မန္တလေးမြို့မှာ မြေပြင်သတင်းနဲ့ မြို့ပြတော်လှန်ရေးတပ်ဖွဲ့တွေကို ထောက်ပို့လုပ်ငန်းတွေ ဆောင်ရွက်နေတဲ့ အဖွဲ့ဝင်တချို့ ဖမ်းခံရပြီးနောက် ကျန်အဖွဲ့ဝင်တွေဟာ လွတ်မြောက်နယ်မြေကို ရောက်ရှိကာ လက်နက်ကိုင်ဆက်တော်လှန်မယ်လို့ Voice Of Mandalay (VOMDY)က ပြောပါတယ်။
Voice Of Mandalay မှာ အစမ်းခန့်ထားတဲ့ Admin အမျိုးသမီးတယောက်ကို စစ်ကောင်စီတပ်က နိုဝင်ဘာ ၂၂ ရက် ညနေ ၄ နာရီ လောက်မှာ မန္တလေးသပိတ်စစ်ကြောင်းမှ ဖမ်းခံရသူတွေနဲ့ ဆက်စပ်ပြီး ထောင်ချောက်ဆင် ဖမ်းဆီးခဲ့ပြီး ကျန်အဖွဲ့ဝင်တွေကို ထပ်မံဖမ်းဆီးဖို့ ခြေရာခံလိုက်နေတာကြောင့် ကျန်ရှိနေသေးတဲ့ အဖွဲ့ဝင်တွေဟာ လွတ်မြောက် နယ်မြေကို အချိန်မီရှောင်တိမ်းခဲ့ရတယ်လို့ အဆိုပါအဖွဲ့မှ အဖွဲ့ဝင် တဦးက ပြောပါတယ်။
"ဘယ်လိုပါသွားမှန်းသေချာမသိဘူး။ ပါတာမိန်းကလေးတွေ ဒါနဲ့ဆို နှစ်ယောက်ရှိပြီ။ သူ အဖမ်းခံရမှ သိတာ။ အလုပ်ကနေ ဖုန်းဆက်လို့သွားတွေ့တာကို ထောင်ဖမ်းခံရတာ။ ဖမ်းခံရတုန်းက သပိတ် အဆက်စပ်နဲ့။ မိတော့မှ ဖုန်းစစ်ရင်း VOMDY ကမှန်းသိသွားတာ”
မန္တလေးမြို့မှာ စစ်ကောင်စီတပ်က တော်လှန်ရေးအင်အားစုတွေကို အပြင်းအထန် ဖမ်းဆီး သတ်ဖြတ်နှိမ်နင်းထားပြီး အစိုးရဌာနတွေကိုလည်း မြို့ပေါ်မှာ ပေါ်ပေါ်တင်တင် ပြန်ဖွင့်နေတာ ကြောင့် ကျန်ရှိနေသေးတဲ့ တော်လှန်ရေးအင်အားစုတွေဟာ လွတ်မြောက်နယ်မြေတွေကို ရှောင်တိမ်း ထွက်ခွာသွားကြတာ ဖြစ်ပါတယ်။
VOMDY တော်လှန်ရေး ရဲဘော်တယောက်က "ဖယောင်းတိုင်တွေ မီးစာ မကုန်သေးသရွေ့တော့ တကွက်စာလေးပဲ ဖြစ်ဖြစ် လင်းနေဦးမှာပါ"လို့ ဆိုပါတယ်။
မန္တလေး၊ ချမ်းမြသာစည်မြို့နယ်၊ ၇၈ လမ်း၊ ခင်စောမူကွေ့ရှိ အမှတ် (၁၁) ရဲစခန်းအနီးမှာ နိုဝင်ဘာ ၁ ရက် ဒီမနက် ၁၀ နာရီဝန်းကျင်က အချုပ်ကား တစီး ဗုံးခွဲတိုက်ခိုက်ခံခဲ့ရပါတယ်။
အချုပ်ကားဟာ ချမ်းမြသာစည်မြို့နယ်တရားရုံးကို အချုပ်သားပို့ပြီးအပြန်မှာ ဗုံးနဲ့ထု တိုက်ခိုက်ခံရတာဖြစ်ပြီး ကားမောင်းတဲ့ စစ်ကောင်စီရဲတပ်ဖွဲ့ဝင် နှစ်ယောက်နဲ့ ဆိုင်ကယ် စီး အရပ်ဝတ်ရဲ တယောက် ထိခိုက်ဒဏ်ရာရလို့ လူနာတင်ယာဉ်နဲ့ တင်ခေါ်သွားတယ်လို့ မြေပြင်ကင်းထောက်အဖွဲ့ Vomdy က ထုတ်ပြန်ထားပါတယ်။
ဗုံးခွဲတိုက်ခိုက်ခံရပြီးနောက် စစ်ကောင်စီလက်အောက်ခံ ရဲတွေက သေနတ်ပစ်ဖောက်ခဲ့သလို အနီးပတ်ဝန်းကျင်မှာလည်း ရှာဖွေစစ်ဆေးတာတွေ လုပ်ခဲ့တယ်လို့သိရပါတယ်။
ဒါ့အပြင် မနက် ၆ နာရီကျော်ကလည်း အောင်မြေသာစံမြို့နယ် ၁၂ လမ်းနဲ့ ၈၈ လမ်း အနီးမှာ ကင်းလှည့်လာတဲ့ စစ်ကောင်စီတပ်သားနဲ့ ရဲတွေ အယောက် ၃၀ လောက်ပါလာတဲ့ Double cup တစ်စီး၊ Faw ကားတစ်စီးနဲ့ ရဲကားတစ်စီး တို့ကို Generation Z Power- GZP(Mandalay) ပြည်သူ့ကာကွယ်ရေးမြို့ပြပြောက်ကျားတပ်ဖွဲ့၊ ပုသိမ်ကြီးမြို့နယ်ပြည်သူ့ကာကွယ်ရေးတပ်ဖွဲ့ (ပကဖ)နဲ့ G 6 Star ပြည်သူ့ကာကွယ်ရေးတပ်ဖွဲ့တို့ ပူးပေါင်းကာ ပဒေသာမိုင်း ၃ လုံးနဲ့ တိုက်ခိုက်ခဲ့ပါတယ်။
