မကွေးတိုင်း၊ ရေစကြိုမြို့နယ်ထဲက ရေလယ်ကျွန်းဒေသမှာရှိတဲ့ Myingan Black Tiger အဖွဲ့ရဲ့ တပ်စခန်းဌာနချုပ်နေရာကို ပြန်လည်သိမ်းပိုက်နိုင်ပြီလို့  MBT တာဝန်ရှိသူတစ်ဦးက ဒီဗွီဘီကို ပြောပါတယ်။

စစ်ကိုင်းတိုင်း တာတိုင်ကျေးရွာမှာ လူမျိုးတုံးသတ်ဖြတ်မှု ကျူးလွန်ခဲ့တဲ့ စစ်ကောင်စီ တပ်မ ၉၉ လက်အောက်ခံ ဘီလူးစစ်ကြောင်းက သိမ်းပိုက်ထားခဲ့တဲ့ တပ်စခန်းကို မဟာမိတ်တွေနဲ့ ပြန်လည်တိုက်ယူနိုင်ခဲ့တာလို့  MBT တာဝန်ရှိသူတစ်ဦးက ပြောပါတယ်။

မတ်လ ၁၆ ရက်မှ ၁၈ ရက်အထိ စစ်ကောင်စီတပ်နဲ့ ပြည်သူ့ကာကွယ်ရေးတပ်ပေါင်းစုတွေအကြား လက်နက်ကြီး လက်နက်ငယ်တွေနဲ့ အပြန်အလှန်တိုက်ပွဲဖြစ်ပွါးပြီး PDF နှစ်ဦး ဒဏ်ရာ ရရှိခဲ့တဲ့အတွက် ဆေးကုသဖို့အတွက် အနီးစပ်ဆုံးနေရာကို ခေါင်းဆောင်ပိုင်းတွေနဲ့ သွားခဲ့တဲ့အချိန်မှာ ပြည်သူ့ကာကွယ်ရေး တပ်စခန်း MBT ဌာနချုပ် ဝင်အစီးခံရတာလို့ဆိုပါတယ်။

"၁၆ ရက်နေ့ကတည်းက ကျနော်တို့နဲ့ အဲဒီဘီလူးစစ်ကြောင်းနဲ့ တိုက်ပွဲဖြစ်နေတာပါ ၁၈ ရက်နေ့မှာ ဒီကောင်တွေ ကျနော်တို့ စခန်းကို ချဥ်းကပ်နေတာကို စတင်သတိထားမိပြီး သွားတိုက်ခဲ့တယ်။ အဲ့မှာ ကျနော်တို့ဘက်က ရဲဘော်နှစ်ဦး ဒဏ်ရာ ရရှိပြီး ပြန်ဆုတ်လာခဲ့တာ ဒဏ်ရာရ ရဲဘော်နှစ်ဦးကို ဆေးကုသဖို့ ခေါင်းဆောင်ပိုင်းတွေသွားတုန်းအချိန်မှာ ညဘက် အင်အား ၂ဝဝခန့်နဲ့ စီးနင်းခံရတာပါ ရဲဘော်တွေလည်း ခုခံပြီး ပြန်တိုက်ပေမဲ့ စစ်မှုရေးရာ အမိန့်ပေး ခေါင်းဆောင်မပါတဲ့အတွက် လက်နက်ခဲယမ်းနဲ့အရေးကြီးပစ္စည်းတွေယူဆောင်ပြီး စခန်းစွန့်ခဲ့ရပါတယ်။ မနေ့ကညနေမှာ တခြား မဟာမိတ်တွေအကူအညီနဲ့ စခန်းပြန်တိုက်ပြီး သိမ်းယူနိုင်ခဲ့တယ်" လို့ တာဝန်ရှိသူတစ်ဦးကဆိုပါတယ်။

လက်ရှိမှာ စစ်ကောင်စီတပ် တပ်မ ၉၉ လက်အောက်ခံ ဘီလူးစစ်ကြောင်းက MBT ဌာနချုပ်ရဲ့ အနောက်ဘက်ကရွာတွေကို ဝင်ရောက်နေပြီး နေအိမ်မီးရှို့ ပစ္စည်းလု ကျေးရွာနေဒေသခံတွေကို ဖမ်းခေါ်သွားတယ်လို့ သိရပြီး ပြည်သူ့ကာကွယ်ရေးတပ်တွေအနေနဲ့ ပြန်လည်ထိုးစစ်ဆင်ဖို့ ပြင်ဆင်နေတယ်လို့ သိရပါတယ်။

MBTတပ်ဖွဲ့က လက်ရှိမှာ ရေစကြို အရာတော် မြောင် စတဲ့ ဒေသတွေက မဟာမိတ်တပ်ပေါင်းစုတွေနဲ့ ပူးပါင်းပြီးပြင်ဆင်မှုတွေပြုလုပ်နေကာ စစ်ရေးအရတင်းမာမှုဖြစ်နေပြီး တိုက်ပွဲတွေဆက်လက်ဖြစ်လာဖို့ အလားအလာ ရှိနေတဲ့အပြင် လက်လုပ် လက်နက်တွေသာရှိတဲ့အတွက် ခဲယမ်းတွေနဲ့ထောက်ပံ့ကူညီမှုတွေလိုအပ်နေတယ်လို့သိရပြီး ပြီးခဲ့တဲ့ မတ်လ ၁၈ ရက်နေ့က ရေစကြိုမြို့ပေါ်က ထွေအုပ်ရုံးကိုလဲ အဝေးပစ်လောင်ချာ၊၄ဝမမ စတာတွေနဲ့ တိုက်ခိုက်မှုတွေပြုလုပ်ခဲ့တယ်လို့ လတ်တလောသိရပါတယ်။

ဓာတ်ပုံ/ဗွီဒီယို - MBT ပြန်ကြားရေး

ရခိုင်ရိုးမတောင်ပေါ် မကွေးတိုင်း၊ စေတုတ္တရာမြို့နယ်ထဲရှိ ဒေသခံ PDF တပ်စခန်းတွေကို ဧပြီ ၆ ရက်နဲ့ ၇ ရက်နေ့တွေမှာ စစ်ကောင်စီတပ်က အပြင်းအထန်  ထိုးစစ်ဆင်နေပါတယ်။

စစ်ကောင်စီတပ်တွေနဲ့ ဒေသခံ PDF တပ်ဖွဲ့တွေ ဧပြီ ၆ ရက်နေ့ တိုက်ပွဲအတွင်း စစ်ကောင်စီတပ်ဖွဲ့ဝင် ၂၀ ကျော် သေဆုံးခဲ့ကာ အလောင်းအများစုကို မကောက်နိုင်ဘဲ ထားခဲ့ရတယ်လို့ ဒေသခံ ကျေးရွာသားတယောက်ထံက သိရပါတယ်။

People Revolution Alliance (PRA-Magway) အဖွဲ့ တာဝန်ရှိသူယောက်က "သူတို့က ကျနော်တို့စခန်းနဲ့ ၁၀ မိုင်လောက်‌ဝေးတဲ့ နေရာမှာ စခန်းလာချနေတာ တပတ်လောက်ရှိပါပြီ။ တောင်ပေါ်မှာ ACDF၊ PRA(Magway)၊ Student Enforce စခန်းတွေ ရှိနေတာကိုလည်း သူတို့သိတယ်။ ကျနော်တို့မှာ အင်အားရှိတာကိုလည်း သူတို့သိနေတာ။ ဒါပေမဲ့ ရှေ့ကိုတိုးမလာဘဲ နေနေတာ အခု ဧပြီ ၅ ရက်နေ့မှာတော့ PRA စခန်းရှိတဲ့နေရာကို သူတို့ လက်နက်ကြီး၊ ရဟတ်ယာဉ်တွေနဲ့ စပစ်ခတ်ပြီး ‌မြေပြင်စစ်ကြောင်းတွေပါ စတက်လာကြတာ၊ ၆ ရက်နေ့မှာတော့ မနက် ၉ နာရီလောက်မှာ ကျနော်တို့က သူတို့ကို မိုင်းကွင်းထဲ ဆွဲခေါ်လာပြီး အပြန်အလှန် ပြစ်ခတ်မှုတွေ စတင်ခဲ့ပါတယ်။ ရန်သူစစ်ကောင်စီဘက်က ၆ ရက်နေ့တိုက်ပွဲမှာတော့ တိုက်လေယာဉ် ၃ စီး၊ ဂျက်တိုက်လေယာဉ်တစီး သုံးပြီး တပ်မ ၆၆၊ တပ်မ ၈၈ နဲ့ ငဖဲ ကပစ ၁၄ တပ်တွေအပြင် ရဲတပ်ဖွဲ့၊ ပျူအဖွဲ့ စုစုပေါင်း အင်အား ၆၀၀ ခန့်နဲ့ ပစ်ခတ်ခဲ့ပါတယ်။" လို့ ပြောပါတယ်။

တိုက်ပွဲမှာ PDF တွေ အသေးစား ထိခိုက်မှုတချို့ရှိပြီး စစ်ကောင်စီဘက်ကတော့ အလောင်း ၂၀ လောက်နဲ့ လက်နက်တချို့ ရခဲ့ပြီး ညနေပိုင်း ၄ နာရီကျော်မှာတော့ ရန်သူဘက်က ဆုတ်သွားတယ်လို့ ဒေသခံပြည်သူ့ကာကွယ်ရေးတပ်ဖွဲ့က ပြောပါတယ်။

ACDF (Asho Chin Defence Force) အဖွဲ့ တာဝန်ရှိသူက "ဧပြီ ၇ ရက်နေ့ တိုက်ပွဲကြောင့် သက္ကယ်ကျင်းကျေးရွာနဲ့ ရေဖြူတောင်ကျေးရွာက အိမ်တွေ မီးလောင်ပျက်စီးခဲ့ပြီး အိမ်ခြေ အတိအကျတော့ ကောက်ယူလို့ မရသေးပါဘူး။ ဒါပေမဲ့ စစ်ပြေးဒုက္ခသည်ကတော့ အိမ်ထောင်စု ၈၀ လောက် တောထဲကို တိမ်းရှောင်ထွက်ပြေးနေရတယ်။ ညနေဘက်မှာ တိုက်ပွဲရပ်သွားခဲ့ပေမဲ့ လက်နက်ကြီးတွေနဲ့ ရွာတွေကို လှမ်းပစ်တာတွေတော့ ဆက်လုပ်နေသေးတယ်" လို့ ပြောပါတယ်။

စစ်ကောင်စီတပ်တွေက ညဘက်မှာ တညလုံး လက်နက်ကြီးတွေနဲ့ ရွာတွေဘက်ကို ပစ်ခတ်ခဲ့ပြီး ဒီနေ့ ဧပြီ ၇ ရက် မနက် ၇ နာရီကျော်လောက်ကတည်းက သက္ကယ်ကျင်းကျေးရွာနဲ့ ရေဖြူကျေးရွာတွေဘက်မှာ ACDF နဲ့ တိုက်ပွဲစတင်ဖြစ်ပွားနေခဲ့ကာ ပထမရက်ကထက် ပိုပြီး စစ်သည်အင်အား တိုးချဲ့လာတယ်လို့ ဆိုပါတယ်။

PDF မဟာမိတ် ပူးပေါင်းအဖွဲ့တွေကလည်း စစ်ကောင်စီတပ်တွေ စခန်းချထားတဲ့နေရာ ၂ နေရာကို စစ်ကြောင်း ၂ ကြောင်းခွဲပြီး တန်ပြန်ထိုးစစ်ဆင် တိုက်ပွဲဝင်နေကြပြီလို့ PRA(Magway) အဖွဲ့ တာဝန်ရှိသူက ပြောပါတယ်။

စစ်ကောင်စီဘက်ကတော့ ဒီတိုက်ပွဲတွေနဲ့ပတ်သက်ပြီး ထိခိုက် ကျဆုံး ဒဏ်ရာရတဲ့ သတင်းတွေ ထုတ်ပြန်တာ မရှိသေးပါဘူး။