မွန်ပြည်နယ်၊ ရေးမြို့နယ်မြောက်ပိုင်း စစ်ကောင်စီအခြေစိုက်တပ်ရင်း ခလရ ၁၀၆ မှာ မေ ၉ ရက်က ဘဲလုမုကျေးရွာအုပ်စုက ရွာလူကြီးတွေကို ဆင့်ခေါ်ပြီး ခြိမ်းခြောက်ပြောဆိုတာတွေ ရှိနေတယ်လို့ ဒေသခံတွေက ပြောပါတယ်။
ကိုယ့်ရွာမှာ လက်နက်ကိုင်အဖွဲ့စည်းတွေ တွေ့ရင်၊ သူစိမ်းတွေ ဝင်ရောက်လာရင်၊ ရွာထဲမှာရှိနေခဲ့ရင် စစ်တပ်ကို သတင်းပေးကြဖို့ ဖိအားပေး ခြိမ်းခြောက်ခံရတယ်လို့ ကျေးရွာဒေသခံတွေက ပြောပါတယ်။
အခုလို ခေါ်ယူသတိပေးထားပြီးမှ လိုက်နာခြင်းမရှိပါက နောက်ပိုင်း စစ်ဆင်ရေးမှာ လေယာဥ်နဲ့ တိုက်ခိုက်သွားမှာဖြစ်ပြီး ထိခိုက်နစ်နာမှာက ရွာတွေသာဖြစ်ကြောင်း စစ်ကောင်စီဘက်က ပြောဆိုတယ်လို့ သိရပါတယ်။
စစ်ကောင်စီတပ်ဘက်က အခုလို ခေါ်ယူသတိပေး ပြောဆိုအပြီး ၂၄ နာရီအတွင်းမှာ ရေးမြောက်ပိုင်းဘက် နေရာတွေကို လေယာဥ်နဲ့ ဗုံးကြဲတိုက်ခိုက်ခဲ့ရာ ဝါပသဲ စာသင်ကျောင်းကိုထိပြီး ပျက်စီးသွားကာ လူတွေတော့ ထိခိုက်မှုမရှိဘဲ တညလုံး လေယာဥ်တွေ ဝဲပျံနေတာ စိုးရိမ်ရတယ်လို့ ဒေသခံတွေက ပြောပါတယ်။
ရေးမြောက်ပိုင်း PDF မှ တာဝန်ရှိသူတယောက်က “စစ်ကောင်စီဘက်က မေ ၁၀ ရက် ည ၁၀ နာရီ ၃၃ မိနစ်မှာ ရေးမြောက်ပိုင်းက PDF စခန်းနေရာတခုကို လေယာဥ်နဲ့ ဗုံး ၁ လုံး လာကြဲသွားတယ်။ ညဘက် မိုးကလည်းရွာတော့ ဘာမှမသိရဘူး။ အခု ညတွင်းချင်း ရွှေ့ပြောင်းနေရတယ်။ လေယာဥ်က ပတ်ဝဲပြီး ပျံနေတုန်းပဲ” လို့ ပြောပါတယ်။
အခုလို စစ်ကောင်စီတပ်ဘက်က လေယာဥ်နဲ့တိုက်ခိုက်နေတာ PDF တွေရဲ့ အခြေစိုက်စခန်းတွေကို မြေပြင်က သတင်းပေးတွေကြောင့် ဖြစ်နိုင်သလို အခု စစ်ကောင်စီက PDF ရဲဘော်တွေ ဖုန်းဆက်သွယ်ပြောဆိုတဲ့ နေရာကနေ ကြားဖြတ်ခြေရာခံလိုက်ပြီး စခန်းရဲ့ တည်နေရာ မြေပုံအညွှန်းတွေကို ရရှိသွားပြီး တိုက်ခိုက်နေတာလို့ စစ်ရေးလေ့လာသူတွေရဲ့ အဆိုအရ သိရပါတယ်။
ရေးမြို့နယ်မြောက်ပိုင်း ဘဲလမုကျေးရွာအုပ်စုရှိ ချောင်း ၂ ခွရွာနဲ့ ဝါပသဲရွာကို စစ်ကောင်စီတပ်က မေ ၈ ရက် မနက် ၁၁ နာရီ ၃၅ မိနစ်က လေယာဥ်နဲ့ ပစ်ခတ်ခဲ့တာကြောင့် အရပ်သား အမျိုးသမီးတယောက် သေဆုံးပြီး လူနေအိမ် ၁ လုံး မီးလောင်ပြာကျခဲ့သလို အမျိုးသမီးတယောက်လည်း ပြင်းထန်ဒဏ်ရာတွေ ရရှိခဲ့ကာ ရွာသားတွေ လွတ်မယ့်နေရာ ဗုံးခိုကျင်းတွေဘက်ကို အကုန်လုံး ပြေးပုန်းရတယ်လို့ သိရပါတယ်။
မေ ၇ ရက် ည ၁၁ နာရီ ၅၀ မိနစ်ကလည်း ရေးမြောက်ပိုင်း ကျားဖြူတပ်ခွဲ ၁ စစ်ကြောင်း အခြေစိုက်စခန်းတခုကို လေယာဥ်နဲ့ တိုက်ခိုက်ခံရလို့ PDF ရဲဘော် ၃ ယောက် ကျဆုံးပြီး ၄ ယောက် ဒဏ်ရာရရှိခဲ့ပါတယ်။
ပဲခူးတိုင်း၊ ကျောက်ကြီးမြို့နယ်ထဲက မုန်းမြို့ အခြေစိုက် စစ်ကောင်စီတပ် ခမရ ၅၉၉ က အရာရှိနဲ့ တခြားအဆင့်တပ်သား စုစုပေါင်း ၁၁ ယောက်ကို ဒေသအခြေစိုက် PDF တပ်ဖွဲ့တွေက တပ်ထဲကို ဝင်ရောက်ဖမ်းဆီးပြီး ထွက်ပြေးဖို့ကြိုးစားတဲ့ စစ်ကောင်စီတပ်သားတယောက်ကိုတော့ လမ်းမှာ ပစ်သတ်ခဲ့တယ်လို့ PDF တပ်ဖွဲ့ဝင်တွေနဲ့ ဒေသခံတွေက ပြောပါတယ်။
မုန်းမြို့ဒေသခံတယောက်က“မေလ ၁၀ ရက်နေ့ ညနေ ၅ နာရီလောက်မှာ PDF က စစ်ကားတစီးနဲ့ ၅၉၉ တပ်က တပ်ရင်းမှူးကို ဝင်ဖမ်းသွားတာ။ တယောက်ကိုတော့ သာစည်ရွာထိပ်မှာ သတ်ပြီး ထားခဲ့တယ်။ အဲ့ဒီတပ်သားက ကားသမားလို့ ပြောတယ်။ ထွက်ပြေးလို့ ပစ်သတ်လိုက်တာတဲ့။ ပါသွားတဲ့အထဲမှာ တချို့ကတော့ ဒုရင်းမှူးလို့လည်း ပြောကြတယ်။ အဲ့ဒီ နှစ်ယောက်ထဲက တယောက်ပါသွားတာတော့ ကြိမ်းသေပဲ။ အခု မုန်းမှာ လမ်းပိတ်ထားတယ်။ ဖုန်းတွေလည်း ဆက်မရတော့ဘူး။ ဖုန်းလိုင်းတွေပါ ဖြတ်ထားတယ်။ ကော့ပြင်းရွာတို့၊ ရေအိုးစဥ်ရွာတို့ဆို ဘယ်သူမှ မနေရဲကြတော့ဘူး၊ အကုန်ထွက်ပြေးနေကြပြီ။ မုန်းမှာလည်း လူသိပ်မရှိကြတော့ဘူး။ သူတို့က မဲပြီး ပြည်သူတွေဘက်ကို လှည့်မှာ”လို့ပြောပါတယ်။
အဲဒီကိစ္စကို ဒေသခံ ပဲခူးတိုင်းအခြေစိုက် PDF အဖွဲ့တဖွဲ့က လုပ်ဆောင်ခဲ့တာဖြစ်ပြီး ကားသမားကတော့ ထွက်ပြေးလို့ ပစ်သတ်လိုက်တယ်လို့ ပြောပါတယ်။
ဒေသခံ PDF တပ်ဖွဲ့ဝင်တယောက်က “အခုဖမ်းခေါ်လာတာက ဒုရင်းမှူးနဲ့အဖွဲ့လို့တော့ သိထားကြပါတယ်။ သူတို့ကတော့ တရားဝင် သတင်းမထုတ်ပြန်သေးပါဘူး။ ကျနော်တို့က နီးတော့ သိနေတာပါ။ ထပ်ပြီးသိရတာရှိရင်လည်း ပြောပါ့မယ်” လို့ အတည်ပြုပါတယ်။
ခမရ ၅၉၉ တပ်ဟာ မုန်းမြို့အရှေ့ဘက် ရေအိုးစဥ်ရွာအနီးမှာရှိပြီး မုန်းမြို့နဲ့ ပတ်ဝန်းကျင်ကရွာတွေကို မကြာခန ဝင်ရောက်ဖမ်းဆီးတာ၊ လက်နက်ကြီးတွေနဲ့ မကြာခန ပစ်ခတ်နေတာကြောင့် ဒေသခံတွေ ရွာတွေမှာ မနေရဲကြဘဲ စစ်ဘေးရှောင်နေရပါတယ်။
အခုလို တပ်ရင်းမှူးအပါအဝင် စစ်ကောင်စီတပ်ဖွဲ့ဝင်တွေ ဖမ်းဆီးခံရတဲ့သတင်းနဲ့ ပတ်သက်ပြီး စစ်ကောင်စီဘက်ကိုတော့ ဆက်သွယ်မေးမြန်းနိုင်ခြင်း မရှိသေးပါဘူး။
စစ်ကောင်စီတပ်က လေကြောင်းကနေ လာရောက်တိုက်ခိုက်လို့ ကျားဖြူစစ်ကြောင်းက ရဲမေတယောက်အပါအဝင် PDF ရဲဘော် ၃ ယောက် ကျဆုံးသွားတယ်လို့ စစ်ကြောင်းက သတင်းထုတ်ပြန်ပါတယ်။
ရေးမြို့နယ်နဲ့ သံဖြူဇရပ်မြို့နယ်ကြားမှာရှိတဲ့ ကျားဖြူစစ်ကြောင်း (၂) စစ်ကြောင်းရုံး၊ တပ်ခွဲ ၁၊ တပ်ခွဲ ၆ ရဲ့ နောက်တန်းစခန်းတနေရာကို မေ ၇ ရက် ညက တိုက်လေယာဉ်နဲ့ လာရောက်ပြီး ပေါင် ၅၀၀ ဗုံး ၂ လုံးကြဲ တိုက်ခိုက်ခဲ့တယ်လို့ ဆိုပါတယ်။
ပြီးတော့ မေ ၈ ရက်နေ့လယ်ပိုင်းမှာလည်း Mi-35 တိုက်ခိုက်ရေး ရဟတ်ယာဉ်နဲ့ ထပ်ပြီးလာပစ်ခဲ့တယ်လို့ ထုတ်ပြန်ထားပါတယ်။
ဒါကြောင့် ကျားဖြူတပ်ခွဲ ၁ က ရဲမေ ရဲမေ မခင်သန္တာဆွေ (ခ) မမြင့်၊ ရဲဘော် ဇွဲမာန်လင်း (ခ) စနေ၊ ရဲဘော် ထွန်းလင်းအောင် (ခ) မြကြီးတို့ကျဆုံးခဲ့ပြီး ရဲဘော် ၄ ယောက်လည်း မပြင်းထန်တဲ့ ဒဏ်ရာရခဲ့တယ်လို့ ဆိုပါတယ်။
ဒီရဲဘော်တွေဟာ အကြမ်းဖက်စစ်အာဏာရှင်စနစ်ကို တော်လှန်ရင်း ဂုဏ်ယူစွာနဲ့ အသက်ပေးခဲ့ရတာဖြစ်ပြီး သူတို့ကိုယ်စား အကြမ်းဖက်စစ်အာဏာရှင်စနစ်ကို အမြစ်ဖြတ်ပြီး အဆုံးထိတွန်းလှန်နိုင်တဲ့အထိ တိုက်ပွဲဝင်သွားမယ်လို့ စစ်ကြောင်းက ထုတ်ပြန်ပါတယ်။
ပြီးတော့ ကျဆုံးရဲဘော်တွေဟာ သူတို့ရဲ့ မိသားစု၊ ချစ်သူ၊ လူမှုအသိုက်အဝိုင်း၊ တပ်ခွဲ၊ တပ်ဖွဲ့၊ စစ်ကြောင်း၊ PDF တပ်မတော်၊ နိုင်ငံနဲ့ အဆုံးစွန်သောလူ့ဘောင်ကို အဓမ္မတရား မင်းမူစိုးမိုးနေရာကနေ ဓမ္မတရားထွန်းကားစေဖို့ ခွင့်တူညီမျှ ဝါဒဖြူစင်တဲ့ ဒီမိုကရေစီစနစ်ရဲ့ အနှစ်သာရတို့နဲ့ပြည့်ဝတဲ့ ဖက်ဒရယ်ပြည်ထောင်စု ပေါ်ထွန်းလာဖို့ ကိုယ်စွမ်းဉာဏ်စွမ်းရှိသရွေ့ ကျေကျေတာဝန်ကို ကျေကျေပွန်ပွန် ထမ်းဆောင်ပြီးကြတဲ့ ဓမ္မဘက်တော်သား PDF တွေဖြစ်တယ်လို့ စစ်ကြောင်းက အမိန့်ပြန်တမ်း ထုတ်ထားပါတယ်။
