ကယားပြည်နယ် ဖားဆောင်းမြို့နယ်နဲ့ ရှားတောမြို့နယ်တို့က ဒေသအချို့ကို   နေအိမ်တွင်းနေထိုင်ရေး (stay at Home) အစီအစဉ်ကနေ ပယ်ဖျက်လိုက်တယ်လို့  ကယားပြည်နယ် ပြည်သူ့ကျန်းမာရေးဦးစီးဌာနက ဒီဇင်ဘာ ၁၂ ရက်နေ့ ထုတ်ပြန်လိုက်ပါတယ်။

ကယားပြည်နယ် ပြည်သူ့ကျန်းမာရေးဦးစီးဌာနက လတ်တလော ဖြစ်ပွားနေတဲ့ ကိုဗစ်-၁၉ ကြိုတင်ကာကွယ်ရေးလုပ်ငန်းတွေကို အချိန်နဲ့တပြေးညီ ဆောင်ရွက်ရာမှာ ရောဂါ ကူးစက်ပျံ့နှံ့မှုကို ပိုမိုထိရောက်စွာ ထိန်းချုပ်နိုင်ဖို့ ပြည်နယ်အတွင်း ရောဂါကူးစက်မှု များပြားနေတဲ့ သက်ဆိုင်ရာမြို့နယ်တွေကို (Stay at Home) သတ်မှတ်ကြေညာခဲ့ပါတယ်။

လက်ရှိမှာတော့ သက်ဆိုင်ရာပြည်နယ် အဝန်းအဝိုင်းနယ်မြေအတွင်း နေထိုင်သူအနေနဲ့ ကိုဗစ်-၁၉ ရောဂါကာကွယ်ရေး စည်းကမ်းချက်တွေကို တိကျစွာလိုက်နာတဲ့အတွက် လွန်ခဲ့တဲ့ ၁၄ ရက်အတွင်း ဓာတ်ခွဲအတည်ပြုလူနာ ထပ်မံတွေ့ရှိမှု လျော့နည်းလာခဲ့တယ်လို့ ဆိုပါတယ်။

ဒါကြောင့် ဖားဆောင်းမြို့နယ် မော်ချီးဒေသ၊ လိုခါးလိုကျေးရွာအုပ်စုနဲ့ ရှားတောမြို့နယ် ရှားတောင်မြို့စည်ပင် သာယာရေးနယ်နိမိတ်တွေကို ဒီကနေ့ ဒီဇင်ဘာ ၁၃ ရက်နေ့ မနက် ၄ နာရီကစပြီး Stay at Home အစီအစဉ်ကနေ ပယ်ဖျက်လိုက်တာလို့ ထုတ်ပြန်ထားပါတယ်။

ဖားဆောင်းမြို့နယ် မော်ချီးဒေသ၊ လိုခါးလို ကျေးရွာအုပ်စုမှာ ကိုဗစ်-၁၉ ကူးစက်မှုမြင့်တက်တာကြောင့် ပြီးခဲ့တဲ့ ဩဂုတ် ၃ ရက်နေ့ကစပြီး Stay at Home သတ်မှတ်ကြေညာခဲ့တာပါ။

မြို့နယ် နှစ်ခုက ကိုဗစ်ကူးစက်မှုလျော့နည်းသွားတဲ့ ဒေသကို Stay at Home ပယ်ဖျက်လိုက်ပေမယ့် ဒီဇင်ဘာ ၁၂ ရက်နေ့မှာတော့ လူပေါင်း ၆၇ ဦးကို ကိုဗစ်-၁၉  စစ်ဆေးခဲ့ရာ ၂ ဦး ပိုးတွေ့ရှိခဲ့တယ်လို့ ပြည်နယ် ကျန်းမာရေးဦးစီးဌာနက ဖော်ပြထားပါတယ်။

ကယားပြည်နယ်မှာ  ဇွန် ၂၉ ကနေ ဒီဇင်ဘာ ၁၂ ရက်နေ့အထိ  ကိုဗစ်-၁၉ ပိုးတွေ့လူနာ ၅၈၅၂ ဦးရှိပြီး အဲထဲက ၂၄၂ ဦး သေဆုံးသွားပါတယ်။

ပြည်နယ်အတွင်း လွိုင်ကော်မြို့နယ်ဟာ ပိုးတွေ့ ၂၈၄၂ ဦး၊ သေဆုံးသူ ၂၀၅ ဦးနဲ့ အများဆုံးဖြစ်ပါတယ်။

ကိုဗစ်-၁၉ ရောဂါကြောင့် နေအိမ်မှာနေဖို့ သတ်မှတ်ထားတဲ့ နိုင်ငံတဝန်း မြို့တွေထဲက မြို့နယ်ပေါင်း ၄၄ ခုကို Stay at Home အစီအစဉ်ကနေ ပယ်ဖျက်လိုက်ပြီလို့ စစ်ကောင်စီလက်အောက်ခံ ကျန်းမာရေးဝန်ကြီးဌာနက အောက်တိုဘာ ၂၇ ရက်မှာ ထုတ်ပြန်ပါတယ်။

အဆိုပါ မြို့နယ်တွေထဲမှာတော့ ချင်းပြည်နယ်ထဲက တွန်းဇံမြို့နယ်၊ စစ်ကိုင်းတိုင်းထဲက ဟုမ္မလင်းမြို့နယ်၊ ပဲခူးတိုင်းထဲက တောင်ငူ၊ ကျောက်တံခါး၊ ညောင်လေးပင်၊ ဝေါ၊ မင်းလှ၊ လက်ပံတန်း၊ သာယာဝတီ၊ အုတ်ဖိုမြို့နယ်တွေ၊ မကွေးတိုင်းထဲက ပွင့်ဖြူမြို့နယ်၊ မန္တ လေးတိုင်းထဲက ချမ်းမြသာစည်၊ ချမ်းအေးသာစံ၊ ပြည်ကြီးတံခွန်၊ မဟာအောင်မြေ၊ ပုသိမ် ကြီး၊ အမရပူရ၊ မြင်းခြံ၊ ပျော်ဘွယ်၊ ရမည်းသင်းမြို့နယ်တွေ၊ မွန်ပြည်နယ်ထဲက သထုံမြို့ နယ်၊ ရန်ကုန်တိုင်းထဲက တိုက်ကြီး၊ မင်္ဂလာဒုံ၊ ရွှေပြည်သာ၊ လှိုင်သာယာ၊ အင်းစိန်၊ တာ မွေ၊ တောင်ဉက္ကလာ၊ ဒဂုံမြို့သစ်မြောက်ပိုင်း၊ မင်္ဂလာတောင်ညွန့်၊ မြောက်ဉက္ကလာ၊ ရန် ကင်း၊ သာကေတ၊ သင်္ယန်းကျွန်း၊ ခရမ်း၊ ကမာရွတ်၊ ကြည့်မြင်တိုင်၊ စမ်းချောင်း၊ ဗဟန်း၊ မရမ်းကုန်း၊ လှိုင်မြို့နယ်တွေနဲ့ ဧရာဝတီတိုင်းထဲက ဘိုကလေးနဲ့ ဟင်္သာတမြို့နယ်တွေ ပါဝင်နေတာပါ။

ဒီမြို့နယ်တွေဟာ ကိုဗစ်ရောဂါကာကွယ်ရေးစည်းကမ်းချက်တွေကို တိတိကျကျလိုက်နာ လို့ လွန်ခဲ့တဲ့ ၁၄ ရက်က အတည်ပြုလူနာတွေ့နှုန်းနည်းလာတာ၊ အစုလိုက် ကူးစက်တာ နည်းလာတာ၊ ဆက်စပ်လူနာရှာဖွေတွေ့နှုန်း နည်းလာတာတွေကြောင့် ခုလို Stay at Home အစီအစဉ်ကနေ ပယ်ဖျက်လိုက်တာလို့ ဆိုပါတယ်။

လတ်တလောမှာတော့ တိုင်းနဲ့ ပြည်နယ်အနှံ့ Stay at Home အစီအစဉ်ကနေ ပယ်ဖျက် လိုက်တဲ့ မြို့နယ်ပေါင်း ၅၀ ထိ ရှိလာပြီဖြစ်ပြီး ကျန်မြို့နယ် ၆၉ မြို့နယ်ကတော့ ဒီအစီ အစဉ်ထဲ ဆက်လက်ပြီးတော့ ရှိနေဦးမယ်လို့ ဆိုပါတယ်။

မြန်မာနိုင်ငံမှာတော့ လက်ရှိအချိန်ထိ ကိုဗစ်-၁၉ ရောဂါကူးစက်ခံရသူ စုစုပေါင်း ၄၉၆,၉၀၁ ယောက် ရှိနေပြီး သေဆုံးသူအရေအတွက်ကတော့ ၁၈,၆၀၃ ယောက်ရှိနေ တယ်လို့ စစ်ကောင်စီကျန်းမာရေးက မနေ့က ထုတ်ပြန်ထားပါတယ်။