စစ်ကိုင်းမြို့ တကောင်းရပ်ကွက် ဧရာဝတီတံတား (ရတနာပုံ) အဆင်း ဘီးခွန်ဂိတ်မှာ ဩဂုတ်လ ၁၇ ရက် မနက် ၈ နာရီက စစ်ကောင်စီတပ်နဲ့ ပြည်သူ့ကာကွယ်ရေးတပ် PDFတို့ အပြန်အလှန် ပစ်ခတ်မှုအတွင်း ၄ ဦး သေဆုံးပြီး ၇ ဦး ဒဏ်ရာရခဲ့တယ်လို့ မြို့ခံတွေက ပြောပါတယ်။
ရန်ကုန်မှ မုံရွာလာတဲ့ အာကာသမှန်လုံယာဉ်အား အထုပ်တွေ ဖွင့်စစ်ဆေးရာမှ အပြန်အလှန်ပစ်ခတ်မှု ဖြစ်ပွားခဲ့တာလို့ မြို့ခံတဦးက ဒီဗွီဘီကို ပြောပါတယ်။
“စစ်တပ်က သေနတ်နဲ့ ဝိုင်းချိန်ထားပြီး အထုပ်တွေဖွင့်စစ်နေလို့ PDF က ပစ်တာ၊ စစ်ကောင်စီဘက်က နှစ်ယောက် ထိတယ်။ အဲဒီမှာ ဝိုင်းပစ်တာ၊ စစ်တပ်ရော ရဲရော အဲဒီလိုပစ်တော့ ခရီးသည်တွေလည်း ထိတယ်၊ PDF နှစ်ဦးလည်းထိတယ်”လို့ ပြောပါတယ်။
အပြန်အလှန်ပစ်ခတ်မှုအတွင်း PDF နှစ်ဦးအပါအဝင် ၄ ဦး သေဆုံးခဲ့ပြီး စစ်သားနှစ်ဦးနဲ့ ခရီးသည် ၅ ဦး ဒဏ်ရာရရှိခဲ့တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“PDF က နှစ်ဦး၊ ခရီးသည်က မိန်းကလေးတဦး၊ ယောကျ်ားလေးတဦး သေတယ်။ ဒဏ်ရာရတာက ယောကျ်ားလေး နှစ်ဦး၊ မိန်းကလေး သုံးဦး၊ စစ်တပ်ဘက်က တပ်ကြပ်ကြီးတဦးနဲ့ တပ်သားတဦး ဒဏ်ရာရတယ်”လို့ ရှင်းပြပါတယ်။
လက်ရှိအခြေအနေထိ ဧရာဝတီတံတား (ရတနာပုံ) အဆင်း ဘီးခွန်ဂိတ်မှာ စစ်ကောင်စီတပ်တွေနဲ့ ရဲတွေကို လုံခြုံရေးအင်အားတိုးမြှင့်ထားတယ်လို့ မြို့ခံတွေက ပြောပါတယ်။
မန္တလေးတိုင်း၊ ကျောက်ပန်းတောင်းမြို့နယ်မှာ ပြည်သူ့ကာကွယ်ရေးတပ်ဖွဲ့ဝင် အဝေးသင်တက္ကသိုလ်ကျောင်းသား ၂ ယောက်ကို ဖမ်းဆီးသွားပြီးနောက် ဇွန် ၄ ရက် ဒီနေ့မနက်မှာ စစ်တပ်က ပစ်သတ်လိုက်တယ်လို့ ကျောက်ပန်းတောင်း PDF ကထုတ်ပြန်ပါတယ်။
တပ်ရင်း ၁ တပ်ခွဲ ၂ က အသက် ၂၁ နှစ်အရွယ် ရဲဘော် ဟိန်းဇေယျာဖြိုးနဲ့ အသက် ၂၀ အရွယ် ဟိန်းဇေယျာဦးတို့ဟာ ဇွန် ၁ ရက်နေ့မှာ လက်ပံပျားရဲစခန်းက တပ်ဖွဲ့ဝင်တွေရဲ့ ဖမ်းဆီးတာကို ခံခဲ့ရတာပါ။
ဇွန် ၃ ရက်မှာတော့ လူငယ် ၂ ယောက်ကို လက်ပံပျားရဲစခန်းကနေ တပ်မ ၉၉ ဆီကို လွှဲပြောင်းပေးခဲ့ပြီး ဒီနေ့ မနက်အစောပိုင်းက စစ်ကြောရေးစခန်းမှာ ဟိန်းဇေယျာဦးရဲ့ ဦးခေါင်းကို သေနတ်နဲ့ တေ့ပစ်ပြီး ဟိန်းဇေယျာဖြိုးဟာလည်း သေနတ်နဲ့ပစ်ခတ်ခံခဲ့ရလို့ သွေးထွက်လွန် ကျဆုံးခဲ့တယ်လို့ ဆိုပါတယ်။
ကျဆုံးသွားတဲ့ ရဲဘော် ၂ ယောက်ကို ဒီနေ့ ညနေ ၃ နာရီအမှာ မီးသင်္ဂြိုဟ်ခဲ့တယ်လို့ ကျောက်ပန်းတောင်း ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။
ဖမ်းဆီးခံရတုန်းမှာ သူတို့ဟာ အကြမ်းဖက်စစ်ကောင်စီရဲ့ နှိပ်စက်ညှဉ်းပန်းတာတွေကို ကြံ့ကြံ့ခံပြီး သစ္စာရှိရှိ ရဲရဲဝံ့ဝံ့နဲ့ ထုတ်ဖော်မပြောဆိုဘဲ နောက်ဆုံးအချိန်ထိ တိုက်ပွဲဝင်ခဲ့ကြတယ်လို့လည်း ဆိုပါတယ်။
ရဲဘော်ဟိန်းဇေယျာဖြိုးနဲ့ ဟိန်းဇေယျာဦးတို့ရဲ့ သစ္စာရှိရှိ ရဲရဲဝံ့ဝံ့တိုက်ပွဲဝင်ခဲ့တာအတွက် မြို့နယ်တော်လှန်ရေးအဖွဲ့ အားလုံးက အာဇာနည်တွေအဖြစ် အသိအမှတ်ပြု ဂုဏ်ပြု ဝမ်းနည်းကြောင်း ထုတ်ပြန်ပြောဆိုထားပါတယ်။
