ထိုင်း နိုင်ငံတကာလေဆိပ်အဝင်တွေမှာ Test & Go စနစ်နဲ့ ကိုဗစ်-၁၉ ရောဂါ စစ်ဆေးမှုကို လာမယ့် မေ ၁ ရက်ကစ ရုပ်သိမ်းပြီး  ATK နဲ့ စစ်ဆေးတဲ့စနစ်ကို ကျင့်သုံးသွားတော့မှာ ဖြစ်ပါတယ်။

ခရီးသွားလုပ်ငန်းမြှင့်တင်ရေး၊ နိုင်ငံ့စီးပွားရေး မြှင့်တင်ရေးနဲ့ နိုင်ငံတကာ ခရီးသွားဧည့်သည်တွေ လျှင်မြန်ချောမွေ့စွာ ဝင်ထွက်သွားလာနိုင်ရေးအတွက် တခြားကန့်သတ်ချက် ဖြေလျှော့မှုတွေနဲ့အတူ Test & Go စနစ်ကို ရုပ်သိမ်းဖို့ ထိုင်းနိုင်ငံ ကိုဗစ်-၁၉ အခြေအနေ ထိန်းချုပ်ကာကွယ်ရေး ဗဟိုကော်မတီ အစည်းအဝေးမှာ ဆုံးဖြတ်ခဲ့တယ်လို့ ဝန်ကြီးချုပ် ပရယုတ်ကျန်အိုးချားက ဒီနေ့မနက်  အစည်းအဝေးအပြီး ထုတ်ပြန်ပြောကြားပါတယ်။

Test & Go နဲ့ RT-PCR စစ်ဆေးခြင်းစနစ် ရုပ်သိမ်းပြီး ATK စနစ် ကျင့်သုံးရာမှာ ခရီးသွားတွေအနေနဲ့ ကာကွယ်ဆေးထိုးပြီးကြောင်း ထောက်ခံစာ၊ လွန်ခဲ့တဲ့ ၇၂ နာရီအတွင်း ATK နဲ့ စစ်ဆေးထားပြီး ရောဂါပိုးကင်းစင်တဲ့ အထောက်အထားတွေ ပြရမယ်လို့ ဆိုပါတယ်။

ကာကွယ်ဆေး အနည်းဆုံး ၂ ကြိမ် သို့မဟုတ် လုံးဝမထိုးရသေးသူတွေအနေနဲ့ ပုံမှန်အတိုင်း AQ ကွာရန်တင်း ၅ ရက်ဝင်ပြီး မိမိအခြေအနေကို စောင့်ကြည့်ရမယ်လို့ ဝန်ကြီးချုပ်က ပြောသွားပါတယ်။

ထိုင်းနိုင်ငံရဲ့ လက်ရှိ ကိုဗစ်-၁၉ ကူးစက်မှုအခြေအနေမှာ ဒီနေ့ ဧပြီ ၂၂ ရက် ထုတ်ပြန်ချက်အရ ပိုးတွေ့လူနာသစ် ၂၁,၈၀၈ ဦး၊ သေဆုံးသူ ၁၂၈ ဦး၊ ATK နဲ့ စစ်ဆေးတွေ့ရှိသူ ၂၀,၆၃၅ ဦးရှိပြီး စုစုပေါင်း လူနာသစ် ၄၂,၄၄၃ ဦးရှိပါတယ်။သက်သာပျောက်ကင်းသူ ၁၉,၈၂၆ ဦးရှိကာ အဆုတ်ထဲကို ပိုးဝင်လို့ အခြေအနေဆိုးသူ ၁,၉၈၅ ဦးရှိတယ်လို့ ကိုဗစ်-၁၉ ထိန်းချုပ်ရေး ဗဟိုကော်မတီ EOC က ထုတ်ပြန်ပါတယ်။

ဒီ ၂၀၂၂ ဇန်နဝါရီလကစ ဒီနေ့ထိ ကိုဗစ်-၁၉ ကူးစက်ခံရသူ စုစုပေါင်း ၁,၉၀၄,၆၀၃ ဦးရှိပြီး သေဆုံးသူ ၅,၈၂၂ ဦးရှိပါတယ်။

ထိုင်းနိုင်ငံထဲကို အပြည်ပြည်ဆိုင်ရာလေဆိပ်ကနေတဆင့်   ဝင်ရောက်လာမယ့်နိုင်ငံခြားသားတွေ အနေနဲ့  ကွာရန်တင်းဝင်စရာမလိုတဲ့  Test & Go စနစ်ကို လာမယ့် ဖေဖော်ဝါရီ ၁ ရက်နေ့ ကနေ ပြန်လည်စတင်တော့မှာ ဖြစ်ပါတယ်။ 

အဆိုပါစနစ်နဲ့ ဝင်လာမယ့်နိုင်ငံခြားသားတွေဟာ ကြိုတင်အမည်စာရင်းပေးသွင်းထားရမှာဖြ စ်ကြောင်း၊  RT - PCR စနစ်နဲ့  ကိုဗစ် ၁၉ ပိုး ၂ ကြိမ်အစစ်ဆေးခံရမှာဖြစ်ပြီး စစ်ဆေးချက်အဖြေထွက်မှ လိုရာကိုသွားနိုင်မယ်လို့  ထိုင်းကိုဗစ်ထိန်းချုပ်ရေးကော်မတီ ပြောခွင့်ရ ဒေါက်တာ ထဝီးဆင် ဝိစနုယိုးထင်းက ယမန်နေ့ သတင်းစာရှင်းပွဲမှာ ပြောပါတယ်။ 

ဒါ့အပြင် မိမိတည်းခိုမည့် ဟိုတယ်ကို ကြိုတင်ဘွတ်ကင်လုပ်ထားရမှာဖြစ်ပြီး ၁ ရက်မှ ၅ ရက်ထိတည်းခိုနေဖို့ ၊ စည်းကမ်းချက်မလိုက်နာဘဲ လျှောက်သွားနေပါက နည်းပညာနဲ့ ခြေရာ ခံနည်းရှိကြောင်း၊  ကျန်းမာရေးအာမခံအထောက်အထားပါ ပြရမှာဖြစ်ပြီး ၊ အာမခံမပြည့်စုံသူ တွေ ဆေးကုသမှုခံယူရပါက သီးသန့်ခွဲနေစဉ်နဲ့ ဆေးကုသမှုခံယူရာမှာ ကုန်ကျစရိတ်ကို မိမိဖာသာကျခံရမယ်လို့ ဆိုပါတယ်။ 

Test & Go စနစ်နဲ့ ဝင်လာမယ့် အဆိုပါစည်းကမ်းချက်တွေမှာ ပြည်ပကနေပြန်ဝင်မယ့် ထိုင်းနိုင်ငံသားတွေရော နိုင်ငံခြားသားတွေပါ အကုန်အကျုံးဝင်ပါတယ်။ 

ထိုင်းနိုင်ငံမှာ ကမ္ဘာလှည့်ခရီးသွားလုပ်ငန်းမြှင့်တင်တဲ့အနေနဲ့ ပြီးခဲ့တဲ့နှစ် နိုဝင်ဘာ ၁ ရက်နေ့ကစ နိုင်ငံထဲဝင်လာရင် ကွာရန်တင်း ၁၄ ရက်ဝင်စရာမလိုဘဲ  လေဆိပ်မှာ စစ်ဆေးခံပြီး လိုရာကိုလွတ်လပ်စွာသွားလာနိုင်တဲ့ Test & Go စနစ်ကို ကျင့်သုံးခဲ့ပါတယ်။ 

ဒါပေမဲ့ နိုဝင်ဘာလကုန်ပိုင်းမှာ နိုင်ငံခြားမှ ဝင်လာသူတွေကနေ ကိုဗစ်-၁၉ ဗီဇမျိုးကွဲ အိုမီခရွန်ပိုးတွေ့ရှိတာကြောင့် Test & Go စနစ် ပြန်ပိတ်ခဲ့ရပါတယ်။ 

မနှစ်က Test & Go စနစ်နဲ့ ဝင်လာဖို့ အမည်စာရင်းတင်သွင်းထားသူပေါင်း ၃၈၂၃၀၆ ဦးရှိပြီး အဲဒီထဲက ၃၀ ရာခိုင်နှုန်းလောက်သာ နိုင်ငံထဲဝင်လာတာကြောင့် ခရီးသွားလုပ်ငန်းပြန်ပြီး လည်ပတ်နိုင်ဖို့ ထိုင်းနိုင်ငံကမ္ဘာလှည့်ခရီးသွားလုပ်ငန်းနဲ့အားကစားဝန်ကြီးဌာနက Test & Go စနစ်ကို စည်းကမ်းချက်တွေနဲ့အညီပြန်ဖွင့်ပေးဖို့ အဆိုပြုခဲ့တာဖြစ်ပါတယ်။ 

ထိုင်းကိုဗစ်ထိန်းချုပ်ရေးကော်မတီက Test & Go စနစ် ပြန်ဖွင့်ရေးအပြင် Sand Box ( အလည်အပတ်အထူးဧည့်သည် ) အစီအစဉ်နဲ့ လည်ပတ်သွားလာနိုင်တဲ့ ဒေသတွေပါ ထပ်မံတိုးချဲ့ဖို့ ဆုံးဖြတ်ခဲ့ပါတယ်။

အဲဒီထဲမှာ  ချွန်းပူးရီး၊ တလတ် ၊ ဖူးကက် ၊ ဖန်င ၊ ကရပိ၊ ဆူရတ်ဌာနီခရိုင်ထဲက မြို့နယ်တွေ ထပ်တိုးလိုက်တာ ဖြစ်ပါတယ်။ 

ဒါ့အပြင် တရတ် ၊ ဆာကယောက်၊ မုဒ်တာဟန်၊ ဘင်ကန် ၊ ဥဘွန်းစတဲ့ခရိုင်တွေကိုလည်း လည်ပတ်သွားလာနိုင်တဲ့ ဇုန်အဖြစ် တိုးမြင့်လိုက်တယ်လို့ ဆိုပါတယ် ။  

ကိုးကား- ThaiPBS