ရန်ကုန်စတော့ဈေးကွက်မှာ ရှယ်ယာအရောင်းအဝယ်အခြေအနေဟာ နေ့စဉ် အရောင်းအဝယ်တွေရှိပြီး ၂၀၂၁ ကာလနဲ့ယှဉ်ရင် ၂၅ ရာခိုင်နှုန်း တိုးတက်မှု ရှိလာပေမဲ့ စစ်တပ်အာဏာမသိမ်းခင်ကရှိခဲ့တဲ့ အရင်အခြေအနေကိုတော့ မရောက်သေးဘူးလို့ စတော့ဈေးကွက်စောင့်ကြည့်သူသုတေသီတွေက ပြောပါ တယ်။

စစ်တပ်အာဏာသိမ်းခဲ့တဲ့ ၂၀၂၁ ခုနှစ်၊ ဖေဖော်ဝါရီ မတိုင်ခင်က ရန်ကုန်စတော့ဈေးကွက်မှာ အရောင်းအဝယ် ဖြစ်ခဲ့တဲ့ ရှယ်ယာတန်ဖိုးဟာ နေ့စဉ် ကျပ် သန်း ၁၀၀ ကျော် ရှိခဲ့တာပါ။ ဒါပေမဲ့ စစ်တပ်မှ အာဏာသိမ်းပြီးတဲ့နောက် ဖြစ်ပေါ်လာတဲ့ နိုင်ငံရေးမတည်ငြိမ်မှုတွေရဲ့ နောက်ဆက်တွဲကြောင့် ရန်ကုန်စတော့ဈေးကွက်ဟာ အေးသွားခဲ့ပြီး အရောင်းအဝယ်ဖြစ်တဲ့ ရှယ်ယာတန်ဖိုးက ကျဆင်းလာပါတယ်။

စတော့ဈေးကွက်စောင့်ကြည့်သူ သုတေသီတဦးက “ရန်ကုန်စတော့က ၂၀၂၂ ခုနှစ်မှာ recovery ပြန်တက်လာလို့ အရောင်းအဝယ်တွေ ပြန်ကောင်းလာတယ်။ လူတွေ စိတ်ဝင်စားမှု ပြန်ရှိလာတဲ့ သဘောပေါ့။ ဒါပေမဲ့ ယခင်က ရှိခဲ့တဲ့ ၂၀၁၉၊ ၂၀၂၀ အခြေအနေနဲ့ယှဉ်ရင်တော့ မမီသေးဘူး။ အဲ့ကာလတုန်းက အရောင်းအဝယ်ဖြစ်တဲ့ ပမာဏက တရက်ကို သန်း ၁၀၀ ကျော်ရှိခဲ့တာလေ။ အဲ့တော့ ၂၀၂၂ ကိုပြန်ကြည့်တဲ့အခါ ရှယ်ယာအရောင်းအဝယ်က ပျမ်းမျှပေါ့ တရက်ကို သန်း ၂၀ ကနေ သန်း ၅၀ အထိ ရှိလာတယ် ဆိုပေမဲ့ ယခင် အခြေအနေကို မရောက်သေးဘူး။ ဒါပေမဲ့ ပြီးခဲ့တဲ့ ၂၀၂၁ အခြေအနေနဲ့ယှဉ်ရင် ၂၀၂၂ မှာ ၂၅ ရာခိုင်နှုန်းလောက် တိုးတက်မှု ပြန်ရှိလာတာတွေ့ရတယ်။ အခု ၂၀၂၃ ကတော့ နှစ်စပဲ ရှိသေးလို့ ကျနော်တို့ ပြောလို့မရသေးဘူး” လို့ ဒီဗွီဘီကို ပြောပါတယ်။

စတော့အရောင်းအဝယ်လုပ်နေတဲ့ ရှယ်ယာရှင်တဦးကလည်း လက်ရှိဈေးကွက်မှာ ဦးဆောင်နေတဲ့ ရှယ်ယာတွေရဲ့ အခြေအနေကို အခုလို မှတ်ချက်ပေးပါတယ်။

“ဈေးကွက်ထဲမှာ ထိပ်တန်းပြေးနေတဲ့ ရှယ်ယာတွေက မြန်မာသီလဝါ၊ FMI ၊ ပထမပုဂ္ဂလိဘဏ် ဒီသုံးခုကတော့ စတော့ဈေးကွက်မှာ အရောင်းအဝယ်ကောင်းတဲ့ ထိပ်တန်းစာရင်းတွေပေါ့နော်။ ထိပ်တန်းစာရင်းထဲမှာ ပါနေပေမဲ့ သူတို့ရဲ့ ရှယ်ယာတန်ဖိုး ဈေးနှုန်း အတက်အကျက ပုံမှန်ပဲ ရှိပါတယ်။ အရမ်းကြီး ဆောင့်တက်သွားတာမျိုး မရှိပါဘူး။ အရောင်းအဝယ်ဆိုရင်လည်း ဒီရှယ်ယာတွေက နေ့စဉ် ပုံမှန် အရောင်းအဝယ် ရှိပါတယ်။ ထူးခြားချက် တခုအနေနဲ့ ပထမပုဂ္ဂလိကဘဏ်က ဘာလုပ်လိုက်လဲဆိုရင် သူ့ရဲ့ရှယ်ယာတန်ဖိုးကို ထပ်ဆင့် ခွဲခြမ်းလိုက်တာ ရှိတယ်။ သဘောက တသောင်းတန်တဲ့ ရှယ်ယာကို ဆယ်စိတ် စိတ်ပြီး ခွဲခြမ်းလိုက်တဲ့အတွက် ရှယ်ယာတန်ဖိုးက တထောင် ဖြစ်သွားတယ်။ ဘာလို့ အဲ့လိုလုပ်လဲ ဆိုရင် ငွေပမာဏ နည်းနည်းပဲ ရှိတဲ့သူတွေလဲ ဝယ်နိုင်အောင် လုပ်လိုက်တဲ့ သဘောပါ။ ဒီတော့ ငွေကြေး အရင်းအနှီး နည်းနည်းပဲ ရှိတဲ့သူတွေ ရင်းနှီးမြှုပ်နှံလို့ ရသွားတယ်။ အဲ့တော့ သူ့ရှယ်ယာ အရောင်းအဝယ်က ပိုပြီးတော့ သွက်လက်လာတာပေါ့” လို့ ဒီဗွီဘီကို ပြောပါတယ်။

ရန်ကုန်စတော့အိတ်ချိန်းက ထုတ်ပြန်တဲ့အချက်အလက်တွေအရ ဇန်နဝါရီ ၁၈ အရောင်းအဝယ်ဖြစ်ခဲ့တဲ့ ရှယ်ယာအရေအတွက်ကတော့ ၄၃၈ ခုရှိပြီး တန်ဖိုးအားဖြင့် ကျပ် ၁ ဒသမ ၄၅ သန်း ရှိပါတယ်။

ကုမ္ပဏီတခုချင်းစီရဲ့ ရှယ်ယာတန်ဖိုးမှာ ရှယ်ယာ တခုကို FMI ကုမ္ပဏီက ၈၆၀၀ ကျပ်၊ MTSH ကုမ္ပဏီက ၃၃၀၀ ကျပ်၊ MCB ကုမ္ပဏီက ၇၅၀၀ ကျပ်၊ FPB ကုမ္ပဏီက ၁၉၀၀ ကျပ်၊ TMH ကုမ္ပဏီက ၂၆၀၀ ကျပ်၊ EFR ကုမ္ပဏီက ၂၆၀၀ ကျပ် နဲ့ AMATA ကုမ္ပဏီက ၄၉၀၀ ကျပ် အသီးသီးရှိတာတွေ့ရပါတယ်။

ရန်ကုန်စတော့စျေးကွက်မှာ အရောင်းအဝယ်ဖြစ်ခဲ့တဲ့ ရှယ်ယာတန်ဖိုးက ပျမ်းမျှ နေ့စဉ် ကျပ် သန်း ၂၀ နဲ့ ၃၀ အကြား အရောင်းအဝယ် ရှိတာကြောင့် စျေးကွက်အနည်းငယ် ပြန်လှုပ်လာတယ်လို့ စတော့စျေးကွက်သုတေသီတွေက ပြောပါတယ်။

စစ်တပ်မှ အာဏာသိမ်းခဲ့တဲ့ ၂၀၂၁ ခုနှစ်၊ ဖေဖော်ဝါရီ မတိုင်ခင်က ရန်ကုန်စတော့စျေးကွက်မှာ အရောင်းအဝယ် ဖြစ်ခဲ့တဲ့ ရှယ်ယာတန်ဖိုးတွေက နေ့စဉ် ကျပ် သန်း ၁၀၀ ကျော်အထိ ရှိခဲ့တာပါ။ ဒါပေမဲ့ စစ်တပ်မှ အာဏာသိမ်းပြီးတဲ့နောက် ရန်ကုန်စတော့စျေးကွက်ဟာ အေးသွားခဲ့ပြီး အရောင်းအဝယ်ဖြစ်တဲ့ ရှယ်ယာတန်ဖိုးကလည်း တစတစနဲ့ ကျဆင်းလာပါတယ်။

လက်ရှိစတော့စျေးကွက် အခြေအနေနဲ့ပတ်သက်ပြီး စျေးကွက်သုတေသီတဦးက “အရောင်းအဝယ်ကတော့ ၂၀၂၂ ခုနှစ်မှာ ပြန်ပြီးတော့ တက်လာတဲ့ အခြေအနေ ရှိပါတယ်။ ၂၀၂၁ ခုနှစ်နဲ့ယှဉ်ရင် အရောင်းအဝယ်ပမာဏက နည်းနည်း တိုးလာတယ်။ ဒါပေမဲ့ ပြီးခဲ့တဲ့ ၂၀၁၉ ၊ ၂၀၂၀ ခုနှစ်တွေနဲ့ယှဉ်ရင်တော့ အဲ့လောက် ပမာဏအထိ မရှိသေးဘူး။ အဲ့အချိန်တုန်းက daily rate က တရက်ကို သန်း ၁၀၀ ကျော် ရှိတယ်နော်။ အခုကတော့ ပျမ်းမျှပေါ့၊ တရက်ကို သန်း ၂၀ နဲ့ ၃၀ ကြားမှာ ရှိပါ တယ်။ အရင်ကာလ အခြေအနေမျိုးတော့ ပြန်မရောက်သေးဘူး။ ၂၀၂၁ ခုနှစ်နဲ့ယှဉ်ရင်တော့ ၂၀၂၂ ခုနှစ် ၄ လပိုင်းအထိ အရောင်းအဝယ်ဖြစ်တဲ့ ပမာဏက နည်းနည်းလေးတော့ ပြန်တက်လာပါတယ်။ စတော့စျေးကွက်အပေါ် စိတ်ဝင်စားမှု နည်းနည်း ပြန်ရှိလာတဲ့ သဘောပေါ့။ အရင်ပုံစံမျိုး ပြန်ရောက်ဖို့ကတော့ တော်တော်လေးကြိုးစားရဦးမယ်။ အဲဒီလိုပြန်ရောက်ဖို့ကလည်း အခြေအနေ အရပ်ရပ်အပေါ်မှာ အများကြီး မူတည်တာပေါ့” လို့ ဒီဗွီဘီကို ပြောပါတယ်။

ရန်ကုန်စတော့စျေးကွက်မှ ထုတ်ပြန်တဲ့ အချက်အလက်တွေအရ လက်ရှိဘဏ္ဍာနှစ်ဖြစ်တဲ့ (၂၀၂၁-၂၀၂၂ ဘဏ္ဍာနှစ်၏ ဒုတိယ သုံးလပတ်၊ ဇန်နဝါရီ မှ မတ်လ အထိ) နေ့စဉ် အရောင်းအဝယ်ဖြစ်ခဲ့တဲ့ ရှယ်ယာစောင်ရေက ၃၁၀၀ ကျော် ရှိပြီး တန်ဖိုးအားဖြင့် ကျပ်သန်းပေါင်း ၁၅ သန်းကျော် ရှိပါတယ်။

အဆိုပါကာလအတွင်းမှာ ကုမ္ပဏီ တခုချင်းစီ၏ အရောင်းအဝယ်ဖြစ်ခဲ့တဲ့ ရှယ်ယာအရေအတွက် နဲ့ တန်ဖိုးမှာ MYANPIX ကုမ္ပဏီက ရှယ်ယာစောင်ရေပေါင်း ၁၉၄၁၃၄ ရောင်းချနိုင်ခဲ့ပြီး တန်ဖိုးအားဖြင့် ၉၃၁ သန်း ရှိတာကြောင့် ထိပ်ဆုံးအဆင့်မှာ ရပ်တည်နေပါတယ်။

သူ့အနောက်မှာ FMI  ကုမ္ပဏီက ရှယ်ယာစောင်ရေပေါင်း ၄၄၈၀၁ ရောင်းချနိုင်ခဲ့ပြီး တန်ဖိုးအားဖြင့် ကျပ်သန်းပေါင်း ၃၆၅ သန်းဖြင့် ဒုတိယအဆင့်မှာ ရပ်တည်နေပါတယ်။

MTSH ကုမ္ပဏီက ရှယ်ယာစောင်ရေပေါင်း ၁၂၂၉၀၀ ရောင်းချနိုင်ခဲ့ပြီး တန်ဖိုးအားဖြင့် ကျပ်သန်းပေါင်း ၃၆၄ သန်းဖြင့် တတိယအဆင့်မှာ ရှိပါတယ်။

FPB ကုမ္ပဏီက ရှယ်ယာစောင်ရေပေါင်း ၇၂၆၃ ရှိပြီး တန်ဖိုးအားဖြင့် ကျပ်သန်းပေါင်း ၁၃၇ သန်း၊ TMH ကုမ္ပဏီက ရှယ်ယာစောင်ရေပေါင်း ၁၀၂၀၁ ရှိပြီး တန်ဖိုးအားဖြင့် ကျပ်သန်းပေါင်း ၂၇ သန်း၊ EFR ကုမ္ပဏီက ရှယ်ယာစောင်ရေပေါင်း ၅၄၁၃ ရှိပြီး တန်ဖိုးအားဖြင့် ကျပ်သန်းပေါင်း ၁၅ သန်း၊ MCB ကုမ္ပဏီက ရှယ်ယာစောင်ရေပေါင်း ၁၇၃၂ ရှိပြီး တန်ဖိုးအားဖြင့် ကျပ်သန်းပေါင်း ၁၄ သန်း၊ AMATA ကုမ္ပဏီက ရှယ်ယာစောင်ရေပေါင်း ၁၈၂၄ ရှိပြီး တန်ဖိုးအားဖြင့် ကျပ်သန်းပေါင်း ၈ ဒသမ ၇ သန်းဖြင့် အောက်ဆုံးအဆင့်မှာ ရပ်တည်နေပါတယ်။

ဒီကနေ့(မေလ ၂၀ ရက်၊ နေ့လည် ၁နာရီထိ) ရန်ကုန်စတော့စျေးကွက်မှာ အရောင်းအဝယ်ဖြစ်ထားတဲ့ ရှယ်ယာ အရေ အတွက်က ၂၄၄၇ ခုရှိပြီး တန်ဖိုးအားဖြင့် ကျပ်သန်းပေါင်း ၁၈ သန်း ရှိပါတယ်။

ကုမ္ပဏီ တခုချင်းစီ၏ရှယ်ယာတန်ဖိုးမှာ ရှယ်ယာ တခုကို FMI ကုမ္ပဏီက ၇၆၀၀ ကျပ်၊ MTSH ကုမ္ပဏီက ၂၆၅၀ ကျပ်၊ MCB ကုမ္ပဏီက ၇၈၀၀ ကျပ်၊ FPB ကုမ္ပဏီက ၁၈၀၀၀ ကျပ်၊ TMH ကုမ္ပဏီက ကျပ် ၂၅၅၀၊ EFR ကုမ္ပဏီက ကျပ် ၂၆၀၀ နဲ့  AMATA ကုမ္ပဏီက ကျပ် ၅၀၀၀ အသီးသီးရှိတာတွေ့ရပါတယ်။