အမေရိကန်ကုမ္ပဏီတခုအား ဇူလိုင်လက အွန်လိုင်းကနေ တိုက်ခိုက်ခဲ့မှုအတွက် ရုရှားနိုင်ငံသား တယောက်နဲ့ ယူကရိန်းနိုင်ငံသား သံသယရှိသူ တယောက်တို့ကို အမေရိကန် တရားရေးဌာနက တရားစွဲလိုက်ပါတယ်။

ပြန်ရွေးငွေအဖြစ် ပေးခဲ့ရတဲ့ အမေရိကန်ဒေါ်လာ ၆ သန်းကိုလည်း ပြန်သိမ်းခဲ့တယ်လို့ အစိုးရရှေ့နေချုပ် မာရစ်ခ် ဂါးလန်းနဲ့ ပြည်ထောင်စု ထောက်လှမ်းရေး ဗျူရို FBI ရဲ့ ညွှန်ကြားရေးမှူး ခရစ်စတိုဖာရေးက နိုဝင်ဘာ ၈ ရက်မှာ ပြောပါတယ်။

ဒီနှစ်အစောပိုင်းက အမေရိကန်ကုမ္ပဏီကြီးတွေကို ပစ်မှတ်ထားပြီး ဆိုင်ဘာတိုက်ခိုက်ရင်း ransomware နဲ့ ငွေညှစ်တဲ့ လုပ်ရပ်ကို တိုက်ဖျက်ဖို့ လုပ်ဆောင်တဲ့ အမေရိကန် အစိုးရရဲ့ လုပ်ရပ်လည်း ဖြစ်ပါတယ်။

အမေရိကန်မှာ အကြီးဆုံး လောင်စာပိုက်လိုင်း ကုမ္ပဏီဖြစ်တဲ့ ကိုလိုနီယယ် ပိုက်လိုင်းကို ransomware နဲ့ တိုက်ခိုက်ခဲ့လို့ နိုင်ငံအရှေ့တောင်ပိုင်းကို လောင်စာ ဖြန့်ဖြူးမှု ရက် အတော်များများ ပြတ်တောက်ခဲ့ပါတယ်။

အရင်လက ပိုလန်နိုင်ငံထဲမှာ အဖမ်းခံထားရတဲ့ ယူကရိန်းနိုင်ငံသား ယာရိုစလပ်စ် ဗာစင်စကီဟာ ရီဗီလ်လို့သိတဲ့ ransomware နဲ့ တိုက်ခိုက်မှုအတွက် အမေရိကန်ရဲ့ တရားစွဲမှုကို ရင်ဆိုင်ရမှာပါ။ 

ခုတော့ ဒီ ransomware ကို ကမ္ဘာတဝန်း ကွန်ပျူတာ ၁၇၅၀၀၀ ကျော်ထိ ကူးစက်ခံထားရပြီး ပြန်ရွေးငွေ အမေရိကန်ဒေါ်လာ သန်း ၂၀၀ ကျော် ပေးထားရပြီလို့ ဆိုပါတယ်။ 

ဒီတိုက်ခိုက်မှု နောက်ကွယ်မှာ ရုရှားအုပ်စု ရှိတယ်လို့ နာမည်ဆိုးရထားပါတယ်။ ဗင်ဆင်စကီဟာ ဇူလိုင် ၄ ရက် သီတင်းပတ်ကုန်ရက်က ဖလော်ရီဒါပြည်နယ် အခြေစိုက် ဆော့ဖ်ဝဲလ်လုပ်ငန်း ကာစေယာကို ရန်ဆမ်ဝဲနဲ့ တိုက်ခိုက်ခဲ့ပြီး ကမ္ဘာတလွှား စီးပွားရေးလုပ်ငန်း ၁၅၀၀ ကျော်ထိ ကူးစက်ခံထားရတယ်လို့ တက္ကဆပ်ပြည်နယ် မြောက်ပိုင်းခရိုင် တရားရုံးမှာ စွဲဆိုထားတဲ့ စွဲချက်ထဲမှာ ဖော်ပြထားပါတယ်။

ပြန်ရွေးငွေ အမေရိကန်ဒေါ်လာ သန်း ၂၀၀ ကျော်ကို ဘစ်ကွိုင်နဲ့ မိုနေရို ဒစ်ဂျစ်တယ် ငွေကြေးတွေနဲ့ ပေးချေထားခဲ့ရပြီး လတ်ဗီယာနဲ့ အဲ့စ်တိုးနီးယား အစိုးရဌာနတွေက စုံစမ်းစစ်ဆေးမှုမှာ အခရာ ကျတယ်လို့ အမေရိကန် ဘဏ္ဍာရေးဝန်ကြီးဌာနက ပြောပါတယ်။

ဖမ်းဆီးခံ ၂ ယောက်အတွက် တရားရေး ကိုယ်စားလှယ် ဒါမှမဟုတ် ရှေ့နေတွေနဲ့ ဆက်သွယ်လို့ မရသေးပါဘူး။