ဟာနာဆန်/People’s Spring
မကွေးတိုင်း၊ ပခုက္ကူမြို့ရှိ မြန်မာ့စီးပွားရေးဘဏ် လုံခြုံရေး စစ်ကောင်စီတပ်သားတစ်ဦး ပစ်ခတ်ခံရ၍ သေဆုံးကြောင်း သတင်းရရှိသည်။
ယနေ့ (ဩဂုတ် ၃၀ရက်) နံနက် ၁၁နာရီခွဲခန့်ကသေနတ်ဖြင့် ၃ချက် အနီးကပ်ပစ်ခတ်ခဲ့ရာ သေဆုံးသွားကြောင်း မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)က ပြောသည်။
Public Service Announcement
“လေးယောက်လောက်ရှိတာကို တစ်ယောက်ကကျွံပြီးတော့ ထွက်နေတော့ အလစ်အငိုက်လုပ် လိုက်တာ။ မြို့ပေါ်ဆိုတော့ မြန်မြန်လုပ်ပြီး ပြန် ဆုတ်ခဲ့တယ်။”ဟု မြိုင်ပကဖ တာဝန်ရှိသူက ပြောသည်။
သေဆုံးစစ်သားမှာ စလင်းမြို့နယ်အခြေစိုက် အမှတ်(၂၅၃)ခြေလျင်တပ်ရင်းမှဖြစ်ပြီး ၎င်း၏ MA 3အမျိုးအစား သေနတ်တစ်လက်နှင့် ကျည်များသိမ်းဆည်းခဲ့ကြောင်း မြိုင်ပကဖတာဝန်ရှိသူက ပြောသည်။
အဆိုပါ စစ်ဆင်ရေးအတွင်း ဆိုင်ကယ်တစ်စီးဆုံးရှုံးခဲ့သော်လည်း ရဲဘော်များ ထိခိုက်မှုမရှိကြောင်း သိရသည်။
ပစ်ခတ်မှုအား မြိုင်ပကဖ တပ်ရင်း-၃ တပ်ခွဲ(၄) နှင့် DLPတို့ ပူးပေါင်းတိုက်ခိုက်ခဲ့ခြင်းဖြစ်ပြီး အခင်းဖြစ်ရာ မြန်မာ့စီးပွားဘဏ်သည် ပခုက္ကူမြို့ရဲစခန်းနှင့် မီတာ ၁၀၀ခန့်သာ ဝေးကြောင်း၊ တိုက်ခိုက်ခံရပြီးနောက် ပခုက္ကူမြို့လမ်းများအား စစ်ကောင်စီတပ်က ပိတ်ဆို့စစ်ဆေးပြီး အများပြည်သူများအား ဖမ်းဆီးခြင်းများပြုလုပ်နေကြောင်း သတင်းရရှိသည်။
အလားတူ ယနေ့ နံနက် ၇နာရီခွဲခန့်ကလည်းမြိုင်မြို့တွင်းမှ စျေးဝယ်ပြန်လာသော စစ်ကောင်စီတပ်သားများအား အနီးကပ်ပစ်ခတ်တိုက်ခိုက်ရာ ပျူစောထီးဝင်းလှိုင်ဆိုသူ သေဆုံးပြီး တစ်ဦး ခြေထောက်ထိမှန်ဒဏ်ရာရရှိခဲ့ကြောင်း မြိုင် ပကဖက ထုတ်ပြန်ထားသည်။
