နယ်သာလန်နိုင်ငံက သုတေသနပညာရှင်တွေဟာ ကာကွယ်ဆေးထိုးရာမှာ ကန့်သတ်ချက်တွေ လျှော့ချဖို့နဲ့ အကြောက်တရား ပြေလျှော့စေဖို့ ဆေးထိုးအပ်မလိုတဲ့ မနာကျင်စေတဲ့ ဆေးထိုးနည်း အတွက် လေဆာ နည်းပညာကို တီထွင်နေပါတယ်။

လေဆာရောင်ခြည်ကို အရေပြားရဲ့အပြင်လွှာကို ထိုးဖောက်ပြီး သေးငယ်တဲ့ အရည်စက်တွေကို ထိုးသွင်းတဲ့နည်းကို သုံးတာလို့ ဒီနည်းပညာကို တီထွင်သူ တွမ်တီတက္ကသိုလ် ပါမောက္ခနဲ့ မန်ဆာချူးဆက် နည်းပညာတက္ကသိုလ် သုတေသီ ဒေးဗစ် ဖာနန်ဒဲ့ဇ် ရီဗက်စ်က ပြောပါတယ်။

ဒီဆေးထိုးနည်းဟာ ခြင်ကိုက်တာထက် မြန်ပြီး အရေပြားပေါ်က အာရုံကြော အဖျားတွေကို မထိမိတဲ့အတွက် နာကျင်မှုကို မခံစားရဘူးလို့လည်းပြောပါတယ်။

သုတေသီ ဒေးဗစ် ဖာနန်ဒဲ့ဇ် ရီဗက်စ်က “စက္ကန့်ပိုင်းအတွင်း ဆေးရည်ထည့်ထားတဲ့ ဖန်ပုလင်းကို လေဆာနဲ့ အပူပေးလို့ ပူဖောင်းတခု အရည်ထဲမှာ ဖန်တီးလိုက်တယ်။ ပြီးရင် အရည်ကို တနာရီ ကီလိုတရာ အမြန်နှုံးနဲ့ တွန်းကန် ထုတ်လိုက်တဲ့အခါ ဆေးရည်က အရေပြားထဲကို ထိုးဖောက် ဝင်သွားတယ်”လို့ ဓာတ်ခွဲခန်းအတွင်း လူတွေ့မေးမြန်းခန်းမှာ ပြောပါတယ်။

ဒီတီထွင်မှုဟာ လူတွေ ပိုများများ ကာကွယ်ဆေး ထိုးလာအောင် ကူညီရုံသာမက အပ်တွေက တဆင့် အဆိပ်သင့် ညစ်ညမ်းမယ့် ဘေးတွေနဲ့ ဆေးဘက်ဆိုင်ရာ အမှိုက်တွေကို လျှော့ချပေးလိမ့်မယ်လို့ သူက မျှော်လင့် ထားပါတယ်။

ဒါပေမဲ့ သုတေသနနဲ့ စည်းမျဉ်းကိစ္စရပ်တွေ တိုးတက်မှုအပေါ် မူတည်ပြီး ဒီနည်းပညာကို သာမန် ပြည်သူတွေ သုံးနိုင်ဖို့ အချိန် တနှစ်ကနေ ၃နှစ်အထိ ယူရနိုင်တယ်လို့ ရိုက်တာ သတင်းဌာနမှာ ရေးသားဖော်ပြပါတယ်။