တောင်ကိုရီးယား အလုပ်အကိုင် အရည်အချင်းစစ်စာမေးပွဲ (EPS) ကို စက်တင်ဘာလကုန်ပိုင်းက စပြီးကျင်းပသွားမယ်လို့ စစ်ကောင်စီလက်အောက်ခံ အစိုးရ ပြည်ပအလုပ်အကိုင်အေဂျင်စီ (POEA-EPS) က ထုတ်ပြန်ပါတယ်။
အဲဒီစာမေးပွဲကို သြဂုတ် ၁၆ ရက်မှာ ပြုလုပ်ဖို့စီစဥ်ခဲ့ပြီး ၁ လကျော်ကြာတဲ့အထိ မကျင်းပဖြစ်ခဲ့ဘဲ ဒီနေ့မှ အချိန်စာရင်းအသစ်ကို ပြန်လည်ထုတ်ပြန်တာပါ။
အခု ထုတ်ပြန်လိုက်တဲ့ အချိန်စာရင်းအရ စိုက်ပျိုးရေးနဲ့မွေးမြူရေးလုပ်ငန်းအတွက် စာမေးပွဲကို စက်တင်ဘာ ၂၉ မှ အောက်တိုဘာ ၂၇ အထိ၊ ကုန်ထုတ်လုပ်ငန်းအတွက် ပထမအသုတ်စာမေးပွဲကို အောက်တိုဘာ ၃၁ မှ ဒီဇင်ဘာ ၂၉ အထိ၊ ကုန်ထုတ်လုပ်ငန်းဒုတိယအသုတ်အတွက် စာမေးပွဲကို ၂၀၂၃ ဇန်နဝါရီ ၃ ရက်မှ ဧပြီ ၃ ရက်အထိ၊ ဆောက်လုပ်ရေးလုပ်ငန်းအတွက် စာမေးပွဲကို ဧပြီ ၁၇ မှ မေ ၁၅ အထိ ကျင်းပမယ်လို့ သိရပါတယ်။
ဖြေဆိုရမယ့် နေ့ရက်၊ အချိန်နဲ့ ခုံနံပါတ်တွေကို ထပ်မံကြေညာပေးသွားမှာဖြစ်ပြီး ကုန်ထုတ်နဲ့ ဆောက်လုပ်ရေးလုပ်ငန်းတွေအတွက် ကျင်းပမယ့်ရက် အပြောင်းအလဲရှိနိူင်တယ်လို့ POEA က ဆိုပါတယ်။
EPS စာမေးပွဲဖြေဆိုဖို့ စောင့်ဆိုင်းနေသူတစ်ဦးက “စာမေးပွဲက နောက်နှစ်လယ်ပိုင်းလောက်အထိ ကူးသွားတယ်။ ပြင်ဆင်ချိန်ရတော့ ရသွားတယ်။ အချိန်တော့ ထပ်ဖင့်သွားတာပေါ့” လို့ ပြောပါတယ်။
EPS စာမေးပွဲဖြေဆိုခွင့် လျှောက်ထားတာကို ဇူလိုင်လက အွန်လိုင်းစနစ်နဲ့ လက်ခံခဲ့တာဖြစ်ပြီး လျှောက်ထားသူ ၃၇၀၀၀ ကျော်ရှိတယ်လို့ POEA က ထုတ်ပြန်ထားပါတယ်။
အဲဒီစာမေးပွဲကို ကိုဗစ်-၁၉ ကပ်ရောဂါကြောင့် ၂၀၂၀ က မလုပ်ဖြစ်ခဲ့ဘဲ အခုမှ ပြန်လည်ကျင်းပဖို့ စီစဥ်နေတာ ဖြစ်ပါတယ်။
ကိုဗစ်-၁၉ ကပ်ရောဂါကြောင့် ၂ နှစ်လောက် ရပ်ထားတဲ့ တောင်ကိုရီးယား အလုပ်အကိုင် အရည်အချင်းစစ်စာမေးပွဲ (EPS-Topik) ကို ပြန်လည်ပြုလုပ်သွားမယ်လို့ အစိုးရပြည်ပ အလုပ်အကိုင်အေဂျင်စီ (POEA- EPS) က ထုတ်ပြန်ထားပါတယ်။
အဲဒီစာမေးပွဲကို ၂၀၂၀ ဧပြီလမှာ ကျင်းပဖို့ စီစဥ်ခဲ့ပေမယ့် ကိုဗစ်-၁၉ ကပ်ရောဂါကြောင့် အခုအချိန်ထိ ရပ်နားထားရတာဖြစ်ပါတယ်။
EPS-Topik ရဲ့ ၁၄ ကြိမ်မြောက်ကုန်ထုတ်နဲ့ ဆောက်လုပ်ရေးလုပ်ငန်းစာမေးပွဲ ၁၅ ကြိမ်မြောက် စိုက်ပျိုးရေးနဲ့ မွေးမြူရေးစာမေးပွဲအတွက် ဖြေဆိုခွင့်လျှောက်လွှာကို အွန်လိုင်းစနစ်နဲ့ လက်ခံသွားမယ်လို့ POEA-EPS က ထုတ်ပြန်ထားတာပါ။
စာမေးပွဲပြန်လုပ်ဖို့ ရှိတယ်လို့ သတင်းတွေထွက်နေပေမယ့် POEA-EPS က ဒီနေ့မှ တရားဝင်အတည်ပြုတာဖြစ်ပါတယ်။
ဒါပေမယ့် လျှောက်လွှာလက်ခံမယ့် ရက်နဲ့ စာမေးပွဲ ကျင်းပမယ့်ရက်တွေကိုတော့ ထည့်သွင်းထုတ်ပြန်ထားတာမရှိပါဘူး။
စာမေးပွဲဖြေမယ့်သူတွေအနေနဲ့ လျှောက်လွှာတင်ရင် နိုင်ငံကူးလက်မှတ် အမျိုးအစား (PV)နဲ့ လည်း လျှောက်ထားနိုင်ပြီး စာမေးအောင်လို့ အလုပ်လျှောက်လွှာတင်ရင်တော့ PJ နဲ့ပဲ လက်ခံမယ်လို့ POEA-EPS ရဲ့ ထုတ်ပြန်ချက်မှာ ဖော်ပြထားပါတယ်။
အဲဒီစာမေးပွဲကို Computer Based Test စနစ်နဲ့ ဖြေဆိုရမှာဖြစ်ပြီး အခြေခံကျွမ်းကျင်မှု စစ်ဆေးတာဖြစ်တဲ့ ကိုယ်ကာယကြံခိုင်မှုနဲ့ အရောင်ခွဲခြားနိုင်စွမ်း ရှိ/မ ရှိ မျက်စိစစ်ဆေးမှုတွေကိုပါ ပြုလုပ်သွားမယ်လို့ ဆိုပါတယ်။
စာမေးပွဲလျှောက်လွှာ လက်ခံမယ့်ရက်နဲ့ စာမေးပွဲကျင်းပမယ့် နေ့ကို တရားဝင်ဆက်လက် ထုတ်ပြန်မှာဖြစ်ပြီး POEA-EPS က ကြေညာတဲ့ သတင်းအချက်အလက်ကသာ အတည်ဖြစ်တယ်လို့ ထုတ်ပြန်ထားပါတယ်။
အဲဒီစာမေးပွဲကို ၂ နှစ်လောက် မကျင်းပဖြစ်ခဲ့တာကြောင့် ဒီနှစ်မှာ ဝင်ရောက်ဖြေဆိုမယ့်သူ များနိုင်တယ်လို့ ကိုရီးယားဘာသာသင်တန်းကျောင်း တာဝန်ရှိသူတချို့က ခန့်မှန်းထားပါတယ်။
