အာရပ်စော်ဘွားများပြည်ထောင်စု UAEရဲ့ သမ္မတ ရှိတ်ခ် မိုဟမ်မဒ် ဘင် ဇာယဒ် အယ်လ် နာယန်ဟာ စွမ်းအင်လုံခြုံရေးနဲ့ စက်မှုလုပ်ငန်း တိုးတက်မှုကို အရှိန်အဟုန်မြှင့်ဆောင်ရွက်မယ့် ဂျာမန်အဓိပတိ အောလော့ဖှ် ရွှိုက်ဇ်နဲ့ သဘောတူညီချက်တရပ် လက်မှတ်ရေးထိုးခဲ့တယ်လို့ နိုင်ငံပိုင်သတင်းအေဂျင်စီ (WAM) က စက်တင်ဘာ ၂၅ ရက်မှာ ဖော်ပြပါတယ်။

အဘူဒါဘီအမျိုးသားရေနံကုမ္ပဏီ (ADNOC) က ဂျာမန်လုပ်ငန်း utility RWE ကို သဘာဝဓာတ်ငွေ့ရည် (LNG) ထောက်ပံ့ဖို့ သဘောတူညီချက်တရပ်ကို လက်မှတ်ရေးထိုးခဲ့ တယ်လို့  ဆိုပါတယ်။ 

ADNOC ဟာ ဘရန်းစ် ဘတ်ဒယ်လ်မှာရှိတဲ့ ရေပေါ် သဘာဝဓာတ်ငွေ့ ဆိပ်ကမ်းရဲ့ စမ်းသပ်လည်ပတ်ရာမှာသုံးဖို့ ပထမဆုံး သင်္ဘောကို ၂၀၂၂ ခုနှစ်နှောင်းပိုင်းမှာ ပို့ပေးမယ်လို့လည်း  ဆိုထားပါတယ်။

မကြာသေးမီကအထိ ဓာတ်ငွေ့အတွက် ရုရှားအပေါ် မှီခိုနေရတဲ့ ဂျာမဏီဟာ ဖေဖော်ဝါရီလမှာ ရုရှားက ယူကရိန်းကို ကျူးကျော်ပြီးကတည်းက ရုရှားစွမ်းအင်ထောက်ပံ့မှု ကွဲပြားစေဖို့ ကြိုးပမ်းနေခဲ့တာပါ။

ဂျာမန်အဓိပတိရဲ့ ပင်လယ်ကွေ့ဒေသဆီ နှစ်ရက်ကြာ ခရီးစဉ်ရဲ့ ဒုတိယနေ့မှာတော့ အစားထိုး စွမ်းအင် အရင်းအမြစ်တွေ ဖူလုံစေဖို့ သူ့ရဲ့ ကြိုးစားမှုရလဒ် ထွက်ပေါ်လာတာလည်း ဖြစ်ပါတယ်။

LNG 137,000 ကုဗမီတာကို ပေးပို့မှာဖြစ်ပြီး ဟမ်းဘာ့ဂ်မြို့နားက ဘရန်းစ်ဘစ်ဒယ် မြို့မှာရှိတဲ့ ရေပေါ် ဓာတ်ငွေ့ ဆိပ်ကမ်းကို ပထမဆုံး ပေးပို့မယ်လို့ RWE က ပြောခဲ့ပါတယ်။

စက်တင်ဘာ ၂၄ရက်က ရွှိုက်ဇ်ဟာ ဆော်ဒီအာရေဗျ အိမ်ရှေ့မင်းသား မိုဟမ်မဒ် ဘင် ဆယ်လ်မန်နဲ့ ဂျက်ဒါမြို့မှာ တွေ့ဆုံဆွေးနွေးခဲ့ပါတယ်။