အမေရိကန်ပြည်ထောင်စု၊ အာရီဇိုနားပြည်နယ် ဖီးနစ်မြို့မှာရှိတဲ့ ပြည်ပရောက် မြန်မာပြည်သူတွေက PDF Kalay တပ်ရင်း ၁၂ ရဲဘော်တွေအတွက် ရန်ပုံငွေဈေးရောင်းပွဲတော်ပြုလုပ်ခဲ့ရာမှာ ငွေကျပ် သိန်း ၁၀၀ ကျော်ရခဲ့ပါတယ်။
အကြမ်းခံပြီး ပေါ့ပေါ့ပါးပါးဝတ်ဆင်နိုင်တဲ့ ယူနီဖောင်းတွေဝယ်ယူဖို့ ရန်ပုံငွေရှာစျေးရောင်းပွဲတော်ကို အောက်တိုဘာ ၂၂ ရက်က ကျင်းပခဲ့ပြီး အခုဈေးရောင်းပွဲတော်ဟာ ဒုတိယအကြိမ်လည်း ဖြစ်ပါတယ်။
အဲဒီပွဲမှာ မုန့်ဟင်းခါး၊ ရှမ်းခေါက်ဆွဲ၊ ဝက်သားတုတ်ထိုး စတဲ့ မြန်မာအစားအစာ ၁၁ မျိုးကို တပွဲကို အမေရိကန် ၁၀ ဒေါ်လာနဲ့ ရောင်းချခဲ့ပြီး ဒေါ်လာ ၃၀၄၀ (မြန်မာကျပ် ၁၀,၆၄၀,၀၀၀) ရရှိခဲ့တယ်လို့ဆိုပါတယ်။
အခုလို ပြည်နယ်အသီးသီမှ လာရောက်အားပေးခဲ့ကြသော ညီအစ်ကိုမောင်နှမတွေ၊ ပွဲဖြစ်မြောက်ရေး စီစဉ်ပေးသူတွေ၊ ပွဲကျင်းပနိုင်ရန် နေရာစီစဉ်ပေးတဲ့ Ding Asian Mart USA နဲ့ ဟင်းပွဲတွေ စီမံချက်ပြုတ်ပေးတဲ့ စေတနာရှင် တယောက်စီတိုင်းကို လှိုက်လှိုက်လှဲလှဲကျေးဇူးတင်ရှိပါကြောင်း မှတ်တမ်းတင်အပ်ပါတယ်လို့ ကလေး PDF တပ်ရင်း ၁၂ က ကျေးဇူးတင်စကားဆိုထားပါတယ်။
ပြီးခဲ့တဲ့ စက်တင်ဘာမှာ ပြုလုပ်ခဲ့တဲ့ တပ်ရင်း ၁၂ အတွက် ပထမဆုံးလုပ်တဲ့ ဈေးရောင်းပွဲတော်မှာတော့ မြန်မာငွေကျပ် သိန်း ၈၀ ကျော်ရရှိခဲ့ပါသေးတယ်။
ကလေး PDF တပ်ရင်း ၁၂ ဟာ ကလေးမြို့နယ်မှာလှုပ်ရှားနေတဲ့အဖွဲ့တခုဖြစ်ပြီး မြေပြင်အဖွဲ့တွေ၊ မဟာမိတ်အဖွဲ့တွေနဲ့အတူပူးပေါင်းပြီး စစ်ကောင်စီကို ရွပ်ရွပ်ချွံချွံတိုက်ခိုက်နေတဲ့ အဖွဲ့တဖွဲ့လည်းဖြစ်ပါတယ်။
စစ်ကိုင်းတိုင်း ကလေးမြို့နယ်အခြေစိုက်၊ ကလေးပြည်သူ့ကာကွယ်ရေးတပ်ဖွဲ့က People Health Organization - Kalay အတွက် လိုအေပ်နေတဲ့ ဓာတ်မှန်စက်ကို လှူဒါန်းခဲ့တယ်လို့ PHO-Kalay က စက်တင်ဘာ ၃ ရက်မှာ ထုတ်ပြန်ပါတယ်။
ကလေး PDF တပ်ရင်း ၁ ရဲ့တာဝန်ခံ ကိုသူရိန်ဇင်က "ပြည်သူလူထုရဲ့ စုပေါင်းလှူဒါန်းမှု နဲ့ ကလေး PDF က ကလေးပြည်သူ့ဆေးရုံရဲ့ လိုအပ်နေတဲ့ ဓာတ်မှန်စက်ကို လှူဒါန်းပေးခဲ့တာ" လို့ ပြောပါတယ်။
ကလေးပြည်သူ့ဆေးရုံရဲ့ တာဝန်ခံဆရာက "အခုလို ဓာတ်မှန်စက်လှူဒါန်းတဲ့အတွက် ကုသရတဲ့ အပိုင်းမှာ အချိန်မကုန်စေဘဲ အဆင်ပြေစွာ သေချာတိတိကျကျ ကုသလို့ ရတယ်။ ရဲဘော်တွေ တိုက်ပွဲတွင်းမှာ ဒဏ်ရာရတဲ့အခါလည်း မမြင်ရတဲ့ အတွင်းပိုင်းနေရာတွေကို ဓာတ်မှန် ရိုက်ကြည့်ပြီး ကုသရတော့ ပိုအဆင်ပြေသွားတယ်” လို့ ပြောပါတယ်။
ပြည်သူနဲ့ ရဲဘော်တွေအတွက် PHO - Kalay ရဲ့ လက်ရှိ လည်ပတ်နေတဲ့ ကျန်းမာရေးကဏ္ဍမှာ ဓာတ်မှန်စက်တလုံးထားရှိပေးထားပြီး အသုံးပြုနေတယ်လို့ ကလေးပြည်သူ့ ကျန်းမာရေးဌာနက အသိပေးထားပါတယ်။
ကလေးပြည်သူ့ဆေးရုံကို ၂၀၂၂ ခုနှစ် ဧပြီ ၇ ရက်က ကလေး PDF ရဲဘော်တွေ၊ CDM ဆရာဝန်တွေ၊ Medical အဖွဲ့တွေနဲ့ စုပေါင်းပြီး လွတ်မြောက်နယ်မြေတနေရာမှာ ဖွင့်လှစ်ထားတာ ဖြစ်ပါတယ်။
