ကမ္ဘာ့စားနပ်ရိက္ခာအစီအစဉ် (WFP) အနေနဲ့ မုန်တိုင်းဒဏ်သင့်နိုင်တဲ့ရခိုင်ပြည်နယ်နဲ့ အနီးအနားဒေသတွေက လူဦးရေပေါင်း ၄၀၀,၀၀၀ ကျော်တို့အတွက် တလစာလုံလောက်တဲ့ စားနပ်ရိက္ခာတွေ ကြိုတင်နေရာချထားပြီးပြီလို့ ဆိုပါတယ်။
လာမယ့် တနင်္ဂနွေနေ့မှာ မြန်မာနိုင်ငံနဲ့ ဘင်္ဂလားဒေ့ရှ်နိုင်ငံကို ဝင်ရောက်မယ်လို့ ခန့်မှန်းထားတဲ့ ဆိုင်ကလုန်းမုန်တိုင်း မိုခါကို WFP အနေနဲ့ ဂရုတစိုက် စောင့်ကြည့်လေ့လာနေပြီး တိုက်ခတ်နိုင်ခြေရှိတဲ့ နယ်မြေဒေသတွေမှာ ကြိုတင်ပြင်ဆင်နေတယ်လို့ ဒီနေ့ ထုတ်ပြန်ပြောဆိုလာတာပါ။
WFP ရဲ့ မြန်မာနိုင်ငံဆိုင်ရာ ဒုတိယဌာနေကိုယ်စားလှယ် Ms. Sheela Matthew က “ကျမတို့ WFP အနေနဲ့ အဆိုးဆုံးအတွက် ကြိုတင်ပြင်ဆင်လျက်ရှိသလို၊ အကောင်းဆုံး ဖြစ်လာနိုင်ဖို့ကိုလည်း မျှော်လင့်ထားပါတယ်။ ဆိုင်ကလုန်းမုန်တိုင်း မိုခါရဲ့ လမ်းကြောင်းဟာ ပဋိပက္ခနဲ့ ဆင်းရဲမွဲတေမှုကိုခံစားနေကြရပြီး ကြံ့ကြံ့ခံနိုင်စွမ်းအား နည်းတဲ့ ဒေသတွေဆီကို ဦးတည်နေပါတယ်။ အဲဒီဒေသတွေက မုန်တိုင်းဒဏ် ခံရနိုင်ခြေရှိတဲ့ လူများစွာဟာ လက်ရှိမှာတောင် WFP ရဲ့ လူသားချင်းစာနာမှု အကူအညီတွေကို ပုံမှန်အားဖြင့် မှီခိုအားထားနေကြရတဲ့အခြေအနေမှာ ရှိနေကြတာပါ။ သူတို့အနေနဲ့ နောက်ထပ် ဘေးအန္တရာယ်တခုကို ဘယ်လိုမှ ခံနိုင်စွမ်းမရှိကြပါဘူး” လို့ ပြောပါတယ်။
WFP ဟာ မိတ်ဖက်အဖွဲ့အစည်းတွေနဲ့တွဲပြီး အရေးပေါ်အခြေအနေ အကြီးစား တုံ့ပြန်ရေးလုပ်နိုင်အောင် အသင့်ပြင်နေပြီး အရေးပေါ်အစီအစဉ်တွေ ရေးဆွဲ ချမှတ်ပြီးဖြစ်သလို စားနပ်ရိက္ခာ၊ ကယ်ဆယ်ရေး အထောက်အပံ့တွေ၊ မော်တော်ယာဉ်တွေနဲ့ အရေးပေါ်ကယ်ဆယ်ရေး ပစ္စည်းကိရိယာတွေကို ကြိုတင် နေရာချထားတယ်လို့ ဆိုပါတယ်။
ပြီးတော့ ပေါ်ပေါက်လာနိုင်တဲ့ သယ်ယူပို့ဆောင်ရေးနဲ့ ဆက်သွယ်ရေးဆိုင်ရာ ပြတ်တောက် ကြန့်ကြာလာနိုင်တာတွေအတွက်လည်း လူသားချင်း စာနာမှုဆိုင်ရာ မိတ်ဖက်အဖွဲ့အစည်းတွေရဲ့ မုန်တိုင်းအတွက်အသင့်ပြင်တာနဲ့ တုံ့ပြန်မှုလုပ်ငန်းတွေမှာ သုံးနိုင်ဖို့ ပို့ဆောင်ရေးနဲ့ ဆက်သွယ်ရေးစနစ်တွေကို WFP ဝန်ထမ်းတွေက တပ်ဆင်နေတယ်လို့ ထုတ်ပြန်ထားပါတယ်။
ဒါပေမယ့် အကူအညီလိုအပ်နေတဲ့ ရပ်ရွာလူထုဆီ လူသားချင်းစာနာမှုအထောက်အပံ့တွေ အပြည့်အဝ သွားရောက်ကူညီခွင့်နဲ့ ရပ်ရွာလူထုက ဝိုင်းဝန်းပူးပေါင်း ဆောင်ရွက်ပေးမှပဲ လတ်တလောအခြေအနေကို တုံ့ပြန်တာနဲ့ ရေရှည် ပြန်လည်ထူထောင်ရေး လုပ်ငန်းတွေကို ထိထိရောက်ရောက်လုပ်နိုင်မယ်လို့လည်း ဆိုပါတယ်။
စစ်တပ်ရိက္ခာတွေကို ကမ္ဘာ့စားနပ်ရိက္ခာအစီအစဉ် (WFP) တံဆိပ်တပ်တဲ့ကားတွေနဲ့ သယ်ဆောင်နေတယ်ဆိုတဲ့ သတင်းတွေအပေါ် အတည်မပြုနိုင်သေးဘဲ သက်သေရှိခဲ့ရင် ဆက်သွယ်ပေးစေလိုတယ်လို့ မြန်မာနိုင်ငံဆိုင်ရာ ဌာနေကိုယ်စားလှယ်က ပြောပါတယ်။
လတ်တလောမှာ လူမှုကွန်ရက်မီဒီယာတွေအပေါ် WFP နဲ့ပတ်သက်တဲ့ သတင်းတွေ ပျံ့နှံ့နေပြီး ဒီအပေါ်မှာ ဌာနေကိုယ်စားလှယ် မစ္စတာ စတီဖန် အန်ဒါဆန်က ရှင်းပြတာပါ။
“ဆိုရှယ်မီဒီယာမှာ အတည်မပြုနိုင်တဲ့သတင်းတွေ ပျံ့နေပေမဲ့လည်း ကမ္ဘာ့စားနပ်ရိက္ခာအစီအစဉ် (WFP) နဲ့ ကုလသမဂ္ဂအဖွဲ့ရဲ့ အဖွဲ့အစည်းတံဆိပ်တွေ ဒါမှမဟုတ် ပစ္စည်းတွေကို မလျော်ကန်ဘဲ အသုံးပြုထားကြောင်း ခိုင်လုံတဲ့ အထောက်အထားတခုခုကို ကျနော်တို့အနေနဲ့ အခုချိန်ထိ မတွေ့ရသေးပါဘူး။ WFP နဲ့ ကုလသမဂ္ဂက လုပ်ဖော်ကိုင်ဘက်တွေအနေနဲ့ အထူးသဖြင့် ပဋိပက္ခဒဏ်ခံနေရတဲ့ ဒေသတွေမှာရှိတဲ့ အကူအညီ အလိုအပ်ဆုံး လူတွေဆီကို အထောက်အပံ့တွေ ပေးအပ်နိုင်ဖို့အတွက် ဆက်လက်ကြိုးပမ်းလျက်ရှိရာမှာ ရပ်ရွာလူထုတွေရဲ့ အစဉ်တစိုက် ပံ့ပိုးကူညီမှုကို အားကိုးအားထားပြုပြီး ဆောင်ရွက်နေပါတယ်။”
တကယ်လို့ WFP တံဆိပ်ကို မလျော်ကန်ဘဲ သုံးနေတာ တွေ့ခဲ့မယ်ဆိုရင်လည်း စိစစ်နိုင်ဖို့ အတွက် သက်သေအထောက်အထားအဖြစ် အီးမေးလ်လိပ်စာ [email protected] ဆီကို အီးမေးလ် ဆက်သွယ်ပေးပို့စေလိုတယ်လို့လည်း သူက ဆက်ပြောပါတယ်။
WFP တံဆိပ်တပ်ထားတဲ့ကားတွေ ပဲခူးတိုင်းထဲမှာ စစ်တပ်အတွက် ရိက္ခာတွေ သယ်ပေးနေတယ်ဆိုပြီး သတင်းဌာနတခုက ပြီးခဲ့တဲ့ ဧပြီလထဲမှာ ရေးသားဖော်ပြခဲ့ပါတယ်။
အဲဒီနောက် ဌာနေကိုယ်စားလှယ်က ဒါဟာ ပဲခူးတိုင်းကိုဖြတ်ပြီး ကယား (ကရင်နီ) ပြည်ထဲကို လူသားချင်းစာနာထောက်ထားမှု အကူအညီပေးနေတာ ဖြစ်တယ်လို့ ပြောဆိုခဲ့ပြီး မူလရေးသားတဲ့ သတင်းဌာနကလည်း ဒီအကြောင်းကို ပြန်လည်ဖော်ပြခဲ့ပါတယ်။
၂၀၂၃ ခုနှစ်ထဲမှာ လူဦးရေ ၄၅ သိန်းကို ဦးစားပေးအနေနဲ့ လူသားချင်းစာနာမှုဆိုင်ရာ အကူအညီတွေ ပေးနိုင်ဖို့ ဆောင်ရွက်နေပြီး ဒီအထဲမှာ အရင်နဲ့ လက်ရှိ ပဋိပက္ခတွေကြောင့် နေရပ်စွန့်ခွာခဲ့ရသူဦးရေ ၁၆ သိန်း ပါတယ်လို့ ဌာနေကိုယ်စားလှယ် မစ္စတာ စတီဖန် အန်ဒါဆန်က ပြောပါတယ်။
၂၀၂၂ ခုနှစ်ကလည်း လူသားချင်းစာနာမှုဆိုင်ရာ အဖွဲ့အစည်းတွေဟာ ပဋိပက္ခဒဏ်ခံရသူနဲ့ နေရပ်စွန့်ခွာနေထိုင်ရသူ ဦးရေ အနည်းဆုံး ၄၄ သိန်းကို စားနပ်ရိက္ခာနဲ့ အာဟာရ၊ အခြေခံကျန်းမာရေးစောင့်ရှောက်မှုနဲ့ စိတ်ပိုင်း လူမှုပိုင်းဆိုင်ရာ အားပေးကူညီမှုတွေ၊ အရေးပေါ် အမိုးအကာအကူအညီတွေ၊ အိမ်သုံးပစ္စည်းအထောက်အပံ့တွေ၊ ရေနဲ့ ပတ်ဝန်းကျင်သန့်ရှင်းရေး အကူအညီတွေနဲ့ ပညာရေးဆိုင်ရာ အကူအညီတွေ ပေးခဲ့ကြတယ်လို့ WFP က ဆိုပါတယ်။
