မြန်မာနိုင်ငံကနေ နေရပ်စွန့်ခွာသွားကြတဲ့ ဘင်္ဂလားဒေ့ရှ်နိုင်ငံရောက် ရိုဟင်ဂျာ(ဘင်္ဂါလီ) ဒုက္ခသည်တွေကို ပြန်လည်လက်ခံမယ်လို့ ရက္ခိုင့်အမျိုးသားအဖွဲ့ချုပ်(ULA) ရဲ့ ပြောရေးဆိုခွင့်ရှိသူ ဦးခိုင်သုခက ပြောလိုက်ပါတယ်။

ရက္ခိတလမ်းစဉ်ကို အကောင်အထည် ဖော်ဆောင်ဖို့ လက်ရှိ တကျော့ပြန် ပြင်းထန်လာနေတဲ့ တိုက်ပွဲတွေဟာ  “အဆုံးအဖြတ်နဲ့ အဆုံးသတ်တိုက်ပွဲ” ဖြစ်သွားမယ်လို့ အေအေဒုစစ်ဦးချုပ်က စက်တင်ဘာ ၁၆ ရက် ပြောဆိုအပြီး  အေအေက တိုက်ပွဲတွေ ဖော်ဆောင်လာသလို အခုလည်း  ရိုဟင်ဂျာ(ဘင်္ဂါလီ) ဒုက္ခသည်တွေကို လက်ခံမယ်လို့ ဦးခိုင်သုခက စက်တင်ဘာ ၁၉ ရက် သတင်းစာရှင်းလင်းပွဲမှာ ပြောလိုက်တာပါ။

ရခိုင်ပြည်နယ်မြောက်ပိုင်း မောင်တောနဲ့ ဘူသီးတောင်မြို့နယ်တွေက ရိုဟင်ဂျာ(ဘင်္ဂါလီ) ၇ သိန်း ကျော်ဟာ စစ်ကောင်စီတပ်ရဲ့ နယ်မြေရှင်းလင်းရေးကြောင့် ၂၀၁၇ ခုနှစ်ကတည်းက နေရပ်စွန့် ခွာ သွားခဲ့ရပြီး ဘင်္ဂလားဒေ့ရှ်နိုင်ငံမှာ ဒုက္ခသည်တွေအဖြစ် ခိုလှုံနေကြရတာဖြစ်ပါတယ်။ 

သတင်းထောက်တဦးရဲ့ ရိုဟင်ဂျာ(ဘင်္ဂါလီ)တွေကို ပြန်လည်လက်ခံရေးနဲ့ပတ်သက်ပြီး မေးမြန်းချက်ကို ဦးခိုင်သုခက “ULA/ AA အနေနဲ့ ဒီပြဿနာတွေကို ဖြေရှင်းပေးရမယ်ဆိုရင် ဖြစ်သင့်တာကတော့ နိုင်ငံတကာနဲ့ ဘင်္ဂလားဒေ့ရှ် အစိုးရက ULA/ AA ကို ဒီပြဿနာကို ဖြေရှင်းတဲ့အခါ အစိုးရတရပ်အနေနဲ့ အသိအမှတ်ပြုပေးဖို့ လိုပါတယ်။ နောက်တချက်က ဘင်္ဂလားဒေ့ရှ်အစိုးရနဲ့ UN အပါအဝင် ကမ္ဘာအင်အားကြီးနိုင်ငံတွေက ကူညီထောက်ပံ့မှု အပြည့်အဝပေးပြီးတော့ ULA အတူ ရပ်တည်ပေးဖို့ လိုပါတယ်။ အဲဒီအခြေအနေတရပ်ကို ရောက်တဲ့နေ့ကျရင် ULA/AA ရဲ့ ဒုက္ခသည် လက်ခံရေးနဲ့ ပြန်လည်နေရာချထားရေး မူဝါဒကို တရားဝင် ထုတ်ဖော်ကြေညာပြီး တရားမျှတမှုနဲ့ ငြိမ်းချမ်းရေးအခြေခံကနေ ရေရှည်တည်တံ့စွာ အတူယှဉ်တွဲ နေထိုင်နိုင်တဲ့ နှစ်ဦးနှစ်ဖက် လက်ခံနိုင်တဲ့ ဖြေရှင်းမှု ပုံစံမျိုးနဲ့ ဖြေရှင်းသွားမယ် ရည်ရွယ်ချက် ရှိပါတယ်”လို့ ဆိုခဲ့ပါတယ်။

ရိုဟင်ဂျာဒုက္ခသည်တွေ နေရပ်ပြန်နိုင်ဖို့ ဘင်္ဂလားဒေ့ရှ်အစိုးရနဲ့ နိုင်ငံတကာက မြန်မာအစိုးရကို တိုက်တွန်းခဲ့ပေမဲ့ မြန်မာဘက်က တိကျတဲ့ မူဝါဒတွေ ချမပြနိုင်တာကြောင့် ဒုက္ခသည် တသန်းလောက် နေရပ်ပြန်နိုင်ခြင်း မရှိသေးပါ။

ရိုဟင်ဂျာအပေါ် မြန်မာစစ်တပ်က သတ်ဖြတ်မှုတွေကြောင့် လူမျိုးတုံးသတ်ဖြတ်မှုနဲ့ လူသားမျိုးနွယ်အပေါ် ကျူးလွန်တဲ့ စစ်ရာဇဝတ်မှုတွေ ဖြစ်တယ်ဆိုပြီး ဂမ်ဘီယာနိုင်ငံက တရားလို လုပ်ပြီးတော့ အပြည်ပြည်ဆိုင်တရားရုံး ICJ မှာ မြန်မာနိုင်ငံကို တရားစွဲဆိုထားပြီး တရားရင်ဆိုင်နေရဆဲ ဖြစ်ပါတယ်။

မြန်မာနိုင်ငံမှာ လူမျိုးတုံးသတ်ဖြတ်မှု မရှိဘူးလို့ စစ်ကောင်စီက ငြင်းဆိုထားသလို ဂမ်ဘီယာနိုင်ငံက တရားစွဲခဲ့စဉ် အမှုရင်ဆိုင်ချိန်တုန်းက NLD ပြောရေးဆိုခွင့်ရှိသူ ဒေါက်တာမျိုးညွန့်ကလည်း လူမျိုးတုံးသတ်ဖြတ်မှုတွေ မရှိသလို ရည်ရွယ်ပြီး လုပ်ကိုင်ခဲ့တာ မရှိဘူးလို့ ငြင်းဆိုခဲ့ဖူးပါတယ်။

မြန်မာတိုင်းရင်းသား ၁၃၅ မျိုးထဲမှာ ရိုဟင်ဂျာလူမျိုးမရှိကြောင်းနဲ့ ဘင်္ဂလားဒေ့ရှ်ဘက် ထွက်ပြေးသွားသူတွေကို ၁၉၈၂ မြန်မာနိုင်ငံသားဥပဒေအရသာ လက်ခံမယ်လို့ မြန်မာအစိုးရ အစဉ်အဆက် ပြောဆိုထားပါတယ်။

ရခိုင်ပြည်နယ် စစ်တွေမြို့နယ်က ရပ်ကျေးအုပ်ချုပ်ရေးမှူး အပါအဝင် အမျိုးသား ၈ ဦးကို မေ ၃ ရက်နဲ့ ၄ ရက်နေ့တွေမှာ စစ်ကောင်စီတပ်ဖွဲ့ဝင်တွေက ဖမ်းဆီးသွားတယ်လို့ ဒေသခံတွေက ပြောပါတယ်။

လက်ရှိဖမ်းဆီးခံထားရသူတွေထဲမှာ ရပ်ကျေးအုပ်ချုပ်ရေးမှူးတဦး အပါအဝင် ကန်ထရိုက်တာတွေနဲ့ ဆိုင်သည် ၂ ဦး ပါဝင်တယ်လို့ ရွာသားတွေက ဆိုပါတယ်။

ဖမ်းဆီခံလိုက်တဲ့အထဲမှာ စစ်တွေမြို့နယ် ဘောဒူဖကျေးရွာ အုပ်ချုပ်ရေးမှူး ဦးရော်ဖီးလ်ကို မေ ၄ ရက် ညနေပိုင်းက စစ်သား ၇ ယောက်လောက်က လက်နက်တွေနဲ့ လာပြီး ဖမ်းဆီးသွားတာလို့ မျက်မြင်ရွာသားတဦးက ပြောပါတယ်။

"ဦးရော်ဖီးလ်ကို မနေ့က ညနေ ၈ နာရီလောက်မှာ သူရဲ့အိမ်ကနေ စစ်သား ၇ ယောက်လောက်က လက်နက်တွေကိုင်ပြီး ကား ၂ စီးနဲ့ လာပြီးဖမ်းသွားတာ။ ဘယ်ကို ခေါ်သွားတယ် ဆိုတာတော့ မသိရသေးဘူး။"

ဖမ်းဆီးခံလိုက်ရတဲ့ ဘောဒူဖ ကျေးရွာအုပ်ချုပ်ရေးမှူး ဦးရော်ဖီးလ်မှာ ကန်ထရိုက်တာ တဦးဖြစ်ပြီး ULA ကို အခွန်ဆောင်တယ်ဆိုပြီး ဖမ်းဆီးသွားတာ ဖြစ်နိုင်တယ်လို့ အမည်မဖော်လိုတဲ့ ကျေးရွာသားတဦးက ပြောပါတယ်။

စစ်ကောင်စီတပ်က မေ ၃ ရက်မှာ ၅ ဦးနဲ့ မေ ၄ ရက် ညနေပိုင်းက ဦးရော်ဖီးလ် အပါအဝင် ၃ ဦး ဖမ်းဆီးသွားတာလို့ ဆိုပါတယ်။

ဖမ်းဆီးခံထားရသူတွေက မကျည်းမြိုင်အကွက် ၉ က ဦးနာဂူနှစ်၊ ဘောဖဒူကျေးရွာ အုပ်ချုပ်ရေးမှူး ဦးရော်ဖီးလ်နှစ်နဲ့ သူ့လက်ထောက်တဦး၊ ဘောဒူဖကျေးရွာက ဦးနုရ်ဟူဆောင်း၊ သက္ကေပြင်ကျေးရွာမှ ဦးအီစုဖ်၊ ဦးကျော်နုနဲ့ ဒါးပိုင်ကျေးရွာက ဦးဆော်လိမ်း၊ ကြက်ကိုင်တန်ကျေးရွာက ဦးထွန်းလှစိန်တို့ ဖြစ်ကြပါတယ်။

ပြီးခဲ့တဲ့ ဧပြီ ၉ ရက်ကလည်း စစ်တွေမြို့နယ် အောင်တိုင်ကျေးရွာအုပ်စုက ရာအိမ်မှူး ၂ ဦးကို AA နဲ့ ဆက်စပ်တယ်ဆိုပြီး စစ်တပ်နဲ့ ရဲတွေက ရိုက်နှက် ဖမ်းဆီးခေါ်ဆောင်သွားတယ်လို့ သိရပါတယ်။