မြန်မာနိုင်ငံရဲ့ လက်ရှိနိုင်ငံရေးအကျပ်အတည်းကို ဖြေရှင်းနိုင်ဖို့ မြန်မာနိုင်ငံကို အထူးကိုယ်စားလှယ် တယောက် စေလွှတ်မယ့် အာဆီယံရဲ့ ဆုံးဖြတ်ချက်ကို ထောက်ခံကြောင်း ဂျပန်နိုင်ငံခြားရေး၀န်ကြီး Motegi Toshimitsu က ထုတ်ဖော်ပြောကြားခဲ့ပါတယ်။ 

ဂျပန်နိုင်ငံခြားရေး၀န်ကြီးဌာနရဲ့ အဆိုအရ ဇွန်လ ၂၈ ရက်က အင်ဒိုနီးရှားဝန်ကြီးချုပ် Retno Marsudi နဲ့ တွေ့ဆုံခဲ့တဲ့ အစည်းအဝေးတခုမှာ Motegi က ဂျပန်ဟာ မြန်မာစစ်ကောင်စီနဲ့ တွေ့ဆုံဆွေးနွေးဖို့ ကြိုးစားနေတယ်လို့ ပြောကြားခဲ့ပါတယ်။ 

ဒါ့အပြင် သူတို့ဟာ မြန်မာနိုင်ငံအရေးကိစ္စမှာ အနီးကပ် ပူးပေါင်းဆောင်ရွက်သွားဖို့လည်း သဘောတူခဲ့ကြပါတယ်။ 

ဇွန်လ ၂၉ ရက်မှာ အဓိက စီးပွားရေးနိုင်ငံပေါင်း ၂၀ အဖွဲ့ရဲ့ နိုင်ငံခြားရေး၀န်ကြီးများ ဆွေးနွေးပွဲတွေမှာ ဝန်ကြီး ၂ ယောက် တွေ့ဆုံဆွေးနွေးခဲ့တာပါ။ 

မြန်မာပြည်မှာ ဖေဖော်ဝါရီ ၁ ရက်က ဒေါ်အောင်ဆန်းစုကြည် ဦးဆောင်တဲ့ အရပ်သားအစိုးရကို ဖြုတ်ချပြီးကတည်းက ဆန္ဒပြသူတွေနဲ့ စစ်တပ်အကြား ဖြစ်ပွားခဲ့တဲ့ ပဋိပက္ခတွေမှာ လူပေါင်း ၈၀၀ ကျော် သေဆုံးထားပါတယ်။ 

ဧပြီလကုန်ပိုင်းမှာ အရှေ့တောင်အာရှနိုင်ငံများအသင်း (အာဆီယံ) အဖွဲ့ဝင်နိုင်ငံတွေက ခေါင်းဆောင်တွေဟာ မြန်မာနိုင်ငံရဲ့ ပဋိပက္ခနဲ့ပတ်သက်ပြီး အထူးအစည်းအဝေးကို ကျင်းပခဲ့ပြီး အကြမ်းဖက်မှုတွေကို ချက်ချင်းရပ်တန့်ဖို့နဲ့ သက်ဆိုင်ရာပါတီ အားလုံးနဲ့ တွေ့ဆုံဖို့အတွက် အာဆီယံအထူးသံတမန်ကိုစေလွှတ်ဖို့ လိုအပ်ချက်အပါအဝင် "အချက်ငါးချက် သဘောတူညီမှု" ရရှိထားပါတယ်။