မကွေးတိုင်း၊ မြိုင်မြို့နယ်မှာ နိုဝင်ဘာ ၆ ရက် နေ့လယ်ပိုင်းက စစ်ကောင်စီတပ်ဖွဲ့ဝင်တွေနဲ့ ပျူစောထီးတွေကို ဒေသကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့လို့ စစ်ကောင်စီဘက်က ၅ ယောက်လောက် သေဆုံးခဲ့တယ်လို့ ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့ (PPDF) ကနေ သိရပါတယ်။
မြိုင်မြို့နယ် သရက်ခွကျေးရွာက စစ်ကောင်စီတပ်ဖွဲ့ဝင်တွေနဲ့ ပျူစောထီးတွေကို နိုဝင်ဘာ ၆ ရက် နေ့လယ် ၁၁ နာရီခွဲလောက်မှာ PPDF၊ ဝံပုလွေပြောက်ကျားတပ်ဖွဲ့ (မြိုင်) နဲ့ ကိုအောင်ကြီးတပ်ဖွဲ့တို့က ပူးပေါင်းတိုက်ခိုက်ခဲ့လို့ စစ်ကောင်စီတပ်ဖွဲ့ဝင်တွေနဲ့ ပျူစောထီး ၅ ယောက်လောက် သေဆုံးခဲ့ပြီး ဒဏ်ရာရသူတွေလည်း ရှိတယ်လို့ PPDF ရဲ့ ပြန်ကြားရေးတာဝန်ခံ အတီးက ဒီဗွီဘီကို ပြောပါတယ်။
“အဲဒီ သရက်ခွကျေးရွာမှာ စစ်(...) နဲ့ ပျူ (...) အင်အား ၆၀ လောက် အထိုင်ချပြီး တပ်စွဲထားတာဗျ။ စစ်(...)တွေနဲ့ သူတို့ရဲ့လက်အောက်ခံ ပျူ(...)တွေကို အမြစ်ဖြတ်ချင်တာကြောင့် အခုလို တိုက်ခိုက်ခဲ့တာဖြစ်ပြီး ကျနော်တို့ဘက်က အထိအခိုက် အကျအဆုံး မရှိခဲ့ဘူး။”
စစ်ဘေးရှောင်ပြည်သူတွေရဲ့ မြေပဲစိုက်ခင်းတွေကို ထွန်စက်တွေနဲ့ ဖျက်ဆီးနေတဲ့ စစ်ကောင်စီတပ်ဖွဲ့ဝင်တွေနဲ့ ပျူစောထီးတွေကို နိုဝင်ဘာ ၅ ရက် မနက် ၁၀ နာရီခွဲလောက်မှာလည်း ဒေသကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့လို့ ထိခိုက်သေဆုံးသူ ရှိနိုင်တယ်လို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ပြောပါတယ်။
နှစ်ဖက်တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
မြိုင်မြို့နယ်မှာ ပြည်သူ့ကာကွယ်ရေးတပ်ဖွဲ့ ထိန်းချုပ်နယ်မြေတွေ များပြားလာလို့ စစ်ကောင်စီတပ်က အင်အားအလုံးအရင်းနဲ့ ထိုးစစ်ဆင်ပြီး နယ်မြေပြန်လည်ထိန်းချုပ်ဖို့ အသည်းအသန် ကြိုးစားလာသလို ပြည်သူတွေကို မတရားဖမ်းဆီး သတ်ဖြတ်တာတွေ၊ နေအိမ်တွေကို မီးရှို့ဖျက်ဆီးတာတွေ ဆက်တိုက်ကျူးလွန်နေတယ်လို့ သိရပါတယ်။
မကွေးတိုင်း၊ ပခုက္ကူမြို့နယ်မှာ စစ်ကောင်စီစစ်ကြောင်းတွေ ရှိနေတဲ့ကြားက အောက်တိုဘာ ၁၁ ရက်က အခြေခံစစ်ပညာသင်တန်း အမှတ်စဥ် ၉ သင်တန်းဆင်းပွဲ ကျင်းပခဲ့တယ်လို့ PPDF ကနေ သိရပါတယ်။
PPDF ပြန်ကြားရေးတာဝန်ခံ အတီးက “ပခုက္ကူ-PDF ပင်မစခန်းမှာ မနေ့က အောက်တိုဘာလ ၁၁ ရက်နေ့မှာ အခြေခံစစ်ပညာသင်တန်း အမှတ်စဥ် ၉ သင်တန်းဆင်းပွဲကို စစ်(...)တွေ စစ်ကြောင်းထိုးနေတဲ့ကြားက အောင်အောင်မြင်မြင် ကျင်းပပြုလုပ်နိုင်ခဲ့တယ်” လို့ ဒီဗွီဘီကို ပြောပါတယ်။
သင်တန်းသား သင်တန်းသူ အရေအတွက်ကတော့ စစ်ကြောင်းတွေရှိနေလို့ လုံခြုံရေးအရ လျှော့ထားရတဲ့အတွက် ၄၀ လောက်သာရှိပြီး အမျိုးသမီးသင်တန်းသူ ၇ ယောက်လောက် ပါဝင်ကာ သင်တန်းကာလ ၄၅ ရက်ကျော် သင်ကြားခဲ့ရတယ်လို့ ဆိုပါတယ်။
သင်တန်းကာလအတွင်းမှာ နယ်မြေအခြေအနေ အခက်အခဲတွေ ရာသီဥတု အခက်အခဲတွေ အများကြီး ကြုံတွေ့ရပြီး စစ်ကြောင်းတွေအခြေအနေကို စောင့်ကြည့်ပြီးမှ လှုပ်ရှား သင်ကြားပေးခဲ့ကြရတာလို့ အတီးက ပြောပါတယ်။
ပခုက္ကူမြို့နယ်မှာ ပြည်သူ့ကာကွယ်ရေးတပ်ဖွဲ့ PDF စိုးမိုးထိန်းချုပ်နယ်မြေတွေ များပြားလာလို့ စစ်ကောင်စီက အင်အားအလုံးအရင်း အသုံးပြုပြီး ထိုးစစ်ဆင်ကာ ပြန်လည်ထိန်းချုပ်ဖို့ အသဲအသန် ကြိုးစားလာသလို ကျေးရွာတွေကို မီးရှို့ဖျက်ဆီးတာတွေ၊ ပြည်သူတွေရဲ့ စားနပ်ရိက္ခာတွေနဲ့ အဖိုးတန်ပစ္စည်းတွေကို ခိုးယူတာတွေ၊ အပြစ်မဲ့ ပြည်သူတွေကို ဖမ်းဆီးသတ်ဖြတ်တာတွေ ဆက်တိုက်ပြုလုပ်နေပါတယ်။
