါ်ကာလ ၂ နှစ်အတောအတွင်းမှာ မအောင်မြင်တဲ့ အရေးပေါ်ကာလ မအောင်မြင်တဲ့ စစ်အုပ်ချုပ်ရေးကိုပဲ သူကြုံလိုက်ရတယ်ပေါ့။ လက်နက်အားကိုးပြီး အနိုင်ကျင့်ဖိနှိပ်သတ်ဖြတ်တာတွေပဲ အရာထင်ခဲ့တယ်။ နိုင်ငံရေးအရ ကောင်းမွန်တဲ့အရွေ့တခုကို မဖော်ဆောင်နိုင်ဘူး။ တိုင်းပြည်ကို နိုင်ငံရေးနည်းအရ မထိန်းသိမ်းနိုင်ဘူးဆိုတာကို ပြီးခဲ့တဲ့ကာလုံအစည်းအဝေးက သက်သေပြလိုက်တာပဲဗျ။"

စစ်ကောင်စီက ရွေးကောက်ပွဲကျင်းပနိုင်ဖို့နဲ့ နယ်မြေထိန်းချုပ်ရေးတွေပိုလုပ်နိုင်ဖို့ ဖေဖော်ဝါရီ ၂ ရက်နေ့က တိုင်းနဲ့ပြည်နယ် ၈ ခုက မြို့နယ် ၃၇မြို့ နယ်မှာ စစ်အုပ်ချုပ်ရေးကြေညာခဲ့ပါတယ်။ 

ဖေဖော်ဝါရီ ၄ ရက်နေ့မှာတော့ စစ်အုပ်ချုပ်ရေးကြေညာထားတဲ့မြို့နယ်တွေထဲက ၂၄ မြို့နယ်မှာ ညမထွက်ရအမိန့်နဲ့ လူ ၅ ယောက်ထပ်ပိုမစုရဆိုတဲ့ အမိန့်တွေကိုပါ ထပ်မံထုတ်ပြန်ခဲ့ပါတယ်။ အဲ့ဒီနောက်ပိုင်း စစ်ကောင်စီက အကြမ်းဖက်လုပ်ရပ်တွေ တိုးမြှင့်လုပ်ဆောင်လာသလို PDF တွေဘက်ကလည်း  စခန်းသိမ်းတိုက်ပွဲတွေနဲ့ ကြားဖြတ်တိုက်ခိုက်မှုတွေ ပိုမိုလုပ်ဆောင်လာပါတယ်။ 

စစ်ကောင်စီအောက်ခြေတပ်တွေဟာ အရပ်သားပြည်သူတွေကို ဖမ်းဆီးပြီး တော်လှန်ရေးသမားတွေအဖြစ် စစ်ခေါင်းဆောင်ကို စာရင်းလိမ်တင်နေတာလို့ ဒေသခံ ပြည်သူ့ကာကွယ်ရေးတပ်ခေါင်းဆောင်တွေက ပြောပါတယ်။

ပြီးခဲ့တဲ့နှစ် ဒီဇင်ဘာ ၂၃ ရက်နေ့က မြန်မာနိုင်ငံရဲတပ်ဖွဲ့ဌာနချုပ်မှာ ပြုလုပ်ခဲ့တဲ့ စစ်ကောင်စီအကြမ်းဖက်မှုတိုက်ဖျက်ရေးဗဟိုအဖွဲ့အစည်းအဝေးမှတ်တမ်းအရ စစ်ကိုင်း၊ မကွေး၊ မန္တလေးနဲ့ ချင်းပြည်နယ်တို့မှာ အာဏာစသိမ်းချိန်ကနေ ၂၀၂၂ ခုနှစ် ဒီဇင်ဘာလအထိ အကြမ်းဖက်မှုတိုက်ဖျက်ရေးဥပဒေနဲ့ အရေးယူထားတဲ့ အမှုစုစုပေါင်း ၄၉၃၉ မှုရှိခဲ့ပြီး၊ ဖမ်းဆီးအရေးယူခံရသူ စုစုပေါင်း ၅၈၈၅ ယောက် အထိရှိခဲ့တယ်လို့ သိရပါတယ်။

အဲဒီအစည်းအဝေးမှာ စစ်ကိုင်းတိုင်း လုံနယ်ဝန်ကြီး ဗိုလ်မှူးကြီးဝင်းတင်စိုးက ၂၀၂၁ ဖေဖော်ဝါရီ ၁ ရက်နေ့ကနေ ၂၀၂၂ ဒီဇင်ဘာ ၂၀ ရက်နေ့အတွင်း စစ်ကိုင်းတိုင်းမှာ အကြမ်းဖက်မှုတိုက်ဖျက်ရေးဥပဒေနဲ့ အရေးယူထားတဲ့အမှုပေါင်း ၂၃၈၆ မှုရှိခဲ့ပြီး အမျိုးသား ၃၉၆၃ ယောက် အမျိုးသမီး ၂၈၉ ယောက်၊ စုစုပေါင်း ၄၂၄၈  ယောက်ကို ဖမ်းဆီးအရေးယူခဲ့တယ်လို့ ဆိုပါတယ်။

ပြီးတော့ ပြည်သူ့ကာကွယ်ရေးတပ်တွေဆီက  စိန်ပြောင်း/လောင်ချာ၊ စက်သေနတ်/မောင်းပြန်ရိုင်ဖယ်၊ ပစ္စတို၊ ပြောင်းချော၊ တူမီး/လက်လုပ်စိန်ပြောင်း/လက်လုပ်သေနတ်/လေ/ဂက်(စ)သေနတ် စုစုပေါင်း ၂၀၄၄ လက် သိမ်းဆည်းခဲ့တယ်လို့လည်း အစည်းအဝေးမှတ်တမ်းမှာဖော်ပြထားပါတယ်။ 

ခင်ဦး Special Force Organization- KSO ရဲ့ တာဝန်ရှိသူတယောက်က "မြေပြင်မှာ တကယ်ဖြစ်နေတာက သူတို့ဖမ်းတဲ့အထဲမှာ ကျနော်တို့လိုကာကွယ်ရေး PDF တွေ ဖမ်းမိတာနည်းတယ်။ အကြမ်းဖက်စစ်ကောင်စီ စစ်ကြောင်းတွေဝင်ပြီဆိုရင် မထွက်ပြေးနိုင်တဲ့စစ်ရှောင်တွေကိုဖမ်းပြီးတော့ လက်နက်တွေကို အရှေ့မှာချပြီးတော့ အကြမ်းဖက် PDF တွေမိတယ် ဆိုပြီး သူတို့အထက်ကိုတင်တယ်။ လိမ်ညာပြီးတော့တင်တယ်။ နောက်ပြီးတော့ မြို့ပေါ်ကအစပေါ့နော်၊ သွားလာတာတွေစုံစမ်းစစ်ဆေးပြီးတော့ ဖမ်းဆီးတာတွေများတယ်။ ကျနော်တို့ ကာကွယ်ရေး PDF တွေကို ဖမ်းမိတာက ရာဂဏန်းတောင်ပြည့်မှာမဟုတ်ပါဘူး” လို့ ပြောပါတယ်။

ဘာမှမသိတဲ့ စစ်ရှောင်တွေ ပြည်သူတွေကို မတရားခေါင်းစဉ်တပ်ပြီးတော့ ဖမ်းတဲ့အပေါ်မှာ ကန့်ကွက်ရှုတ်ချတယ်လို့လည်း သူက ဆက်ပြောပါတယ်။

စစ်ကောင်စီ အစည်းအဝေးမှတ်တမ်းမှာ အနောက်မြောက်တိုင်းစစ်ဒေသ မကွေးတိုင်း လုံနယ်ဝန်ကြီး ဗိုလ်မှူးကြီးကျော်ကျော်လင်းရဲ့ ပြောဆိုချက်အရ မကွေးတိုင်းမှာ အကြမ်းဖက်မှုတိုက်ဖျက်ရေးဥပဒေနဲ့ အရေးယူထားတဲ့အမှုပေါင်း ၁၄၂၇ မှုရှိခဲ့ပြီး အမျိုးသား၊ အမျိုးသမီး စုစုပေါင်း ၇၅၆ ယောက်ကို ဖမ်းဆီးခဲ့တယ်လို့ ဖော်ပြပါတယ်။ PDF တွေဆီက လက်နက်မျိုးစုံ ၅၆၅ လက်၊ ခဲယမ်း ၅၀၀၀ ကျော်၊ မိုင်းမျိုးစုံ ၁၀၀၀ ကျော် သိမ်းဆည်းခဲ့တယ်လို့လည်းဆိုပါတယ်။ 

မကွေးဒေသခံ CDM ကျောင်းဆရာတယောက်က "ဒလန်တွေပေါ့ဗျာ။ ဒလန်တွေ သတင်းပေးသမျှ ရသမျှတွေထဲကနေ ရဲဘော်လည်း ဟုတ်ချင်မှဟုတ်မယ်။ ပြည်သူလည်းဟုတ်ချင်ဟုတ်မယ်။ ဟုတ်ချင်မှလည်းဟုတ်မယ်။ သူတို့တွေ့ရာမြင်ရာ မထင်ရင်မထင်သလို ဖမ်းသွားတာပဲ။ အကုန်လုံးက ကျနော်တို့ရဲဘော်တွေချည်းပဲဆိုတာ လုံးဝမဖြစ်နိုင်ဘူးလေ” လို့ ပြောပါတယ်။

အလယ်ပိုင်းတိုင်းစစ်ဒေသ မန္တလေးတိုင်း လုံနယ်ဝန်ကြီး ဗိုလ်မှူးကြီး ကျော်ကျော်မင်းကတော့ မန္တလေးတိုင်းမှာ အကြမ်းဖက်မှုတိုက်ဖျက်ရေးဥပဒေနဲ့ အရေးယူထားတဲ့အမှုပေါင်း ၉၈၁ မှုအထိရှိခဲ့ပြီး အမျိုးသား၊ အမျိုးသမီး စုစုပေါင်း ၈၀၇ ယောက်ကို ဖမ်းဆီးခဲ့တယ်လို့ ဆိုပါတယ်။

Zero ပြောက်ကျားတပ်ဖွဲ့ - မြင်းခြံက ဗိုလ်ဇီးရိုးက "တွေ့တဲ့လူကိုသူတို့က ဥပမာ ရဲစခန်းတွေမှာဆို တလကို အမှုဘယ်လောက် ပို့ရမယ်ဆိုတာ ဒါမျိုးစနစ်တွေရှိတာပေါ့။ အဲအချိန်မှာ အောက်က လိမ်ဖို့အတွက် မဟုတ်လည်းဖမ်းတယ်။ သူတို့ရဲ့ လိမ်ညာမှုတွေပေါ့။ အထက်ကိုလိမ်ဖို့အတွက် တခါတလေဘာမှမဟုတ်ပဲလည်း စတေးခံရတာရှိတယ်။ ဟိုတခေါက်က အသက်မပြည့်သေးတဲ့ ကလေးလေးတွေကို PDF ဆိုပြီးတော့ လိုင်းပေါ်မှာ တက်လာတာ၊ ရိုက်နှက်တာတွေ၊ ကလေးမလေးဆိုအင်မတန်ငယ်ပါတယ် ၁၂၊ ၁၃ လောက်၊ ဒါမျိုးတွေ တွေ့ရတယ်ပေါ့။ ကျနော်တို့မန္တလေးတိုင်းထဲမှာလည်း အဲလောက်ကြီးမရှိဘူးပေါ့။ သူတို့က အရှက်မရှိ လိမ်ညာပြီးတော့ သတင်းတွေဖြန့်တာမျိုးလည်းရှိတယ်ပေါ့။ အကြမ်းဖက်တာသူတို့လား ကျနော်တို့လားဆိုတာ အားလုံးသဲသဲကွဲကွဲသိကြပါတယ်ဗျ" လို့ ပြောပါတယ်။

အစည်းအဝေးမှတ်တမ်းမှာ ချင်းပြည်နယ် လုံနယ်ဝန်ကြီး ဗိုလ်မှူးကြီးဉာဏ်ဝင်းရဲ့ ပြောဆိုချက်အရ ၂၀၂၁ ခုနှစ်ကနေ ၂၀၂၂ ခု ဒီဇင်ဘာ ၂၁ ရက်နေ့အထိ ချင်းပြည်နယ်မှာ အကြမ်းဖက်မှုတိုက်ဖျက်ရေးဥပဒေနဲ့ အရေးယူထားတဲ့အမှုပေါင်း ၁၄၅ မှု ရှိခဲ့ပြီး အမျိုးသား ၆၈ ယောက်၊ အမျိုးသမီး ၆ ယောက် စုစုပေါင်း ၇၄ ယောက်ကို ဖမ်းဆီးအရေးယူခဲ့တယ်လို့ ဖော်ပြထားပါတယ်။