မကွေးတိုင်း ပေါက်မြို့နယ်မှာ ဇူလိုင် ၂၁ ရက်နေ့မနက်ပိုင်းက စစ်ကောင်စီရဲ့ လက်ပါးစေ ရဲတွေ၊ ပျုစောထီးတွေနဲ့ ဒေသကာကွယ်ရေးတပ်ဖွဲ့တွေ တိုက်ပွဲဖြစ်ပွားပြီး ရဲနဲ့ပျူစောထီး ၁၀ ယောက်လောက် သေဆုံးခဲ့တယ်လို့ ပေါက်မြို့နယ် လူငယ်တော်လှန်ရေးတပ်ဦး YRF က ပြောပါတယ်။
ပေါက်မြို့နယ် ပင်တောင်၊ ကိုင်းလယ်၊ သစ်ချိုကုန်းနဲ့ တပ်ကုန်းဘက်ကနေ ဆိုင်ကယ်နဲ့ ထွက်လာတဲ့ ရဲ(...) နဲ့ ပျူ(...) အင်အား ၁၀၀ ကျော်လောက်ကို YRF နဲ့ ပေါက်တောင်ပိုင်း ပြောက်ကျားတပ်ဖွဲ့တို့က ဇူလိုင် ၂၁ ရက်နေ့ မနက် ၁ နာရီလောက်က မြေခြားရွာနားမှာ မိုင်းဆွဲတိုက်ခိုက်ပြီး ထိတွေ့တိုက်ပွဲဖြစ်ခဲ့တာလို့ YRF ခေါင်းဆောင် ဗိုလ်နားပေါက်က ဒီဗွီဘီကို ပြောပါတယ်။
“ရဲနဲ့ပျူ (...)တွေဘက်ကတော့ ၁၀ ယောက်လောက်သေဆုံးပြီး ကျနော်တို့ဘက်ကတော့ ထိခိုက်သေဆုံးသူ မရှိဘူး။”
စစ်ကောင်စီတပ်တွေဟာ ပေါက်မြို့နယ်ထဲကို အင်အားအလုံးရင်းနဲ့ စစ်ကြောင်းထိုးပြီး ဇူလိုင် ၁၅ ရက်နေ့က ကျောက်အိုးရွာလုံးကျွတ်နဲ့ ရွားနားက စစ်ဘေးရှောင်တဲတွေ မီးရှို့ဖျက်ဆီးခံခဲ့ရတယ်လို့ ဆိုပါတယ်။
နှစ်ဖက်တိုက်ပွဲအတွင်းမှာ တပ်ဖွဲ့ဝင်တွေ ထိခိုက်သေဆုံးတဲ့ အခြေနေကိုတော့ စစ်ကောင်စီက သတင်းထုတ်ပြန်ထားတာ မတွေ့ရသေးပါဘူး။
မကွေးတိုင်း၊ ပေါက်မြို့နယ်မှာ မေ ၄ ရက် နေ့လယ်ပိုင်းက ဒေသကာကွယ်ရေး မဟာမိတ်တပ်တွေနဲ့ စစ်ကောင်စီတပ်တွေ တိုက်ပွဲဖြစ်ပွားပြီး စစ်ကောင်စီဘက်က အယောက် ၃၀ လောက် သေဆုံးကာ အများအပြားဒဏ်ရာရရှိခဲ့တယ်လို့ လူငယ်တော်လှန်ရေးတပ်ဦး YRF ကနေ သိရပါတယ်။
ပေါက်မြို့နယ် ပုသိမ်-မုံရွာ ကားလမ်းနဲ့ ချက်ကန်ကျေးရွာနားမှာ မေလ ၄ ရက်နေ့ နေ့လယ်ပိုင်းမှာ YRF တပ်ဖွဲ့၊ ပေါက်တောင်ပိုင်း ပြည်သူ့ကာကွယ်ရေးတပ် SPPDF(လယ်ယာ) မဟာမိတ်ပူးပေါင်းတပ်ဖွဲ့တွေနဲ့ စစ်ကောင်စီတပ်တွေတိုက်ပွဲ အပြင်းအထန်ဖြစ်တာလို့ YRF ခေါင်းဆောင် ဗိုလ်နားပေါက်က ပြောပါတယ်။
“ကျနော်တို့ စခန်းချထားတဲ့ ချက်ကန်ရွာနားကို ဒီကနေ့ မေလ ၄ ရက် နေ့လယ် ၁၂ နာရီလောက်မှာ စစ်ကောင်စီတပ်တွေနဲ့ ပျူစောထီးအင်အား ၁၀၀ လောက် ထိုးစစ်ဆင်လာတာဗျ။ ကျနော်တို့တပ်ဖွဲ့ က အဲဒီရွာနားမှာ မိုင်းအလုံး ၂၀၀ လောက်မြှုပ်ထားတာ။ အပြင်းစားမိုင်း ၁၀ လုံးလောက်ပေါက်ကွဲ ပြီး စစ်ကောင်စီတပ်သား ၃၀ လောက် သေဆုံးကာ အများကြီးဒဏ်ရာရသွားတယ်။ အဲဒီနောက် ပထမဦးဆုံး ကျနော်တို့ရဲ့ကင်းစခန်းတွေကို မီးရှို့ပြီး ချက်ကန်ရွာကိုပါ မီးရှို့ ဖျက်ဆီးကြတယ်။ ကျနော်တို့တပ်ဖွဲ့တွေက စစ်(-) တွေ အလောင်းကော လက်နက်ပါရအောင် တိုက်မယ်လို့ ဆုံးဖြတ်ပြီး တိုက်ခဲ့တာဗျ။”
တိုက်ပွဲက ၁ နာရီကျော်လောက်ကြာအောင် အပြင်းအထန်ဖြစ်ပွားခဲ့ပြီး လူငယ်တော်လှန်ရေးတပ်ဦး YRF ဘက်က ရဲဘော်တယောက် ဒဏ်ရာရရှိခဲ့ကာ ဒဏ်ရာအခြေအနေကတော့ မစိုးရိမ်ရဘူးလို့ ပြောပါတယ်။
တိုက်ပွဲမှာအတွင်းမှာ စစ်ကောင်စီဘက်က ၃၀ လောက်သေဆုံးပြီး အများအပြား ဒဏ်ရာရရှိခဲ့တယ်လို့ YRF ခေါင်းဆောင်က ပြောဆိုထားပေမဲ့ ဒီဗွီဘီက သီးခြားအတည်မပြုနိုင်သေးပါဘူး။
ချက်ကန်ကျေးရွာကို ဒီကနေ့မနက်ပိုင်းမှာ စစ်ကောင်စီတပ်တွေ စစ်ကြောင်းထိုးလာလို့ ရွာလုံးကျွတ် ဘေးလွတ်ရာနေရာတွေကို ထွက်ပြေးတိမ်းရှောင်နေကြရတယ်ဗျ။ နေ့လယ် ၁၂ နာရီလောက်ကျတော့ ပေါက်ကွဲသံတွေ ပစ်ခတ်သံတွေကြားရပြီး ရွာဘက်က မီးခိုးလုံးတွေ မီးတောက်တွေ တက်လာတာတွေ့ရတယ်။ စစ်ကောင်စီတပ်တွေ ရွာထဲဝင်မွှေနေတာဆိုတော့ ကျနော်တို့လည်း ရွာပြန်ပြီး မီးမငြှိမ်းရဲဘူး။ အဝေးကနေပဲ ကြည့်နေကြရတာ။ ကျနော်တို့ရွာမှာ အိမ်ခြေ ၄၀၀ လောက်ရှိပြီး အိမ်ခြေဘယ်လောက်မီးလောင်သွားပြီလည်းဆိုတာကို အတည်မပြုနိုင်သေးဘူးလို့ ချက်ကန်ရွာ ဒေသခံတစ်ယောက်က ပြောပါတယ်။
ပေါက်မြို့နယ် ဒီးဒုတ်ကွင်းရွာမှာ တပ်စွဲထားတဲ့ စစ်ကောင်စီတပ်သားတွေနဲ့ ပျူစောထီးတွေကို လည်း မေလ ၃ ရက် မနက် ၂ နာရီလောက်က YRFနဲ့ ဒေသကာကွယ်ရေး မဟာမိတ်တပ်တွေ ပူးပေါင်းပြီး စီးနင်းတိုက်ခိုက်ခဲ့ရာ စစ်ကောင်စီဘက်က တစ်ယောက်သေဆုံးပြီး တစ်ယောက် ဒဏ်ရာရရှိခဲ့တယ်လို့ သိရပါတယ်။
စစ်ကောင်စီဘက်ကတော့ အဆိုပါတိုက်ပွဲတွေနဲ့ ထိခိုက်သေဆုံးတာနဲ့ပတ်သက်လို့ သတင်းထုတ်ပြန်တာ မတွေ့ရသေးသလို စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ စစ်တပ်အနေနဲ့ ကျေးရွာတွေကို မီးရှို့တာမရှိဘဲ PDF ကသာ မီးရှို့တာဖြစ်တယ်လို့ ပြီးခဲ့တဲ့ သတင်းစာရှင်းလင်းပွဲမှာ ပြောပါတယ်။
