ကျူးဘားနိုင်ငံမှာ အဖမ်းခံထားရတဲ့ စပိန်အခြေစိုက် အေဘီစီသတင်းစာရဲ့ သတင်းထောက်ကို ချက်ချင်း ပြန်လွှတ်ပေးဖို့ စပိန်အစိုးရက တောင်းဆိုလိုက်ပါတယ်။

စပိန်နိုင်ငံက ABC သတင်းစာအတွက် ကျူးဘားနိုင်ငံကနေ သတင်းပို့နေတဲ့ သတင်းထောက် ကာမီလာ အာကော့စ်တာကို ဖမ်းဆီးထားတဲ့ကိစ္စနဲ့ ပတ်သက်ပြီး အရေးယူဖို့ စပိန်အစိုးရက ဆောင်ရွက် နေတယ်လို့ စပိန်အစိုးရ ပြောခွင့်ရက ဇူလိုင် ၁၃ ရက်မှာ ပြောပါတယ်။ 

ဆယ်စုနှစ် အတော်များများအတွင်း အကြီးဆုံး အစိုးရ ဆန့်ကျင်ရေး ဆန္ဒပြပွဲတွေ ကျူးဘားမှာ သီတင်းပတ်ကုန်ရက်က ဖြစ်ပွားခဲ့တာပါ။ လမ်းပေါ်လူထောင်ချီ တက်လာတဲ့ လူထု ဆန္ဒပြပွဲတွေ အပြီး ဇူလိုင် ၁၂ ရက်မှာ ကျူးဘားအစိုးရက တက်ကြွလှုပ်ရှားသူတွေကို ဖမ်းဆီးခဲ့ပါတယ်။

သူ့ကိုယ်သူအလွတ်တန်း ကျူးဘား သတင်းထောက်လို့ တွစ်တာပေါ်မှာ ဖော်ပြထားတဲ့ အကော့စ်တာဟာ အေဘီစီ သတင်းဌာန အတွက် သတင်းရေးသား ပေးပို့ နေခဲ့ပြီး ကျူးဘားနိုင်ငံအတွင်း မတည်မငြိမ် ဖြစ်နေတဲ့ သတင်းဓာတ်ပုံတွေကို လူမှုကွန်ယက် မီဒီယာပေါ် တင်ခဲ့ပါတယ်။

ဇူလိုင် ၁၁ ရက်တည်းက ခုထိ ကျူးဘားနိုင်ငံတဝန်း ဆန္ဒပြသူတွေ၊ တက်ကြွလှုပ်ရှားသူတွေနဲ့ အလွတ်တန်း သတင်းထောက်တွေ အယောက်  ၁၀၀ နီးပါး အဖမ်းခံထားရတယ်လို့ ပြည်ပြေး လူ့အခွင့်အရေးအုပ်စု ကျးဘားလက်စ်က ပြောပါတယ်။

အကော့စ်တာကို ချက်ချင်းလွှတ်ပေးဖို့ စပိန်နိုင်ငံခြားရေး ဝန်ကြီး ဟိုဆေးမန်နျူယယ် အယ်ဘာရက်စ်က ကျူးဘားအစိုးရကို တွစ်တာ လူမှုကွန်ယက်ပေါ်ကနေ ဆော်သြခဲ့ပါတယ်။

ကျူးဘား အစိုးရဟာ အကော့စ်တာကို နိုင်ငံလုံခြုံရေး အပေါ် ကျူးလွန်တဲ့ ရာဇဝတ်မှုနဲ့ စွဲချက်တင်ဖို့ စီစဉ်နေတယ်လို့ စပိန်နေ့စဉ်ထုတ် သတင်းစာ အေဘီစီက ပြောပါတယ်။ အကော့စ်တာ ပြန်လွတ်တာ သေချာစေရေး ကျူးဘားအစိုးရအပေါ် သံတမန်ရေးဖိအားပေးဖို့ကိုလည်း စပိန်အစိုးရကို ဆော်သြခဲ့ပါတယ်။