ရန်ကုန်မြို့က အများပြည်သူပိုင် တနိုင်တပိုင် အသေးစားဆိုလာစနစ်ကနေ ပိုလျှံတဲ့ လျှပ်စစ်ဓာတ်အားတွေကို ဝယ်ယူလိုကြောင်း ရန်ကုန်လျှပ်စစ်ဓာတ်အားပေးရေး ကော်ပိုရေးရှင်း (YESC) က ဧပြီ ၂၁ ရက် ဒီနေ့ အသိပေးကြေညာပါတယ်။

ရန်ကုန်မြို့မှာရှိတဲ့ ဈေးဝယ်စင်တာတွေ၊ ဟိုတယ်တွေ၊ စက်ရုံ၊ အလုပ်ရုံတွေ၊ နေအိမ်တွေ၊ အဆောက်အဦတွေရဲ့ ခေါင်မိုးပေါ်နဲ့ အများပြည်သူ၊ လုပ်ငန်းရှင်တွေရဲ့ ကိုယ်ပိုင်မြေနေရာတွေပေါ်မှာ တနိုင်တပိုင် တပ်ဆင်ထားတဲ့ ဓာတ်အားကွန်ရက်ချိတ်ဆက် အသေးစားဆိုလာစနစ်ကနေ အသုံးပြုပြီး ပိုလျှံတဲ့ လျှပ်စစ်ဓာတ်အားတွေကို ရန်ကုန်ဓာတ်အားဖြန့်ဖြူးမှု ကွန်ရက်စနစ်ကို ချိတ်ဆက်ရောင်းချလိုပါက ဝယ်ယူသွားမယ်လို့ YESC ရဲ့ ကြေညာချက်မှာ ဖော်ပြထားတာပါ။

ဓာတ်အားခနှုန်းထားအနေနဲ့ ၁၀၀ ကီလိုဝပ်ကနေ ၁ မဂ္ဂါဝပ်အတွင်း ရောင်းချပါက ၁ ကီလိုဝပ်ကို ၈၅ ကျပ်နှုန်း၊ ၁ မဂ္ဂါဝပ် အထက်ကနေ ၁၀ မဂ္ဂါဝပ်အထိဖြစ်ပါက ၁ ကီလိုဝပ်ကို ၈၀ ကျပ်နှုန်းနဲ့ ဝယ်ယူသွားမယ်လို့ ထုတ်ပြန်ချက်မှာ ပါရှိပါတယ်။

ဓာတ်အားကွန်ရက်ချိတ်ဆက် အသေးစားဆိုလာစနစ်အတွက် နည်းပညာဆိုင်ရာ သတ်မှတ်ချက်တွေ၊ လျှောက်ထားရမယ့် လုပ်ငန်းစဉ်တွေနဲ့ ပတ်သက်တဲ့ အသေးစိတ် အချက်အလက်တွေကိုတော့ ထပ်မံထုတ်ပြန် ကြေညာပေးသွားမယ်လို့ ဆိုပါတယ်။

လက်ရှိမှာ နိုင်ငံတဝန်း လျှပ်စစ်မီးပြတ်တောက်မှုတွေက ဆိုးဆိုးရွားရွား ဖြစ်ပေါ်နေပြီး တရက်ကို ၂၄ နာရီနီးပါး ပြတ်တောက်နေတဲ့ နေရာဒေသတွေရှိသလို သတ်မှတ်ချိန်ထက်ပိုပြီး လျှပ်စစ်မီးပြတ်တောက်နေတဲ့ နေရာဒေသတွေလည်း ရှိနေပါတယ်။

လျှပ်စစ်မီး ဆိုးဆိုးရွားရွား ပြတ်တောက်မှုက လူထုအကြားမှာ အဆင်မပြေမှုတွေ ကြုံတွေ့နေရပြီး စီးပွားရေးလုပ်ငန်းတွေလည်း အခက်ကြုံနေရပါတယ်။

အများပြည်သူ လျှပ်စစ်မီးပေးစနစ်အတွင်း ဓာတ်အားသုံးစွဲနေတဲ့ ရန်ကုန်မြို့ ရပ်ကွက်/ကျေးရွာတွေအတွင်းက စီးပွားရေးလုပ်ငန်းတွေကို ညနေပိုင်း လျှပ်စစ်ဓာတ်အား အသုံးပြုခွင့် တလခန့် ထပ်မံကန့်သတ်လိုက်ပါတယ်။

အဆိုပါလုပ်ငန်းတွေအနေနဲ့ မတ်လ ၂၈ ရက်ကနေ ဧပြီ ၃၀ ရက်အထိ ညနေ ၅ နာရီကနေ ည ၁၁ နာရီအတွင်း ဌာနကဖြန့်ဖြူးတဲ့ လျှပ်စစ်ဓာတ်အားနဲ့ လုပ်ငန်းဆောင်ရွက်ခြင်းမပြုဖို့ ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) က မတ်လ ၂၈ ရက်မှာ အသိပေး ထုတ်ပြန်ခဲ့တာပါ။

အဲဒီကန့်သတ်ချိန်အတွင်း ဌာနကဖြန့်ဖြူးတဲ့ လျှပ်စစ်ဓာတ်အားနဲ့ လုပ်ငန်းဆောင်ရွက်နေကြောင်း စစ်ဆေးတွေ့ရှိပါက အုပ်ချုပ်မှုနည်းလမ်းအရ အရေးယူ ဆောင်ရွက်သွားမယ်လို့လည်း သတိပေးထားပါတယ်။

အခုနှစ် နွေရာသီကာလအတွင်း ဓာတ်အားသုံးစွဲမှု မြင့်တက်လာတာ၊ ဓာတ်အားပေးစက်တွေကို နှစ်စဉ် ပုံမှန်ထိန်းသိမ်းပြုပြင်မှုတွေ လုပ်ဆောင်ရတာ၊ ဓာတ်အားထုတ်လုပ်ပို့လွှတ်နိုင်မှုနဲ့ သုံးစွဲမှု မမျှတတာတွေကြောင့် နိုင်ငံတော်ဓာတ်အားစနစ် အတွင်း အရေးပေါ် ဝန်အားလျှော့ချရတာ၊ အလှည့်ကျ ဝန်အားလျှော့ချရတာတွေ ပြုလုပ်ပြီး ဓာတ်အားဖြန့်ဖြူးပေးနေရတဲ့အတွက် ဓာတ်အားထုတ်လုပ်ပို့လွှတ်ပေးနိုင်မှု အခြေအနေအရ အခုလို ကန့်သတ်ရခြင်းဖြစ်တယ်လို့ YESC က ဆိုပါတယ်။