နည်းပညာသူဌေးကြီး အီလွန်မတ်စ်ရဲ့ SpaceX ကုမ္ပဏီက အင်္ဂါဂြိုဟ်ကို သွားမယ့်ခရီးစဉ်အတွက် လျာထားတဲ့ နည်းပညာပြင်ဆင်မှုတွေနဲ့ ဒီခရီးစဉ်ရဲ့ပုံကြမ်းကို မကြာခင်ကပဲ ထုတ်ပြန်ခဲ့ပါတယ်။

အကြိမ်ကြိမ်ပြန်လည်သုံးစွဲနိုင်တဲ့ Spaceship အာကာသယာဉ်ကြီးက တန်ချိန် ၁၅၀ လောက် တင်ဆောင်နိုင်ပြီး ခရီးသည်လူ ၁၀၀ လောက် လိုက်ပါနိုင်ပါတယ်။ spaceship ကို ဒုံးပျံနဲ့တင်ဆောင်ပြီး ကမ္ဘာပတ်လမ်းကြောင်းရောက်တဲ့အခါမှာ အင်္ဂါဂြိုဟ်ခရီးစဉ်မတိုင်ခင် လောင်စာစွမ်းအင်ကို အာကာသထဲမှာပဲ ဖြည့်တင်းမှာဖြစ်ပါတယ်။ အဲဒီနောက်မှာတော့ ခရီးစဉ်ဟာ ၆ လလောက်ကြာမြင့်မယ်လို့  SpaceX က ခန့်မှန်းထားပါတယ်။ 

အင်္ဂါဂြိုဟ် Mars ဟာ ကမ္ဘာကြီးနဲ့ အနီးဆုံးအချိန်မှာ မိုင်ပေါင်း သန်း ၁၄၀ လောက်ဝေးကွာတာပါ။  နေရောင်ခြည်ကောင်းကောင်းရပြီး လူနေထိုင်ဖို့ ဖြစ်နိုင်ခြေရှိတဲ့ဂြိုဟ်တခုအဖြစ် ယူဆထားကြပါတယ်။ နေရောင်ခြည်ကောင်းကောင်းရရှိပါတယ်။

ကမ္ဘာကြီးထက်ပိုအေးပေမယ့် လူနေထိုင်နိုင်အောင် အနွေးဓာတ်ကို စီစဉ်လို့ရနိုင်တယ်လို့ SpaceX ကုမ္ပဏီကပြောပါတယ်။

သူ့ရဲ့လေထုဟာ ကာဗွန်ဒိုင်အောက်ဆိုဒ် CO2 အများစုနဲ့ဖွဲ့စည်းထားပြီး နိုက်ထရိုဂျင် အာဂွန်နဲ့ တခြားဓာတ်ငွေ့တွေ အနည်းစုရှိကြပါတယ်။ အဲဒီလေထုကို ပြင်ဆင်ပြုပြင်ပြီး အပင်တွေ စိုက်ပျိုးလို့ရနိုင်တယ်လို့ဆိုပါတယ်။

အင်္ဂါဂြိုဟ်ပေါ်က မြေဆွဲငင်အားဟာ ကမ္ဘာ့ဆွဲအားရဲ့ ၃၈ ရာနှုန်းပဲရှိတဲ့အတွက် ပေါင်တရာအလေးချိန်ရှိတဲ့သူတယောက်ဟာ အင်္ဂါဂြိုဟ်ပေါ်မှာ ၃၈ ပေါင်ပဲ လေးနိုင်ပါတယ်။

သူ့ရဲ့ နေ့တာညတာကြာမြင့်ချိန်ကလည်း ၂၄ နာရီ ၃၇ မိနစ်ဖြစ်လို့ ကမ္ဘာ့။ နေ့ညပြောင်းချိန်နဲ့ ဆင်တူပါတယ်။

ကမ္ဘာဂြိုဟ်နဲ့  အင်္ဂါဂြိုဟ်ဟာ နေလုံးကြီးကိုလှည့်ပတ်နေတဲ့ စက်ဝိုင်းပမာဏနဲ့ ရွေ့လျားတဲ့ အရှိန်မတူကြတာကြောင့် နီးလိုက်ဝေးလိုက်ဖြစ်နေတတ်ကြပါတယ်။ ၂ နှစ် တခါတိုင်းမှာ အနီးဆုံးနေရာကို ရောက်လာကြတဲ့အချိန်မှာမှ အာကာသယာဉ် စတင်ပျံသန်းသွားရင် လောင်စာအနည်းဆုံးပဲ အသုံးပြုရမှာဖြစ်ပါတယ်။ ဂြိုဟ်ပတ်လမ်း ရွေ့လျားပုံအတိုင်း မျောလိုက်သွားရတဲ့ခရီးစဉ်ဟာ စုစုပေါင်း မိုင် သန်းပေါင်း ၃၀၀ လောက်ထိ ဖြတ်သန်းရမှာပါ။ 

ကမ္ဘာနဲ့အနီးဆုံးနေရာဆီ Mars ရောက်လာမယ့်နေရာကို ချိန်ရွယ်ပြီး ကြိုတင်ပျံသန်းသွားရတဲ့ခရီးဟာ လက်ဆင့်ကမ်းအပြေးသမားအချင်းချင်း လှမ်းပစ်ပေးသလို အချိန်ကိုက်ဖြစ်ဖို့လိုတာကို အမေရိကန် အာကာသအေဂျင်စီ NASA က ကျောင်းသားတွေ နားလည်အောင်ဗီဒီယို အင်နီမေးရှင်းနဲ့ ရှင်းပြထားပါတယ်။

အမှားအယွင်းမရှိ ဆိုက်ရောက်ခဲ့မယ်ဆိုရင် ဒီခရီးဟာ ၇ လ ၈ လ လောက်ကြာမြင့်နိုင်တယ်လို့ NASA က တွက်ချက်ထားပါတယ်။ 

SpaceX ကုမ္ပဏီကတော့ လမ်းမှာတစုံတခုအမှားအယွင်းဖြစ်ခဲ့ရင် ကမ္ဘာမြေဆီလှည့် ပြန်လာနိုင်လောက်တဲ့ စွမ်းအင်အပြည့်အဝရှိတယ်လို့ဆိုထားပါတယ်။  အရင်တုန်းက ဒီခရီးစဉ်ကို ၂၀၂၀ ပြည့်နှစ်နဲ့ ၂၀၃၇ ခုနှစ် အကြားမှာ စတင်နိုင်လိမ့်မယ်လို့ ခန့်မှန်းထားခဲ့ဖူးပါတယ်။

အာကာသဂြိုဟ်တုလွှတ်တင်မှုသမိုင်းမှာ အကြီးမားဆုံး ဒုံးပျံကိုအသုံးပြုပြီး အင်္ဂါဂြိုဟ်သွား စီမံကိန်းထဲကတခုဖြစ်တဲ့ Spaceship အာကာသယာဉ်မကြီးကို လွှတ်တင်တဲ့ စမ်းသပ်ချက်တခုကို SpaceX  ကုမ္ပဏီက ဧပြီ ၂၀ ရက်မှာ ပြုလုပ်ခဲ့ပါတယ်။​

ဒါပေမဲ့ ဒီစမ်းသပ်ချက်ဟာ မူရင်းရည်မှန်းထားတဲ့ မိနစ် ၉၀ ကြာပျံသန်းမှုအပြီး ဟာဝိုင်ယီကျွန်းနားက ပစိဖိတ်သမုဒ္ဒရာထဲမှာပြုတ်ကျသွားရမယ့်အစား ပျံတက်ပြီး ၄ မိနစ်အကြာ ကမ္ဘာပတ်လမ်းထဲမရောက်ခင် အမြင့် ၂၄ မိုင်မှာ တနာရီမိုင် ၁၃၀၀ နှုန်းနဲ့ ပျံတက်နိုင်ခဲ့ပြီးနောက်မှာတော့ တွန်းတင်ပေးတဲ့ဒုံးပျံနဲ့ အာကာသယာဉ် ခွဲထွက်မှု မအောင်မြင်ခဲ့ပဲ အလိုလျောက်စနစ်နဲ့ ဖေါက်ခွဲဖျက်စီးပစ်လိုက်ရပါတယ်။

ဒါပေမဲ့ Launch Pad ဒုံးပျံပစ်စင်ကနေ ကမ္ဘာ့အကြီးမားဆုံးဒုံးပျံနဲ့ စံချိန်တင်အလေးချိန် တန်ချိန် ၅၀၀၀ လောက်ပမာဏကို အောင်မြင်စွာလွှတ်တင်နိုင်ခဲ့တဲ့အတွက် ဂုဏ်ပြုချီးကျူးတဲ့အကြောင်း SpaceX ရဲ့ CEO ဘီလီယံနာ သူဌေးကြီး အီလွန်မတ်စ်က တွစ်တာမှာရေးသားခဲ့ပါတယ်။

စိတ်လှုပ်ရှားစရာ စမ်းသပ်ချက်ဖြစ်ပြီး လာမယ့်လပိုင်းမှာ နောက်ထပ် ဒုံပျံစမ်းသပ်လွှတ်တင်ဖို့ လေ့လာစရာတွေအများကြီး ရရှိခဲ့တယ်လို့ အီလွန်မတ်စ်က ပြောပါတယ်။ ပေ ၄၀၀ လောက်ရှည်လျားပြီး တန်ချိန် ၅၀၀၀ လောက်သယ်ဆောင်ထားရတဲ့ အကြီးမားဆုံးဒုံးပျံနဲ့ အကြီးမားဆုံးအာကာသယာဉ်ဟာ အာကသထဲရောက်သွားနိုင်ဖို့က အောင်မြင်ဖို့ ၅၀ ရာနှုန်းပဲခန့်မှန်းထားပြီး ဒုံးပျံပစ်စင်မှာ ပေါက်ကွဲမသွားတာက အောင်မြင်မှုတခုပဲလို့ သူကပြောပါတယ်။ 

SpaceX ကုမ္ပဏီဟာ အခုစမ်းသပ်နေတဲ့ အာကာသယာဉ်မကြီး Spaceship ကို လာမယ့်နှစ်ပိုင်းမှာစတင်ဖို့ စီစဉ်ထားတဲ့ NASA ရဲ့ လကမ္ဘာပါတ်ခရီးစဉ်အပြင် ခရီးသည် ၁၀၀ ကျော် တင်ဆောင်နိုင်မယ့် ၆ လတာခရီးစဉ် အင်္ဂါဂြိုဟ်သွားစီမံကိန်းအတွက်ပါ အသုံးပြုဖို့ ရည်ရွယ်ထားတာဖြစ်ပါတယ်။

Spaceship ကို အာကာသထဲအရောက်ပို့ဆောင်ပေးမယ့် ကမ္ဘာ့အကြီးမားဆုံး Super Heavy - gargantuan ဟာ အကြိမ်ကြိမ်ထပ်မံသုံးစွဲနိုင်တဲ့ လွန်းပျံယာဉ်ဒုံးပျံဖြစ်ပြီး မီသိန်းနဲ့ အောက်ဆီဂျင်ဓါတ်ငွေ့အရည်သုံး အင်ဂျင် ၃၃ လုံးပါဝင်ပါတယ်။

အဲဒီထဲက အင်ဂျင်တချို့ မလည်ပတ်နိုင်တာကို လွှတ်တင်ပြီးမကြာခင်မှာပဲ သိရှိခဲ့ကြပါတယ်။ မူလအစီအစဉ်အရဆိုရင် ပေ ၂၃၀ လောက်ရှိတဲ့ super Heavy ဒုံးပျံဟာ တက္ကဆက်ပြည်နယ်တောင်ပိုင်း မက်ဆီကိုပင်လယ်ကွေ့နားကနေ လွှတ်တင်ပြီး ၂ မိနစ်ခွဲအကြာ ကမ္ဘာ့လေထုကိုဖြတ်သန်းပြီးတဲ့အခါ Spaceship အာကာသယာဉ်မကြီးနဲ့ အဆက်ဖြတ်ပြီး သမုဒ္ဒရာထဲကို ကျဆင်းမှာဖြစ်ပါတယ်။

ပေ ၁၈၀ လောက်အရှည်ရှိတဲ့ Spaceship အာကာသယာဉ်မကြီးဟာ သူ့ရဲ့ သီးသန့်အင်ဂျင် ၆ လုံးနဲ့ ကမ္ဘာပတ်လမ်းမှာပျံသန်းပြီး မိနစ် ၉၀ အကြာမှာ ပင်လယ်ရေပြင်ဆီ ပြန်ကျဆင်းလာဖို့ အစီအစဉ်ဆွဲထားတာ ဖြစ်ပါတယ်။ 

အသက် ၄၆ နှစ်ရှိ ဂျပန်ဘီလီယံနာသူဌေးကြီး ‘ယူဆာကူ မဲဇာဝါ’ ဟာ ၁၂ ရက်ကြာ အာကာသခရီး ထွက်ခဲ့ပြီးနောက် ဒီဇင်ဘာ ၂၀ ရက်နေ့က ကမ္ဘာမြေကို ပြန်လည်ရောက်ရှိလာပါတယ်။

သူဟာ အမေရိကန်ဘီလီယံနာ အီလွန်မက်စ်ရဲ့ အာကသခရီးသွားလုပ်ငန်း SpaceX အစီအစဉ်နဲ့ ၂၀၂၃ မှာ လကမ္ဘာကိုပတ်ဖို့ စီစဉ်ထားပြီး အခုခရီးက သူ့အတွက် ကနဦး စမ်းသပ်ခရီးသာ ဖြစ်ပါတယ်။

ဂျပန် ဖက်ရှင်လုပ်ငန်းရှင်နဲ့ အနုပညာဖန်တီးသူ  ‘မဲဇာဝါ’ ဟာ  သူ့ရဲ့လက်ထောက် ‘ယိုဇို ဟီရာနို’ နဲ့အတူ ရုရှားပိုင် ကာဇက်စတန်ရှိ ဘိုင်ကော်နာ ကော်စမိုဒရုန်း (Baikonur Cosmodrome)  အာကာသစခန်းကနေ ဒီဇင်ဘာ ၈ ရက်နေ့က အာကာသထဲ သွားခဲ့ကြတာပါ။ သူတို့ကို  ရုရှားအာကသယာဉ်မှူး ‘အလက်ဇန်းဒါး မီဆာကင်’ က ဦးဆောင်သွားခဲ့ပြီး မနေ့က အောင်မြင်စွာ ပြန်ဆင်းသက်နိုင်ခဲ့ပါတယ်။

မဲဇာဝါဟာ အာကာသခရီးထွက်ဖို့ စိတ်အားထက်သန်သူဖြစ်ပြီး ကမ္ဘာ့အပြင်ဘက်ရှိ နိုင်ငံတကာအာကာသစခန်း (ISS) ကို သွားခဲ့တဲ့ ပထမဆုံး အာရှအာကာသ ခရီးသွားတဦး ဖြစ်ပါတယ်။ 

အခုအခါ ကမ္ဘာ့အချမ်းသာဆုံး  ဘီလီယံနာတွေဟာ အပြိုင်အဆိုင် အာကာသထဲ ခရီးထွက်နေကြပါတယ်။