ဂရမ်မီဆု ၉ ဆုရှင် ကမ္ဘာ့နာမည်ကြီးအဆိုတော် ရီဟားနားဟာ လာမယ့် ဖေဖော်ဝါရီ ၁၂ ရက်နေ့မှာ သူ အများကြီးမျှော်လင့်ထားတဲ့ Super Bowl 57 အမေရိကန်ဘောလုံးပွဲစဉ်မှာ တိုက်ရိုက်ဖျော်ဖြေတင်ဆက်မှုနဲ့အတူ တဖန်ပြန်လာဖို့ရှိပါတယ်။
ဘာဘေးဒိုးစ်ကျွန်းနိုင်ငံဖွား အသက် ၃၄ နှစ်အရွယ် အဆိုတော်ဟာ ၂၀၁၆ ခုနှစ်၊ ဇန်နဝါရီလကတည်းက တကိုယ်တော်အယ်လ်ဘမ် မထွက်ရှိသေးတာကြောင့် ပရိသတ်တွေက သူရဲ့ဖျော်ဖြေမှုကို မျှော်လင့်စောင့်စားနေကြတာပါ။
Philadelphia Eagles အသင်းနဲ့ Kansas City Chiefs အသင်းတို့ ယှဉ်ပြိုင်ကစားကြမယ့် အမေရိကန်ဘောလုံးပွဲစဉ် တဝက်ရပ်နားချိန်အတွင်း ရီဟားနားက ကာရေဘီယံ ယဉ်ကျေးမှုကို အသားပေးဖျော်ဖြေသွားမှာဖြစ်တယ်လို့ သိရပါတယ်။
စတိတ်ဖန်းမ် အားကစားကွင်းကြီးထဲမှာ ပရိသတ် သန်းပေါင်းများစွာကို ဖျော်ဖြေရမှာ ဖြစ်တာကြောင့် ဒါဟာ ရီဟားနားအတွက် စိန်ခေါ်မှုတခုဖြစ်သလို ဒီလိုလုပ်ဆောင်နိုင်ဖို့ အတွက်လည်း ပြီးခဲ့တဲ့မေလမှာ မွေးဖွားခဲ့တဲ့ သူ့ရဲ့ ပထမဆုံးရင်သွေးလေးက လှုံ့ဆော်မှုတခု ဖြစ်တယ်လို့ ပြောပါတယ်။
ဘာဘေဒိုးစ်အစိုးရဟာ အဆိုတော် ရီဟားနားကို နိုင်ငံ့သူရဲကောင်းအဖြစ် နိုဝင်ဘာ ၃၀ ရက်မှာ ကြေညာလိုက်ပါတယ်။
ရီဟားနားရဲ့ ဇာတိမြို့ ဘရစ်ချ်တောင်းမှာ ကျင်းပတဲ့ သမ္မတနိုင်ငံတော်နေ့ ပွဲအတွင်း ဝန်ကြီးချုပ် မီယာမော့တ်လေက ကြေညာလိုက်တာပါ။
ဝန်ကြီးချုပ်က အသက် ၃၃ နှစ်အရွယ် ရီဟားနားကို ချီးကျူးဂုဏ်ပြုဖို့ လူအုပ်ရှေ့ကို ဆင့်ခေါ်ခဲ့ပါတယ်။
ရီဟားနား အောင်မြင်ခဲ့တဲ့ ၂၀၁၂ ခုနှစ်မှာ ဖြန့်ချိတဲ့ တေးစီးရီး ဒိုင်းမွန်းစ်ကို ရည်ညွှန်းပြီး စိန်လို ဆက်လက်တောက်ပနိုင်ပါစေ၊ အမိနိုင်ငံအတွက် လုပ်ရပ်တွေ အလုပ်တွေနဲ့ ဂုဏ်ဆောင်နိုင်ပါစေလို့ ဝန်ကြီးချုပ်က ရီဟားနားကို ပြောခဲ့ပါတယ်။
ဘာဘေဒိုးစ်နိုင်ငံဟာ ဗြိတိန်ဘုရင်မကြီး အဲလိဇဘက်ကို နိုင်ငံတော်အကြီးအကဲအဖြစ်ကနေ ပယ်ဖျက်ပြီး သမ္မတ နိုင်ငံတော်သစ်ကို အင်္ဂါနေ့က စတင်တည်ထောင်လိုက်တာပါ၊
ကယ်ရစ်ဘီယံကျွန်းနိုင်ငံဆီကို ပထမဆုံး အင်္ဂလိပ်သင်္ဘောတွေ ရောက်လာအပြီး အနှစ် ၄၀၀ အကြာမှာ လက်ကျန်ကိုလိုနီစာချုပ်တွေကို ပယ်ဖျက်ပြီး ပထမဆုံး သမ္မတဟာလည်း ကျမ်းသစ္စာ ကျိန်ဆိုခဲ့ပါတယ်။
မြို့တော် ဘရစ်ချ်တောင်းမ်က ချိန်ဘာလေတံတားမှာ လူရာချီ တန်းစီ ကောင်းချီးပေးနေချိန် ည သန်းခေါင်မှာ သမ္မတ နိုင်ငံတော်သစ် မွေးဖွားခဲ့ပါတယ်။
အမြောက် ၂၁ ချက် ပစ်ဖောက် ဂုဏ်ပြုပြီး လူစည်ကားနေတဲ့ သူရဲကောင်းများရင်ပြင်မှာ အမျိုးသားသီချင်းကို ဖွင့်လှစ်သီဆိုခဲ့ကြပါတယ်။
