ခင်ဦးမြို့နယ်က ရွှေကူတဲစုရွာသား တစ်ဦးကို စစ်တပ်က ဖမ်းဆီးသတ်ဖြတ်
စစ်ကိုင်းတိုင်း၊ ခင်ဦးမြို့နယ်၊ ရွှေကူတဲစုရွာက နေအိမ်မှာ အိပ်နေတဲ့ ဒေသခံ တစ်ဦးကို အောက်တိုဘာ ၁၆ ရက် မနက် ၄ နာရီလောက် ပျဉ်ထောင်ရွာကို စစ်တပ်က ဆိုင်ကယ် ၅ စီးနဲ့ လာရောက်ဖမ်းဆီးခေါ်ဆောင်သွားပြီး တနေကုန် ရိုက်နှက်စစ်ဆေးကာ ည ၁၀ နာရီလောက်က ပျဉ်ထောင်ရွာတံတားထိပ်ကို ဆွဲထုတ်ပစ်သတ်ခဲ့တယ်လို့ ဒေသခံတွေဆီက သိရပါတယ်။
“ခင်ဦးက မြတ်သီရိ လူမှုကူညီရေးကားကို အကူအညီတောင်းပြီး အလောင်းသွားကောက်တယ်။ ပါးစပ်က ပွင့်ထွက်နေတယ်။ နောက်ကျောနဲ့ရင်ဘတ်တွေမှာလည်း အညိုအမည်းတွေ တွေ့ရတယ်။ မျက်နှာကတော့ဗျာ ဘာမှမပီသတော့ဘူး။ ရွာကလည်း တိမ်းရှောင်နေကြတာဆိုတော့ ရွာမှာ သင်္ဂြိုဟ်ဖို့ အဆင်မပြေလို့ လူမှုကူညီရေးအဖွဲ့ကို ဘုန်းကြီးတပါးစာ ဝတ္ထုငွေလေးလှူလိုက်ပြီး သင်္ဂြိုဟ်ခိုင်းလိုက်ရတယ်” လို့ ဆွေမျိုးတော်စပ်သူတစ်ဦးက ပြောပါတယ်။
စစ်ကောင်စီတပ်က မတရားဖမ်းဆီးညှဉ်းပန်းနှိပ်စက် သတ်ဖြတ်ခံရသူဟာ အသက် ၃၉ နှစ်အရွယ် ကိုမျိုးဆွေလို့ သိရပြီး ရွှေကူတဲစုကျေးရွာမှာ သမားရိုးကျ တောင်သူလုပ်ငန်း လုပ်ကိုင်စား သောက်နေသူဖြစ်သလို အဖွဲ့အစည်းတွေနဲ့ ဆက်စပ်မှုမရှိတဲ့အတွက် ရွာကနေ ထွက်ပြေး တိမ်းရှောင်ခြင်း မပြုဘဲ နေထိုင်နေတာ ဖြစ်ပါတယ်။
ခင်ဦးမြို့နယ် ပျဉ်ထောင်ရွာမှာ အောက်တိုဘာ ၁ ရက် နေ့ကစပြီး တပ်စွဲထားတာဖြစ်လို့ တချို့ ကျေးရွာသားတွေဟာ အခုချိန်အထိ နေအိမ်ကို ပြန်နိုင်ခြင်းမရှိသေးသလို မတရားဖမ်းဆီး ညှဉ်းပန်းနှိပ်စက် သတ်ဖြတ်မှာလည်း စိုးရိမ်နေကြပါတယ်။
