သင်္ကြန်ကာလရုံးပိတ်ရက်တွေမှာ ပြည်သူတွေ အဆင်ပြေစေဖို့ YBS ယာဉ်တွေ ပြေးဆွဲသွားမှာဖြစ်ပြီး ယာဥ်စီးခကို ပုံမှန်အတိုင်း ကောက်ခံဖို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) က တိုက်တွန်းထားပေမယ့် ဧပြီ ၁၃ ရက်ဒီနေ့ သင်္ကြန်အကြိုနေ့မှာ ယာဉ်စီးခတွေ ပိုမိုကောက်ခံနေတယ်လို့ ခရီးသွားပြည်သူတွေဆီက သိရပါတယ်။

သ​​​​င်္ကြန်အတွင်းမှာ YBS အနေနဲ့ ယာဉ်စီးကားခတွေ တိုးမတောင်းဖို့ သတင်းစာထဲမှာ ကြေညာထားတာကို အရင်က ကျပ် ၃၀၀ ၊ ၄၀၀  ပေးစီးရတဲ့ကားတွေက ဒီနေ့ အကြိုနေ့မှာ ယာဉ်စီးခကိုပိုပြီး ပေးခဲ့ရတယ်လို့ ရန်ကုန်မြို့က ခရီးသွားတစ်ဦး ပြောပါတယ်။

“ဒီမနက်ကလည်း YBS 71 စီးတာ ယာဉ်စီးခ တယောက် တထောင်ပေးရတယ်။ ပုံမှန်ဆို ၃၀၀ ပဲ ပေးရတာ၊ ဘယ်လိုပဲအရေးယူမယ်ပြောပြော အရေးယူဖို့ကြေညာတာက တဖွဲ့၊ တောင်းချင်ရာ တောင်းတဲ့တဖွဲ့နဲ့ ဘာကြေညာချက်ကိုမှ ဂရုမစိုက်တဲ့ ပုံစံမျိုးလုပ်နေတာ။” 

YBS ယာဉ်မောင်းတစ်ဦးက “ဒီကာလမှာ ထွက်တဲ့ YBS ယာဉ်လိုင်းကတော့ တောင်းမှာပဲ၊ ကားလည်း အကုန်မထွက်နိုင်သလို ကားတစ်စီးမှာ ဂိတ်အစကနေ အဆုံးအထိက လူ၅၀ မပြည့်ဘူးလေ၊ အုံနာကြေး၊ CNG ဖိုးနဲ့ မောင်းကြေး ကျန်အောင်တော့ လုပ်ကြမှာပဲ၊ YRTC အနေနဲ့တော့ ပိုတောင်းဖို့ ခွင့်မပြုထားပါဘူး။ ယာဉ်စီးခပိုကောက်လို့ တိုင်ကြားနိုင်ဖို့လည်း ကြေ ညာထားတယ်” လို့ ပြောပါတယ်။ 

သင်္ကြန်ရုံးပိတ်ရက်ကာလ YBS ယာဉ်တွေ ပြေးဆွဲရာမှာ ယာဉ်စီးခပိုတောင်းတဲ့ ယာဉ်တွေကို CNG ပိတ်သိမ်းမှုနဲ့ လုပ်ငန်းလိုင်စင် ပိတ်သိမ်းကာ အရေးယူသွားမှာဖြစ်တယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ ဆောင်ရေး ကြီးကြပ်မှုကော်မတီ (YRTC) အသိပေးထားပါတယ်။

အများပြည်သူရုံးပိတ်ရက်ရှည်ဖြစ်တဲ့ ဧပြီ ၁၃ ရက် မှာ YBS အစီးရေ ၁၄၃၀ ၊ ၁၄ ရက်မှာ ၁၂၉၀ စီး ၊၁၅ ရက်မှာ  ၁၂၈၈ စီးနဲ့ ၁၆ ရက်မှာ ၁၂၈၈ စီး ပြေးဆွဲသွားမှာဖြစ်ပြီး  နှစ်ဆန်းတစ်ရက်ကစတင်ကာ ရန်ကုန်မြို့ရှိ YBS ယာဉ်လိုင်းအားလုံး ပုံမှန်အတိုင်း ပြေးဆွဲသွားမှာ ဖြစ်ပါတယ်။

စစ်တပ်အာဏာသိမ်းပြီးနောက်ပိုင်း ရန်ကုန်မြို့ အများပြည်သူသုံး YBS ဘတ်စ်ကားတွေပေါ်မှာ ရုံးသွားချိန်နဲ့ ရုံးဆင်းချိန် လူကြပ်ချိန်တွေမှာ အုပ်စုဖွဲ့ပြီး ခါးပိုက်နှိုက်မှုတွေ၊ အိတ်ကို ဓားနဲ့ခွဲမှုတွေ မကြာခဏဖြစ်ပွားနေတယ်လို့ မြို့ခံခရီးသွားပြည်သူတွေကပြောပါတယ်။

မတ်လ ၃၀ ရက်၊ မနက် ၈ နာရီခွဲလောက်က YBS 14 ပေါ်မှာ အိတ်ခွဲခံလိုက်ရပေမဲ့ ပစ္စည်းတော့ ပါမသွားဘူးလို့ ကိုယ်တွေ့ကြုံရတဲ့ခရီးသည်တဦးကပြောပါတယ်။

“ကျောက်ကုန်းမီးပွိုင့်ကနေ ခပ်ဝဝအမျိုးသားနှစ်ဦး တက်လာတာဖြစ်ပြီး တယောက်က ဘေးကနေပြီး လှုပ်မရအောင် တိုးထားတာပါ။ နောက်တယောက်က အနောက်ကနေ အိတ်ကိုခွဲသွားတာမျိုးလုပ်တာလို့ သိရပါတယ်။ အိတ်ကိုနှိုက်သလို ခံစားနေရလို့ အတင်း ရှေ့ကိုဆွဲထားလိုက်လို့ ပါမသွားတာပါ။ ကျနော့်ဆီကလည်း မရရော အနောက်ဘက်ကို ချက်ချင်းရောက်သွားတာ။ အဲ့အချိန်ထိ အိတ်ကို အခွဲခံထားရမှန်း မသိခဲ့ဘူး။ ဘေးနားကအစ်ကိုက သတိထား၊ အိတ်ကို ရှေ့လွယ်ထားလို့ သတိပေးခဲ့တာကြောင့် ရှိသမျှပစ္စည်းတွေ အကုန်ပါမသွားခဲ့တာ။”

ကိုယ်တိုင်ကြုံခဲ့ရတဲ့ ခရီးသွားအမျိုးသမီးကလည်း “ခရေပင်လမ်းခွဲကနေ YBS 66 နဲ့ အိမ်ကိုအပြန် ကန်သာယာမှာ လူတွေတော်တော်များများ တက်လာကြပြီး ကျမဘေးနားကို ကောင်လေးက သူ့ထီးနဲ့ အတင်းတွေကွယ်နေတော့ သတိထားမိလိုက်တယ်။ အသက်၂ဝ ဝန်းကျင်အရွယ်ပဲ၊ ကျမအိတ်ကို ဓားနဲ့ခွဲနေတာ သိနေပေမဲ့ ဓားက ကျမဗိုက်ဘေးနားမှာဆိုတော့ မအော်ရဲဘူး” လို့ ပြောပါတယ်။

မတ်လ ၁၉ ရက် ညနေ ၃နာရီလောက်ကလည်း YBS ယာဉ်မောင်းတဦးက လှိုင်သာယာမှ တောင်ဒဂုံပြန်အဆင်း အင်းစိန် BPI မှတ်တိုင်အရောက်မှာ ခရီးသည်က ဖုန်းအနှိုက်ခံရလို့ ဖုန်းမရှိတော့ဘူး ပြောဆိုတာကြောင့် ကားသမားက ခရီးသည်တွေကို မှတ်တိုင်မှာ ဆင်းခွင့်မပြုဘဲ စစ်တပ်ဂိတ်တခုကို အပ်ခဲ့တယ်လို့လည်း သိရပါတယ်။

YBS ယာဉ်မောင်တဦးက“BPI မှတ်တိုင်ရောက်တော့ အမျိုးသား ၂ ဦးက တံခါးဖွင့်ဖို့ပြောတယ်။ ကျနော်က ခရီးသည်တယောက် ဖုန်းပျောက်သွားလို့ ဘယ်သူမှမဆင်းရဘူး ပြောပြီး ဖုန်းခေါ်လိုက်တာ သူတို့ဆီကနေ အသံမြည်လာတာ။ သူတို့ ၂ ယောက်က ပြေးဖို့ကြည့်နေတာ။ ၁ ယောက်ကလည်း ဓားထုတ်ပြီး တယောက်မှ အနားမကပ်နဲ့ဆိုပြီး ပြောတာ။ ကျနော့်ကားထဲမှာက ဝါးရင်းတုတ်ထားထားတော့ ဓားကိုင်ထားတဲ့လက်ကို တုတ်နဲ့ရိုက်ချပြီး ဝင်လုံးလိုက်တယ်။ ခရီးသည်တွေက ကူလုံးပေးတယ်။ ခရီးသည်ပေးတဲ့ ခါးပတ်နဲ့ သူတို့ကို လက်ပြန်ကြိုးတုပ်ပြီး ခရီးသည်တွေကို ရှေ့ကပေးတက်၊ ရှေ့ကပေးဆင်းတာမျိုး လုပ်ပြီး သမိုင်းလမ်းဆုံ မီးပွိုင့်ထိပ်က စစ်တပ်ဂိတ်ကို အပ်ခဲ့လိုက်တယ်” လို့ ပြောပါတယ်။

ယာဉ်မောင်းတွေအနေနဲ့လည်း ခါးပိုက်နှိုက်ကို ဖမ်းပေးရတာ အန္တရာယ်များပြီး အဖွဲ့တွေနဲ့ ဆိုတော့ လူမှတ်ထားတာမျိုး၊ ကားနံပါတ်မှတ်ထားပြီး အန္တရာယ်အပြုခံရတာမျိုးတွေ ကြုံရနိုင်တာကြောင့် ယာဉ်မောင်းတွေက ဖမ်းပေးကြတာမျိုး မလုပ်ဘူးလို့လည်း သိရပါတယ်။ YBS စီးတဲ့အခါမှာ အတတ်နိုင်ဆုံး ကိုယ့်ပစ္စည်းကို ဂရုစိုက်ကြပါလို့လည်း YBS ယာဉ်မောင်းက ပြောပါတယ်။

စစ်တပ်အာဏာသိမ်းပြီးနောက်ပိုင်း YBS ကို အားကိုးနေရတဲ့ ရန်ကုန်မြို့က ပြည်သူလူထုဟာ အုပ်စုဖွဲ့ ခါးပိုက်နှိုက်ခံရမှုတွေ၊ အနုကြမ်းစီးခံရမှုတွေ ပိုမိုကြုံတွေ့နေရတာ ဖြစ်ပါတယ်။

အခုလို အုပ်စုဖွဲ့ ခါးပိုက်နှိုက်၊ လုယက်တိုက်ခိုက်မှုတွေကြောင့် ပြည်သူလူထုအနေနဲ့ လုံခြုံမှုမရှိတဲ့အပြင် ကျူးလွန်သူတွေကို စစ်ကောင်စီလက်အောက်ခံ ရဲတပ်ဖွဲ့ဝင်တွေကလည်း ထိရောက်တဲ့ အရေးယူမှုတွေ လုပ်ဆောင်နိုင်ခြင်း မရှိသေးပါဘူး။