ရွှေပြည်သာစက်မှုဇုန်က Yi Cai အထည်ချုပ်စက်ရုံဟာ ပိတ်သိမ်းလိုက်ပေမဲ့ ဥပဒေပါ နစ်နာကြေးမရလို့ အချေအတင် အငြင်းပွားမှု ဖြစ်နေတယ်လို့ အဲဒီစက်ရုံအလုပ်သမားအရေး ကူညီပေးနေတဲ့ သွေးစည်းညီညွတ်သော သမဂ္ဂများအဖွဲ့ချုပ် (STUM) က ပြောပါတယ်။

အဲဒီစက်ရုံက အလုပ်သမား ၂၉ ယောက်ဟာ စက်ရုံပိတ်သိမ်းလိုက်တာကြောင့် ဥပဒေပါ နစ်နာကြေးအပြည့်ရဖို့ တောင်းဆိုထားကြပြီး စက်ရုံဘက်က ငြင်းဆန်နေတာကြောင့် ပြေလည်မှု မရသေးဘူးလို့ သိရပါတယ်။

STUM တာဝန်ရှိသူတယောက်က “ဒီနေ့လည်း အလုပ်သမားရုံးက ခေါ်ညှိတယ်။ အလုပ်သမားတွေ တောင်းတဲ့အတိုင်းမပေးလို့ ပြေလည်မှုတော့ မရခဲ့ဘူး” လို့ ပြောပါတယ်။

အလုပ်သမားတွေက ဥပဒေပါ အလုပ်ထုတ်နစ်နာကြေး သတ်မှတ်ချက်ဖြစ်တဲ့ နောက်ဆုံးထုတ်လစာ (အချိန်ပိုကြေးမပါ) အတိုင်းပေးဖို့ တောင်းဆိုထားတာပါ။

စက်ရုံဘက်ကတော့ တရက်လုပ်ခ ၄,၈၀၀ ကျပ်နှုန်းနဲ့ လစာတွက် နစ်နာကြေးပေးမှာဖြစ်လို့ အရင်က လစာထဲပါဝင်တဲ့ ကျွမ်းကျင်ကြေး၊ ဆုကြေး စတာတွေ ချန်လပ်ခံထားရတယ်လို့ သိရပါတယ်။

“ချန်လှပ်ခံရတာတွေကနေ ရမှာတွေပါ ပေါင်းလိုက်ရင် အလုပ်သမားတယောက်ကို ၁ သိန်းခွဲ၊ ၂ သိန်းလောက် နစ်နာသွားတယ်။ ဒါကို အလုပ်သမားတွေက ပြောနေတာ” လို့ STUM တာဝန်ရှိသူက ပြောပါတယ်။

Yi Cai အထည်ချုပ်စက်ရုံကို ဒီနှစ် ဇန်နဝါရီလလောက်ကမှ ဖွင့်လှစ်ခဲ့တာဖြစ်ပြီး ၁ နှစ်မပြည့်ခင်မှာတင် အော်ဒါရရှိမှုနည်းလို့ဆိုကာ ပိတ်သိမ်းဖို့ ကြေညာလိုက်တာပါ။

အဲဒီလို စက်ရုံပိတ်သိမ်းတာကြောင့် လုပ်သက် ၆ လအထက် အလုပ်သမားတွေဟာ နစ်နာကြေး ၆ လစာ၊ နို့တစ်ကြေး တလစာနဲ့ စက်တင်ဘာလအတွက် လစာရဖို့ ရှိနေတာပါ။

အဲဒီထဲမှာမှ နို့တစ်ကြေးနဲ့ နစ်နာကြေး ၆ လစာကို ဥပဒေပါအတိုင်း တွက်ချက်ပေးဖို့ အလုပ်သမားတွေက တောင်းဆိုနေကြတာလည်း ဖြစ်ပါတယ်။

အဆိုပါစက်ရုံဟာ အလုပ်သမား ၃၀၀ ကျော် လုပ်ကိုင်နေတာဖြစ်ပြီး ကျန်အလုပ်သမား အများစုဟာ စက်ရုံကပေးတဲ့အတိုင်း လက်ခံလိုက်ပြီး လက်ရှိ ၂၉ ယောက်ကသာ ဆက်လက်တောင်းဆိုနေတာ ဖြစ်ပါတယ်။

အဲဒီအလုပ်သမားတွေက သူတို့တောင်းဆိုချက်အတိုင်း ရရှိဖို့ မနေ့ကရော ဒီနေ့ပါ စက်ရုံရှေ့မှာ စောင့်ဆိုင်းနေပြီး စစ်ကောင်စီ နယ်မြေလုံခြုံရေး အဖွဲ့တွေကလည်း စောင့်ကြည့်မေးမြန်းမှုတွေ ရှိနေတယ်လို့ သိရပါတယ်။

ဒီနေ့မှာ အလုပ်သမားရုံးကိုခေါ်ပြီး ညှိနှိုင်းမှုလုပ်ခဲ့ပေမဲ့ အခြေအနေ မထူးတာကြောင့် နောက်ရက်တွေမှာ စက်ရုံရှေ့ သွားရောက်စောင့်ဆိုင်းသွားကြဖို့ ရှိတယ်လို့ သိရပါတယ်။

Yi Cai စက်ရုံဟာ အော်ဒါအခက်အခဲကြောင့် နှစ်လ ယာယီပိတ်မယ်လို့ ကြေညာထားပေမဲ့ လက်ရှိမှာ စက်ရုံအတွင်းက စက်တွေ၊ အထည်တွေကို ရွှေ့ပြောင်းတာတွေ ရှိနေတယ်လို့ STUM တာဝန်ရှိသူက ပြောပါတယ်။

ရန်ကုန်တိုင်း၊ ရွှေပြည်သာမြို့နယ်မှာရှိတဲ့ မြန်မာနိုင်ငံသားအမည်ပေါက် Yi Cai အထည်ချုပ်စက်ရုံဟာ အော်ဒါပြတ်လပ်မှု အခက်အခဲတွေ ရှိလာတဲ့အတွက် စက်ရုံကို နှစ်လတာ ယာယီရပ်နားမယ်လို့ စက်ရုံပိုင်ရှင်က သတင်းထုတ်ပြန်ထားပါတယ်။

စက်ရုံယာယီရပ်နားဖို့အတွက် အလုပ်ရုံနဲ့ အလုပ်သမား စစ်ဆေးရေးဦးစီးဌာနထံ ခွင့်ပြုချက် တောင်းခံရာမှာ စက်ရုံအတွင်းရှိ လုပ်သက် ၆ လအထက်ရှိတဲ့ အလုပ်သမားတွေကို နှစ်ကြေးခံစားခွင့်အနေနဲ့ ၂၀၂၂ ခုနှစ် စက်တင်ဘာ ၁၉ ရက်က ရှင်းလင်းပေးခဲ့ပြီး ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ဒီ့အပြင် လုပ်သက် ၆ လအထက်ရှိတဲ့ အလုပ်သမားတွေကို ကရုဏာကြေးအနေနဲ့ တယောက်ကို ကျပ် ၅၀,၀၀၀ နှုန်း သတ်မှတ်ထားပြီး လုပ်သက် ၆ လအောက်ရှိတဲ့ အလုပ်သမားတွေကို တဦး ကျပ် ၃၀,၀၀၀ နှုန်းနဲ့ စက်တင်ဘာလအတွက် လုပ်ခလစာထဲမှာ ထည့်သွင်းပေးသွားမယ်လို့ ဆိုပါတယ်။

လုပ်ငန်းခွင်ကို ပြန်လည်ဝင်ရောက်ပါက အလုပ်သမားတယောက်ကို ကျပ် ၁ သိန်းနှုန်း အသီးသီးပေးသွားမှာဖြစ်ပြီး စက်တင်ဘာလအတွက် လုပ်ခလစာကို အောက်တိုဘာ ၅ ရက်နေ့မှာ ပေးချေသွားမယ်လို့ အလုပ်ရုံနဲ့ အလုပ်သမားစစ်ဆေးရေး ဦးစီးဌာနထံ တင်ပြလာပါတယ်။

ဒါပေမဲ့ စက်ရုံပိုင်ရှင်ဖြစ်သူဟာ အလုပ်ရုံပိတ်မယ့်အကြောင်းကို အလုပ်သမားတွေနဲ့ ညှိနှိုင်းဖြေရှင်းတာမရှိဘဲ မိမိသဘောနဲ့ ဆောင်ရွက်ခဲ့တာလို့ အလုပ်သမားအရေး လိုက်ပါဆောင်ရွက်နေသူတွေက ဆိုပါတယ်။

အလုပ်သမားအရေး တက်ကြွလှုပ်ရှားသူတယောက်က “အလုပ်သမားတွေနဲ့ ညှိနှိုင်းတာမရှိဘဲ သူ့သဘောနဲ့သူ ပိတ်မယ်ဆိုတာကို အလုပ်သမားရုံးဆီ တင်ခဲ့တာ။ တကယ်ဖြစ်သင့်တာက စက်ရုံကို ၂ လပိတ်မယ်ဆိုရင် ဥပဒေနဲ့အညီလုပ်ပေါ့။ ပိတ်ထားတဲ့ကာလမှာ လုပ်ငန်းရှင်က တာဝန်ယူရမယ်လေ။ ၂ လပြည့်လို့ ပြန်ဖွင့်တဲ့အခါ ၁ သိန်းပေးမယ်ဆိုပြီး လုပ်တာမျိုးက မဟုတ်ဘူးလေ။ ၂ လစာ အပြည့်ပေးရမှာ။ မပေးနိုင်ဘူးဆိုရင် ညှိနှိုင်းမှုလုပ်ရမှာပေါ့။ ဒါမှမဟုတ် တခါတည်း လျော်ကြေးပေးပြီး ပိတ်ပေါ့။ ရှင်းရှင်းပြောရရင် ‌လျော်ကြေး မပေးချင်လို့ ဒီပုံစံမျိုးခင်းတာ။ ‌လျော်ကြေးပေးတယ်ဆိုရင် ဥပဒေနဲ့အညီ ပေးရတော့မှာ။ ဒါကို မပေးချင်ဘူး။ ဒီအလုပ်သမားတွေကလည်း ဒီကာလအတွင်းမှာ လစာမရဘဲနဲ့ တင်းမခံနိုင်ဘူး။ တခြားအလုပ်တွေရှာပြီး လုပ်ကြရမှာလေ။ အဲ့ဒီအခါ သူက စက်ရုံပြန်ဖွင့်တဲ့အချိန် အလုပ်သမားက လူ ၅၀ လောက်ပဲလာမယ်။ ကျန်တဲ့လူတွေက တခြားနေရာမှာ လုပ်နေကြပြီဆိုတော့ မလာနိုင်တော့ဘူး။ အဲ့ပုံစံမျိုး လုပ်နေတာ” လို့ ဒီဗွီဘီကို ပြောပါတယ်။

ဒါကြောင့် အလုပ်သမားတွေကလည်း မိမိတို့ ရသင့်ရထိုက်တဲ့ အခွင့်အရေးတွေကို သိရှိ တောင်းဆိုနိုင်ဖို့အတွက် သမဂ္ဂတွေနဲ့ချိတ်ဆက်ပြီး ဆောင်ရွက်ကြဖို့နဲ့ မျက်စိပွင့်၊ နားပွင့် ရှိကြဖို့ လိုနေပါတယ်။

သမဂ္ဂခေါင်းဆောင်တ‌ယောက်က “အလုပ်သမားတွေအနေနဲ့ အလုပ်ရှင်၊ မန်နေဂျာနဲ့ စူပါ လီဒါတွေပြောတဲ့ စကားကို မယုံကြဖို့လိုတယ်ဗျ။ အဲ့လူတွေက အလုပ်သမားတွေရဲ့ အကျိုးစီးပွားကို ဘယ်တုန်းကမှ ကြည့်ခဲ့တာမဟုတ်ဘူးနော်။ တကယ်လို့ အလုပ်သမားတွေရဲ့ အကျိုးစီးပွားကို ကြည့်တယ်ဆိုရင် သူတို့ ဒီလို ဒုက္ခဘယ်ရောက်ပါ့မလဲ။ ဒါကြောင့် ပြောရရင် အလုပ်သမားတွေရဲ့ အကျိုးစီးပွားကို ကြည့်တဲ့ သမဂ္ဂတွေနဲ့ ပူးပေါင်းဖို့လိုတယ်။ အခုက အဲ့လိုမဟုတ်ဘူး။ ဘယ်လိုဖြစ်နေလဲဆိုရင် အလုပ်သမားတွေဟာ သမဂ္ဂတွေကြောင့် သူတို့ ဒုက္ခရောက်နေရတယ်ဆိုတဲ့ အမြင်တွေ ဖြစ်နေကြတယ်” လို့ ဒီဗွီဘီကို ပြောပါတယ်။

စက်ရုံကို ၂ လ ယာယီရပ်နားဖို့ ခွင့်ပြုချက်တောင်းခံခဲ့တဲ့ မြန်မာနိုင်ငံသားအမည်ပေါက် Yi Cai အထည်ချုပ်လုပ်ငန်းဟာ ၂၀၂၂ ခုနှစ် ဇန်နဝါရီ ၆ ရက်နေ့မှာ လုပ်ငန်းစတင်လည်ပတ်ခဲ့ပြီး လုပ်ငန်းလည်ပတ်စဉ်ကာလမှာ ဝန်ထမ်း ၂၇၁ ယောက်သာ ရှိပါတယ်။ လက်ရှိမှာတော့ ဝန်ထမ်းအင်အား ၃၃၆ ယောက်အထိ ရှိလာပြီး ရွှေပြည်သာမြို့နယ် စက်မှုဇုန်-၁ မှာ စက်ရုံထောင်ပြီး လည်ပတ်နေတာ ဖြစ်ပါတယ်။