စစ်ကိုင်းတိုင်း၊ မုံရွာမြို့နယ်ရှိ  မုံရွာ အမှတ် ၂ ရဲစခန်းကို ဧပြီ ၁၆ ရက် မနက်အစောပိုင်း ၁ နာရီလောက်မှာ ပြည်သူ့ကာကွယ်ရေးတပ်ဖွဲ့က  RPG လက်နက်နဲ့ ပစ်ခတ်တိုက်ခိုက်ခဲ့တယ်လို့ ဒေသခံတွေက ပြောပါတယ်။

အမှတ် ၂ ရဲစခန်းအနီးဝန်းကျင်နေ ဒေသခံတစ်ဦးက “အသံကအကျယ်ကြီး၊ ပေါက်ကွဲ သံကြားလိုက်ရတာ။ အဲလိုကွဲပြီး လက်နတ်ငယ်အသံတွေ ဆူညံနေတာပဲ။ အဲဒီလို ဆူညံနေတာ နာရီဝက်ကျော်ကျော်လောက်ကြာလိမ့်မယ်ထင်တယ်ဗျ။ အခုမနက်ခင်းအထိ အပြင်မထွက်ရဲ သေးဘူး”လို့  ပြောပါတယ်။

အမှတ် ၂ ရဲစခန်းတိုက်ခိုက်ခံရမှုမှာ စစ်ကောင်စီတပ်သား  ၁၂ ယောက်လောက် သေဆုံးနိုင်တယ်လို့ PDF တပ်ပေါင်းစုက သတင်းထုတ်ပြန်ထားပေမဲ့ ဒီပစ်ခတ်မှုနဲ့ ပတ်သက်လို့ စစ်ကောင်စီက သတင်းထုတ်ပြန်တာ မရှိသေးသလို ထိခိုက်သေဆုံးသူ အရေအတွက်ကိုလည်း အတည်မပြုနိုင်သေး ပါဘူး။ 

မုံရွာမြို့အမှတ် ၂ စခန်းကို မုံရွာခရိုင် ပြည်သူကာကွယ်ရေးတပ်ဖွဲ့ တပ်ရင်း - ၂ - ၃ - ၄ ရဲ့ ပြောက်ကျားကွန်မန်ဒိုတပ်ဖွဲ့နဲ့ အထူးစုံစမ်းစစ်ဆင်ရေးတပ်ဖွဲ့၊ မုံရွာခရိုင်တပ်ရင်း - ၂ ရဲ့ အထူးကွန်မန်ဒိုတပ်ဖွဲ့ - Monywa The Boys၊ တပ်ခွဲ (၁) - Monywa Ranger group/Truth Army၊ တပ်ခွဲ (၃) - Northwest Plains Revolutionary Forces-NPRF တို့က ပူးပေါင်း တိုက်ခိုက်ခဲ့တာဖြစ်ပါတယ်။

စစ်ကောင်စီတပ်စခန်းကနေ ပစ်ခတ်လိုက်တဲ့ RPG လက်နက်ကျည်ဆန်တခု  ဒီဇင်ဘာ ၂၅ ရက် မနက်က မြန်မာ-ထိုင်းနယ်စပ် ထိုင်းနိုင်ငံ၊ ဖုတ်ဖရမြို့ မော်လချိုင်းကျေးရွာအတွင်း  ကျရောက်ခဲ့လို့ နေအိမ်တလုံး ထိမှန်ပျက်စီးသွားပါတယ်။

ဒီနေ့ မနက် ၉ နာရီ ၄၅ မိနစ်လောက်က မြဝတီခရိုင်တောင်ဘက် ၂၈ လောက်အကွာ စစ်ကောင်စီတပ်စွဲထားတဲ့ သေ့ဘောဘိုးစခန်းဘက်ကနေ RPG အလုံးကြီးတစ်လုံး ပစ်ခတ်ခဲ့တာလို့ ထိုင်းစစ်တပ်နဲ့ နီးစပ်သူထံက  သိရပါတယ်။

အဆိုပါပစ်ခတ်တဲ့နေရာကို ဖုတ်ဖရမြို့နယ်က ထိုင်းရဲတပ်ဖွဲ့တာဝန်ရှိသူနဲ့ နယ်စပ်လုံခြုံရေးယူထားတဲ့ ထိုင်းစစ်တပ်က သွားရောက်စစ်ဆေးရာမှာ မော်လချိုင်းရွာသား တယောက်ရဲ့ အိမ်ခေါင်မိုးနဲ့ အိမ်တွင်းပစ္စည်း အနည်းငယ် ထိခိုက်ပျက်စီးတာ တွေ့ခဲ့ရပါတယ်။ 

ကရင်ပြည်နယ်၊ မြဝတီမြို့တောင်ဘက် လေးကေ့ကော်မြို့သစ်မှာ စစ်ကောင်စီတပ်တွေ ကျူးကျော်ဝင်ရောက်လာရာကစတင်ပြီး  စစ်ကောင်စီတပ်တွေနဲ့ KNLA ပူးပေါင်းတပ်တွေ နေ့စဉ်လိုလို တိုက်ပွဲတွေ ဖြစ်ပွားနေတာပါ။ 

ဒီဇင်ဘာလ ၂၅ ရက်အထိ တိုက်ပွဲတွေအတွင်း စစ်ကောင်စီတပ်ဘက်က အနည်းဆုံး အယောက် ၄၀‌ လောက်သေဆုံးပြီး ထိုင်းနိုင်ငံဘက်ကိုလည်း လက်နက်ကြီးကျည်ဆန်တွေ  ၁၀ လုံးလောက် ကျရောက်ပေါက်ကွဲခဲ့ပါတယ်။

တိုက်ပွဲတွေကြောင့် မြဝတီခရိုင်အတွင်း ကျေးရွာတွေမှာ သောင်းနဲ့ချီတဲ့ပြည်သူတွေ စစ်ဘေးဒုက္ခသည်အဖြစ် ရှောင်တိမ်းနေရတဲ့အပြင် နယ်ခြားသောင်ရင်းမြကို ဖြတ်ကူးပြီး ထိုင်းနိုင်ငံမှာ ထွက်ပြေးခိုလှုံနေသူတွေလည်း ထောင်နဲ့ချီရှိနေပါတယ်။