မွန်ပြည်နယ်၊ ရေးမြို့နယ်၊ ကျုံလောင်းရွာဟောင်းက စစ်ကောင်စီကို သတင်းပေးနေတဲ့ ကျော်နိုင်ဦးကို စက်တင်ဘာ ၂၆ ရက် မနက် ၁၁ နာရီ ၂၀ မိနစ်အချိန်က ရေး YGF ပြောက်ကျား တပ်ဖွဲ့က ပစ်ခတ်ရှင်းလင်းလိုက်တယ်လို့ YGF မှ တာဝန်ရှိသူက ပြောပါတယ်။

သူက စစ်ကောင်စီနဲ့ပတ်သက်ဆက်နွှယ်နေပြီး ပြည်သူတွေအမြင်မှာတော့ အနေအေးပြီး နောက်ကွယ်မှာ  ကွမ်းသီးဝယ်ရင်း စစ်ကောင်စီကို အထူးသတင်းပေးနေသော ကျောက်မိချောင်း တောင်နေ ကျော်နိုင်ဦးကို ဖရဲသီးသတင်းပေးချက်အရ  YGF - ရေးပြောက်ကျားတပ်ဖွဲ့က ပစ်ခတ်ရခြင်းဖြစ်တယ်လို့ ဆိုပါတယ်။

ကျောက်မိချောင်းရွာနဲ့ ကျုံလောင်းရွာဟောင်းလမ်းဆုံ သူ့ရဲ့ ကွမ်းသီးရောင်းဝယ်ဒိုင်မှာ သူ့မိန်းမနဲ့ အတူရှိနေစဥ် မိန်းမဖြစ်သူကို ဘေးဖယ်ရှားပြီး စစ်ကောင်စီသတင်းပေး ကျော်နိုင်ဦးကို  YGF-ရေး ပြောက်ကျားတပ်ဖွဲ့ကရှင်းလင်းလိုက်တာပါ။

ပစ်ခတ်ရှင်းလင်းခံရတဲ့ မိသားစုဝင်တွေဘက်ကတော့ အခုဖြစ်စဉ်မှာ သတင်းပေးလို့ စွပ်စွဲခံရပြီး အသတ်ခံရတဲ့အပေါ်မှာ ဝမ်းနည်းရုံကလွဲပြီး ဘာမှ မတတ်နိုင်ဘူးလို့ မိသားစုနဲ့နီးစပ်တဲ့ သူတဦးက ပြောပါတယ်။

ရေးမြို့နယ်မှာ စစ်တပ်သတင်းပေးဆိုပြီး ကျောက်မိတောင်ကျေးရွာအုပ်ချုပ်ရေးမှူး၊ အိုင်ဗုတ် လက်ဖက်ရည်ဆိုင်မှာ အမျိုးသား ၁ ဦး၊ အခု ကွမ်းသီးရောင်းဝယ်သမားတို့ အသတ်ခံခဲ့ရပြီး ကျုံလောင်းရွာဟောင်းရွာက ရပ်ကျေးစာရေးက ပထမဦးဆုံး ပစ်ခတ်ခံရပေမယ့် မသေဆုံးခဲ့ပါဘူး။

အဆိုပါ သတင်းပေးတွေ လုပ်ကြံသတ်ဖြတ်ခံနေရတဲ့ ကျုံလောင်းရွာဟောင်းနေရာဟာ မွန်ပြည်သစ်ပါတီ ထိန်းချုပ်နယ်မြေဖြစ်သလို PDF တွေ လှုပ်ရှားနယ်မြေလည်း ဖြစ်ပြီး ရေး  မြစ်ကူးတံတား စစ်ဆေးရေးဂိတ်လည်း ထားရှိပြီး လုံခြုံရေးတွေ တင်းကျပ် ပိတ်ဆို့ထားပါတယ်။

မွန်ပြည်နယ်၊ ရေးမြို့နယ်မှာ စက်တင်ဘာ ၂၃ ရက် မနက် ၄ နာရီခွဲက စစ်ကောင်စီတပ်ရင်း ၅၈၈ အနီးရှိ ကြိုးတံတား ဘုန်းကြီးကျောင်း တောင်ကုန်းမှာ တပ်စွဲထားတဲ့ စစ်ကောင်စီ တပ်ဖွဲ့ဝင်တွေနဲ့ ပျူစောထီးတွေကို Ye Defence Force - YDF နဲ့ YGF ပြောက်ကျားတပ်ဖွဲ့ မဟာမိတ်ပူးပေါင်းတပ်ဖွဲ့ဝင်တွေ ဝင်ရောက်စီးနင်းခဲ့တယ်လို့ YDF က ထုတ်ပြန်ပါတယ်။

အဆိုပါ စီးနင်းမှုမှာ M16 (A1) ၁ လက်၊ AK 47  ကိုးလုံးကျည် (ဂျောက်ဂျက်) နဲ့ ငှက်ကြီးတောင်ဓားတလက် သိမ်းဆည်းရရှိခဲ့တယ်လို့ ဆိုပါတယ်။

ရေး PDF မှ တာဝန်ရှိသူက “ကျည်တချက်မှ မဖောက်လိုက်ရဘဲ အနီးကပ် ဝင်စီးတာပါ။ လူတော့မမိဘူး၊ လွတ်သွားတယ်။ ပြီးတော့ လက်နက်တွေသိမ်းဆည်းပြီး အနီးနားမှာ လွတ်မြောက်သွားတဲ့ စစ်ကောင်စီတပ်ဖွဲ့ဝင်တွေနောက်လိုက်ပြီး နယ်မြေရှင်းလင်းခဲ့ပါတယ်” လို့ ပြောပါတယ်။

လက်ရှိအခြေအနေမှာ စစ်ကောင်စီတပ်ဘက်က တပ်ကိုဖျောက်ထားပြီး PDF တွေနဲ့ နှစ်ဖက် ထိတွေ့မှုတော့ မရှိသေးပါဘူး။

ရေးမြောက်ပိုင်းဒေသက ရွာတွေအများစုမှာ စစ်ကောင်စီနဲ့ PDF တွေရဲ့ တိုက်ပွဲတွေ ဖြစ်လာမှာကို စိုးရိမ်နေကြတယ်လို့ ဒေသခံတွေက ပြောပါတယ်။

ပြီးခဲ့တဲ့ရက်က မော့ကနင် ခလရ ၁၀၆ တပ်ရင်းရှိ တပ်ရင်းမှူးနေအိမ်ကို ရေး YGF ပြောက်ကျားတပ်ဖွဲ့က ၄၀ မမနဲ့ ၂ ချက် ပစ်ခတ်ခဲ့ပါတယ်။